Àpɔ́sò 17
17
Pɔ́ɔ̀ kè Sáɖè mu ɖé Tɛ̀sàɖònákà-hwɔ̀ɖɔ̀ɔ̀ mú
1Ké Pɔ́ɔ̀ kè Sáɖè zĩ̀ìn ma ɖé Ã́fípòɖè-hwɔ̀ɖɔ̀ɔ̀ kè Àpàɖónìà-hwɔ̀ɖɔ̀ɔ̀ mú, ké wa dyi ma ɖé Tɛ̀sàɖònákà-hwɔ̀ɖɔ̀ɔ̀ mú, dɛ̀ Júù-nyɔ̀ ɓěɔ̀ cɔ́cì-gbò ɓěɔ̀ ɖò nì ma kɛ. 2Ké Pɔ́ɔ̀ mu ma ɖé Júù-nyɔ̀ ɓěɔ̀ cɔ́cì-gbòɔ̀ mú, sepóɛɖé ɔ mɔ̀ ma ɔ nyuu-ɖɛ̀ kĩ́ín. Ké ɓó Gèɖèpɔ́ɔ̀ fɔ̀-wè tã ɓě kɔ ɓó dyíɛɛ xwíníín nyɛɛ, ɔ zaìn ma wa ɖɛ ɓě sɔ̀ìn ɖé Gèɖèpɔ́ɔ̀-cèè-ɖɛ̀ ɓěɔ̀ múɛɛ gbo kɔ̃in. 3Ɔ zaìn ma wa gbo kɔ̃in, ké ɔ cɛ̃ ma ɔ xwíníín ɓěɔ̀ wa gbo kà ɓɛ́ Kɛ́ɖɛ́ìɔ̀ ɓéɖé ɓɛ́ ɔ ké ma gǎ dyé, ɔ kè ɓɛ́ ɔ ké ma gĩɔ wóɖóɛ. Ɔ cɛ̃ɛ, ké ɔ ɖá, “Jízɛ̀ kɔ̃̀ jè ɓɛ́ ḿ nìà ɓě gbo cɛ̃iń nyɛɛ, ɔ mɔ̀ Kɛ́ɖɛ́ìɔ̀.” 4Ké wa ɖíɛ́ ɓě kpɔ̃ ma ɔ wuɖuɔ̀ dyi, ké wa zi ma Pɔ́ɔ̀ kè Sáɖè gbo. Gíɖíì-nyɔ̀ ɓě ɓɛ́ wa ɓiè ma Gèɖèpɔ́ɔ̀ kɛ kè màa vɛ̀nɛ̀-vɛ̀nɛ̀ ɓěɔ̀ ɓáún-ɓáún zi ma wa gbo ɖekè.
5Kɛɛ Júù-nyɔ̀ ɓěɔ̀ kpá ma hwɛ̀nɛ̌ǐn, ké wa ɖú ma kpeɖeɛ̀-dyíin-nyìnììn-nyɔ̀ ɓě ɓɛ́ wa nì ma ɖé hwɔɖɔɔ̀ múɛɛ dyí, ké wa poìn ma nyɔ kúɖúú ɓěɔ̀ dyí. Ké wa po ma zàǔn-zàǔn ɖé hwɔɖɔɔ̀ mú dyi, ké wa hwɛ̀ìn ma Jésììn gbǒɔ̀ ɖei. Wa nì ma vɔ̃uń ɓɛ́ wa ké Pɔ́ɔ̀ kè Sáɖè gbǒɔ̀ mú zà, ɓɛ́ wa ké wa ɖé nyɔ ɓěɔ̀ gbo síìn. 6Ti wa se ma wa dyéɛ ɓɛ́ìn nyɛɛ, wa kpa ma Jésììn kè cɔ́cì-nyɔ̀ ɖíɛ́ ɓě nì ma ɖéɛɛ jiɖiɛ ɖé hwɔɖɔɔ̀ wuɖuí-kɔ̃̀-nyɔ̀ ɓěɔ̀ dyúa. Ké wa páná ma mú, ké wa ɖá, “Gàa ɓě ɓɛ́ wa ɖǎà zàǔn-zàǔn ɓáún-ɓáún ɖé ɓóɖó-kpàà dà séín dyi poɛɛ, wa ɖǎ nɔ̄ dyi kàǔn, 7ké Jésììn ɖǎ wa dyi kpɔ̃. Wa nì ɖɛ ɓě ɓɛ́ Síízɛ̀ mɔ̀à Wóɖóùn-kã̀ǎɔ̀ kɛɛ ɖǎ ma gbɔ poɛɛ dyií dyi poɛń. Wa nìɛ̀ cɛ̃iń kà ɓɛ́ ɓóɖóɔ̀ ɓéɖé kã́á ɖìè ɖò, ké ɔ nyɛ́nɛ́ mɔ̀ Jízɛ̀ kɛ.” 8Ti nyɔ ɓěɔ̀ kè hwɔɖɔɔ̀ wuɖuí-kɔ̃̀-nyɔ̀ ɓěɔ̀ wɔ̃́ ma ɖɛa kɛɛ, fũ̀à-fṹá nyu ma wa mìɔ. 9Ké wa cɛ̃ɛ ma Jésììn kè cɔ́cì-nyɔ̀ tɔ̀ɔ̀ ɓěɔ̀ gbo, ɓɛ́ wa ké nyɔ ɓěɔ̀ kpa dyí ɖú. Ké wa táà ma wa dyi, ké wa mu ma.
Pɔ́ɔ̀ kè Sáɖè nì ɖé Bèwíɖíà-hwɔ̀ɖɔ̀ɔ̀ mú
10Ɓó máaún wɛ̃ɛ, cɔ́cì-nyɔ̀ ɓěɔ̀ tò ma Pɔ́ɔ̀ kè Sáɖè ɖé Bèwíɖíà-hwɔ̀ɖɔ̀ɔ̀ mú wàɖà. Ti wa nyini ma ɖéɛɛ, wa mu ma ɖé Júù-nyɔ̀ ɓěɔ̀ cɔ́cì-gbòɔ̀ mú. 11Ké Júù-nyɔ̀ ɓě nì ma ɖéɛɛ cɛ̃̀ ma hwòɖǒ kɔ̃in, ké wa zi nyɔ ɓě ɓɛ́ wa nì ma ɖé Tɛ̀sàɖònákà-hwɔ̀ɖɔ̀ɔ̀ múɛɛ dyí. Waà hwòɖǒ fṹà ma bɔ̃̌ nɔ̀mɔ̀ dyíinɔ̀ dyi kpɔ̃uń, ké wa gmɔìn Gèɖèpɔ́ɔ̀-cèè-ɖɛ̀ ɓěɔ̀ múin ɓó wé séín ɓaɖa, ɓɛ́ wa kéɛ ma dyé kɛbì ɖɛ ɓɛ́ Pɔ́ɔ̀ cɛ̃ ma kà wa gboɛɛ mɔ̀ ma jǎà ní. 12Ɔ jèɛɛ, wa ɓáún-ɓáún taɓa ma Gèɖèpɔ́ɔ̀ hwìɖǐǐ. Gíɖíì-nyɔ̀ pàɖǎ ɓě ɓɛ́ wa mɔ̀ ma màa vɛ̀nɛ̀-vɛ̀nɛ̀ ɓě kè gàa ɓě kɛɛ taɓa ma Gèɖèpɔ́ɔ̀ hwìɖǐǐ ɖekè. 13Kɛɛ ti Júù-nyɔ̀ ɓě ɓɛ́ wa nì ma ɖé Tɛ̀sàɖònákà-hwɔ̀ɖɔ̀ɔ̀ múɛɛ wɔ̃́ɔ ma kà ɓɛ́ Pɔ́ɔ̀ nì ma Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ cɛ̃iń ɖé Bèwíɖíà-hwɔ̀ɖɔ̀ɔ̀ mú ɖekèɛɛ, wa dyi ma ɖé, ké wa nì ma nyɔ ɓěɔ̀ ɖeín, ɓɛ́ wa ké Pɔ́ɔ̀ gbo zàǔn-zàǔn nyu. 14Kɛɛ wàɖà cáa, cɔ́cì-nyɔ̀ ɓěɔ̀ tò ma Pɔ́ɔ̀ ɖé dyóóɔ̀ wĩín, kɛɛ Sáɖè kè Tímétè se ma mu. 15Nyɔ ɓě ɓɛ́ wa nì ma Pɔ́ɔ̀ kpauń wɛ̃ɛ sèìn ma ɓó Átɛ̃̀-hwɔ̀ɖɔ̀ɔ̀ mú. Ké Pɔ́ɔ̀ cuò ma wa, ɓɛ́ wa kéɛ Sáɖè kè Tímétè gbo cɛ̃, ɓɛ́ wa ké ɖé ɔ gbo muɛń fṹà. Ké wa mu ma.
Pɔ́ɔ̀ nì ɖé Átɛ̃̀-hwɔ̀ɖɔ̀ɔ̀ mú
16Ti Pɔ́ɔ̀ nì ma Sáɖè kè Tímétè fòèɛ̌n ɖé Átɛ̃̀-hwɔ̀ɖɔ̀ɔ̀ múɛɛ, ɔ hwòɖǒ nì ma sĩɛń, sepóɛɖé ɔ dyéɛ ma kà kũùn-kpò ɓáún-ɓáún dyí ma hwɔɖɔɔ̀ múɛ. 17Ɔ jèɛɛ, ɔ wùɖù ma Júù-nyɔ̀ ɓěɔ̀ kè nyɔ ɓě ɓɛ́ wa ɓiè ma Gèɖèpɔ́ɔ̀ kɛɛ gbo ɖé Júù-nyɔ̀ ɓěɔ̀ cɔ́cì-gbòɔ̀ mú, ké ɔ wùɖù ma nyɔ ɓě ɓɛ́ ɔ dyɛ̀ìn ma ɖé píéɔ̀ hwòɖǒǔn dyiɛɛ gbo ɓó wé séín ɓaɖa. 18Hwòɖǒ-fɔ̀nɔ̀-nyɔ̀ ɓě dyi ma ɔ gbo, ɓɛ́ wa kèɔ̀ ké ma wùɖù. Wa mɔ̀ ma Ɛ̀pìkíúwíɖíà-nyɔ̀ kè Sóɖóè-nyɔ̀ ɓě. Ké nyɔ ɖíɛ́ ɓě ɖá, “Ɖɛ́ wĩín-dyi-wùɖù-nyɔ̀ fóɖóún nìà kɛ mɔ́ ɓɛ́ ɔ kéà cɛ̃ɛ́?”
Ké ɖíɛ́ ɓě ɖá, “M̀ dyiɔ́ɔ dyéín, m̀ ɖáìn ɔ mɔ̀ɔ̌ ɓóɖó kà kò ɖò nììn gèɖèpɔ́ɔ̀ ɓě jè cɛ̃-nyɔ̀.” Wa cɛ̃ɛ ma náa, sepóɛɖé ɔ cɛ̃ ma Jízɛ̀ kè nyɔǔn gĩɔ wóɖó jè. 19Wa ɖú ma Pɔ́ɔ̀ dyí, ké wa kpa ma ɔ ɖé zɔ̃́ín-cɛ̃̀ìn-naín ɓɛ́ wa ɖáìn Àwìɖìɔ́pɔ́gà kɛɛ mú. Ké wa ɖá, “M̀ ɓɛ́ìn wɛ́ɛ à tɛ̀mɛ̀ìn-ɖɛ̀ ɖìè ɓě ɓɛ́ m̀ dyàà à gboɛɛ gbo cɛ̃ɛ̀? 20Sepóɛɖé ɖɛ ɓě ɓɛ́ m̀ dyàà kɛɛ, wa mɔ̀ ɖɛ kò-kò ɓě ɖé à ɖùǔn. Ɔ jèɛɛ, à mɔ́ ɓɛ́ à ké ɖɛ ɓě nìà kɛ xwíníín dyuò.” 21Nyɔ séín ɓě ɓɛ́ wa cĩ́ ma ɖé Átɛ̃̀-hwɔ̀ɖɔ̀ɔ̀ múɛɛ, ɔ hwɔìn kà Átɛ̃̀-nyɔ̀ ɓě kè nyɔ ɓě se ma ɓóɖóɔ̀ nyɔ ɓě cá kɛɛ, wa ní nyu ma ɖɛ kà kò ɖò, kɛɛ ɔ sèìn ɓɛ́ wa ké ma ti dyí ɖú, ɓɛ́ wa ké ɖɛ ɖìè ɓě cɛ̃, ɔ kè ɓɛ́ wa ké ɖɛ ɖìè ɓě wɔ̃́ ɖekè.
22Ké Pɔ́ɔ̀ nyànà ma tɔ̀ɔ̀-ɓìɔ̀ ɓěɔ̀ hwìɛ̀ dyi, ké ɔ ɖá, “Átɛ̃̀-nyɔ̀ ɓě, ḿ ɖǎa dyé kà ɓɛ́ ɓě mɔ̀ ɖɛ-ɓiè-nyɔ̀ jɛ́ɛ́ cá kɛ. 23Sepóɛɖé ti ɓɛ́ ḿ nì ma dyi téɛń, ké ḿ nì ma ɓěɛ̀ ɓiè-ɖɛ̀ ɓěɔ̀ kɔ̃in gmɔìn kpauń wɛ̃ɛ, ḿ dyé ma ɖé sáa-kɔ̃-zàìn-gbàà ɖò, ké ɓóɛ kɔ̃ɛɛ, ɖɛ ɖò céè ma ɓó, ké ɔ ɖá, ‘Ɔ nì ɓó gèɖèpɔ́ɔ̀ à se dyí dyuòɛɛ bìì.’ Ɖɛ ɓě seà dyí dyuò, ké ɓě ɓièà kɛɛ, ɔ kɔ̃̀ jè ḿ muà ɓě gbo cɛ̃ìn nyɛ̀. 24Gèɖèpɔ́ɔ̀ mɔ̀ nyɔ nyuà ɓóɖó-kpàà kè ɖɛ séín nìɛ̀ múɛ, ké ɔ mɔ̀à dyɔún kè ɓóɖó-kpàà Wuɖuí-kɔ̃̀-nyɔ̀ɔ̀ kɛɛ, ɔ ní cĩ́ poo-ɖɛ̀ ɓɛ́ nyɔǔn-dyù poɛɛ mú, 25hwɛ̀ ḿ po níiń, ɓɛ́ nyɔǔn-dyù ké ɔ gbo kpáa. Ɔ se kɔ̃̀ ɓɛ́ ɔ ké wa ɖɛ ɖò xwa dyé, sepóɛɖé ɔ mìɔùn nyuɛ ké nyɔ séín ɓéɖé fɛ̀ɛ̀, ké wa cĩ́, ké ɔ nyí wa ɖɛ séín. 26Ɔ nyu ɓóɖó-dù séínɛ̀ nyɔ sɔ̀ìn ɖé gàa dyúáɖò mú, ɓɛ́ wa ké ɓóɖó-kpàà dà séín cĩ́. Ɔ sɔ́ ti ɓě ɔ mu ma wa nyíìn nyɛɛ dyí kĩ́ín, ké ɔ nyu pá kɔ̃̀ mú ɓɛ́ wa mu cĩ́ìn nyɛɛ bã̀à. 27Gèɖèpɔ́ɔ̀ nyuɛ ma náa, ɓɛ́ wa ké ɔ dyi mɔ́, ti ɖò ɓaɖaín, wa ké ɔ jè dyi ɓɛɛ̀, ɓɛ́ wa ké ɔ dyé. Kɛɛ wɛ̃́ɛ́ kɛɛ, ɔ kè à ɖò se gboi tɔmɔìn, 28sepóɛɖé wa ɖǎa cɛ̃, ké wa ɖá,
‘Ɖé ɔ mú, ɖé à nì, ɖé à cĩ́, ké ɖé à té dyi.’
Ké kǎà ɓě nììn nɔ́ɔ́-céè-nyɔ̀ ɓěɔ̀ ɖíɛ́ ɓě ɖá ɖekè. Waà nɔ́ɔ́ ɓěɔ̀ ɖò ɖá,
‘À mɔ̀ ɔ mìɔùn nììn nyɔ ɓě ɖekè.’
29Ké kà à mɔ̀à Gèɖèpɔ́ɔ̀ mìɔùn nììn nyɔ ɓěɛɛ, à se ɓéɖé ɓɛ́ à ké Gèɖèpɔ́ɔ̀ hwɔìn-ɖɛ̀ sɛ-sɛ dyí poìn. Nyɔǔn-dyùɛ̀ sɛ́ɖɛ́ kè waà hwìɖǐi-poìn-ɖɛ̀ mɔ̀ nyɔ nyu hwɔìn-ɖɛ̀ sɛ-sɛ ɓě mɔ̀à góò kè séɓàɖà ɔ kè sɔ́ɔ́-kpò kɛ. 30Ti ɓě ɓɛ́ nyɔ séè ma ɖɛ ɖò dyí dyuò keɛɛ, Gèɖèpɔ́ɔ̀ seɛ ma ɖɛ ɖá. Kɛɛ kàǔn wɛ̃ɛ, ɔ ɖǎa nyɔ séín ɓě nì dà séín ɓěɛɛ gbo cɛ̃, ɓɛ́ wa ké waà nàmàǔn-kpèɖèɔ̀ dyi táà, 31sepóɛɖé ɔ ɖǎ wé kɔ̃̀ mú ɓɛ́ ɔ ké ɓóɖó-kpàà zaa wɔ̃ po ɓó dyí-sɛ́ɖɛ́ìn-kà kɛɛ táí po ɖé gàa ɓɛ́ ɔ ɖǎà gã kɛɛ mú. Ɔ ɖǎa nyɔ séín dyí tɛ̀mɛ̀ìn kà ɓɛ́ ɖɛ nìà kɛ mu ná kpáùn jǎà kɛ, sepóɛɖé ɔ zà ma gàaɔ̀ gĩɔ.”
32Ti wa wɔ̃́ ma gĩɔ zà jèɔ̀ kɛɛ, wa ɖíɛ́ ɓě ɓaɖa ma Pɔ́ɔ̀ dyɔ́. Kɛɛ ɖíɛ́ ɓě ɖá, “À mɔ́ ɓɛ́ m̀ ké à ɖɛa ɖò gbo cɛ̃ ɖe ti ɖòɛ̀ ɓaɖa.” 33Ké Pɔ́ɔ̀ sɔ̀ ma ɖé wa hwìɛ̀. 34Kɛɛ gàa ɖíɛ́ ɓě sí ma ɔ kíɖíí, ké wa taɓa ma Gèɖèpɔ́ɔ̀ hwìɖǐǐ. Wa dyúáɖòɛ̀ nyɛ́nɛ́ mɔ̀ ma Dàónísìà. Ɔ mɔ̀ ma tɔ̀ɔ̀-ɓìɔ̀ ɓěɔ̀ ɖò. Ké màa ɖò kɔ̃̀ nyɛ́nɛ́ mɔ̀ ma Dìmáɖɛ̀ kɛ kè nyɔ ɖíɛ́ ɓě sí ma ɔ kíɖíí ɖekè.
Currently Selected:
Àpɔ́sò 17: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Àpɔ́sò 17
17
Pɔ́ɔ̀ kè Sáɖè mu ɖé Tɛ̀sàɖònákà-hwɔ̀ɖɔ̀ɔ̀ mú
1Ké Pɔ́ɔ̀ kè Sáɖè zĩ̀ìn ma ɖé Ã́fípòɖè-hwɔ̀ɖɔ̀ɔ̀ kè Àpàɖónìà-hwɔ̀ɖɔ̀ɔ̀ mú, ké wa dyi ma ɖé Tɛ̀sàɖònákà-hwɔ̀ɖɔ̀ɔ̀ mú, dɛ̀ Júù-nyɔ̀ ɓěɔ̀ cɔ́cì-gbò ɓěɔ̀ ɖò nì ma kɛ. 2Ké Pɔ́ɔ̀ mu ma ɖé Júù-nyɔ̀ ɓěɔ̀ cɔ́cì-gbòɔ̀ mú, sepóɛɖé ɔ mɔ̀ ma ɔ nyuu-ɖɛ̀ kĩ́ín. Ké ɓó Gèɖèpɔ́ɔ̀ fɔ̀-wè tã ɓě kɔ ɓó dyíɛɛ xwíníín nyɛɛ, ɔ zaìn ma wa ɖɛ ɓě sɔ̀ìn ɖé Gèɖèpɔ́ɔ̀-cèè-ɖɛ̀ ɓěɔ̀ múɛɛ gbo kɔ̃in. 3Ɔ zaìn ma wa gbo kɔ̃in, ké ɔ cɛ̃ ma ɔ xwíníín ɓěɔ̀ wa gbo kà ɓɛ́ Kɛ́ɖɛ́ìɔ̀ ɓéɖé ɓɛ́ ɔ ké ma gǎ dyé, ɔ kè ɓɛ́ ɔ ké ma gĩɔ wóɖóɛ. Ɔ cɛ̃ɛ, ké ɔ ɖá, “Jízɛ̀ kɔ̃̀ jè ɓɛ́ ḿ nìà ɓě gbo cɛ̃iń nyɛɛ, ɔ mɔ̀ Kɛ́ɖɛ́ìɔ̀.” 4Ké wa ɖíɛ́ ɓě kpɔ̃ ma ɔ wuɖuɔ̀ dyi, ké wa zi ma Pɔ́ɔ̀ kè Sáɖè gbo. Gíɖíì-nyɔ̀ ɓě ɓɛ́ wa ɓiè ma Gèɖèpɔ́ɔ̀ kɛ kè màa vɛ̀nɛ̀-vɛ̀nɛ̀ ɓěɔ̀ ɓáún-ɓáún zi ma wa gbo ɖekè.
5Kɛɛ Júù-nyɔ̀ ɓěɔ̀ kpá ma hwɛ̀nɛ̌ǐn, ké wa ɖú ma kpeɖeɛ̀-dyíin-nyìnììn-nyɔ̀ ɓě ɓɛ́ wa nì ma ɖé hwɔɖɔɔ̀ múɛɛ dyí, ké wa poìn ma nyɔ kúɖúú ɓěɔ̀ dyí. Ké wa po ma zàǔn-zàǔn ɖé hwɔɖɔɔ̀ mú dyi, ké wa hwɛ̀ìn ma Jésììn gbǒɔ̀ ɖei. Wa nì ma vɔ̃uń ɓɛ́ wa ké Pɔ́ɔ̀ kè Sáɖè gbǒɔ̀ mú zà, ɓɛ́ wa ké wa ɖé nyɔ ɓěɔ̀ gbo síìn. 6Ti wa se ma wa dyéɛ ɓɛ́ìn nyɛɛ, wa kpa ma Jésììn kè cɔ́cì-nyɔ̀ ɖíɛ́ ɓě nì ma ɖéɛɛ jiɖiɛ ɖé hwɔɖɔɔ̀ wuɖuí-kɔ̃̀-nyɔ̀ ɓěɔ̀ dyúa. Ké wa páná ma mú, ké wa ɖá, “Gàa ɓě ɓɛ́ wa ɖǎà zàǔn-zàǔn ɓáún-ɓáún ɖé ɓóɖó-kpàà dà séín dyi poɛɛ, wa ɖǎ nɔ̄ dyi kàǔn, 7ké Jésììn ɖǎ wa dyi kpɔ̃. Wa nì ɖɛ ɓě ɓɛ́ Síízɛ̀ mɔ̀à Wóɖóùn-kã̀ǎɔ̀ kɛɛ ɖǎ ma gbɔ poɛɛ dyií dyi poɛń. Wa nìɛ̀ cɛ̃iń kà ɓɛ́ ɓóɖóɔ̀ ɓéɖé kã́á ɖìè ɖò, ké ɔ nyɛ́nɛ́ mɔ̀ Jízɛ̀ kɛ.” 8Ti nyɔ ɓěɔ̀ kè hwɔɖɔɔ̀ wuɖuí-kɔ̃̀-nyɔ̀ ɓěɔ̀ wɔ̃́ ma ɖɛa kɛɛ, fũ̀à-fṹá nyu ma wa mìɔ. 9Ké wa cɛ̃ɛ ma Jésììn kè cɔ́cì-nyɔ̀ tɔ̀ɔ̀ ɓěɔ̀ gbo, ɓɛ́ wa ké nyɔ ɓěɔ̀ kpa dyí ɖú. Ké wa táà ma wa dyi, ké wa mu ma.
Pɔ́ɔ̀ kè Sáɖè nì ɖé Bèwíɖíà-hwɔ̀ɖɔ̀ɔ̀ mú
10Ɓó máaún wɛ̃ɛ, cɔ́cì-nyɔ̀ ɓěɔ̀ tò ma Pɔ́ɔ̀ kè Sáɖè ɖé Bèwíɖíà-hwɔ̀ɖɔ̀ɔ̀ mú wàɖà. Ti wa nyini ma ɖéɛɛ, wa mu ma ɖé Júù-nyɔ̀ ɓěɔ̀ cɔ́cì-gbòɔ̀ mú. 11Ké Júù-nyɔ̀ ɓě nì ma ɖéɛɛ cɛ̃̀ ma hwòɖǒ kɔ̃in, ké wa zi nyɔ ɓě ɓɛ́ wa nì ma ɖé Tɛ̀sàɖònákà-hwɔ̀ɖɔ̀ɔ̀ múɛɛ dyí. Waà hwòɖǒ fṹà ma bɔ̃̌ nɔ̀mɔ̀ dyíinɔ̀ dyi kpɔ̃uń, ké wa gmɔìn Gèɖèpɔ́ɔ̀-cèè-ɖɛ̀ ɓěɔ̀ múin ɓó wé séín ɓaɖa, ɓɛ́ wa kéɛ ma dyé kɛbì ɖɛ ɓɛ́ Pɔ́ɔ̀ cɛ̃ ma kà wa gboɛɛ mɔ̀ ma jǎà ní. 12Ɔ jèɛɛ, wa ɓáún-ɓáún taɓa ma Gèɖèpɔ́ɔ̀ hwìɖǐǐ. Gíɖíì-nyɔ̀ pàɖǎ ɓě ɓɛ́ wa mɔ̀ ma màa vɛ̀nɛ̀-vɛ̀nɛ̀ ɓě kè gàa ɓě kɛɛ taɓa ma Gèɖèpɔ́ɔ̀ hwìɖǐǐ ɖekè. 13Kɛɛ ti Júù-nyɔ̀ ɓě ɓɛ́ wa nì ma ɖé Tɛ̀sàɖònákà-hwɔ̀ɖɔ̀ɔ̀ múɛɛ wɔ̃́ɔ ma kà ɓɛ́ Pɔ́ɔ̀ nì ma Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ cɛ̃iń ɖé Bèwíɖíà-hwɔ̀ɖɔ̀ɔ̀ mú ɖekèɛɛ, wa dyi ma ɖé, ké wa nì ma nyɔ ɓěɔ̀ ɖeín, ɓɛ́ wa ké Pɔ́ɔ̀ gbo zàǔn-zàǔn nyu. 14Kɛɛ wàɖà cáa, cɔ́cì-nyɔ̀ ɓěɔ̀ tò ma Pɔ́ɔ̀ ɖé dyóóɔ̀ wĩín, kɛɛ Sáɖè kè Tímétè se ma mu. 15Nyɔ ɓě ɓɛ́ wa nì ma Pɔ́ɔ̀ kpauń wɛ̃ɛ sèìn ma ɓó Átɛ̃̀-hwɔ̀ɖɔ̀ɔ̀ mú. Ké Pɔ́ɔ̀ cuò ma wa, ɓɛ́ wa kéɛ Sáɖè kè Tímétè gbo cɛ̃, ɓɛ́ wa ké ɖé ɔ gbo muɛń fṹà. Ké wa mu ma.
Pɔ́ɔ̀ nì ɖé Átɛ̃̀-hwɔ̀ɖɔ̀ɔ̀ mú
16Ti Pɔ́ɔ̀ nì ma Sáɖè kè Tímétè fòèɛ̌n ɖé Átɛ̃̀-hwɔ̀ɖɔ̀ɔ̀ múɛɛ, ɔ hwòɖǒ nì ma sĩɛń, sepóɛɖé ɔ dyéɛ ma kà kũùn-kpò ɓáún-ɓáún dyí ma hwɔɖɔɔ̀ múɛ. 17Ɔ jèɛɛ, ɔ wùɖù ma Júù-nyɔ̀ ɓěɔ̀ kè nyɔ ɓě ɓɛ́ wa ɓiè ma Gèɖèpɔ́ɔ̀ kɛɛ gbo ɖé Júù-nyɔ̀ ɓěɔ̀ cɔ́cì-gbòɔ̀ mú, ké ɔ wùɖù ma nyɔ ɓě ɓɛ́ ɔ dyɛ̀ìn ma ɖé píéɔ̀ hwòɖǒǔn dyiɛɛ gbo ɓó wé séín ɓaɖa. 18Hwòɖǒ-fɔ̀nɔ̀-nyɔ̀ ɓě dyi ma ɔ gbo, ɓɛ́ wa kèɔ̀ ké ma wùɖù. Wa mɔ̀ ma Ɛ̀pìkíúwíɖíà-nyɔ̀ kè Sóɖóè-nyɔ̀ ɓě. Ké nyɔ ɖíɛ́ ɓě ɖá, “Ɖɛ́ wĩín-dyi-wùɖù-nyɔ̀ fóɖóún nìà kɛ mɔ́ ɓɛ́ ɔ kéà cɛ̃ɛ́?”
Ké ɖíɛ́ ɓě ɖá, “M̀ dyiɔ́ɔ dyéín, m̀ ɖáìn ɔ mɔ̀ɔ̌ ɓóɖó kà kò ɖò nììn gèɖèpɔ́ɔ̀ ɓě jè cɛ̃-nyɔ̀.” Wa cɛ̃ɛ ma náa, sepóɛɖé ɔ cɛ̃ ma Jízɛ̀ kè nyɔǔn gĩɔ wóɖó jè. 19Wa ɖú ma Pɔ́ɔ̀ dyí, ké wa kpa ma ɔ ɖé zɔ̃́ín-cɛ̃̀ìn-naín ɓɛ́ wa ɖáìn Àwìɖìɔ́pɔ́gà kɛɛ mú. Ké wa ɖá, “M̀ ɓɛ́ìn wɛ́ɛ à tɛ̀mɛ̀ìn-ɖɛ̀ ɖìè ɓě ɓɛ́ m̀ dyàà à gboɛɛ gbo cɛ̃ɛ̀? 20Sepóɛɖé ɖɛ ɓě ɓɛ́ m̀ dyàà kɛɛ, wa mɔ̀ ɖɛ kò-kò ɓě ɖé à ɖùǔn. Ɔ jèɛɛ, à mɔ́ ɓɛ́ à ké ɖɛ ɓě nìà kɛ xwíníín dyuò.” 21Nyɔ séín ɓě ɓɛ́ wa cĩ́ ma ɖé Átɛ̃̀-hwɔ̀ɖɔ̀ɔ̀ múɛɛ, ɔ hwɔìn kà Átɛ̃̀-nyɔ̀ ɓě kè nyɔ ɓě se ma ɓóɖóɔ̀ nyɔ ɓě cá kɛɛ, wa ní nyu ma ɖɛ kà kò ɖò, kɛɛ ɔ sèìn ɓɛ́ wa ké ma ti dyí ɖú, ɓɛ́ wa ké ɖɛ ɖìè ɓě cɛ̃, ɔ kè ɓɛ́ wa ké ɖɛ ɖìè ɓě wɔ̃́ ɖekè.
22Ké Pɔ́ɔ̀ nyànà ma tɔ̀ɔ̀-ɓìɔ̀ ɓěɔ̀ hwìɛ̀ dyi, ké ɔ ɖá, “Átɛ̃̀-nyɔ̀ ɓě, ḿ ɖǎa dyé kà ɓɛ́ ɓě mɔ̀ ɖɛ-ɓiè-nyɔ̀ jɛ́ɛ́ cá kɛ. 23Sepóɛɖé ti ɓɛ́ ḿ nì ma dyi téɛń, ké ḿ nì ma ɓěɛ̀ ɓiè-ɖɛ̀ ɓěɔ̀ kɔ̃in gmɔìn kpauń wɛ̃ɛ, ḿ dyé ma ɖé sáa-kɔ̃-zàìn-gbàà ɖò, ké ɓóɛ kɔ̃ɛɛ, ɖɛ ɖò céè ma ɓó, ké ɔ ɖá, ‘Ɔ nì ɓó gèɖèpɔ́ɔ̀ à se dyí dyuòɛɛ bìì.’ Ɖɛ ɓě seà dyí dyuò, ké ɓě ɓièà kɛɛ, ɔ kɔ̃̀ jè ḿ muà ɓě gbo cɛ̃ìn nyɛ̀. 24Gèɖèpɔ́ɔ̀ mɔ̀ nyɔ nyuà ɓóɖó-kpàà kè ɖɛ séín nìɛ̀ múɛ, ké ɔ mɔ̀à dyɔún kè ɓóɖó-kpàà Wuɖuí-kɔ̃̀-nyɔ̀ɔ̀ kɛɛ, ɔ ní cĩ́ poo-ɖɛ̀ ɓɛ́ nyɔǔn-dyù poɛɛ mú, 25hwɛ̀ ḿ po níiń, ɓɛ́ nyɔǔn-dyù ké ɔ gbo kpáa. Ɔ se kɔ̃̀ ɓɛ́ ɔ ké wa ɖɛ ɖò xwa dyé, sepóɛɖé ɔ mìɔùn nyuɛ ké nyɔ séín ɓéɖé fɛ̀ɛ̀, ké wa cĩ́, ké ɔ nyí wa ɖɛ séín. 26Ɔ nyu ɓóɖó-dù séínɛ̀ nyɔ sɔ̀ìn ɖé gàa dyúáɖò mú, ɓɛ́ wa ké ɓóɖó-kpàà dà séín cĩ́. Ɔ sɔ́ ti ɓě ɔ mu ma wa nyíìn nyɛɛ dyí kĩ́ín, ké ɔ nyu pá kɔ̃̀ mú ɓɛ́ wa mu cĩ́ìn nyɛɛ bã̀à. 27Gèɖèpɔ́ɔ̀ nyuɛ ma náa, ɓɛ́ wa ké ɔ dyi mɔ́, ti ɖò ɓaɖaín, wa ké ɔ jè dyi ɓɛɛ̀, ɓɛ́ wa ké ɔ dyé. Kɛɛ wɛ̃́ɛ́ kɛɛ, ɔ kè à ɖò se gboi tɔmɔìn, 28sepóɛɖé wa ɖǎa cɛ̃, ké wa ɖá,
‘Ɖé ɔ mú, ɖé à nì, ɖé à cĩ́, ké ɖé à té dyi.’
Ké kǎà ɓě nììn nɔ́ɔ́-céè-nyɔ̀ ɓěɔ̀ ɖíɛ́ ɓě ɖá ɖekè. Waà nɔ́ɔ́ ɓěɔ̀ ɖò ɖá,
‘À mɔ̀ ɔ mìɔùn nììn nyɔ ɓě ɖekè.’
29Ké kà à mɔ̀à Gèɖèpɔ́ɔ̀ mìɔùn nììn nyɔ ɓěɛɛ, à se ɓéɖé ɓɛ́ à ké Gèɖèpɔ́ɔ̀ hwɔìn-ɖɛ̀ sɛ-sɛ dyí poìn. Nyɔǔn-dyùɛ̀ sɛ́ɖɛ́ kè waà hwìɖǐi-poìn-ɖɛ̀ mɔ̀ nyɔ nyu hwɔìn-ɖɛ̀ sɛ-sɛ ɓě mɔ̀à góò kè séɓàɖà ɔ kè sɔ́ɔ́-kpò kɛ. 30Ti ɓě ɓɛ́ nyɔ séè ma ɖɛ ɖò dyí dyuò keɛɛ, Gèɖèpɔ́ɔ̀ seɛ ma ɖɛ ɖá. Kɛɛ kàǔn wɛ̃ɛ, ɔ ɖǎa nyɔ séín ɓě nì dà séín ɓěɛɛ gbo cɛ̃, ɓɛ́ wa ké waà nàmàǔn-kpèɖèɔ̀ dyi táà, 31sepóɛɖé ɔ ɖǎ wé kɔ̃̀ mú ɓɛ́ ɔ ké ɓóɖó-kpàà zaa wɔ̃ po ɓó dyí-sɛ́ɖɛ́ìn-kà kɛɛ táí po ɖé gàa ɓɛ́ ɔ ɖǎà gã kɛɛ mú. Ɔ ɖǎa nyɔ séín dyí tɛ̀mɛ̀ìn kà ɓɛ́ ɖɛ nìà kɛ mu ná kpáùn jǎà kɛ, sepóɛɖé ɔ zà ma gàaɔ̀ gĩɔ.”
32Ti wa wɔ̃́ ma gĩɔ zà jèɔ̀ kɛɛ, wa ɖíɛ́ ɓě ɓaɖa ma Pɔ́ɔ̀ dyɔ́. Kɛɛ ɖíɛ́ ɓě ɖá, “À mɔ́ ɓɛ́ m̀ ké à ɖɛa ɖò gbo cɛ̃ ɖe ti ɖòɛ̀ ɓaɖa.” 33Ké Pɔ́ɔ̀ sɔ̀ ma ɖé wa hwìɛ̀. 34Kɛɛ gàa ɖíɛ́ ɓě sí ma ɔ kíɖíí, ké wa taɓa ma Gèɖèpɔ́ɔ̀ hwìɖǐǐ. Wa dyúáɖòɛ̀ nyɛ́nɛ́ mɔ̀ ma Dàónísìà. Ɔ mɔ̀ ma tɔ̀ɔ̀-ɓìɔ̀ ɓěɔ̀ ɖò. Ké màa ɖò kɔ̃̀ nyɛ́nɛ́ mɔ̀ ma Dìmáɖɛ̀ kɛ kè nyɔ ɖíɛ́ ɓě sí ma ɔ kíɖíí ɖekè.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.