Ɛ́séɖɔ̀ 23

Gma ɓě ɓá dyí-sɛ́ɖɛ́ìn-ɖɛ̀ nyu jè kè wìì ɓéɖé jè dyíɛ

1“Ɓě ɖò ní ɖá ɓɛ́ ɓě ké ɓě mǔè ɖò se wĩin tɔ́mɔ́ìn. Ɓě ɖò ní ɖá ɓɛ́ ɓě ké ɖɛ-gbà-nyu-nyɔ̀ ɖò gbo zi dyììn ɖé ɔ bìì seɛ̀-zàse nyu-nyu mú. 2Ɓě ɖò ní ɖá ɓɛ́ ɓě ké vòò-nyɔ̀ hwìɛ̀ kpá, ɓɛ́ ɓě ké ɖɛ gbà nyu. Ɔ jǔ ké ɓě ɖò dyi ɖɛ ɖòɛ̀ zàse jǔ, ké ɓě dyi ɖɛ kɔ̃in zaǐn mu ɖé tɔ̀ɔ̀-ɓìɔ̀ ɓěɔ̀ dyúa ní, ɓě ní ɖá ɓɛ́ ɓě ké ɖɛ mɔ̀ dyí-sɛ́ɖɛ́ìn-ɖɛ̀ kɛɛ hwìǐ zàìn dyììn ɖé vòò-nyɔ̀ ɓěɔ̀ gbo-zi-zi mú. 3Ɓě ɖò ní ɖá ɓɛ́ ɓě ké gǎ-dyé-nyɔ̀ ɖò hwòɖǒǔn gbo zĩ̀ìn ɓó ɔ gǎ-dyé-nyɔ̀ jǔ jè ɖé zaa-wɔ̃-po-po mú.

4“Ɔ jǔ ké nyɔ ɖò dyi ɔ mú-nyɛ́-nyɔ̀ ɖòɛ̀ ɓìɖǐ mɔɔ ɔ jǎkasì ɓɛ́ ɔ sè xwáɖáún wɛ̃ɛ dyé ní, ɔ mɛ kpɔ̃ɔ, ɓɛ́ ɔ kéɛ ɔ gbo ɖe kpa. 5Nyɔ ɖò dyiɛ dyé ké ɔ mú-nyɛ́-nyɔ̀ ɖòɛ̀ jǎkasì dyi gbɛ̌ vɛ̀nɛ̀ ɖò ɓéɖé, ké gbɛ̌ɔ̀ dyi ɔ ma, ké ɔ dyi ɓó ɓíɖíi dyi jìɖǐ, ké ɔ se dyí sɔ̀ɔ̀ ɓɛ́ìn ní, ɔ mɛ ɓɔ́ɔ ɓóɛ sèɛ̀, ɓɛ́ ɔ kéɛ dyíin zi, kɛɛ ɔ mɛ kpáa gbo, ɓɛ́ ɔ kéɛ dyí sɔ̀ìn.

6“Ɔ jǔ ké gǎ-dyé-nyɔ̀ ɖò ɓíɖí dyi dyí ɓɛ̀ɖɛ̀ìn ɖé zaa ɖò mú ní, ɓě ní ɖá ɓɛ́ ɓě ké ɔ gɔ̃̌ xwa zà ɓó ɔ gǎ-dyé-nyɔ̀ jǔ jè. 7Ɓě ní ɖá ɓɛ́ ɓě ké nyɔ ɖò ɖɛ ɔ se nyuɛɛ dúún po, ké ɓě ní ɖá ɓɛ́ ɓě ké nyɔ ɓɛ́ ɔ se ɖɛ gbà ɖò nyuɛ mɔɔ jǎà-nyɔ̀ ɖò ɖáɓá, sepóɛɖé nyɔ ɓɛ́ ɔ mu ɖɛ nì kàà nyuùn wɛ̃ɛ, ḿ se ɔ ɖɛ gbàɔ̀ dyéɖé kɔ̃in wã̀ǐn mu. 8Ɓě ɖò ní ɖá ɓɛ́ ɓě ké nyɔ-gbo-pa-wìɖì dyi kpɔ̃, sepóɛɖé nyɔ-gbo-pa-wìɖì kpèìn nyɔǔn dyéɖéín dyi, ké ɔ cɛ́ɛ̀ zaa-wɔ̃-po-po sɛ́ɖɛ́ìn dyíɛɛ xwa.

9“Ɓě ɖò ní ɖá ɓɛ́ ɓě ké ɖíà ɖò dyi pĩ́à. Ɓě mìɔùn dyuòɛ̀ kà nyɔ dyi ɖíà jǔǐn, kà ɔ nyu nìɛ̀ kɛ, sepóɛɖé ɓě mìɔùn mɔ̀ ma ɖíà ɖé Íjè-ɓòɖòɔ̀ kɔ̃.

Gma ɓě ɓá wé mɛ̀nɛ̌ìn-sɔ̃́ nììnɔ̀ kè zɔ̃ mɛ̀nɛ̌ìn-sɔ̃́ nììnɔ̀ jè dyíɛ

10“Ɓě ɓɛ́ìn geɖe nyuɛ ɓó zɔ̃ mɛ̀nɛ̌ìn-ɖò xwíníín, ɓɛ́ ɓě ké ɖii-ɖɛ̀ ɓě sɔ̀ geɖe ɓěɔ̀ gboɛɛ dyí poìn. 11Kɛɛ ɓó zɔ̃ mɛ̀nɛ̌ìn-sɔ̃́ nììnɔ̀ xwíníín nyɛɛ, ɓě mɛ ɓɔ́ ɓěɛ̀ geɖe ɓěɔ̀ gbo ɖɛ ɖò ɓáa. Ɓě mɛ táà ɓóɖóɔ̀ dyi, ɓɛ́ ɔ ké fɔ̀,#23:11 Éézùɖùɛ̀-nyɔ̀ ɓěɔ̀ mɔ̀ùn ɓá ma geɖe dyúáɖòɔ̀ gbo ɖɛ zɔ̃ kè zɔ̃ xwíníín. ɓɛ́ gǎ-dyé-nyɔ̀ ɓě nì ɖé ɓě hwìɛ̀ kɛɛ mɔ̀ùn kéɛ ɖii-ɖɛ̀ kɔ̃ dyé, ɓɛ́ xwáɖá-xwíɖíi-nìmìì ɓěɔ̀ mɔ̀ùn ké ɖɛ gǎ-dyé-nyɔ̀ ɓěɔ̀ mu ɖé sèìn nyɛɛ ɖi. Ɓě mɛ nyu ɖɛ dyúáɖòɔ̀ ɓá ɓěɛ̀ géɖéè-gbǎ ɓěɔ̀ kè ɓěɛ̀ ɔ́ɖè-gbǎ ɓěɔ̀ jè dyí ɖekè.

12“Ɓě mɛ nyu ɓěɛ̀ kũ̀à ɓěɔ̀ ɓó wé mɛ̀nɛ̌ìn-ɖò xwíníín, kɛɛ ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖaa, ɓě ɖò mɛ ɓɔ́ kũ̀à ɖò nyuɛ, nìí, ɓɛ́ ɓě kè ɓěɛ̀ gǐì ɓě kè ɓěɛ̀ ɓìɖǐ ɓě kè ɓěɛ̀ jǎkasì ɓě ɔ kè ɖíà ɓě cĩ́ ɖé ɓě hwìɛ̀ kɛɛ ké fɔ̀.

13“Ɓě mɛ tò ɖɛ séín ɓɛ́ ḿ cɛ̃à ɓě gboɛɛ gbo ɖùǔ nɔ̀mɔ̀ dyíin, ɓɛ́ ɓě kéɛ nyu. Ɓě ɖò ní ɖá ɓɛ́ ɓě ké gèɖèpɔ́ɔ̀ kà kò ɖò nyɛ́nɛ́ mú ɖɛ zɔ̀ìn, hwɛ̀ ḿ po níiń, ɓɛ́ gèɖèpɔ́ɔ̀ kà kò ɖòɛ̀ nyɛ́nɛ́ ké ɓě wĩín dyììn.

Gma ɓě ɓá hwɔ vɛ̀nɛ̀ tã ɓěɔ̀ jè dyíɛ

(Ɛ́séɖɔ̀ 34:18-26; Dìtɔ̀wáɖánámɛ̀ 16:1-17)

14“Ɓě mɛ nyu hwɔ pàìn kpa tã ɓó ḿ bìì ɓó zɔ̃ xwíníín. 15Hwɔɔ̀ kĩ́ín-kĩ́ínɔ̀ mɛ mɔ̀ Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀. Ɓó tia ɓaɖaa, ɓě mɛ ɖi bɛɖɛɛ̀ ɓɛ́ ɓě se dyáìn-ɖɛ̀ nyùìn nyɛɛ ɓó wé mɛ̀nɛ̌ìn-sɔ̃́ xwíníín kà ḿ nyuɛ ma kà ɓě gbo cɛ̃ɛ kɛ. Ɓě mɛ nyu ɖɛ nìà kɛ ɖé ti ɓɛ́ ḿ ɖǎa dyi dèɛɛ mú ɖé dɛ̀nɛ̀ mɔ̀à Áɓì kɛɛ xwíníín, sepóɛɖé ɔ mɔ̀ dɛ̀nɛ̀ kɔ̃̀ xwíníín ɓě sɔ̀ ma kà ɖé Íjè-ɓòɖòɔ̀ kɔ̃ɛ̀. Ɓě ɖò ní ɖá ɓɛ́ ɓě ké xwa fɔ̀nɔ̀, ɓɛ́ ɓě ké ḿ ɓièɛ̌n dyi.

16“Ké hwɔɔ̀ sɔ̃́ nììnɔ̀ mɛ mɔ̀ Geɖe-Kɔ́-Ɓàɖà-hwɔ̀ɔ̀. Ɓó tia ɓaɖaa, ɓě mɛ dyà ɖii-ɖɛ̀ kĩ́ín-kĩ́ín sɔ̀ ɖé ɓěɛ̀ geɖe ɓěɔ̀ gboɛ, ɓɛ́ ɓě kéɛ hwɔɔ̀ pàìn.

“Hwɔɔ̀ tã nììnɔ̀ mɛ mɔ̀ Ɓáá-Ɖɛ̀-Geɖeín-Hwɛ̀-hwɔ̀ɔ̀.#23:16 Ɓáá-Ɖɛ̀-Geɖeín-Hwɛ̀-hwɔ̀ɔ̀ kè Ɓeè-Dyù-hwɔ̀ɔ̀ mɔ̀ ɖɛ dyúáɖò. Ɓě mɛ pa hwɔ nìà kɛ ti ɓɛ́ ɓě ɖǎ ɓěɛ̀ ɖii-ɖɛ̀ séín ɓěɔ̀ hwɔɖɔún hwùɖǔɛ̀n hwɔɛ. 17Ɓó zɔ̃ séín xwíníín nyɛɛ, ɓěɛ̀ gàa séín ɓěɔ̀ mɛ dyi ɓó mɔ̄ mɔ̀à Bounɓo Ɖɛɓíɔ́ kɛɛ dyúa, ɓɛ́ wa ké ḿ ɓiè. Wa mɛ nyùìn ɖɛ nìà kɛ kpa dyúáɖò ɓó hwɔ tã ɓěɔ̀ ɖò-ɖò ɓaɖa.

18“Ɔ jǔ ké ɓě ɖò dyi nyúà-ɖɛ̀ ɖò sáa zàìn ní, bɛɖɛɛ̀ nì dyáìn-ɖɛ̀ gboɛɛ mɛ ɓɔ́ sáa-zàìn-sùàɖɛ̀ɔ̀ hwìɛ̀ nìɛ̀. Sáa-zàìn-ɖɛ̀ ɓɛ́ ɓě ɖáɓá ɓó ní hwɔ ɓěɔ̀ ɖò jèɛɛ cáná ɖò mɛ ɓɔ́ goòɛ̀.

19“Ɖii-ɖɛ̀ kĩ́ín-kĩ́ín sɔ̀ ɖé ɓěɛ̀ geɖe ɓěɔ̀ gboɛɛ nyɔ nɔ̀mɔ̀ dyíin nyɛɛ mɔ̀ ɖɛ ɓě mɛ kpa ɖé mɔ̄ Bounɓo mɔ̀à ɓěɛ̀ Gèɖèpɔ́ɔ̀ kɛɛ gbǒɔ̀ mú.

“Ɓě ɖò ní ɖá ɓɛ́ ɓě ké wiɖi-dyù ɖò mɔɔ ɓáɖáá-dyù ɖò ɔ ɖeɛ̀ nɛɛ̀-nì dyí pĩ̀ìn.

Nyɛ́nɛ́ín-ɖáìn-ɖɛ̀ kè náún-po-wùɖù

20“Gmɔ̀ nɔ̄, ní mu ínjà ɖò ɖé ɓě dyúa ɖoɓoùn, ɓɛ́ ɔ ké ɓě nàìn ɓó hwìèɔ̀ kɔ̃, ɓɛ́ ɔ ké ɓě pá ɓɛ́ ḿ ɖǎ ɓě bìì naɓaà kɛɛ mú nyìnììn. 21Ɓě mɛ tò ɔ ɖùǔ gbo, ɓɛ́ ɓě ké ɖɛ ɔ mu ɓě gbo cɛ̃ìn nyɛɛ nyu. Ɓě ní ɖá ɓɛ́ ɓě ké ɔ gbo vɔ̃. Ɓě dyiɛ náa nyuín, ɔ se ɓě kɔ̃in zĩ̀ɛ̌n mu, sepóɛɖé ɔ ɓaɖa ní kɛ́. 22Ɔ jǔ ké ɓě dyi ɖɛ séín ɔ cɛ̃ ɓě gboɛɛ ɖùǔ gbo tò nɔ̀mɔ̀ dyíin, ké ɓě dyiɛ nyu ní, nìí, ní mu nyɔ ɓě nyɛ́ ɓě mú, ké wa vɔ̃ ɓě gboɛɛ mɔ̀ùn mú nyɛ́ìn, ɓɛ́ ḿ ké wa gbo vɔ̃ ɖekè. 23Ní ínjàɔ̀ mu ɓě dyúa síìn, ɓɛ́ ɔ ké ɓě Ámɔ̀-nyɔ̀ ɓěɔ̀ kè Hítì-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ kè Kénà-nyɔ̀ ɓěɔ̀ kè Hívì-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀ ɓíɖí-ɓòɖòɔ̀ kɔ̃ kpa, ké ní mu wa ɓóɖóɔ̀ kɔ̃ dyi sámáùn sɔ̀ìn ɓó ɓě dyúa. 24Ɓě ní ɖá ɓɛ́ ɓě ké ɓóɖó-dù ɓěɛ̀ gèɖèpɔ́ɔ̀ ɓěɔ̀ ɖò dyúa dú hwuɖu taɓa, ɓɛ́ ɓě ké wa ɓiè, hwɛ̀ ḿ po níiń, ɓɛ́ ɓě ké waà kpeɖe ɓěɔ̀ ɖò kíɖíí sí. Kɛɛ ɓě mɛ wàìn waà gèɖèpɔ́ɔ̀ ɓěɔ̀ kè ɓiè-sɔ̀ɔ̌-kpò ɓě ɓɛ́ wa nyànàìn dyiɛɛ dyi. 25Ɓě mɛ ɓiè mɔ̄ Bounɓo mɔ̀à ɓěɛ̀ Gèɖèpɔ́ɔ̀ kɛ, nìí, ní manaɔ̀ mu ɓěɛ̀ ɖii-ɖɛ̀ ɓě kè ɓěɛ̀ ní ɓě kɔ̃ nììn, ké ní mu wɛ́ ɖé ɓě hwìɛ̀ zàùn. 26Ké xwíɖí se màa ɖò wɔ̃ sɔ̀ɔ̌ mu, mɔɔ ké ɖàà-màà ɖò se ɖé ɓěɛ̀ ɓóɖóɔ̀ kɔ̃ nìɛ̌ mu. Ní muɛ nyuùn ɓɛ́ ɓě ké nyɛ hwɛ̀ ɓɛ́ ɓě ké mɛ́.

27“Ní muɛ nyuùn ɓɛ́ ní díɖí ké ɓóɖó-dù séín vɔ̃ ɓě gboɛɛ kɔ̃ kpɔ̃, ɓɛ́ ɔ kéɛ nyu ɓɛ́ ɓóɖó-dù ɓěɔ̀ hwòɖǒ ké kɔ̃in cá, ɓɛ́ toɔ̀ ké ɓóɖó ɓěɔ̀ ɖu. Ní muɛ nyuùn ɓɛ́ ɓěɛ̀ mú-nyɛ́-nyɔ̀ séín ké ɓě dyúa gbǔ. 28Ní mu ɖɛ hwɔìn ɓaà kɛɛ ɖé ɓě dyúa tòùn, ɓɛ́ ɔ ké Hívì-nyɔ̀ ɓěɔ̀ kè Kénà-nyɔ̀ ɓěɔ̀ ɔ kè Hítì-nyɔ̀ ɓěɔ̀ kúmú sɔ̀ìn ɓó ɓě dyúa. 29Kɛɛ ḿ se wa séín kúmúɛ mu ɓó zɔ̃ dyúáɖò xwíníín. Ɔ dyi ná nìǐn, ɓóɖóɔ̀ mu fóɖóún kpáùn, ké xwáɖá-xwíɖíi-nìmìì ɓě mu kɔ̃ kpáùn mìɔ, ɓɛ́ wa ké ɓě fũ̀à-fṹá nyuùn. 30Ní mu wa kúmúùn kéɖé-kéɖé. Ní muɛ náa nyuɛń dyi gã̀ùn tee, ɓɛ́ ɓě ké dyí vò, ɓɛ́ ɓě ké ɓóɖóɔ̀ dyí ɖúɛ ɓɛ́ìn hwɛ̀. 31Ɓóɖó ní muà ɓě nyíìn nyɛɛ sɔ̀ìn ɖé Dyóó Zĩ-zãɔ̀ wĩín, ké ɔ nyini ɖé Mɛ́ɖɛ̀tɔ̀wéɖénìà-dyòǒɔ̀ wĩín, ké ɔ sɔ̀ìn ɖé gbǎùn-fúɖúáɔ̀ wĩín, ké ɔ nyini ɖé Dyùféɖétì-nìɔ̀ wĩín ɖekè. Ní mu nyɔ ɓě cĩ́à ɖé ɓóɖóɔ̀ kɔ̃ɛɛ ɓě xwaún dyi poùn, ɓɛ́ ɓě ké ɖé nyɔ ɓěɔ̀ dyi kúmú. 32Ɓě ní ɖá ɓɛ́ ɓě kè nyɔ ɓěɔ̀ kè waà gèɖèpɔ́ɔ̀ ɓěɔ̀ ké wuɖu ɓíín po. 33Ɓě ní ɖá ɓɛ́ ɓě ké wɔ̃́ ɓɛ́ nyɔ ɓěɔ̀ ké ɖé waà ɓóɖóɔ̀ kɔ̃ cĩ́. Ɓě dyiɛ náa nyuín, nyɔ ɓěɔ̀ muɛ nyuùn ɓɛ́ ɓě ké ḿ nàmàǔn bũ̌ nyu, sepóɛɖé nyɔ ɓěɔ̀ dyi waà gèɖèpɔ́ɔ̀ ɓěɔ̀ ɓièɛ̌n nì ɓó ɓě dyéɖé waí ní, nìí, ɔ mu xwáɖá-gbǎ-mú jǔùn ɓó ɓě bìì.”

Currently Selected:

Ɛ́séɖɔ̀ 23: ƁB02

Highlight

Copy