Ɛ́séɖɔ̀ 15

Mózèɛ̀ wɛ́ɖɛ́

1Ti ɓɛ́ Éézùɖùɛ̀-nyɔ̀ ɓěɔ̀ dyé ma ɖɛ ɓɛ́ Bounɓoɔ̀ ɖǎ ma kà nyuɛɛ, Mózè nàìn ma wa Bounɓoɔ̀ ɓàìn-wɛ̀ɖɛ̀ mú, ké ɔ ɖá,

“Ní mu Bounɓoɔ̀ gbo ɓèɖèìn, sepóɛɖé ɔ ɖǎ dĩ́ín-dĩ̀ìn-tò ɖò ɖu.

Ɔ ɖǎ sǒ ɓěɔ̀ kè waà nàìn-nyɔ̀ ɓěɔ̀ ɖé dyóóɔ̀ kɔ̃ po.

2Bounɓoɔ̀ mɔ̀ ní vɔ̃̀ìn dyúa, ké ní mu ɔ wɛ́ɖɛ́ dyi ɓèɖèìn.

Ɔ mɔ̀ ní póìn-nyɔ̀.

Ɔ mɔ̀ ní Gèɖèpɔ́ɔ̀ jèɛɛ, ní mu ɔ ɓàìn.

Ɔ mɔ̀ ḿ ɓǎà Gèɖèpɔ́ɔ̀ jèɛɛ, ní mu ɔ dya dèìn.

3Bounɓoɔ̀ mɔ̀ gàa-zà-nyɔ̀.

Bounɓo-nyɛ̀nɛ̀ɔ̀ mɔ̀ ɔ nyɛ́nɛ́.

4“Ɔ ɖǎ Féwòɖòɛ̀ hwíì-sǒ ɓěɔ̀ kè ɔ sójà ɓěɔ̀ ɖé Dyóó Zĩ-zãɔ̀ kɔ̃ po.

Ɔ ɖǎa nyu ké Féwòɖòɛ̀ sójà-nàìn-nyɔ̀ ɓěɔ̀ nyɔ kpa ɖɛ ɓěɔ̀ ɖǎ ɖé dyóóɔ̀ kɔ̃ sè.

5Ní tɔ̀mɔ̀ǔn-tɔ̀mɔ̀ǔnɔ̀ ɖǎ wa kɔ̃in zi.

Wa dèìn ɖé níɔ̀ hwuɖu dyi kà sɔ́ɔ́-kpò nìà kɛ.

6“Óó Bounɓo, nì ɖiaùn-sɔ̃̀ɔ̀ ɓéɖé dĩ́ín-dĩ̀ìn-kpè.

Nì ɖiaùn-sɔ̃̀ɔ̀ ɖǎ nì mú-nyɛ́-nyɔ̀ ɓěɔ̀ dyi wàìn.

7M̀ ɓaɖa nyɔ ɓě ɓɛ́ wa vɔ̃ m̀ gboɛɛ ɓíɖíí dyììn ɖé nì dĩ́ín-dĩ̀ìnɔ̀ kpé vɛ̀nɛ̀ɔ̀ mú.

Nì dyoɖo-hwòɖòɔ̀ kpɔ̃ dyí kà nyɛ kpɔ̃à dyíɛ,

ké ɔ fɔ̃ ɓó wa dyi kà nyɛ fɔ̃à pìǐ dyɛ-dyɛ ɓó dà ɖò dyiɛ.

8Pìɔ̌ sɔ̀ nì máná múɛɛ nyuɛ ké níɔ̀ kùɖùìn dyí.

Ní-dyèɖè ku wɔ̃ɔ̀ nyànà dyi kóɖó-kóɖó kà gmɔ nìà kɛ.

Dyóó tɔ̀mɔ̀ǔn-tɔ̀mɔ̀ǔnɔ̀ páɖá kpo ɖé ɔ hwòɖǒǔn.

9À mú-nyɛ́-nyɔ̀ ɓěɔ̀ nì ma ɓɔ́ɖɔ́uń, ké wa ɖá, ‘À mu wa kíɖíí kpáùn, ɓɛ́ à ké wa dyɛ̀ìn.

À mu à mìɔùn wa mú sṹùn, ɓɛ́ à ké wa hwu.

À mu à gàsíà ɓěɔ̀ kpaɖaún zàùn, ɓɛ́ à ké wa mú gbɔɔ̀.’

10Kɛɛ m̀ po dyóóɔ̀ pìɔ̌, ké ɔ ɓáìn wa kɔ̃in.

Wa dèìn ɖé ní ku wɔ̃ɔ̀ hwuɖu kà nɛɛ̀-kpà dèàìn ní-hwùɖù dyiɛ.

11“Óó Bounɓo, nyɛ́ nì ɖé gèɖèpɔ́ɔ̀ ɓěɔ̀ hwìɛ̀ kà m̀ nìà kɛɛ kɛ́?

Nyɛ́ m̀ kèɔ̀ kè ɓɛ́ìn wɔ̃ kɛ́?

Nyɛ́ hwɛ̀ mú mìɔ, ké ɔ gã̌, ké ɔ nyu zɛ̃̀ìn-ɖɛ̀ ɓě kɛ́?

12Ti m̀ pɛ́ɛ̀ nì ɖiaùn-sɔ̃̀ɔ̀ nyɛ̀nɛ̀ɛ̀ kɛɛ,

ɓóɖóɔ̀ mana wa ní.

13“Nì mu nyɔ ɓě ɓɛ́ m̀ ɖǎ póìn nyɛɛ nàìn ɓó nì ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ jè.

Nì mu wa nàìn ɖé nì kpéɔ̀ mú,

ɓɛ́ m̀ ké wa nì cĩ́-naín hwɛ̀ǐn-hwɛ̀ǐn mɔ̀à nyɛ́nɛ́ín-ɖáìn-ɓòɖòɔ̀ kɛɛ mú kpa.

14Ɓóɖó-dù ɓě muɛ jè wɔ̃́ùn, ké wa mu tɛɖɛìn.

Fã̀à mu Féɖésìà-nyɔ̀ ɓěɔ̀ hwòɖǒ xwíníín zàùn.

15Ké Íɖɔ̀ùn-nyɔ̀ ɓěɔ̀ wuɖuí-kɔ̃̀-nyɔ̀ ɓěɔ̀ mu fɛ̃̀ìn mìɔ.

Ké Móà-ɓòɖòɔ̀ nàìn-nyɔ̀ ɓěɔ̀ mu kɔ̃in tɛɖɛìn.

Ké hwòɖǒ ɖò se Kénà-nyɔ̀ ɓěɔ̀ xwíníín sèɛ̌ mu.

16Fã̀à mu wa nyuùn, ké díɖí mu wa taɓaùn.

Bounɓo, nì gana-sɔ̃̀ɔ̀ muɛ nyuùn ké wa mu dɔ̃un-dɔ̃un nììn kà sɔ́ɔ́-kpò nìà kɛ.

Wa se daí sɔ̀ǐn mu,

ké nì nyɔ ɓě ɓɛ́ m̀ ɖǎà gǐì-kũ̀à mú zàa hwɔ ziɛ hwɛ̀.

17Bounɓo, nì mu wa dyàùn, ɓɛ́ wa ké ɖé nì toɖoɔ̀ dya cĩ́.

Ɔ mɔ̀ pá ɓɛ́ m̀ ɖǎ naɓaà, ɓɛ́ ɔ ké nì cĩ́-naín jǔ kɛ.

Ɔ mɔ̀ nì pá hwɛ̀ǐn-hwɛ̀ǐn ɓɛ́ m̀ ɖǎ dyi dè kɛ.

18Bounɓoɔ̀ mu nyɔ wuɖuí kɔ̃̀ùn ɓó sè-ná-sèɛ̀ tiín.”

19Mózè ɓeɖe ma wɛ́ɖɛ́ nìà kɛ, sepóɛɖé ti ɓɛ́ Féwòɖòɛ̀ sǒ ɓěɔ̀ kè ɔ hwíì-sǒ ɓěɔ̀ kè ɔ sǒ-nàìn-nyɔ̀ ɓěɔ̀ sí ma ɖé dyóóɔ̀ kɔ̃ɛɛ, Bounɓoɔ̀ dyaìn ma níɔ̀ dyí ɓó wa kɔ̃in, kɛɛ Éézùɖùɛ̀-nyɔ̀ ɓěɔ̀ péɖéìn ma ɓóɖó dyɛ-dyɛ kɔ̃ ɖé dyóóɔ̀ hwòɖǒǔn.

Méwìɖìàùn wɛ́ɖɛ́

20-21Ti ɓɛ́ Mózè ɖǎ ma wɛ́ɖɛ́-wùɖùɔ̀ dyi dèɛɛ, Méwìɖìàùn ɓɛ́ ɔ mɔ̀ ma Eɖóún ɖíí-màà kɛɛ ɖú ma bòùnbá ɖò dyí, ké màa séín ɓěɔ̀ sí ma ɔ kíɖíí. Wa mɔ̀ùn ɓéɖé ma bòùnbá ɖekè, ké wa nì ma wɛ́ɖɛ́ kpáuń. Ké Méwìɖìàùn nìɛ̀ ma wa gbo cɛ̃iń ɖé wɛ́ɖɛ́-wùɖù mú, ké ɔ ɖá,

“Ɓě ɓèɖèìn Bounɓoɔ̀ gbo, sepóɛɖé ɔ ɖǎ dĩ́ín-dĩ̀ìn-tò ɖu.

Ɔ ɖǎ sǒ ɓěɔ̀ kè waà nàìn-nyɔ̀ ɓěɔ̀ ɖé dyóóɔ̀ kɔ̃ po.”

Méwìɖìàùn mɔ̀ ma kpáá-ɖɛ̀-cɛ̃-nyɔ̀.

Ní nɛɛ̀-nɛɛ̀

22Sɔ̀ìn ɓóɛ gboɛɛ, Mózè nàìn ma Éézùɖùɛ̀-nyɔ̀ ɓěɔ̀ sɔ̀ìn Dyóó Zĩ-zãɔ̀ wĩín, ké wa mùìn ma ɖé gbǎùn-fúɖúá kɔ̃̀ nyɛ́nɛ́ mɔ̀ ma Súɔ̀ kɛɛ kɔ̃. Wa nàìn ma ɖé gbǎùn-fúɖúáɔ̀ mú ɓó wé tã xwíníín, ké wa se ma ní ɖò dyé. 23Ké wa nyini ma ɓó pá ɖò kɔ̃̀ nyɛ́nɛ́ mɔ̀ Máwàɖàà kɛɛ mú, ké wa se ma ní nì ɓóɛɛ náa ɓɛ́ìn, sepóɛɖé níɔ̀ nɛɛ̀ ma ní. Ɖɛ nìà kɛ jè wa jǔìn ma kà pá nìà kɛ Máwàɖàà-nyɛ̀nɛ̀ɔ̀#15:23 Máwàɖàà-nyɛ̀nɛ̀ɔ̀ xwíníín mɔ̀ ɖɛ nɛɛ̀-nɛɛ̀. kĩ́ín nyɛ̀. 24Sepóɛɖé níɔ̀ nɛɛ̀ ma jèɛɛ, nyɔ ɓěɔ̀ ɖú ma Mózè dúi jɛ̀ìn kpàǐ, ké wa ɖá, “Ɖɛ́ à mu náùn wɛ̃́?”

25Hwɛ̀ ké Mózè pòìn ma Bounɓoɔ̀ kpéi, ké Bounɓoɔ̀ zàìn ma ɔ cu ɖò da. Ké Mózè ɖú ma cuɔ̀ dyí, ké ɔ poɛ ma níɔ̀ kɔ̃. Púɛɛ, nyɔ ɓěɔ̀ ɓɛ́ìn ma níɔ̀ náa.

Ɓó pá nìà kɛ mú, ɓóɛ̀ Bounɓoɔ̀ nyí ma wa gma ɓě, ké ɓóɛ̀ Bounɓoɔ̀ dɔ̃̌ìn ma wa mú. 26Ɔ cɛ̃ɛ ma wa gbo, ké ɔ ɖá, “Ɔ jǔ ké ɓě dyi mɔ̄ mɔ̀à Bounɓo mɔ̀à ɓěɛ̀ Gèɖèpɔ́ɔ̀ kɛɛ wuɖu ɓěɔ̀ ɖùǔ gbo tò nɔ̀mɔ̀ dyíin, ké ɓě dyi ɖɛ sɛ́ɖɛ́ìn dyí ɖé ḿ dyéɖéín nyɛɛ nyu, ké ɓě dyi ní gma séín ɓěɔ̀ dyi kpɔ̃ ní, nìí, ḿ se wɛ́ ɓě ɓɛ́ ḿ dyà ma kà Íjè-nyɔ̀ ɓěɔ̀ kɔ̃ɛɛ ɖò ɓě kɔ̃ dyàǎ mu, sepóɛɖé mɔ̄ mɔ̀à ɓě dyi-kánáìn-nyɔ̀ kɛ̀.”

27Sɔ̀ìn ɓóɛɛ, wa nyini ma pá ɖò kɔ̃̀ nyɛ́nɛ́ mɔ̀ Éɖììn kɛɛ mú. Ní-dù ɓaɖa-bùè sè sɔ̃́ kè hwɛ̃-cù kpáɖá-nyɔ tã ɓaɖa-bùè nì ma ɓó páɔ̀ mú. Ké Éézùɖùɛ̀-nyɔ̀ ɓěɔ̀ nyànàìn ma waà jàɖàìn-gbò ɓěɔ̀ ɓó níɔ̀ wĩín dyi.

Currently Selected:

Ɛ́séɖɔ̀ 15: ƁB02

Highlight

Copy