Ɛ́séɖɔ̀ 14
14
Dyóó Zĩ-zãɔ̀ péɖé-péɖé
1Ti ɓɛ́ Éézùɖùɛ̀-nyɔ̀ ɓěɔ̀ nì ma ɖé Éfàùn-hwɔ̀ɖɔ̀ɔ̀ gbɔɛɛ, Bounɓoɔ̀ cɛ̃ɛ ma Mózè gbo, ké ɔ ɖá, 2“Cɛ̃ɛ Éézùɖùɛ̀-dyù ɓěɔ̀ gbo, ɓɛ́ wa ké ɖe kɔ́ìn, ɓɛ́ wa ké waà jàɖàìn-gbò ɓěɔ̀ dyi nyànàìn ɖé Píhàhíwòɖò-hwɔ̀ɖɔ̀ nìà ɖé Míɖòò-hwɔ̀ɖɔ̀ɔ̀ kè Dyóó Zĩ-zãɔ̀ pṹa kɛɛ gbɔ. Wa mɛ nyànàìn waà jàɖàìn-gbò ɓěɔ̀ dyi ɓó dyóóɔ̀ wĩín, hwɔ ɖé Béò-Zɛ́fɔ̀ùn-hwɔ̀ɖɔ̀ɔ̀ gbɔ dyí. 3Ɔ dyi ná nìǐn, Féwòɖò muɛ cɛ̃ìn, ɓɛ́ ɔ ké níiń, ‘Éézùɖùɛ̀-dyù ɓěɔ̀ hwòɖǒ ɖǎ kɔ̃in cá, ké wa nì dyi téɛń, sepóɛɖé gbǎùn-fúɖúáɔ̀ ɖǎa nyu ké wa se dà ɖò muɛ ɓɛ́ìn.’ 4Ɔ ɖǎ ná nìǐn, ní mu Féwòɖòɛ̀ hwòɖǒ-dyùàɔ̀ kùmùìn, ké ɔ mu wa kíɖíí kpáùn. Kɛɛ ɖɛ ní mu ɔ kè ɔ sójà kúɖúú ɓěɔ̀ bũ̌ nyuùn wɛ̃ɛ muɛ nyuùn ɓɛ́ ḿ ké dya-dè-dè ɓéɖé, ɓɛ́ Íjè-nyɔ̀ ɓěɔ̀ kéɛ dyuò kà mɔ̄ mɔ̀ Bounɓoɔ̀ kɛ.” Ɔ jèɛɛ, Éézùɖùɛ̀-nyɔ̀ ɓěɔ̀ nyuɛ ma náa.
5Ti ɓɛ́ Íjè-kã̀ǎɔ̀ wɔ̃́ɔ ma kà Éézùɖùɛ̀-nyɔ̀ ɓěɔ̀ ɖǎ ma xwáɖáún kpáa, púɛɛ, ɔ kè ɔ gɔ̌mànà-nyɔ̀ ɓěɔ̀ zĩàìn ma waà hwòɖǒ gbo ɓá Éézùɖùɛ̀-nyɔ̀ ɓěɔ̀ jè dyí, ké wa ɖá, “Ɖɛ́ mɔ̀ ɖɛ à nyuà kɛɛ xwíníín nyɛ́? Dyéɛ, à táà Éézùɖùɛ̀-nyɔ̀ ɓěɔ̀ dyi, ké wa ɖǎ mu, ké nyɔ ké à kũ̀à ɓěɔ̀ nyuɛɛ ɖò se nì ɖe!” 6Ɔ jèɛɛ, kã́áɔ̀ naɓaà ma ɔ hwíì-sǒɔ̀ kè ɔ sójà ɓěɔ̀. 7Ɔ kpa ma ɔ hwíì-sǒ kpa ɖɛ hɔ̃dɛ̀ɖɛ̀ mɛ̀nɛ̌ìn-ɖò ɓěɔ̀ kè Íjè-ɓòɖòɔ̀ hwíì-sǒ tɔ̀ɔ̀ ɓěɔ̀ ɔ kè wa nììn kɔ̃in-nyɔ̀ séín ɓě. 8Ké Bounɓoɔ̀ kùmùìn ma ɔ hwòɖǒ-dyùàɔ̀, ké ɔ kpá ma Éézùɖùɛ̀-nyɔ̀ ɓě ɓɛ́ wa nì ma muɛń to-ɖu-kà kɛɛ kíɖíí.#14:8 Vɔ́sì nìà kɛ kpa kòɛ̀ ɖò-ɖò ɖé Báɓò ɖíɛ́ ɓě mú, sepóɛɖé ɔ Híìbúɖúù-wùɖùɔ̀ kàmà múin wɔ̃́uń jè. 9Féwòɖòɛ̀ sǒ séín ɓěɔ̀ kè ɔ hwíì-sǒ séín ɓěɔ̀ kè ɔ sǒ-nàìn-nyɔ̀ ɓěɔ̀ ɔ kè ɔ sójà tɔ̀ɔ̀ ɓěɔ̀ kpá ma Éézùɖùɛ̀-nyɔ̀ ɓěɔ̀ kíɖíí, ké wa dyɛ̀ìn ma wa ɓó Píhàhíwòɖò-hwɔ̀ɖɔ̀ɔ̀ gbɔ dyi dɛ̀ ɓɛ́ wa nyànàìn ma kà waà jàɖàìn-gbò ɓěɔ̀ dyi ɓó dyóóɔ̀ wĩín nyɛ. Ɔ mɔ̀ hwɔ ɓó Béò-Zɛ́fɔ̀ùn-hwɔ̀ɖɔ̀ɔ̀ gbɔ dyí.
10Ti ɓɛ́ Féwòɖò nìǎ ma dyi xwɛ̃́ǐn nyɛɛ, púɛɛ, Éézùɖùɛ̀-nyɔ̀ ɓěɔ̀ gmɔ̀ ma ɖe, ké wa dyé ma Íjè-sòjà ɓěɔ̀ wa wɔ̃ dyiɛ. Ké fã̀à nyu ma wa mìɔ cá, ké wa pòìn ma Bounɓoɔ̀ kpéi. 11Hwɛ̀ ké wa cɛ̃ɛ ma Mózè gbo, ké wa ɖá, “Kú-toɖo ɖò se ɖé Íjè-ɓòɖòɔ̀ kɔ̃ nì jè ké m̀ dyàà à nɔ̄ gbǎùn-fúɖúáà mú, ɓɛ́ à kéà nɔ̄ mɛ́ìn nyɛɛ̀? Ɖɛ́ mɔ̀ ɖɛ m̀ nyuà à bũ̌ɛɛ xwíníín nyɛ́, ɓɛ́ m̀ dyià à ɖé Íjè-ɓòɖòɔ̀ kɔ̃ zà kɛ́? 12Má, ti à nì ma kà ɖé Íjè-ɓòɖòɔ̀ kɔ̃ɛɛ, à cɛ̃ɛ ma m̀ gbo, ké à ɖá, ‘Táà à dyi, ɓɛ́ à ké Íjè-nyɔ̀ ɓěɔ̀ gǐì jǔoe?’ Ɔ muɔ́ dyíin nɔ̀mɔ̀ùn ɓó à bìì ɓɛ́ à kéɔ́ má Íjè-nyɔ̀ ɓěɔ̀ gǐì jǔ ké ɔ zi ɓɛ́ à ké nɔ̄ gbǎùn-fúɖúá nìà kɛ kɔ̃ mɛ́ìn nyɛɛ dyí.”
13Ké Mózè jǔ ma nyɔ ɓěɔ̀ gɔ̃̌, ké ɔ ɖá, “Ɓě ɓɔ́ fɛ̃̀ìn. Ɓě nyànà dyi gãun-gãun, nìí, ɓě mu kà Bounɓoɔ̀ mu ɓě póɛ̀n nyuùn ɓó zɛ̃̌ɛ̀ kɛɛ dyéìn. Íjè-nyɔ̀ ɓě ɓɛ́ ɓě dyéà ɓó zɛ̃̌ɛ̀ kɛɛ, ɓě se wa dyéɛ mu ɖe fɔɔ cá. 14Bounɓoɔ̀ mɔ̀ nyɔ mu ɓě bìì vɔ̃ùn. Ɖɛ ɓě ɓéɖé ɓɛ́ ɓě ké nyuɛɛ mɔ̀ ɓě ké gìɖìǐ nì nyɛ̀nɛ̀ɛ̀ pū.”
15Ti ɓɛ́ Mózè ɖǎ ma Éézùɖùɛ̀-nyɔ̀ ɓěɔ̀ gbo wùɖùɛ̀ hwɔɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Ɖɛ́ kɔ̃̀ jè m̀ nìà ḿ kpéi pòɛ̌n nyɛ́? Cɛ̃ɛ Éézùɖùɛ̀-dyù ɓěɔ̀ gbo, ɓɛ́ wa ké dyí sɔ̀, ɓɛ́ wa ké dyúa mu. 16Ké m̀ mɛ pɛ́ɛ̀ nì sɔ̃ɔ̀, ɓɛ́ m̀ ké nì kùì-kpàɔ̀ dyóóɔ̀ kɔ̃in tò, ɓɛ́ níɔ̀ ké mú ge, nìí ɓɛ́ Éézùɖùɛ̀-dyù ɓěɔ̀ ké ɓóɖó dyɛ-dyɛ kɔ̃in nà, ɓɛ́ wa ké dyóóɔ̀ péɖé. 17Gmɔ̀ nɔ̄, ní mu Íjè-nyɔ̀ ɓěɔ̀ hwòɖǒ-dyùàɔ̀ kùmùìn, ɓɛ́ wa ké ɓě kíɖíí sí. Ɔ dyi ná nìǐn, nìí, ɖɛ ní mu Féwòɖò kè ɔ hwíì-sǒ ɓěɔ̀ kè ɔ sǒ-nàìn-nyɔ̀ ɓěɔ̀ ɔ kè ɔ sójà tɔ̀ɔ̀ ɓěɔ̀ bũ̌ nyuùn wɛ̃ɛ muɛ nyuùn ɓɛ́ ḿ ké dya-dè-dè ɓéɖé. 18Ɖɛ nìà kɛ muɛ nyuùn ɓɛ́ Íjè-nyɔ̀ ɓěɔ̀ kéɛ dyuò kà mɔ̄ mɔ̀ Bounɓoɔ̀ kɛ.”
19Púɛɛ, Gèɖèpɔ́ɔ̀ ínjà ɓɛ́ ɔ nì ma Éézùɖùɛ̀-nyɔ̀ kúɖúú ɓěɔ̀ dyúa ɓó hwìèɔ̀ kɔ̃ɛɛ jiɖi ma ɔ mɔ̀ùn ɖe, ké ɔ zi ma wa ɖeín. Ké ní-kpòɔ̀ sɔ̀ ma wa dyúa, ké ɔ zi ma ɖé wa ɖeín ɖekè. 20Ɔ zi ma ɓó Íjè-nyɔ̀ ɓěɔ̀ nììn jàɖàìn-hwɔ̀ɖɔ̀ɔ̀ kè Éézùɖùɛ̀-nyɔ̀ ɓěɔ̀ nììn jàɖàìn-hwɔ̀ɖɔ̀ɔ̀ pṹa. Ɓó máaún-hwùɖù gànáɔ̀ múɛɛ, ní-kpòɔ̀ mɔ̀ ma tíe-kpò ɖé Íjè-nyɔ̀ ɓěɔ̀ nììn wáká kɔ̃, kɛɛ ɔ mɔ̀ ma ce ɖé Éézùɖùɛ̀-nyɔ̀ ɓěɔ̀ nììn wákáɔ̀ kɔ̃, ké ɔ nyuɛ ké Íjè-nyɔ̀ ɓěɔ̀ se ma Éézùɖùɛ̀-nyɔ̀ ɓěɔ̀ bũ̌in xwɛ̃́ìn ɓɛ́ìn.
21Hwɛ̀ ké Mózè pɛ́ɛ̀ ma sɔ̃, ké ɔ tò ma ɔ kùì-kpàɔ̀ dyóóɔ̀ kɔ̃in. Ɓó máaún-hwùɖù gànáɔ̀ múɛɛ, Bounɓoɔ̀ nyuɛ ké pìɔ̌ ku wɔ̃ ɖò sɔ̀ìn ma ɖé dyóɖó-xwáɖáún-wóɖóìn-naínɔ̀, ké ɔ gã̀ ma níɔ̀ ɓaɖauń dyi tee, ké ɔ ge ma níɔ̀ mú, ké ɓóɖó dyɛ-dyɛ wóɖó ma píé. 22Ké Éézùɖùɛ̀-nyɔ̀ ɓěɔ̀ nà ma ɓóɖó dyɛ-dyɛɔ̀ kɔ̃in, ké wa péɖé ma dyóóɔ̀. Níɔ̀ dyá ma dyí ɖé wa ɖiaún kè ɖé wa kunuaún. 23Ké Féwòɖòɛ̀ sǒ séín ɓěɔ̀ kè ɔ hwíì-sǒ séín ɓěɔ̀ kè ɔ sǒ-nàìn-nyɔ̀ ɓěɔ̀ ɔ kè ɔ sójà tɔ̀ɔ̀ ɓěɔ̀ sí ma wa kíɖíí ɖé dyóóɔ̀ hwòɖǒǔn. 24Kɛɛ ɓó zɔ̃ wĩín vɛ̀nɛ̀ɛ, Bounɓoɔ̀ gmɔ̀ ma ɓíɖíi sɔ̀ìn ɖé nyɛ-mìɔ̀ɔ̀ kè ní-kpòɔ̀ mú, ké ɔ dyé ma wa. Púɛɛ, ɔ nyuɛ ké waà hwòɖǒ cá ma kɔ̃in. 25Ké ɔ nyuɛ ké waà hwíì-sǒ ɓěɔ̀ ɓo ɓěɔ̀ nì ma kpãun-kpãun, ké ɔ nyu ké wa se ma nàà ɓɛ́ìn. Ké Íjè-nyɔ̀ ɓěɔ̀ ɖá, “Ɓěà sɔ̀ Éézùɖùɛ̀-nyɔ̀ ɓěɔ̀ kíɖíí, sepóɛɖé Bounɓoɔ̀ nì ɓěà gbo vɔ̃uń ɓó wa bìì.”
26Hwɛ̀ ké Bounɓoɔ̀ cɛ̃ɛ ma Mózè gbo, ké ɔ ɖá, “Pɛ́ɛ̀ nì sɔ̃ɔ̀, ɓɛ́ m̀ ké nì kùì-kpàɔ̀ dyóóɔ̀ kɔ̃in tò ɖe, ɓɛ́ níɔ̀ ké dyí dyaìn ɓó Íjè-nyɔ̀ ɓěɔ̀ hwíì-sǒ ɓěɔ̀ kè waà sǒ-nàìn-nyɔ̀ ɓěɔ̀ ɔ kè waà sójà tɔ̀ɔ̀ ɓěɔ̀ kɔ̃in.” 27Ké Mózè pɛ́ɛ̀ ma sɔ̃, ké ɔ tò ma ɔ kùì-kpàɔ̀ dyóóɔ̀ kɔ̃in. Ké ti ɓɛ́ zɔ̃ wáɖá ma hwɔɖɔún dyi nyɛ̀nɛ̀ɛ̀ kɛɛ, dyóóɔ̀ dyaìn ma dyí ɖe. Íjè-nyɔ̀ ɓěɔ̀ ɓéɖé ma gbǔɛń, kɛɛ níɔ̀ nì ma wa wɔ̃ dyiɛń. Ké Bounɓoɔ̀ nyuɛ ké Íjè-nyɔ̀ ɓěɔ̀ sè ma dyóóɔ̀ kɔ̃. 28Níɔ̀ dyaìn ma dyí, ké ɔ ɓáìn ma Féwòɖòɛ̀ hwíì-sǒ ɓěɔ̀ kè ɔ sǒ-nàìn-nyɔ̀ ɓěɔ̀ ɔ kè ɔ sójà tɔ̀ɔ̀ séín ɓě ɓɛ́ wa kpá ma kà Éézùɖùɛ̀-nyɔ̀ ɓěɔ̀ kíɖííɛɛ kɔ̃in. Waà nyɔ dyúáɖò kpeé-kpeé seɛ ma xwaún pó dyɛ mɔ̀ùn. 29Kɛɛ Éézùɖùɛ̀-nyɔ̀ ɓěɔ̀ péɖéìn ma ɓóɖó dyɛ-dyɛ kɔ̃ ɖé dyóóɔ̀ hwòɖǒǔn. Ní-po-dyíɔ̀ nyànà ma dyi ɖé wa ɖiaún kè ɖé wa kunuaún.
30Kǎà Bounɓoɔ̀ nyu ma Éézùɖùɛ̀-nyɔ̀ ɓěɔ̀ póɛ̀n sɔ̀ìn ɖé Íjè-nyɔ̀ ɓěɔ̀ xwaún ɓó wéa ɓaɖa. Ké Éézùɖùɛ̀-nyɔ̀ ɓěɔ̀ dyé ma Íjè-nyɔ̀ ɓěɔ̀ xwɛ́ ɓěɔ̀ dyóóɔ̀ wĩin. 31Ti ɓɛ́ Éézùɖùɛ̀-nyɔ̀ ɓěɔ̀ dyé ma Bounɓoɔ̀ kpé vɛ̀nɛ̀ ɔ nyùìn ma kà kũ̀à mú ɓó Íjè-nyɔ̀ ɓěɔ̀ kɔ̃ɛɛ, púɛɛ, wa fɛ̃̀ìn ma Bounɓoɔ̀ dyi mìɔ, ké wa taɓa ma ɔ kè ɔ gbo-nì-nyɔ̀ Mózè hwìɖǐǐ.
Currently Selected:
Ɛ́séɖɔ̀ 14: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
