1 Kɔ̀ɖéíntĩ̀ɔ̀ 9
9
Kpé ɓɛ́ àpɔ́sò ɓěɔ̀ ɓéɖéɛ
1Ḿ se kpé ɓéɖéè? Ḿ se àpɔ́sò ɓěɔ̀ ɖòò? Má, ḿ ɖǎ Jízɛ̀ mɔ̀à à Wuɖuí-kɔ̃̀-nyɔ̀ kɛɛ dyéè? Ɖé Bounɓoɔ̀ múɛɛ, ɓě se nyɔ ɓě ɓɛ́ ḿ dyé ma ní kũ̀àɔ̀ kɔ̃ún wɛ̃ɛ̀? 2Kɛbì ḿ mɛ se àpɔ́sò ɖé nyɔ tɔ̀ɔ̀ ɓě gboɛɛ, ḿ mɔ̀ àpɔ́sò ɖé ɓě mɔ̀ùn gbo, sepóɛɖé ɖé Bounɓoɔ̀ múɛɛ, ɓě mɔ̀ ní àpɔ́sò-kũ̀àɔ̀ kɛɛ dyí-dyuòìn-bɛ̃̀.
3Nyɔ ɓɛ́ ḿ zaìn kɔ̃in ɖé nyɔ ɓě ɓɛ́ wa diè ḿ dyiɛ gboɛɛ, ɔ kɛ̀. 4Ɔ mɔ̀, à se kpé ɓéɖé ɓɛ́ à ké ɓě ɖii-ɖɛ̀ xwaún dyéè? 5À se kpé ɓéɖé ɓɛ́ à ké nyɔ́nɔ́ ɓɛ́ ɔ mɔ̀ Kɛ́ɖɛ́ì ɖeín-sí-nyɔ̀ kɛɛ ɖò mú nàìn kà àpɔ́sò tɔ̀ɔ̀ ɓěɔ̀ kè Bounɓoɔ̀ ɖíí-gàà ɓěɔ̀ ɔ kè Sífà nìà nyuɛń nyɛɛ̀? 6Ḿ kè Bànábà ɖòùn mɔ̀ nyɔ ɓéɖé kpé ɓɛ́ à ké kũ̀à nyu ɓó à ɖii-ɖɛ̀ jèè? 7Nyɛ́ mɔ̀ sójà hwɛ̀ ké ɔ mɔ́ ɔ mìɔùn nììn ɖɛ ɓě dyi ɖeɛ́? Nyɛ́ ɓá géɖéè-gbǎ, ké ɔ ní ɖiɛ ɓoɛ́? Nyɛ́ gmɔ̀ ɓáɖáá ɓě dyí, ké ɔ ní ná waà nɛɛ̀-nìɔ̀ ɖòɛ́?
8Ḿ cɛ̃ ɖɛ nìà kɛ ɖé nyɔǔn-dyùɛ̀ hwìɖǐi-poìn-poìn múù? Gèɖèpɔ́ɔ̀ gmaɔ̀ se ɖɛ dyúáɖòɔ̀ cɛ̃ ɖekèè? 9Sepóɛɖé ɔ ɖǎ céè ɖé Mózèɛ̀ gma-cèè-ɖɛ̀ɔ̀ mú, ké ɔ ɖá, “Nyɔ ɖò mɛ ɓɔ́ ɓìɖǐ ɓɛ́ ɔ nì hwítì dyí síɛń nyɛɛ kpã́ wĩín poɛ.” Ɓìɖǐɔ̀ ɖé Gèɖèpɔ́ɔ̀ kɔ̃̀à jè gboɛ̀e? 10Ɔ se ɖɛ nìà kɛ cɛ̃ ɓó ɓěà jè cáà? Ɔ céè ma ɓó ɓěà jè, sepóɛɖé mɔɔ́-po-nyɔ̀ɔ̀ ɓéɖé ɓɛ́ ɔ ké mɔɔ́ po ɖé ɖɛ-hwòɖǒ-kɔ̃-dè-dè mú, ké mɔɔ́-dyí-sí-nyɔ̀ɔ̀ ɓéɖé ɓɛ́ ɔ ké mɔɔ́ dyí sí, ɓɛ́ ɔ kéɛ hwòɖǒ kɔ̃ dè kà ɔ mu ɓó ɔ nììn dyéìn nyɛ. 11Ɔ jǔ ké à dyi ma Gèɖèpɔ́ɔ̀ xwaún-ɖɛ̀ ɓá ɓó ɓě bìì, ké à kũ̀àɔ̀ pɛ́ɛ̀-ɖɛ̀ɔ̀ dyi ɓóɖó-kpàà ɖɛ ɓě sɔ̀à ɓě xwaún wɛ̃ɛ jǔǐn, nìí, ɔ mɔ̀ ɖɛ vɛ̀nɛ̀ cáe? 12Ɔ jǔ ké ɓě dyi wɔ̃́ ɓɛ́ nyɔ kà kò ɖò ké kpéɛ̀ ɓě kɔ̃ún ɓéɖéín, nìí, à mɔ̀ùn seɛ ɓéɖé ɖe mìɔe?
Kɛɛ wɛ̃́ɛ́ kɛɛ, ɖɛ kɔ̃̀ kpé ɓɛ́ à ɓéɖé ɓɛ́ à kéà nyuɛɛ, à seɛ nyu. À kùìn ɖɛ séín ɓěɔ̀ hwòɖǒ, ɓɛ́ à ní kɔ̃̀ɔ̀ ɖà nyuín, ɖɛ ɖò ní kɔ̃̀ ɖà Kɛ́ɖɛ́ì bɔ̃̌ nɔ̀mɔ̀ dyíinɔ̀ dyí kpɔ̃. 13Nyɔ ɓě ɓɛ́ wa nyuà kũ̀à ɖé Gèɖèpɔ́ɔ̀ gbǒɔ̀ múɛɛ, wa dyé waà ɖii-ɖɛ̀ sɔ̀ìn ɖé nyíí-ɖɛ̀ ɓě ɓɛ́ nyɔ ɓě dyàà ɖé Gèɖèpɔ́ɔ̀ gbǒɔ̀ múɛɛ mú, ké nyɔ ɓě ɓɛ́ wa nyuà kũ̀à ɖé sáa-kɔ̃-zàìn-gbààɔ̀ kɔ̃ɛɛ, wa dyé sáa-zàìn-ɖɛ̀ ɓě ɓɛ́ nyɔ ɓěɔ̀ dyàà ɓóɛɛ ɖò. Ɔ se ná nìì? 14Kà dyúáɖòɔ̀ kǎà Bounɓoɔ̀ cɛ̃ɛ ma kà nyɔ ɓě ɓɛ́ wa po bɔ̃̌ nɔ̀mɔ̀ dyíinɔ̀ jè zio kɛɛ, wa ɓéɖé ɓɛ́ wa ké waà ɖii-ɖɛ̀ dyé ɖé bɔ̃̌ nɔ̀mɔ̀ dyíinɔ̀ cɛ̃-cɛ̃ múɛ.
15Kɛɛ ɖɛ ɓě kɔ̃̀ kpé ɓɛ́ ḿ ɓéɖé ɓɛ́ ḿ kéà nyuɛɛ, ḿ se wa ɖò nyu. Ké ḿ se ɖɛa céè, ɓɛ́ ɔ kéɛ nyu ɓɛ́ ḿ ké ɖɛ ɖò dyé. Ḿ ɓɛ́ìn dyɛ mɛ́ɛ pū, ké ɔ zi ɓɛ́ ḿ ké ɖɛ ɖò dyéɛɛ dyí. Nyɔ ɖò seɛ nyuɛ́ mu ɓɛ́ ɖɛ kɔ̃̀ jè ḿ nìà ɓɔ́ɖɔ́uń wɛ̃ɛ ké ɖɛ fóɖóún jǔ. 16Sepóɛɖé ɔ jǔ ké ḿ dyi bɔ̃̌ nɔ̀mɔ̀ dyíinɔ̀ cɛ̃iń, nìí, ɔ seɛ nyuɛ́ mu ɓɛ́ ḿ ké ɓɔ́ɖɔ́. Gèɖèpɔ́ɔ̀ kɔ̃̀ ḿ zaa mú, ɓɛ́ ḿ kéɛ nyu. Ḿ se bɔ̃̌ nɔ̀mɔ̀ dyíinɔ̀ cɛ̃iń, nìí, gboò-wùɖù nì ḿ kɔ̃. 17Ɔ jǔ ké ḿ dyi bɔ̃̌ nɔ̀mɔ̀ dyíinɔ̀ cɛ̃ ɖé ḿ mìɔùn nììn hwòɖǒɛ̀-wɔ̃́-wɔ̃́ múín, nìí, ḿ ɖǎ pɛ́ɛ̀-ɖɛ̀ ɓéɖé. Kɛɛ ɔ jǔ ké ḿ seɛ ḿ mìɔùn nììn hwòɖǒɛ̀-wɔ̃́-wɔ̃́ mú nyùìn ní, nìí, ɔ mɔ̀ǎ ɖɛ Gèɖèpɔ́ɔ̀ sè ḿ gbo, ɓɛ́ ḿ ké nyuɛ. 18Nìí, ɖɛ́ jɛ́ɛ́ mɔ̀ ní pɛ́ɛ̀-ɖɛ̀ kɛ́? Ní pɛ́ɛ̀-ɖɛ̀ɔ̀ kɛ̀. Ɔ mɔ̀, ɔ jǔ ké ḿ dyi bɔ̃̌ nɔ̀mɔ̀ dyíinɔ̀ cɛ̃ín, ḿ nyuɛ ɓɛ́ nyɔ ɖò ké se ɖɛ ɖò pɛ́ɛ̀. Ké ɖɛ kɔ̃̀ kpé ɓɛ́ ní bɔ̃̌ nɔ̀mɔ̀ dyíin cɛ̃-cɛ̃ɔ̀ nyíà ḿ wɛ̃ɛ, ḿ ké seɛ nyu.
19Ḿ se nyɔ ɖòɛ̀ gǐì dyɛo, kɛɛ ḿ ɖǎ ḿ mìɔùn gǐì mú nyu ɓó nyɔ séín gbo, ɓɛ́ ḿ ké wa ɓáún-ɓáún Kɛ́ɖɛ́ì gbo dyà. 20Ɖé Júù-nyɔ̀ ɓěɔ̀ mɔ̀ùn gboɛɛ, ḿ nyu ma ḿ mìɔùn kà Júù-nyɔ̀ nìà jɛ́ɛ́ kɛ, ɓɛ́ ḿ ké Júù-nyɔ̀ ɓěɔ̀ Kɛ́ɖɛ́ì gbo dyà jè. Ɖé nyɔ ɓě nìà gma xwíɖíiɛ gboɛɛ, ḿ nyu ma ḿ mìɔùn kà nyɔ nìɔ̌ gma xwíɖíi jɛ́ɛ́ kɛ. Kɛɛ ḿ se gmaɔ̀ xwíɖíi nì. Ḿ nyuɛ náa pū ɓɛ́ ḿ ké wa Kɛ́ɖɛ́ì gbo dyà jè. 21Ɖé nyɔ ɓě seà gmaɔ̀ ɓéɖéɛ gboɛɛ, ḿ nyu ma ḿ mìɔùn kà nyɔ seà gmaɔ̀ ɓéɖéɛɛ nìà kɛ. Ḿ nyuɛ náa pū ɓɛ́ ḿ ké nyɔ ɓě seà gmaɔ̀ ɓéɖéɛɛ Kɛ́ɖɛ́ì gbo dyà jè. Kɛɛ ɔ se ɖɛ ɓɛ́ ḿ ké se Gèɖèpɔ́ɔ̀ nììn gmaɔ̀ ɓéɖéɛ. Ḿ nì Kɛ́ɖɛ́ì gmaɔ̀ xwíɖíi. 22Ɖé nyɔ ɓě se dyi kuɛ gboɛɛ, ḿ nyu ma ḿ mìɔùn kà nyɔ seà dyi kuɛɛ nìà kɛ, ɓɛ́ ḿ ké wa Kɛ́ɖɛ́ì gbo dyà jè. Ḿ nyu ma ná ḿ mìɔùn ɖé wa séín gbo, ɓɛ́ ɖé hwìè kò-kò séín ɓěa múɛɛ, ḿ ké wa ɖíɛ́ ɓě póìn wɛ̃́ɛ́.
23Ḿ nyu ɖɛ séín ɓěa ɓó bɔ̃̌ nɔ̀mɔ̀ dyíinɔ̀ jè, ɓɛ́ ɖɛ bɔ̃̌ɔ̀ mu nyuùn wɛ̃ɛ, ḿ ké ḿ níǐn dyé. 24Nyɔ ɓě dyi kpɛɖɛ kpaín, wa séín vɔ̃, kɛɛ dyúáɖò mɔ̀ nyɔ dyé ɖɛ kɔ̃̀ jè wa kpaà kpɛɖɛɔ̀ kɛ. Má, kà ɔ nìe? Ɔ jè ɓě mɛ vɔ̃, ɓɛ́ ɓě ké ɖu. 25Kpɛɖɛ-kpa-nyɔ̀ séín kpɔ̃ wa mìɔùn dyí ɖé ɖɛ séín mú. Wa nyuɛ náa ɓɛ́ wa ké fĩìn-mì-gbàǎ ɓɛ́ ɔ muà mú gbɔɔ̀ùn wɛ̃ɛ dyé jè. Kɛɛ à mɔ̀ùn nyuɛ náa ɓɛ́ à ké gbàǎɔ̀ nyɔ seà mú gbɔɔ̀ ɓɛ́ìn nyɛɛ dyé jè. 26Ɔ jèɛɛ, ḿ dyi kpɛɖɛ kpaín, ɔ se ɖɛ ɓɛ́ ḿ ké se ɖɛ ɖò hwòɖǒ kɔ̃ dè cáa. Ɔ jǔ ké ḿ kè nyɔ ɖò dyi kùà poìn ní, nìí, ḿ se nì kà nyɔ bĩà ɔ mǔèɔ̀ kɛɛ nìà kɛ. 27Kɛɛ ḿ ɓeìn ḿ mìɔùn nììn kpóɖó-dyùàɔ̀ dyi, ké ḿ nyuɛ cá ké ɔ mɔ̀ gǐì ɖé ḿ gbo. Ḿ nyuɛ náa ɓɛ́ wa ní kɔ̃̀ ɖà ɖé mɔ̄ mɔ̀ nyɔ ɖǎà Gèɖèpɔ́ɔ̀-wùɖùɔ̀ nyɔ tɔ̀ɔ̀ ɓě gbo cɛ̃ɛ ɖé zà.
Currently Selected:
1 Kɔ̀ɖéíntĩ̀ɔ̀ 9: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
1 Kɔ̀ɖéíntĩ̀ɔ̀ 9
9
Kpé ɓɛ́ àpɔ́sò ɓěɔ̀ ɓéɖéɛ
1Ḿ se kpé ɓéɖéè? Ḿ se àpɔ́sò ɓěɔ̀ ɖòò? Má, ḿ ɖǎ Jízɛ̀ mɔ̀à à Wuɖuí-kɔ̃̀-nyɔ̀ kɛɛ dyéè? Ɖé Bounɓoɔ̀ múɛɛ, ɓě se nyɔ ɓě ɓɛ́ ḿ dyé ma ní kũ̀àɔ̀ kɔ̃ún wɛ̃ɛ̀? 2Kɛbì ḿ mɛ se àpɔ́sò ɖé nyɔ tɔ̀ɔ̀ ɓě gboɛɛ, ḿ mɔ̀ àpɔ́sò ɖé ɓě mɔ̀ùn gbo, sepóɛɖé ɖé Bounɓoɔ̀ múɛɛ, ɓě mɔ̀ ní àpɔ́sò-kũ̀àɔ̀ kɛɛ dyí-dyuòìn-bɛ̃̀.
3Nyɔ ɓɛ́ ḿ zaìn kɔ̃in ɖé nyɔ ɓě ɓɛ́ wa diè ḿ dyiɛ gboɛɛ, ɔ kɛ̀. 4Ɔ mɔ̀, à se kpé ɓéɖé ɓɛ́ à ké ɓě ɖii-ɖɛ̀ xwaún dyéè? 5À se kpé ɓéɖé ɓɛ́ à ké nyɔ́nɔ́ ɓɛ́ ɔ mɔ̀ Kɛ́ɖɛ́ì ɖeín-sí-nyɔ̀ kɛɛ ɖò mú nàìn kà àpɔ́sò tɔ̀ɔ̀ ɓěɔ̀ kè Bounɓoɔ̀ ɖíí-gàà ɓěɔ̀ ɔ kè Sífà nìà nyuɛń nyɛɛ̀? 6Ḿ kè Bànábà ɖòùn mɔ̀ nyɔ ɓéɖé kpé ɓɛ́ à ké kũ̀à nyu ɓó à ɖii-ɖɛ̀ jèè? 7Nyɛ́ mɔ̀ sójà hwɛ̀ ké ɔ mɔ́ ɔ mìɔùn nììn ɖɛ ɓě dyi ɖeɛ́? Nyɛ́ ɓá géɖéè-gbǎ, ké ɔ ní ɖiɛ ɓoɛ́? Nyɛ́ gmɔ̀ ɓáɖáá ɓě dyí, ké ɔ ní ná waà nɛɛ̀-nìɔ̀ ɖòɛ́?
8Ḿ cɛ̃ ɖɛ nìà kɛ ɖé nyɔǔn-dyùɛ̀ hwìɖǐi-poìn-poìn múù? Gèɖèpɔ́ɔ̀ gmaɔ̀ se ɖɛ dyúáɖòɔ̀ cɛ̃ ɖekèè? 9Sepóɛɖé ɔ ɖǎ céè ɖé Mózèɛ̀ gma-cèè-ɖɛ̀ɔ̀ mú, ké ɔ ɖá, “Nyɔ ɖò mɛ ɓɔ́ ɓìɖǐ ɓɛ́ ɔ nì hwítì dyí síɛń nyɛɛ kpã́ wĩín poɛ.” Ɓìɖǐɔ̀ ɖé Gèɖèpɔ́ɔ̀ kɔ̃̀à jè gboɛ̀e? 10Ɔ se ɖɛ nìà kɛ cɛ̃ ɓó ɓěà jè cáà? Ɔ céè ma ɓó ɓěà jè, sepóɛɖé mɔɔ́-po-nyɔ̀ɔ̀ ɓéɖé ɓɛ́ ɔ ké mɔɔ́ po ɖé ɖɛ-hwòɖǒ-kɔ̃-dè-dè mú, ké mɔɔ́-dyí-sí-nyɔ̀ɔ̀ ɓéɖé ɓɛ́ ɔ ké mɔɔ́ dyí sí, ɓɛ́ ɔ kéɛ hwòɖǒ kɔ̃ dè kà ɔ mu ɓó ɔ nììn dyéìn nyɛ. 11Ɔ jǔ ké à dyi ma Gèɖèpɔ́ɔ̀ xwaún-ɖɛ̀ ɓá ɓó ɓě bìì, ké à kũ̀àɔ̀ pɛ́ɛ̀-ɖɛ̀ɔ̀ dyi ɓóɖó-kpàà ɖɛ ɓě sɔ̀à ɓě xwaún wɛ̃ɛ jǔǐn, nìí, ɔ mɔ̀ ɖɛ vɛ̀nɛ̀ cáe? 12Ɔ jǔ ké ɓě dyi wɔ̃́ ɓɛ́ nyɔ kà kò ɖò ké kpéɛ̀ ɓě kɔ̃ún ɓéɖéín, nìí, à mɔ̀ùn seɛ ɓéɖé ɖe mìɔe?
Kɛɛ wɛ̃́ɛ́ kɛɛ, ɖɛ kɔ̃̀ kpé ɓɛ́ à ɓéɖé ɓɛ́ à kéà nyuɛɛ, à seɛ nyu. À kùìn ɖɛ séín ɓěɔ̀ hwòɖǒ, ɓɛ́ à ní kɔ̃̀ɔ̀ ɖà nyuín, ɖɛ ɖò ní kɔ̃̀ ɖà Kɛ́ɖɛ́ì bɔ̃̌ nɔ̀mɔ̀ dyíinɔ̀ dyí kpɔ̃. 13Nyɔ ɓě ɓɛ́ wa nyuà kũ̀à ɖé Gèɖèpɔ́ɔ̀ gbǒɔ̀ múɛɛ, wa dyé waà ɖii-ɖɛ̀ sɔ̀ìn ɖé nyíí-ɖɛ̀ ɓě ɓɛ́ nyɔ ɓě dyàà ɖé Gèɖèpɔ́ɔ̀ gbǒɔ̀ múɛɛ mú, ké nyɔ ɓě ɓɛ́ wa nyuà kũ̀à ɖé sáa-kɔ̃-zàìn-gbààɔ̀ kɔ̃ɛɛ, wa dyé sáa-zàìn-ɖɛ̀ ɓě ɓɛ́ nyɔ ɓěɔ̀ dyàà ɓóɛɛ ɖò. Ɔ se ná nìì? 14Kà dyúáɖòɔ̀ kǎà Bounɓoɔ̀ cɛ̃ɛ ma kà nyɔ ɓě ɓɛ́ wa po bɔ̃̌ nɔ̀mɔ̀ dyíinɔ̀ jè zio kɛɛ, wa ɓéɖé ɓɛ́ wa ké waà ɖii-ɖɛ̀ dyé ɖé bɔ̃̌ nɔ̀mɔ̀ dyíinɔ̀ cɛ̃-cɛ̃ múɛ.
15Kɛɛ ɖɛ ɓě kɔ̃̀ kpé ɓɛ́ ḿ ɓéɖé ɓɛ́ ḿ kéà nyuɛɛ, ḿ se wa ɖò nyu. Ké ḿ se ɖɛa céè, ɓɛ́ ɔ kéɛ nyu ɓɛ́ ḿ ké ɖɛ ɖò dyé. Ḿ ɓɛ́ìn dyɛ mɛ́ɛ pū, ké ɔ zi ɓɛ́ ḿ ké ɖɛ ɖò dyéɛɛ dyí. Nyɔ ɖò seɛ nyuɛ́ mu ɓɛ́ ɖɛ kɔ̃̀ jè ḿ nìà ɓɔ́ɖɔ́uń wɛ̃ɛ ké ɖɛ fóɖóún jǔ. 16Sepóɛɖé ɔ jǔ ké ḿ dyi bɔ̃̌ nɔ̀mɔ̀ dyíinɔ̀ cɛ̃iń, nìí, ɔ seɛ nyuɛ́ mu ɓɛ́ ḿ ké ɓɔ́ɖɔ́. Gèɖèpɔ́ɔ̀ kɔ̃̀ ḿ zaa mú, ɓɛ́ ḿ kéɛ nyu. Ḿ se bɔ̃̌ nɔ̀mɔ̀ dyíinɔ̀ cɛ̃iń, nìí, gboò-wùɖù nì ḿ kɔ̃. 17Ɔ jǔ ké ḿ dyi bɔ̃̌ nɔ̀mɔ̀ dyíinɔ̀ cɛ̃ ɖé ḿ mìɔùn nììn hwòɖǒɛ̀-wɔ̃́-wɔ̃́ múín, nìí, ḿ ɖǎ pɛ́ɛ̀-ɖɛ̀ ɓéɖé. Kɛɛ ɔ jǔ ké ḿ seɛ ḿ mìɔùn nììn hwòɖǒɛ̀-wɔ̃́-wɔ̃́ mú nyùìn ní, nìí, ɔ mɔ̀ǎ ɖɛ Gèɖèpɔ́ɔ̀ sè ḿ gbo, ɓɛ́ ḿ ké nyuɛ. 18Nìí, ɖɛ́ jɛ́ɛ́ mɔ̀ ní pɛ́ɛ̀-ɖɛ̀ kɛ́? Ní pɛ́ɛ̀-ɖɛ̀ɔ̀ kɛ̀. Ɔ mɔ̀, ɔ jǔ ké ḿ dyi bɔ̃̌ nɔ̀mɔ̀ dyíinɔ̀ cɛ̃ín, ḿ nyuɛ ɓɛ́ nyɔ ɖò ké se ɖɛ ɖò pɛ́ɛ̀. Ké ɖɛ kɔ̃̀ kpé ɓɛ́ ní bɔ̃̌ nɔ̀mɔ̀ dyíin cɛ̃-cɛ̃ɔ̀ nyíà ḿ wɛ̃ɛ, ḿ ké seɛ nyu.
19Ḿ se nyɔ ɖòɛ̀ gǐì dyɛo, kɛɛ ḿ ɖǎ ḿ mìɔùn gǐì mú nyu ɓó nyɔ séín gbo, ɓɛ́ ḿ ké wa ɓáún-ɓáún Kɛ́ɖɛ́ì gbo dyà. 20Ɖé Júù-nyɔ̀ ɓěɔ̀ mɔ̀ùn gboɛɛ, ḿ nyu ma ḿ mìɔùn kà Júù-nyɔ̀ nìà jɛ́ɛ́ kɛ, ɓɛ́ ḿ ké Júù-nyɔ̀ ɓěɔ̀ Kɛ́ɖɛ́ì gbo dyà jè. Ɖé nyɔ ɓě nìà gma xwíɖíiɛ gboɛɛ, ḿ nyu ma ḿ mìɔùn kà nyɔ nìɔ̌ gma xwíɖíi jɛ́ɛ́ kɛ. Kɛɛ ḿ se gmaɔ̀ xwíɖíi nì. Ḿ nyuɛ náa pū ɓɛ́ ḿ ké wa Kɛ́ɖɛ́ì gbo dyà jè. 21Ɖé nyɔ ɓě seà gmaɔ̀ ɓéɖéɛ gboɛɛ, ḿ nyu ma ḿ mìɔùn kà nyɔ seà gmaɔ̀ ɓéɖéɛɛ nìà kɛ. Ḿ nyuɛ náa pū ɓɛ́ ḿ ké nyɔ ɓě seà gmaɔ̀ ɓéɖéɛɛ Kɛ́ɖɛ́ì gbo dyà jè. Kɛɛ ɔ se ɖɛ ɓɛ́ ḿ ké se Gèɖèpɔ́ɔ̀ nììn gmaɔ̀ ɓéɖéɛ. Ḿ nì Kɛ́ɖɛ́ì gmaɔ̀ xwíɖíi. 22Ɖé nyɔ ɓě se dyi kuɛ gboɛɛ, ḿ nyu ma ḿ mìɔùn kà nyɔ seà dyi kuɛɛ nìà kɛ, ɓɛ́ ḿ ké wa Kɛ́ɖɛ́ì gbo dyà jè. Ḿ nyu ma ná ḿ mìɔùn ɖé wa séín gbo, ɓɛ́ ɖé hwìè kò-kò séín ɓěa múɛɛ, ḿ ké wa ɖíɛ́ ɓě póìn wɛ̃́ɛ́.
23Ḿ nyu ɖɛ séín ɓěa ɓó bɔ̃̌ nɔ̀mɔ̀ dyíinɔ̀ jè, ɓɛ́ ɖɛ bɔ̃̌ɔ̀ mu nyuùn wɛ̃ɛ, ḿ ké ḿ níǐn dyé. 24Nyɔ ɓě dyi kpɛɖɛ kpaín, wa séín vɔ̃, kɛɛ dyúáɖò mɔ̀ nyɔ dyé ɖɛ kɔ̃̀ jè wa kpaà kpɛɖɛɔ̀ kɛ. Má, kà ɔ nìe? Ɔ jè ɓě mɛ vɔ̃, ɓɛ́ ɓě ké ɖu. 25Kpɛɖɛ-kpa-nyɔ̀ séín kpɔ̃ wa mìɔùn dyí ɖé ɖɛ séín mú. Wa nyuɛ náa ɓɛ́ wa ké fĩìn-mì-gbàǎ ɓɛ́ ɔ muà mú gbɔɔ̀ùn wɛ̃ɛ dyé jè. Kɛɛ à mɔ̀ùn nyuɛ náa ɓɛ́ à ké gbàǎɔ̀ nyɔ seà mú gbɔɔ̀ ɓɛ́ìn nyɛɛ dyé jè. 26Ɔ jèɛɛ, ḿ dyi kpɛɖɛ kpaín, ɔ se ɖɛ ɓɛ́ ḿ ké se ɖɛ ɖò hwòɖǒ kɔ̃ dè cáa. Ɔ jǔ ké ḿ kè nyɔ ɖò dyi kùà poìn ní, nìí, ḿ se nì kà nyɔ bĩà ɔ mǔèɔ̀ kɛɛ nìà kɛ. 27Kɛɛ ḿ ɓeìn ḿ mìɔùn nììn kpóɖó-dyùàɔ̀ dyi, ké ḿ nyuɛ cá ké ɔ mɔ̀ gǐì ɖé ḿ gbo. Ḿ nyuɛ náa ɓɛ́ wa ní kɔ̃̀ ɖà ɖé mɔ̄ mɔ̀ nyɔ ɖǎà Gèɖèpɔ́ɔ̀-wùɖùɔ̀ nyɔ tɔ̀ɔ̀ ɓě gbo cɛ̃ɛ ɖé zà.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.