Àpɔ́sò 26
26
Pɔ́ɔ̀ zaìn ɔ mìɔùn jè kɔ̃in ɓó Àgéɖépà dyúa
1Ké Àgéɖépà cɛ̃ɛ ma Pɔ́ɔ̀ gbo, ké ɔ ɖá, “M̀ mìɔùn mɛ wùɖù.”
Ké Pɔ́ɔ̀ pɛ́ɛ̀ ma sɔ̃, ké ɔ ɖú ma ɔ mìɔùn jè kɔ̃in zaìn kpàǐ, ké ɔ ɖá, 2“Kã́á Àgéɖépà, ḿ kpá múàǔn kà ɓɛ́ ḿ ké ḿ níǐn kɔ̃in zaìn ɓó m̀ dyúa, ɓá ɖɛ séín ɓě kɔ̃̀ jè Júù-nyɔ̀ ɓěɔ̀ kpɔ̃à ḿ wɛ̃ɛ jè dyí, ɓó zɛ̃̌ɛ̀ kɛ. 3Sepóɛɖé m̀ dyuò Júù-nyɔ̀ ɓěɔ̀ kpeɖe kè ɖɛ ɓě kɔ̃̀ jè wa zà dòǐn nyɛɛ séín dyí mìɔ. Ɔ jèɛɛ, ḿ nì m̀ ɓaàǔn, ɓɛ́ m̀ ké hwòɖǒ ku, ɓɛ́ m̀ ké ḿ ɖùǔ gbo tò.
4“Júù-nyɔ̀ séín ɓěɔ̀ dyuò kà ḿ nyu ma cĩ́ɛ sɔ̀ìn ɖé ní dyú-ɓìɖìɛ. Ḿ cĩ́ ma ɖé ḿ mìɔùn nììn nyɔ ɓěɔ̀ gbo kĩ́ín, hwɛ̀ ké ḿ cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. 5Wa ɖǎ ma ḿ dyí dyuò see, ké wa dyi jǎà cɛ̃ɛ ɓɛ́ìn ní, wa ɓɛ́ìn cɛ̃ɛ kà ḿ mɔ̀ ma nyɔ ɓě ɓɛ́ wa kpɔ̃ ma kà Júù-nyɔ̀ ɓěɔ̀ cɔ́cìɔ̀ jè dyi kóɖó-kóɖó kɛɛ ɖòɛ. Ḿ mɔ̀ ma Fáɖòsíì-nyɔ̀ cá. 6Ɖɛ kɔ̃̀ jè ḿ nyànàà dà ɓó dyi, ɓɛ́ ɓě kéà ní zaaɔ̀ cɛ̃ɛ, ɔ mɔ̀ ɖɛ ɓɛ́ ḿ dè hwòɖǒ kɔ̃ɛɛ jè. Ɔ mɔ̀ ɖɛ ɓɛ́ Gèɖèpɔ́ɔ̀ ɖáìn zɔ̃̌ɔ̀ à ɓǎ nììn ɓǎ ɓěɔ̀ nyɛ́nɛ́ín nyɛɛ jè. 7À xwéɖé-dù ɓaɖa-bùè sè sɔ̃́ɔ̀ dè ɖɛ ɓɛ́ Gèɖèpɔ́ɔ̀ ɖáìn zɔ̃̌ɔ̀ à ɓǎ nììn ɓǎ ɓěɔ̀ nyɛ́nɛ́ín nyɛɛ dyé jè hwòɖǒ kɔ̃, ké wa nì Gèɖèpɔ́ɔ̀ ɓièɛ̌n ɓó gànà-kṹún kè ɔ ɖíí hwìo ɓó hwòɖǒɛ̀-ɖé-hwɛ̀-kà. Ké wa ɖǎ ḿ kpɔ̃ ɓó hwòɖǒ-kɔ̃-dè-ɖɛ̀ dyúáɖòɔ̀ jè. Ɓɔ̌ɔ̀, Júù-nyɔ̀ ɓěɔ̀ mɔ̀ nyɔ kpɔ̃à ḿ jɛ́ɛ́ kɛ̀. 8Ɖɛ́ kɔ̃̀ jè ɓě ɖá ɔ kàmà mú ɓɛ́ nyɔǔn kéɛ jǎà po kà ɓɛ́ Gèɖèpɔ́ɔ̀ ɓɛ́ìn nyɔ gĩɔ zàà kɛɛ́?
9“Ḿ mìɔùn poɛ̀n ma hwìɖǐi kà ḿ ɓéɖé ɓɛ́ ḿ ké ma ɖɛ ɓáún-ɓáún nyu ɓó Jízɛ̀ sɔ̀à Názɛ̀ɖɛ̀-hwɔ̀ɖɔ̀ɔ̀ mú kɛɛ nyɛ́nɛ́ɔ̀ gbo vɔ̃ jèɛ, 10ké ḿ nyu ma wa ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Sáa-zà-nyɔ̀ kpa ɖɛ ɓěɔ̀ nyí ma ḿ kpé, ké ḿ po ma Gèɖèpɔ́ɔ̀-nyɔ̀ ɓáún-ɓáún kpɔɖɔ ɖeín. Ti ɓɛ́ wa ɖá wa mɛ mɛ́ ma kɛɛ, ḿ wɔ̃́ ɓɛ́ wa ké ma mɛ́. 11Ḿ dyéìn ma wa gǎ ɖé Júù-nyɔ̀ ɓěɔ̀ cɔ́cì-gbò ɓěɔ̀ mú kpɛ́-kpɛ́, ké ḿ vɔ̃ ɓɛ́ wa ké ma Gèɖèpɔ́ɔ̀ ɖɛ gbà kɔ̃ún cɛ̃. Ḿ zi ma dyoɖoún kpáuń mìɔ. Ɔ jèɛɛ, ḿ mu ma hwɔɖɔ ɓě ɓɛ́ wa kpa ma ɓóɖó-dù kà kò ɖò ɓě kɔ̃ nìɛ̀ kɛɛ mú, ɓɛ́ ḿ ké ɖé wa gǎ dyéìn ɖekè.
Pɔ́ɔ̀ cɛ̃ɛ kà ɔ nyu Gèɖèpɔ́ɔ̀ gbo dyiɛ kɛɛ jè
(Àpɔ́sò 9:1-19; 22:6-16)
12“Ti ɖòɛ̀ ɓaɖaa, ḿ nì ma ɖɛ dyúáɖòɔ̀ nyuɛń muɛń ɖe. Sáa-zà-nyɔ̀ kpa ɖɛ ɓěɔ̀ nyí ma ḿ kpé, ké wa ɖoɓo ma ḿ ɖé Dìmásìkɔ̀-hwɔ̀ɖɔ̀ɔ̀ mú. 13Ɓɔ̌ɔ̀, ḿ nì ma hwìè kɔ̃, ké ḿ dyé ma ce ɖò, ké ɔ sɔ̀ìn ma ɖé dyií ɓó dyóɖó-kò-dú-hwìɛ̀. Ceɔ̀ fã ma cá, ké ɔ zi dyóɖóɔ̀ dyí. Ké ɔ fã̀ìn ma ḿ kè nyɔ ɓě nì ma muɛń nyɛɛ ɖei. 14Ké ti à séín ɓùɖùìn ma ɓó ɓóɖó-kpàɔ̀ kɔ̃ɛɛ, ḿ wɔ̃́ ma wuɖu ɖò. Ké wuɖuɔ̀ wùɖù ma ḿ gbo ɖé Híìbúɖúù-wùɖù mú, ké ɔ ɖá, ‘Sɔ́ɔ̀, Sɔ́ɔ̀, ɖɛ́ kɔ̃̀ jè m̀ nìà ḿ gǎ dyéɛ̌n nyɛ́? Ɔ jǔ ké m̀ dyi ɓà-cù té-té ɖò ɓá taɓaín, nìí, ɔ mu m̀ puàùno.’ 15Ké ḿ ɖá, ‘Ɓɔ̌ɔ̀, m̀ mɔ̀ nyɛ́ɛ̀?’ Ké Bounɓoɔ̀ ɖá, ‘Mɔ̄ Jízɛ̀, mɔ̄ mɔ̀ nyɔ m̀ nìà gǎ dyéɛ̌n nyɛ̀. 16Sɔ́ dyí, ɓɛ́ m̀ ké dyi nyànà. Ɖɛ kɔ̃̀ jè ḿ wóɖóìn kà m̀ dyíɛɛ, ɔ kɛ̀. Ɔ mɔ̀, ɓɛ́ ḿ ké m̀ gã, ɓɛ́ m̀ ké ní gbo-nì-nyɔ̀ jǔ, ɓɛ́ m̀ ké ɖɛ ɓě kɔ̃̀ mú ɓɛ́ m̀ ɖǎà ḿ dyéɛ kè ɖɛ ɓě kɔ̃̀ mú ɓɛ́ ní mu m̀ dyí wóɖóìn nyɛɛ jè zàse nyu. 17Ní mu m̀ Júù-nyɔ̀ ɓěɔ̀ kè ɓóɖó-dù kà kò ɖò ɓěɛ̀ nyɔ ɓě kɔ̃̀ gbo ḿ nìà m̀ ɖoɓoɛń nyɛɛ xwaún gbǎàùn. 18Ḿ ɖoɓo m̀, ɓɛ́ m̀ ké waà dyéɖé ɓěɔ̀ kaà, ɓɛ́ m̀ ké wa tíe-kpòɔ̀ gbo zàìn, ɓɛ́ m̀ ké wa ceɔ̀ dyí dyà. Ḿ ɖoɓo m̀, ɓɛ́ m̀ ké wa Sétɔ̃̀ɛ̀ kpéɔ̀ gbo zà, ɓɛ́ m̀ ké wa Gèɖèpɔ́ɔ̀ gbo dyà, ɓɛ́ ɔ jǔ ké wa dyi ḿ hwìɖǐǐ taɓa ní, Gèɖèpɔ́ɔ̀ ké waà nàmàǔn ɓěɔ̀ kɔ̃in zĩ̀ìn, ɓɛ́ wa ké pá ɓéɖé ɖé nyɔ ɓě ɓɛ́ Gèɖèpɔ́ɔ̀ ɖǎà ɔ mìɔùn nììn nyɔ ɓě mú nyuɛɛ hwìɛ̀.’
Pɔ́ɔ̀ zaìn ɔ kũ̀àɔ̀ jè kɔ̃in
19“Dyéɛ, Kã́á Àgéɖépà, ḿ se ma dyí-tɛ̀mɛ̀ìn-ɖɛ̀ sɔ̀ìn ma kà ɖé dyɔún wɛ̃ɛ gbo nɔ́ɔ̀. 20Ḿ mu ma nyɔ ɓě nì ma ɖé Dìmásìkɔ̀-hwɔ̀ɖɔ̀ɔ̀ mú kɛɛ gbo kĩ́ín, ké ḿ mu ma ɖé nyɔ ɓě nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ kè ɖé Júɖìà-ɓòɖòɔ̀ dà séín nyɛɛ gbo, ké ḿ mu ma ɖé ɓóɖó-dù kà kò ɖò ɓěɛ̀ nyɔ ɓěɔ̀ mɔ̀ùn gbo ɖekè. Ḿ cɛ̃ɛ ma nyɔ séín ɓě nìà kɛ gbo kà ɓɛ́ wa ɓéɖé ɓɛ́ wa ké waà nàmàǔn-kpèɖèɔ̀ dyi táà, ɓɛ́ wa ké Gèɖèpɔ́ɔ̀ gbo gmɔ̀ìn, ɓɛ́ waà nyuu-kpèɖè ɓěɔ̀ kéɛ nyɔǔn dyí tɛ̀mɛ̀ìn kà waà kpeɖe ɓěɔ̀ ɖǎ gbo zĩàìn nyɛ. 21Ɔ jèɛɛ, Júù-nyɔ̀ ɓěɔ̀ kpɔ̃ ma ḿ ɖé Gèɖèpɔ́ɔ̀ gbǒɔ̀ mú, ké wa mɔ́ ɓɛ́ wa ké ma ḿ ɖáɓá. 22Sɔ̀ìn ɓó tia gbo, ké ɓó zɛ̃̌ɛ̀ gbo dyiɛɛ, Gèɖèpɔ́ɔ̀ kpá ḿ gbo. Ɔ jèɛɛ, ḿ nyànàà zɛ̃̌ɛ̀ dà ɓó dyú kè vɛ̀nɛ̀ dyúa dyi, ɓɛ́ ḿ kéà zàse nyuɛ̀. Ɖɛ ɓɛ́ Mózè kè kpáá-ɖɛ̀-cɛ̃-nyɔ̀ ɓěɔ̀ cɛ̃ zɔ̃̌ɔ̀, ɓɛ́ wa dyi níiń, ɔ mu ma kà kpáùn wɛ̃ɛ, mɔ́ún cɛ̃ ɖɛ dyúáɖòɔ̀ ɖekè, ké ḿ se ɓó kà kò ɖò kɔ̃in po ɖe. 23Ɖɛ wa cɛ̃ zɔ̃̌ɔ̀ kà kɛɛ, ɔ mɔ̀ kà Kɛ́ɖɛ́ìɔ̀ ɓéɖé ɓɛ́ ɔ ké ma gǎ dyéɛ. Wa ɖá ɔ mu ma nyɔ kĩ́ín-kĩ́ín ké gĩɔ wóɖóɛɛ jǔùn, ké ɔ mu ma ceɔ̀ jè Júù-nyɔ̀ ɓěɔ̀ kè ɓóɖó-dù kà kò ɖò ɓěɛ̀ nyɔ ɓěɔ̀ gbo cɛ̃ìn.”
24Ti Pɔ́ɔ̀ nì ma kà ɔ mìɔùn jè cɛ̃iń keɛɛ, Fɛ́sàɖà páná ma mú, ké ɔ ɖá, “Pɔ́ɔ̀, sã̀à nyu m̀ ní. M̀ ɖǎ céè-ɖɛ̀ cɛ̃́ mìɔ. Ɔ jèɛɛ, sã̀à nìà m̀ nyuɛń nyɛ̀.”
25Kɛɛ Pɔ́ɔ̀ ɖá, “Ɓɔ̌ɔ̀, ḿ se sã̀à-nyɔ̀o. Kɛɛ ɖɛ ḿ nìà cɛ̃iń nyɛɛ, ɔ mɔ̀ jǎà jɛ́ɛ́ cá. 26À kã́á nìà kɛ dyuò ɖɛ séín ɓěɛ̀ dyí nɔ̀mɔ̀ dyíin, ké ḿ ɓɛ́ìn náa ɔ mɔ̀ùn dyúa cɛ̃ɛ wáɖáá cá. Ḿ dyuòɛ̀ jɛ́ɛ́ cá kà ɖɛ ɓě nìà kɛ ɖò se ɔ dyí gàìn nyɛ, sepóɛɖé ɖɛ ɓě nìà kɛ se ma gã gbo kpáìn. 27Kã́á Àgéɖépà, m̀ po ɖɛ kpáá-ɖɛ̀-cɛ̃-nyɔ̀ ɓěɔ̀ céè ma kà kɛɛ jè jǎà? Ḿ dyuòɛ̀ kà m̀ po wa jè jǎà kɛ.”
28Ké Àgéɖépà cɛ̃ɛ ma Pɔ́ɔ̀ gbo, ké ɔ ɖá, “Nì hwòɖǒ ɖá m̀ ɓɛ́ìn ḿ Kɛ́ɖɛ́ì ɖeín-sí-nyɔ̀ mú nyuɛ wàɖà cáe?”
29Ké Pɔ́ɔ̀ ɖá, “Kɛbì ɔ mɛ sèɔ̌ ti tííwè mɔɔ ti tɔ̀mɔ̀ǔn-tɔ̀mɔ̀ǔn wɛ̃ɛ, ḿ nì Gèɖèpɔ́ɔ̀ dyi dièɛ̌n, ɓɛ́ mɔ́ún kè mɔ̀ùn ɔ kè nyɔ séín ɓě nìà ḿ gbo ɖùǔ tòɛ̌n ɓó zɛ̃̌ɛ̀ kɛɛ kéɔ́ má nyɔ dyúáɖò jǔ, ɔ sèìn ḿ se mɔ́ ɓɛ́ wa ké ɓě mɔ̀ùn dyɔ̀ɔ̌ ɓě nìà kɛ sɔ̃ po ɖekè.”
30Ké kã́áɔ̀ kè gɔ̌mànàɔ̀ kè Bàníì ɔ kè nyɔ ɓě nì ma ɓó wa gboɛɛ sɔ̀ ma dyí, 31ké wa cɛ̃ìn cɛ̃̀ìn ma gbo, ké wa ɖá, “Ɔ se ɖɛ kɔ̃̀ jè à ké ɔ kpɔɖɔ ɖeín po, mɔɔ ɓɛ́ à ké ɔ ɖáɓáa ɖò nyuɛń nì.” 32Ké Àgéɖépà cɛ̃ɛ ma Fɛ́sàɖà gbo, ké ɔ ɖá, “Ɔ jǔ ké gàa nìà kɛ seɛ ma cɛ̃ kà ɔ mu ma zaa nìà kɛ Síízɛ̀ gbo kpaùn wɛ̃ɛ ní, nìí, à muɔ́ má ɔ buɛ̀ìn.”
Currently Selected:
Àpɔ́sò 26: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Àpɔ́sò 26
26
Pɔ́ɔ̀ zaìn ɔ mìɔùn jè kɔ̃in ɓó Àgéɖépà dyúa
1Ké Àgéɖépà cɛ̃ɛ ma Pɔ́ɔ̀ gbo, ké ɔ ɖá, “M̀ mìɔùn mɛ wùɖù.”
Ké Pɔ́ɔ̀ pɛ́ɛ̀ ma sɔ̃, ké ɔ ɖú ma ɔ mìɔùn jè kɔ̃in zaìn kpàǐ, ké ɔ ɖá, 2“Kã́á Àgéɖépà, ḿ kpá múàǔn kà ɓɛ́ ḿ ké ḿ níǐn kɔ̃in zaìn ɓó m̀ dyúa, ɓá ɖɛ séín ɓě kɔ̃̀ jè Júù-nyɔ̀ ɓěɔ̀ kpɔ̃à ḿ wɛ̃ɛ jè dyí, ɓó zɛ̃̌ɛ̀ kɛ. 3Sepóɛɖé m̀ dyuò Júù-nyɔ̀ ɓěɔ̀ kpeɖe kè ɖɛ ɓě kɔ̃̀ jè wa zà dòǐn nyɛɛ séín dyí mìɔ. Ɔ jèɛɛ, ḿ nì m̀ ɓaàǔn, ɓɛ́ m̀ ké hwòɖǒ ku, ɓɛ́ m̀ ké ḿ ɖùǔ gbo tò.
4“Júù-nyɔ̀ séín ɓěɔ̀ dyuò kà ḿ nyu ma cĩ́ɛ sɔ̀ìn ɖé ní dyú-ɓìɖìɛ. Ḿ cĩ́ ma ɖé ḿ mìɔùn nììn nyɔ ɓěɔ̀ gbo kĩ́ín, hwɛ̀ ké ḿ cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. 5Wa ɖǎ ma ḿ dyí dyuò see, ké wa dyi jǎà cɛ̃ɛ ɓɛ́ìn ní, wa ɓɛ́ìn cɛ̃ɛ kà ḿ mɔ̀ ma nyɔ ɓě ɓɛ́ wa kpɔ̃ ma kà Júù-nyɔ̀ ɓěɔ̀ cɔ́cìɔ̀ jè dyi kóɖó-kóɖó kɛɛ ɖòɛ. Ḿ mɔ̀ ma Fáɖòsíì-nyɔ̀ cá. 6Ɖɛ kɔ̃̀ jè ḿ nyànàà dà ɓó dyi, ɓɛ́ ɓě kéà ní zaaɔ̀ cɛ̃ɛ, ɔ mɔ̀ ɖɛ ɓɛ́ ḿ dè hwòɖǒ kɔ̃ɛɛ jè. Ɔ mɔ̀ ɖɛ ɓɛ́ Gèɖèpɔ́ɔ̀ ɖáìn zɔ̃̌ɔ̀ à ɓǎ nììn ɓǎ ɓěɔ̀ nyɛ́nɛ́ín nyɛɛ jè. 7À xwéɖé-dù ɓaɖa-bùè sè sɔ̃́ɔ̀ dè ɖɛ ɓɛ́ Gèɖèpɔ́ɔ̀ ɖáìn zɔ̃̌ɔ̀ à ɓǎ nììn ɓǎ ɓěɔ̀ nyɛ́nɛ́ín nyɛɛ dyé jè hwòɖǒ kɔ̃, ké wa nì Gèɖèpɔ́ɔ̀ ɓièɛ̌n ɓó gànà-kṹún kè ɔ ɖíí hwìo ɓó hwòɖǒɛ̀-ɖé-hwɛ̀-kà. Ké wa ɖǎ ḿ kpɔ̃ ɓó hwòɖǒ-kɔ̃-dè-ɖɛ̀ dyúáɖòɔ̀ jè. Ɓɔ̌ɔ̀, Júù-nyɔ̀ ɓěɔ̀ mɔ̀ nyɔ kpɔ̃à ḿ jɛ́ɛ́ kɛ̀. 8Ɖɛ́ kɔ̃̀ jè ɓě ɖá ɔ kàmà mú ɓɛ́ nyɔǔn kéɛ jǎà po kà ɓɛ́ Gèɖèpɔ́ɔ̀ ɓɛ́ìn nyɔ gĩɔ zàà kɛɛ́?
9“Ḿ mìɔùn poɛ̀n ma hwìɖǐi kà ḿ ɓéɖé ɓɛ́ ḿ ké ma ɖɛ ɓáún-ɓáún nyu ɓó Jízɛ̀ sɔ̀à Názɛ̀ɖɛ̀-hwɔ̀ɖɔ̀ɔ̀ mú kɛɛ nyɛ́nɛ́ɔ̀ gbo vɔ̃ jèɛ, 10ké ḿ nyu ma wa ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Sáa-zà-nyɔ̀ kpa ɖɛ ɓěɔ̀ nyí ma ḿ kpé, ké ḿ po ma Gèɖèpɔ́ɔ̀-nyɔ̀ ɓáún-ɓáún kpɔɖɔ ɖeín. Ti ɓɛ́ wa ɖá wa mɛ mɛ́ ma kɛɛ, ḿ wɔ̃́ ɓɛ́ wa ké ma mɛ́. 11Ḿ dyéìn ma wa gǎ ɖé Júù-nyɔ̀ ɓěɔ̀ cɔ́cì-gbò ɓěɔ̀ mú kpɛ́-kpɛ́, ké ḿ vɔ̃ ɓɛ́ wa ké ma Gèɖèpɔ́ɔ̀ ɖɛ gbà kɔ̃ún cɛ̃. Ḿ zi ma dyoɖoún kpáuń mìɔ. Ɔ jèɛɛ, ḿ mu ma hwɔɖɔ ɓě ɓɛ́ wa kpa ma ɓóɖó-dù kà kò ɖò ɓě kɔ̃ nìɛ̀ kɛɛ mú, ɓɛ́ ḿ ké ɖé wa gǎ dyéìn ɖekè.
Pɔ́ɔ̀ cɛ̃ɛ kà ɔ nyu Gèɖèpɔ́ɔ̀ gbo dyiɛ kɛɛ jè
(Àpɔ́sò 9:1-19; 22:6-16)
12“Ti ɖòɛ̀ ɓaɖaa, ḿ nì ma ɖɛ dyúáɖòɔ̀ nyuɛń muɛń ɖe. Sáa-zà-nyɔ̀ kpa ɖɛ ɓěɔ̀ nyí ma ḿ kpé, ké wa ɖoɓo ma ḿ ɖé Dìmásìkɔ̀-hwɔ̀ɖɔ̀ɔ̀ mú. 13Ɓɔ̌ɔ̀, ḿ nì ma hwìè kɔ̃, ké ḿ dyé ma ce ɖò, ké ɔ sɔ̀ìn ma ɖé dyií ɓó dyóɖó-kò-dú-hwìɛ̀. Ceɔ̀ fã ma cá, ké ɔ zi dyóɖóɔ̀ dyí. Ké ɔ fã̀ìn ma ḿ kè nyɔ ɓě nì ma muɛń nyɛɛ ɖei. 14Ké ti à séín ɓùɖùìn ma ɓó ɓóɖó-kpàɔ̀ kɔ̃ɛɛ, ḿ wɔ̃́ ma wuɖu ɖò. Ké wuɖuɔ̀ wùɖù ma ḿ gbo ɖé Híìbúɖúù-wùɖù mú, ké ɔ ɖá, ‘Sɔ́ɔ̀, Sɔ́ɔ̀, ɖɛ́ kɔ̃̀ jè m̀ nìà ḿ gǎ dyéɛ̌n nyɛ́? Ɔ jǔ ké m̀ dyi ɓà-cù té-té ɖò ɓá taɓaín, nìí, ɔ mu m̀ puàùno.’ 15Ké ḿ ɖá, ‘Ɓɔ̌ɔ̀, m̀ mɔ̀ nyɛ́ɛ̀?’ Ké Bounɓoɔ̀ ɖá, ‘Mɔ̄ Jízɛ̀, mɔ̄ mɔ̀ nyɔ m̀ nìà gǎ dyéɛ̌n nyɛ̀. 16Sɔ́ dyí, ɓɛ́ m̀ ké dyi nyànà. Ɖɛ kɔ̃̀ jè ḿ wóɖóìn kà m̀ dyíɛɛ, ɔ kɛ̀. Ɔ mɔ̀, ɓɛ́ ḿ ké m̀ gã, ɓɛ́ m̀ ké ní gbo-nì-nyɔ̀ jǔ, ɓɛ́ m̀ ké ɖɛ ɓě kɔ̃̀ mú ɓɛ́ m̀ ɖǎà ḿ dyéɛ kè ɖɛ ɓě kɔ̃̀ mú ɓɛ́ ní mu m̀ dyí wóɖóìn nyɛɛ jè zàse nyu. 17Ní mu m̀ Júù-nyɔ̀ ɓěɔ̀ kè ɓóɖó-dù kà kò ɖò ɓěɛ̀ nyɔ ɓě kɔ̃̀ gbo ḿ nìà m̀ ɖoɓoɛń nyɛɛ xwaún gbǎàùn. 18Ḿ ɖoɓo m̀, ɓɛ́ m̀ ké waà dyéɖé ɓěɔ̀ kaà, ɓɛ́ m̀ ké wa tíe-kpòɔ̀ gbo zàìn, ɓɛ́ m̀ ké wa ceɔ̀ dyí dyà. Ḿ ɖoɓo m̀, ɓɛ́ m̀ ké wa Sétɔ̃̀ɛ̀ kpéɔ̀ gbo zà, ɓɛ́ m̀ ké wa Gèɖèpɔ́ɔ̀ gbo dyà, ɓɛ́ ɔ jǔ ké wa dyi ḿ hwìɖǐǐ taɓa ní, Gèɖèpɔ́ɔ̀ ké waà nàmàǔn ɓěɔ̀ kɔ̃in zĩ̀ìn, ɓɛ́ wa ké pá ɓéɖé ɖé nyɔ ɓě ɓɛ́ Gèɖèpɔ́ɔ̀ ɖǎà ɔ mìɔùn nììn nyɔ ɓě mú nyuɛɛ hwìɛ̀.’
Pɔ́ɔ̀ zaìn ɔ kũ̀àɔ̀ jè kɔ̃in
19“Dyéɛ, Kã́á Àgéɖépà, ḿ se ma dyí-tɛ̀mɛ̀ìn-ɖɛ̀ sɔ̀ìn ma kà ɖé dyɔún wɛ̃ɛ gbo nɔ́ɔ̀. 20Ḿ mu ma nyɔ ɓě nì ma ɖé Dìmásìkɔ̀-hwɔ̀ɖɔ̀ɔ̀ mú kɛɛ gbo kĩ́ín, ké ḿ mu ma ɖé nyɔ ɓě nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ kè ɖé Júɖìà-ɓòɖòɔ̀ dà séín nyɛɛ gbo, ké ḿ mu ma ɖé ɓóɖó-dù kà kò ɖò ɓěɛ̀ nyɔ ɓěɔ̀ mɔ̀ùn gbo ɖekè. Ḿ cɛ̃ɛ ma nyɔ séín ɓě nìà kɛ gbo kà ɓɛ́ wa ɓéɖé ɓɛ́ wa ké waà nàmàǔn-kpèɖèɔ̀ dyi táà, ɓɛ́ wa ké Gèɖèpɔ́ɔ̀ gbo gmɔ̀ìn, ɓɛ́ waà nyuu-kpèɖè ɓěɔ̀ kéɛ nyɔǔn dyí tɛ̀mɛ̀ìn kà waà kpeɖe ɓěɔ̀ ɖǎ gbo zĩàìn nyɛ. 21Ɔ jèɛɛ, Júù-nyɔ̀ ɓěɔ̀ kpɔ̃ ma ḿ ɖé Gèɖèpɔ́ɔ̀ gbǒɔ̀ mú, ké wa mɔ́ ɓɛ́ wa ké ma ḿ ɖáɓá. 22Sɔ̀ìn ɓó tia gbo, ké ɓó zɛ̃̌ɛ̀ gbo dyiɛɛ, Gèɖèpɔ́ɔ̀ kpá ḿ gbo. Ɔ jèɛɛ, ḿ nyànàà zɛ̃̌ɛ̀ dà ɓó dyú kè vɛ̀nɛ̀ dyúa dyi, ɓɛ́ ḿ kéà zàse nyuɛ̀. Ɖɛ ɓɛ́ Mózè kè kpáá-ɖɛ̀-cɛ̃-nyɔ̀ ɓěɔ̀ cɛ̃ zɔ̃̌ɔ̀, ɓɛ́ wa dyi níiń, ɔ mu ma kà kpáùn wɛ̃ɛ, mɔ́ún cɛ̃ ɖɛ dyúáɖòɔ̀ ɖekè, ké ḿ se ɓó kà kò ɖò kɔ̃in po ɖe. 23Ɖɛ wa cɛ̃ zɔ̃̌ɔ̀ kà kɛɛ, ɔ mɔ̀ kà Kɛ́ɖɛ́ìɔ̀ ɓéɖé ɓɛ́ ɔ ké ma gǎ dyéɛ. Wa ɖá ɔ mu ma nyɔ kĩ́ín-kĩ́ín ké gĩɔ wóɖóɛɛ jǔùn, ké ɔ mu ma ceɔ̀ jè Júù-nyɔ̀ ɓěɔ̀ kè ɓóɖó-dù kà kò ɖò ɓěɛ̀ nyɔ ɓěɔ̀ gbo cɛ̃ìn.”
24Ti Pɔ́ɔ̀ nì ma kà ɔ mìɔùn jè cɛ̃iń keɛɛ, Fɛ́sàɖà páná ma mú, ké ɔ ɖá, “Pɔ́ɔ̀, sã̀à nyu m̀ ní. M̀ ɖǎ céè-ɖɛ̀ cɛ̃́ mìɔ. Ɔ jèɛɛ, sã̀à nìà m̀ nyuɛń nyɛ̀.”
25Kɛɛ Pɔ́ɔ̀ ɖá, “Ɓɔ̌ɔ̀, ḿ se sã̀à-nyɔ̀o. Kɛɛ ɖɛ ḿ nìà cɛ̃iń nyɛɛ, ɔ mɔ̀ jǎà jɛ́ɛ́ cá. 26À kã́á nìà kɛ dyuò ɖɛ séín ɓěɛ̀ dyí nɔ̀mɔ̀ dyíin, ké ḿ ɓɛ́ìn náa ɔ mɔ̀ùn dyúa cɛ̃ɛ wáɖáá cá. Ḿ dyuòɛ̀ jɛ́ɛ́ cá kà ɖɛ ɓě nìà kɛ ɖò se ɔ dyí gàìn nyɛ, sepóɛɖé ɖɛ ɓě nìà kɛ se ma gã gbo kpáìn. 27Kã́á Àgéɖépà, m̀ po ɖɛ kpáá-ɖɛ̀-cɛ̃-nyɔ̀ ɓěɔ̀ céè ma kà kɛɛ jè jǎà? Ḿ dyuòɛ̀ kà m̀ po wa jè jǎà kɛ.”
28Ké Àgéɖépà cɛ̃ɛ ma Pɔ́ɔ̀ gbo, ké ɔ ɖá, “Nì hwòɖǒ ɖá m̀ ɓɛ́ìn ḿ Kɛ́ɖɛ́ì ɖeín-sí-nyɔ̀ mú nyuɛ wàɖà cáe?”
29Ké Pɔ́ɔ̀ ɖá, “Kɛbì ɔ mɛ sèɔ̌ ti tííwè mɔɔ ti tɔ̀mɔ̀ǔn-tɔ̀mɔ̀ǔn wɛ̃ɛ, ḿ nì Gèɖèpɔ́ɔ̀ dyi dièɛ̌n, ɓɛ́ mɔ́ún kè mɔ̀ùn ɔ kè nyɔ séín ɓě nìà ḿ gbo ɖùǔ tòɛ̌n ɓó zɛ̃̌ɛ̀ kɛɛ kéɔ́ má nyɔ dyúáɖò jǔ, ɔ sèìn ḿ se mɔ́ ɓɛ́ wa ké ɓě mɔ̀ùn dyɔ̀ɔ̌ ɓě nìà kɛ sɔ̃ po ɖekè.”
30Ké kã́áɔ̀ kè gɔ̌mànàɔ̀ kè Bàníì ɔ kè nyɔ ɓě nì ma ɓó wa gboɛɛ sɔ̀ ma dyí, 31ké wa cɛ̃ìn cɛ̃̀ìn ma gbo, ké wa ɖá, “Ɔ se ɖɛ kɔ̃̀ jè à ké ɔ kpɔɖɔ ɖeín po, mɔɔ ɓɛ́ à ké ɔ ɖáɓáa ɖò nyuɛń nì.” 32Ké Àgéɖépà cɛ̃ɛ ma Fɛ́sàɖà gbo, ké ɔ ɖá, “Ɔ jǔ ké gàa nìà kɛ seɛ ma cɛ̃ kà ɔ mu ma zaa nìà kɛ Síízɛ̀ gbo kpaùn wɛ̃ɛ ní, nìí, à muɔ́ má ɔ buɛ̀ìn.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.