Àpɔ́sò 18
18
Pɔ́ɔ̀ nì ɖé Kɔ́ɖèìn-hwɔ̀ɖɔ̀ɔ̀ mú
1Ti ɖɛa ɖǎ ma dyi ziɛɛ, Pɔ́ɔ̀ sɔ̀ ma ɖé Átɛ̃̀-hwɔ̀ɖɔ̀ɔ̀ mú, ké ɔ mu ma ɖé Kɔ́ɖèìn-hwɔ̀ɖɔ̀ɔ̀ mú. 2Ké ɔ dyɛ̀ìn ma ɖé Júù-gàà ɖò kɔ̃̀ nyɛ́nɛ́ mɔ̀ ma Àkúɖà kɛɛ dyi. Ɔ wóɖóìn ma ɖé Pɔ̃́tɔ̀-ɓòɖòɔ̀ kɔ̃. Ɔ kè ɔ gmàà Pìɖìsíɖà sɔ̀ ma ɖé Ítáɖè-ɓòɖòɔ̀ kɔ̃ ɖie, ké wa mu ma ɖé Kɔ́ɖèìn-hwɔ̀ɖɔ̀ɔ̀ mú. Wa sɔ̀ ma ɖé Ítáɖè-ɓòɖòɔ̀ kɔ̃, sepóɛɖé Kɔ́ɖɔ́ɖìàsì mɔ̀à Wóɖóùn-kã̀ǎɔ̀ kɛɛ cɛ̃ɛ ma Júù-nyɔ̀ séín ɓěɔ̀ gbo, ɓɛ́ wa ké ɖé Wóɖóùn-hwɔ̀ɖɔ̀ɔ̀ mú sɔ̀. Ké Pɔ́ɔ̀ mu ma ɖé wa gbo, 3ké ɔ tã́ìn ma ɖé, sepóɛɖé ɔ kè wa kè dyuò ma sɛ́ɖɛ́ dyúáɖò. Ké ɔ kè wa nyu ma kũ̀à. Kũ̀à wa nyu ma kɛɛ, ɔ mɔ̀ nimii-kùɖùù ɖɔ-mú-nyu-kũ̀à. 4Ké Pɔ́ɔ̀ wùɖù ma nyɔ ɓěɔ̀ gbo ɖé Júù-nyɔ̀ ɓěɔ̀ cɔ́cì-gbòɔ̀ mú, ɓó Gèɖèpɔ́ɔ̀ fɔ̀-wè séín xwíníín. Ɔ vɔ̃ ɓɛ́ Júù-nyɔ̀ ɓěɔ̀ kè Gíɖíì-nyɔ̀ ɓěɔ̀ ké ma ɔ wuɖuɔ̀ hwòɖǒ kɔ̃ dè.
5Ti Sáɖè kè Tímétè sɔ̀ ma ɖé Màsèdónìà-ɓòɖòɔ̀ kɔ̃, ké wa dyi ma ɖé Pɔ́ɔ̀ gboɛɛ, Pɔ́ɔ̀ po ma ɔ mìɔùn bɔ̃̌ nɔ̀mɔ̀ dyíinɔ̀ cɛ̃-cɛ̃ mú gàná cá. Ɔ nyu ma zàse ɓó Júù-nyɔ̀ ɓěɔ̀ gbo kà ɓɛ́ Jízɛ̀ mɔ̀ ma Kɛ́ɖɛ́ìɔ̀ kɛ. 6Kɛɛ ti wa vɔ̃ ma ɔ gbo, ké wa ɖá ma ɔ nyɛ́nɛ́ gbà kɛɛ, ɔ ɓaɖa ma ɔ ɖɔɔ̀ mú, ké ɔ cɛ̃ɛ wa gbo, ké ɔ ɖá, “Ɓě mìɔùn nììn nyɔmɔɔ̀ mu ɓě dúún sèìn. Ḿ se ɔ kpa dyí ɖúɛ mu. Wéɛ̀ sɔ̀ìn dà ké dyúa muɛɛ, ní muá ɓóɖó-dù kà kò ɖò ɓěɛ̀ nyɔ ɓěɔ̀ gbo muùn.” 7Ké ɔ sɔ̀ ma ɖé dyí, ké ɔ mu ma ɖé gàa ɖò kɔ̃̀ nyɛ́nɛ́ mɔ̀ Tátìɛ̀ Jɔ́sɔ̀ɖɔ̀ kɛɛ ɓíɖí-taún. Gàaɔ̀ mɔ̀ ma Gèɖèpɔ́ɔ̀ ɓiè-nyɔ̀. Ɔ gbǒɔ̀ kɔ ma ɓó Júù-nyɔ̀ ɓěɔ̀ cɔ́cì-gbòɔ̀ gbo dyí. 8Kíɖípàsì ɓɛ́ ɔ mɔ̀ ma Júù-nyɔ̀ ɓěɔ̀ cɔ́cì-gbòɔ̀ wuɖuí-kɔ̃̀-nyɔ̀ kɛ kè ɔ ɓíɖí-gbǒ-xwíníín-nyɔ̀ séín ɓěɔ̀ taɓa ma Bounɓoɔ̀ hwìɖǐǐ. Ké Kɔ́ɖèìn-nyɔ̀ tɔ̀ɔ̀ ɓěɔ̀ ɓáún-ɓáún wɔ̃́ ma Pɔ́ɔ̀ɛ̀ wuɖu ɓěɔ̀, ké wa taɓa ma Gèɖèpɔ́ɔ̀ hwìɖǐǐ, ké wa po ma wa níɔ.
9Ɓó máaún-wè ɖòɛ̀ ɓaɖaa, Bounɓoɔ̀ cɛ̃ɛ ma Pɔ́ɔ̀ gbo ɖé dyí-tɛ̀mɛ̀ìn-ɖɛ̀ ɖò mú, ké ɔ ɖá, “Mɔ̀ǔn ɖá ɓɛ́ m̀ ké fɛ̃̀ìn. Ku dúún, ɓɛ́ m̀ ké ní wuɖuɔ̀ nyɔ ɓěɔ̀ gbo cɛ̃. Mɔ̀ǔn ɖá ɓɛ́ m̀ ké wùɖùɛ̀ ɓɔ́, 10sepóɛɖé ḿ nì ɓó m̀ gbo, ké nyɔ ɖò se m̀ gbo dyiɛ́ mu, ɓɛ́ ɔ ké m̀ gbà-kà kpɔ̃. Ḿ ɓéɖé nyɔ ɓáún-ɓáún ɓě nɔ̄ hwɔɖɔɛ̀ mú.” 11Ɔ jèɛɛ, Pɔ́ɔ̀ gã̀ ma ɖé wa gbo dyi ɓó zɔ̃ dyúáɖò kè ɓɛ́ìn-hwìɛ̀, ké ɔ nì ma Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ wa tɛ̀mɛ̀ǐn.
12Kɛɛ ti Gáɖìò kɔ̃̀ ma Àkédyà-ɓòɖòɔ̀ wuɖuíɛɛ, Júù-nyɔ̀ ɓěɔ̀ poìn ma dyí, ké wa kpɔ̃ ma Pɔ́ɔ̀, ké wa kpa ma ɔ gɔ̌mànàɔ̀ dyúa, 13ké wa ɖá, “Gàa nìà kɛɛ, ɔ nì nyɔǔn pɛ́í poɛń, ɓɛ́ wa ké Gèɖèpɔ́ɔ̀ ɓiè ɖé hwìè kò-kò se gmaɔ̀ dyí ɓáa mú.”
14Kɛɛ wùɖùɛ̀ ɓɛ́ Pɔ́ɔ̀ ké ma kà wùɖù nyɛ̀nɛ̀ɛ̀ cá kɛɛ, Gáɖìò cɛ̃ɛ ma Júù-nyɔ̀ ɓěɔ̀ gbo, ké ɔ ɖá, “Ḿ ɖáo, Júù-nyɔ̀ ɓě, ɔ jǔ ké ɔ dyiɔ́ ɖɛ gbà kè gbá-gbá vɛ̀nɛ̀ ɖò jè jǔǐn, nìí, ɔ nɔ̀mɔ̀ dyíin ɓɛ́ ḿ kéɔ́ ɓěɛ̀ kpeɖeɔ̀ hwòɖǒ kùìn. 15Kɛɛ ɔ jǔ ké ɔ dyi wuɖu kè nyɛ́nɛ́ ɔ kè ɓě mìɔùn nììn gma jè jǔǐn, nìí, ɓě mìɔùn mɛ dyéɛ jè gbo. Ḿ se wɔ̃́ ɓɛ́ ḿ ké ɖɛ ɓě nìàǒ wɛɛ wɔ̃ po.” 16Ké ɔ kúmú ma wa ɓó ɔ dyúa dyi. 17Ké Júù-nyɔ̀ séín ɓěɔ̀ kpɔ̃ ma Sɔ́sènì ɓɛ́ ɔ mɔ̀ ma Júù-nyɔ̀ ɓěɔ̀ cɔ́cì-gbòɔ̀ wuɖuí-kɔ̃̀-nyɔ̀ kɛ, ké wa ɓaɖa ma ɔ ɓó gɔ̌mànàɔ̀ dyúa. Kɛɛ Gáɖìò se ma ɖɛ ɓěa ɖɛ ɖá.
Pɔ́ɔ̀ kɔ́ìn ɖé Ã́tìà-hwɔ̀ɖɔ̀ɔ̀ mú ɖe
18Ti wé ɓáún-ɓáún ɖǎ ma ziɛɛ, Pɔ́ɔ̀ po ma ɔ ɖíí cɔ́cì-nyɔ̀ ɓěɔ̀ hwuɖu ɖǎ hwɔ ɖé Kɔ́ɖèìn-hwɔ̀ɖɔ̀ɔ̀ mú. Ké ɔ mùìn ma dyóóɔ̀ kɔ̃, ɓɛ́ ɔ ké ma ɖé Síwíɖíà-ɓòɖòɔ̀ kɔ̃ mu. Ɔ kè Pìɖìsíɖà kè Àkúɖà mu ma. Ké ɔ cɛ̃ ma ɔ míɔ̀ ɖé Sɛ̃̀kíɖíà-hwɔ̀ɖɔ̀ɔ̀ mú, sepóɛɖé ɔ ɖǎ ma ɖɛ ɖò jè wuɖu ɖi ɓó Gèɖèpɔ́ɔ̀ gbo. 19Ké wa nyini ma ɖé Ɛ́fɛ́sà-hwɔ̀ɖɔ̀ɔ̀ mú, ké ɔ sè ma ɓó Pìɖìsíɖà kè Àkúɖà. Hwɛ̀ ɓɛ́ ɔ ké ma ɓó wa sèɛɛ, ɔ mìɔùn mu ma ɖé Júù-nyɔ̀ ɓěɔ̀ cɔ́cì-gbòɔ̀ mú, ké ɔ wùɖù ma Júù-nyɔ̀ ɓěɔ̀ gbo. 20Ké wa ɓaà ma ɔ, ɓɛ́ ɔ ké ma ɖé wé goun wè wa gbo nyu, kɛɛ ɔ nɔ́ɔ̀ ma ní. 21Ké ɔ po ma wa hwuɖu ɖǎ hwɔ, ké ɔ ɖá, “Gèɖèpɔ́ɔ̀ dyi wɔ̃́ín, ní mu nɔ̄ ɓě gbo dyiìn ɖe.” Ké ɔ sɔ̀ ma ɓó Ɛ́fɛ́sà-hwɔ̀ɖɔ̀ɔ̀ mú, ké ɔ mùìn ma dyóóɔ̀ kɔ̃.
22Ké ɔ nyini ma ɖé Sɛ̀sɛ̀wíɖíà-hwɔ̀ɖɔ̀ɔ̀ mú, ké ɔ zà ma cɔ́cì-nyɔ̀ ɓěɔ̀ nyíɔún. Hwɛ̀ ké ɔ mu ma ɖé Ã́tìà-hwɔ̀ɖɔ̀ɔ̀ mú. 23Ti ɔ ɖǎ ma ɖé wé gbɛ̀ǐ-gbɛ̀ǐ nyuɛɛ, ɔ sɔ̀ ma ɖé dyí, ké ɔ kpa ma ɖé Gàɖézìà-ɓòɖòɔ̀ kè Fíɖíjìà-ɓòɖòɔ̀ kɔ̃ dyi téɛ. Ké ɔ kpa ma nyɔ ɓě ɓɛ́ wa taɓa ma ɖé Gèɖèpɔ́ɔ̀ hwìɖǐǐɛɛ kpéí poɛ.
Àpɔ́ɖè cɛ̃ Gèɖèpɔ́ɔ̀-wùɖùɔ̀ ɖé Ɛ́fɛ́sà-hwɔ̀ɖɔ̀ɔ̀ kè Kɔ́ɖèìn-hwɔ̀ɖɔ̀ɔ̀ mú
24Ɓó tia ɓaɖaa, Júù-gàà ɖò kɔ̃̀ nyɛ́nɛ́ mɔ̀ ma Àpɔ́ɖè kɛɛ dyi ma ɖé Ɛ́fɛ́sà-hwɔ̀ɖɔ̀ɔ̀ mú. Ɔ wóɖóìn ma ɖé Ɛ̀ɖìzánìà-hwɔ̀ɖɔ̀ɔ̀ mú. Ké ɔ mɔ̀ ma céè-ɖɛ̀ dyuò-nyɔ̀ vɛ̀nɛ̀, ké ɔ dyuò Gèɖèpɔ́ɔ̀-cèè-ɖɛ̀ ɓěɔ̀ nyɔ tɛ̀mɛ̀ìn nɔ̀mɔ̀ dyíin. 25Wa tɛ̀mɛ̀ìn ma ɔ mɔ̀ùn Bounɓoɔ̀ hwìèɔ̀ kĩ́ín. Ɔ mɔ̀ ma hwòɖǒɛ̀-fṹà-nyɔ̀. Ɔ dyuò ma Jɔ̃́ɔ́ nyɔ-níɔ-po-poɔ̀ jè dyí ɖòùn, kɛɛ ti ɔ nì ma nyɔ ɓěɔ̀ gbo wùɖùɛ̌n nyɛɛ, ɔ tɛ̀mɛ̀ìn ma wa ɖɛ ɓě ɓá ma Jízɛ̀ jè dyíɛɛ jɛ́ɛ́ cá. 26Ɔ ɖú ma wùɖù kpàǐ ɖé Júù-nyɔ̀ ɓěɔ̀ cɔ́cì-gbòɔ̀ mú, ké ɔ se ma ɖé fã̀à-kà wùɖù. Pìɖìsíɖà kè Àkúɖà wɔ̃́ ma ɔ wuɖu ɓěɔ̀, ké wa ɖú ma ɔ dyí, ké wa zàìn ma ɔ Gèɖèpɔ́ɔ̀ hwìèɔ̀ da nɔ̀mɔ̀ dyíin cá. 27Ké ti Àpɔ́ɖè mɔ́ ɓɛ́ ɔ ké ma dyóóɔ̀ péɖé, ɓɛ́ ɔ ké ma ɖé Àkédyà-ɓòɖòɔ̀ kɔ̃ muɛɛ, ɔ ɖíí cɔ́cì-nyɔ̀ ɓěɔ̀ po ma ɔ kpéí. Ké wa tò ma céè-ɖɛ̀ ɖé ɖeín-nà-nyɔ̀ ɓě nì ma ɖéɛɛ gbo, ɓɛ́ wa ké ma ɔ jè dyi kpɔ̃. Ti ɔ nyini ma ɖéɛɛ, ɔ kpá ma nyɔ ɓě ɓɛ́ Gèɖèpɔ́ɔ̀ kpeɖe nɔ̀mɔ̀ dyíinɔ̀ ɖǎa ma nyu ké wa ɖǎ ma Gèɖèpɔ́ɔ̀ hwìɖǐǐ taɓa kɛɛ gbo mìɔ, 28sepóɛɖé ɔ tɛ̀mɛ̀ìn ma nyɔ ɓěɔ̀ dyí sɔ̀ìn ɖé Gèɖèpɔ́ɔ̀-cèè-ɖɛ̀ ɓěɔ̀ mú kà ɓɛ́ Jízɛ̀ mɔ̀ ma Kɛ́ɖɛ́ìɔ̀ kɛ, ké ɔ ɖáɓá ma Júù-nyɔ̀ ɓěɔ̀ wĩín dyi mìɔ cá ɓó nyɔǔn séín dyúa.
Currently Selected:
Àpɔ́sò 18: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Àpɔ́sò 18
18
Pɔ́ɔ̀ nì ɖé Kɔ́ɖèìn-hwɔ̀ɖɔ̀ɔ̀ mú
1Ti ɖɛa ɖǎ ma dyi ziɛɛ, Pɔ́ɔ̀ sɔ̀ ma ɖé Átɛ̃̀-hwɔ̀ɖɔ̀ɔ̀ mú, ké ɔ mu ma ɖé Kɔ́ɖèìn-hwɔ̀ɖɔ̀ɔ̀ mú. 2Ké ɔ dyɛ̀ìn ma ɖé Júù-gàà ɖò kɔ̃̀ nyɛ́nɛ́ mɔ̀ ma Àkúɖà kɛɛ dyi. Ɔ wóɖóìn ma ɖé Pɔ̃́tɔ̀-ɓòɖòɔ̀ kɔ̃. Ɔ kè ɔ gmàà Pìɖìsíɖà sɔ̀ ma ɖé Ítáɖè-ɓòɖòɔ̀ kɔ̃ ɖie, ké wa mu ma ɖé Kɔ́ɖèìn-hwɔ̀ɖɔ̀ɔ̀ mú. Wa sɔ̀ ma ɖé Ítáɖè-ɓòɖòɔ̀ kɔ̃, sepóɛɖé Kɔ́ɖɔ́ɖìàsì mɔ̀à Wóɖóùn-kã̀ǎɔ̀ kɛɛ cɛ̃ɛ ma Júù-nyɔ̀ séín ɓěɔ̀ gbo, ɓɛ́ wa ké ɖé Wóɖóùn-hwɔ̀ɖɔ̀ɔ̀ mú sɔ̀. Ké Pɔ́ɔ̀ mu ma ɖé wa gbo, 3ké ɔ tã́ìn ma ɖé, sepóɛɖé ɔ kè wa kè dyuò ma sɛ́ɖɛ́ dyúáɖò. Ké ɔ kè wa nyu ma kũ̀à. Kũ̀à wa nyu ma kɛɛ, ɔ mɔ̀ nimii-kùɖùù ɖɔ-mú-nyu-kũ̀à. 4Ké Pɔ́ɔ̀ wùɖù ma nyɔ ɓěɔ̀ gbo ɖé Júù-nyɔ̀ ɓěɔ̀ cɔ́cì-gbòɔ̀ mú, ɓó Gèɖèpɔ́ɔ̀ fɔ̀-wè séín xwíníín. Ɔ vɔ̃ ɓɛ́ Júù-nyɔ̀ ɓěɔ̀ kè Gíɖíì-nyɔ̀ ɓěɔ̀ ké ma ɔ wuɖuɔ̀ hwòɖǒ kɔ̃ dè.
5Ti Sáɖè kè Tímétè sɔ̀ ma ɖé Màsèdónìà-ɓòɖòɔ̀ kɔ̃, ké wa dyi ma ɖé Pɔ́ɔ̀ gboɛɛ, Pɔ́ɔ̀ po ma ɔ mìɔùn bɔ̃̌ nɔ̀mɔ̀ dyíinɔ̀ cɛ̃-cɛ̃ mú gàná cá. Ɔ nyu ma zàse ɓó Júù-nyɔ̀ ɓěɔ̀ gbo kà ɓɛ́ Jízɛ̀ mɔ̀ ma Kɛ́ɖɛ́ìɔ̀ kɛ. 6Kɛɛ ti wa vɔ̃ ma ɔ gbo, ké wa ɖá ma ɔ nyɛ́nɛ́ gbà kɛɛ, ɔ ɓaɖa ma ɔ ɖɔɔ̀ mú, ké ɔ cɛ̃ɛ wa gbo, ké ɔ ɖá, “Ɓě mìɔùn nììn nyɔmɔɔ̀ mu ɓě dúún sèìn. Ḿ se ɔ kpa dyí ɖúɛ mu. Wéɛ̀ sɔ̀ìn dà ké dyúa muɛɛ, ní muá ɓóɖó-dù kà kò ɖò ɓěɛ̀ nyɔ ɓěɔ̀ gbo muùn.” 7Ké ɔ sɔ̀ ma ɖé dyí, ké ɔ mu ma ɖé gàa ɖò kɔ̃̀ nyɛ́nɛ́ mɔ̀ Tátìɛ̀ Jɔ́sɔ̀ɖɔ̀ kɛɛ ɓíɖí-taún. Gàaɔ̀ mɔ̀ ma Gèɖèpɔ́ɔ̀ ɓiè-nyɔ̀. Ɔ gbǒɔ̀ kɔ ma ɓó Júù-nyɔ̀ ɓěɔ̀ cɔ́cì-gbòɔ̀ gbo dyí. 8Kíɖípàsì ɓɛ́ ɔ mɔ̀ ma Júù-nyɔ̀ ɓěɔ̀ cɔ́cì-gbòɔ̀ wuɖuí-kɔ̃̀-nyɔ̀ kɛ kè ɔ ɓíɖí-gbǒ-xwíníín-nyɔ̀ séín ɓěɔ̀ taɓa ma Bounɓoɔ̀ hwìɖǐǐ. Ké Kɔ́ɖèìn-nyɔ̀ tɔ̀ɔ̀ ɓěɔ̀ ɓáún-ɓáún wɔ̃́ ma Pɔ́ɔ̀ɛ̀ wuɖu ɓěɔ̀, ké wa taɓa ma Gèɖèpɔ́ɔ̀ hwìɖǐǐ, ké wa po ma wa níɔ.
9Ɓó máaún-wè ɖòɛ̀ ɓaɖaa, Bounɓoɔ̀ cɛ̃ɛ ma Pɔ́ɔ̀ gbo ɖé dyí-tɛ̀mɛ̀ìn-ɖɛ̀ ɖò mú, ké ɔ ɖá, “Mɔ̀ǔn ɖá ɓɛ́ m̀ ké fɛ̃̀ìn. Ku dúún, ɓɛ́ m̀ ké ní wuɖuɔ̀ nyɔ ɓěɔ̀ gbo cɛ̃. Mɔ̀ǔn ɖá ɓɛ́ m̀ ké wùɖùɛ̀ ɓɔ́, 10sepóɛɖé ḿ nì ɓó m̀ gbo, ké nyɔ ɖò se m̀ gbo dyiɛ́ mu, ɓɛ́ ɔ ké m̀ gbà-kà kpɔ̃. Ḿ ɓéɖé nyɔ ɓáún-ɓáún ɓě nɔ̄ hwɔɖɔɛ̀ mú.” 11Ɔ jèɛɛ, Pɔ́ɔ̀ gã̀ ma ɖé wa gbo dyi ɓó zɔ̃ dyúáɖò kè ɓɛ́ìn-hwìɛ̀, ké ɔ nì ma Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ wa tɛ̀mɛ̀ǐn.
12Kɛɛ ti Gáɖìò kɔ̃̀ ma Àkédyà-ɓòɖòɔ̀ wuɖuíɛɛ, Júù-nyɔ̀ ɓěɔ̀ poìn ma dyí, ké wa kpɔ̃ ma Pɔ́ɔ̀, ké wa kpa ma ɔ gɔ̌mànàɔ̀ dyúa, 13ké wa ɖá, “Gàa nìà kɛɛ, ɔ nì nyɔǔn pɛ́í poɛń, ɓɛ́ wa ké Gèɖèpɔ́ɔ̀ ɓiè ɖé hwìè kò-kò se gmaɔ̀ dyí ɓáa mú.”
14Kɛɛ wùɖùɛ̀ ɓɛ́ Pɔ́ɔ̀ ké ma kà wùɖù nyɛ̀nɛ̀ɛ̀ cá kɛɛ, Gáɖìò cɛ̃ɛ ma Júù-nyɔ̀ ɓěɔ̀ gbo, ké ɔ ɖá, “Ḿ ɖáo, Júù-nyɔ̀ ɓě, ɔ jǔ ké ɔ dyiɔ́ ɖɛ gbà kè gbá-gbá vɛ̀nɛ̀ ɖò jè jǔǐn, nìí, ɔ nɔ̀mɔ̀ dyíin ɓɛ́ ḿ kéɔ́ ɓěɛ̀ kpeɖeɔ̀ hwòɖǒ kùìn. 15Kɛɛ ɔ jǔ ké ɔ dyi wuɖu kè nyɛ́nɛ́ ɔ kè ɓě mìɔùn nììn gma jè jǔǐn, nìí, ɓě mìɔùn mɛ dyéɛ jè gbo. Ḿ se wɔ̃́ ɓɛ́ ḿ ké ɖɛ ɓě nìàǒ wɛɛ wɔ̃ po.” 16Ké ɔ kúmú ma wa ɓó ɔ dyúa dyi. 17Ké Júù-nyɔ̀ séín ɓěɔ̀ kpɔ̃ ma Sɔ́sènì ɓɛ́ ɔ mɔ̀ ma Júù-nyɔ̀ ɓěɔ̀ cɔ́cì-gbòɔ̀ wuɖuí-kɔ̃̀-nyɔ̀ kɛ, ké wa ɓaɖa ma ɔ ɓó gɔ̌mànàɔ̀ dyúa. Kɛɛ Gáɖìò se ma ɖɛ ɓěa ɖɛ ɖá.
Pɔ́ɔ̀ kɔ́ìn ɖé Ã́tìà-hwɔ̀ɖɔ̀ɔ̀ mú ɖe
18Ti wé ɓáún-ɓáún ɖǎ ma ziɛɛ, Pɔ́ɔ̀ po ma ɔ ɖíí cɔ́cì-nyɔ̀ ɓěɔ̀ hwuɖu ɖǎ hwɔ ɖé Kɔ́ɖèìn-hwɔ̀ɖɔ̀ɔ̀ mú. Ké ɔ mùìn ma dyóóɔ̀ kɔ̃, ɓɛ́ ɔ ké ma ɖé Síwíɖíà-ɓòɖòɔ̀ kɔ̃ mu. Ɔ kè Pìɖìsíɖà kè Àkúɖà mu ma. Ké ɔ cɛ̃ ma ɔ míɔ̀ ɖé Sɛ̃̀kíɖíà-hwɔ̀ɖɔ̀ɔ̀ mú, sepóɛɖé ɔ ɖǎ ma ɖɛ ɖò jè wuɖu ɖi ɓó Gèɖèpɔ́ɔ̀ gbo. 19Ké wa nyini ma ɖé Ɛ́fɛ́sà-hwɔ̀ɖɔ̀ɔ̀ mú, ké ɔ sè ma ɓó Pìɖìsíɖà kè Àkúɖà. Hwɛ̀ ɓɛ́ ɔ ké ma ɓó wa sèɛɛ, ɔ mìɔùn mu ma ɖé Júù-nyɔ̀ ɓěɔ̀ cɔ́cì-gbòɔ̀ mú, ké ɔ wùɖù ma Júù-nyɔ̀ ɓěɔ̀ gbo. 20Ké wa ɓaà ma ɔ, ɓɛ́ ɔ ké ma ɖé wé goun wè wa gbo nyu, kɛɛ ɔ nɔ́ɔ̀ ma ní. 21Ké ɔ po ma wa hwuɖu ɖǎ hwɔ, ké ɔ ɖá, “Gèɖèpɔ́ɔ̀ dyi wɔ̃́ín, ní mu nɔ̄ ɓě gbo dyiìn ɖe.” Ké ɔ sɔ̀ ma ɓó Ɛ́fɛ́sà-hwɔ̀ɖɔ̀ɔ̀ mú, ké ɔ mùìn ma dyóóɔ̀ kɔ̃.
22Ké ɔ nyini ma ɖé Sɛ̀sɛ̀wíɖíà-hwɔ̀ɖɔ̀ɔ̀ mú, ké ɔ zà ma cɔ́cì-nyɔ̀ ɓěɔ̀ nyíɔún. Hwɛ̀ ké ɔ mu ma ɖé Ã́tìà-hwɔ̀ɖɔ̀ɔ̀ mú. 23Ti ɔ ɖǎ ma ɖé wé gbɛ̀ǐ-gbɛ̀ǐ nyuɛɛ, ɔ sɔ̀ ma ɖé dyí, ké ɔ kpa ma ɖé Gàɖézìà-ɓòɖòɔ̀ kè Fíɖíjìà-ɓòɖòɔ̀ kɔ̃ dyi téɛ. Ké ɔ kpa ma nyɔ ɓě ɓɛ́ wa taɓa ma ɖé Gèɖèpɔ́ɔ̀ hwìɖǐǐɛɛ kpéí poɛ.
Àpɔ́ɖè cɛ̃ Gèɖèpɔ́ɔ̀-wùɖùɔ̀ ɖé Ɛ́fɛ́sà-hwɔ̀ɖɔ̀ɔ̀ kè Kɔ́ɖèìn-hwɔ̀ɖɔ̀ɔ̀ mú
24Ɓó tia ɓaɖaa, Júù-gàà ɖò kɔ̃̀ nyɛ́nɛ́ mɔ̀ ma Àpɔ́ɖè kɛɛ dyi ma ɖé Ɛ́fɛ́sà-hwɔ̀ɖɔ̀ɔ̀ mú. Ɔ wóɖóìn ma ɖé Ɛ̀ɖìzánìà-hwɔ̀ɖɔ̀ɔ̀ mú. Ké ɔ mɔ̀ ma céè-ɖɛ̀ dyuò-nyɔ̀ vɛ̀nɛ̀, ké ɔ dyuò Gèɖèpɔ́ɔ̀-cèè-ɖɛ̀ ɓěɔ̀ nyɔ tɛ̀mɛ̀ìn nɔ̀mɔ̀ dyíin. 25Wa tɛ̀mɛ̀ìn ma ɔ mɔ̀ùn Bounɓoɔ̀ hwìèɔ̀ kĩ́ín. Ɔ mɔ̀ ma hwòɖǒɛ̀-fṹà-nyɔ̀. Ɔ dyuò ma Jɔ̃́ɔ́ nyɔ-níɔ-po-poɔ̀ jè dyí ɖòùn, kɛɛ ti ɔ nì ma nyɔ ɓěɔ̀ gbo wùɖùɛ̌n nyɛɛ, ɔ tɛ̀mɛ̀ìn ma wa ɖɛ ɓě ɓá ma Jízɛ̀ jè dyíɛɛ jɛ́ɛ́ cá. 26Ɔ ɖú ma wùɖù kpàǐ ɖé Júù-nyɔ̀ ɓěɔ̀ cɔ́cì-gbòɔ̀ mú, ké ɔ se ma ɖé fã̀à-kà wùɖù. Pìɖìsíɖà kè Àkúɖà wɔ̃́ ma ɔ wuɖu ɓěɔ̀, ké wa ɖú ma ɔ dyí, ké wa zàìn ma ɔ Gèɖèpɔ́ɔ̀ hwìèɔ̀ da nɔ̀mɔ̀ dyíin cá. 27Ké ti Àpɔ́ɖè mɔ́ ɓɛ́ ɔ ké ma dyóóɔ̀ péɖé, ɓɛ́ ɔ ké ma ɖé Àkédyà-ɓòɖòɔ̀ kɔ̃ muɛɛ, ɔ ɖíí cɔ́cì-nyɔ̀ ɓěɔ̀ po ma ɔ kpéí. Ké wa tò ma céè-ɖɛ̀ ɖé ɖeín-nà-nyɔ̀ ɓě nì ma ɖéɛɛ gbo, ɓɛ́ wa ké ma ɔ jè dyi kpɔ̃. Ti ɔ nyini ma ɖéɛɛ, ɔ kpá ma nyɔ ɓě ɓɛ́ Gèɖèpɔ́ɔ̀ kpeɖe nɔ̀mɔ̀ dyíinɔ̀ ɖǎa ma nyu ké wa ɖǎ ma Gèɖèpɔ́ɔ̀ hwìɖǐǐ taɓa kɛɛ gbo mìɔ, 28sepóɛɖé ɔ tɛ̀mɛ̀ìn ma nyɔ ɓěɔ̀ dyí sɔ̀ìn ɖé Gèɖèpɔ́ɔ̀-cèè-ɖɛ̀ ɓěɔ̀ mú kà ɓɛ́ Jízɛ̀ mɔ̀ ma Kɛ́ɖɛ́ìɔ̀ kɛ, ké ɔ ɖáɓá ma Júù-nyɔ̀ ɓěɔ̀ wĩín dyi mìɔ cá ɓó nyɔǔn séín dyúa.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.