1 Kɔ̀ɖéíntĩ̀ɔ̀ 1

Pɔ́ɔ̀ zà Kɔ́ɖèìn-nyɔ̀ ɓěɔ̀ nyíɔún

1Céè-ɖɛ̀ nìà kɛ sɔ̀ mɔ̄ Pɔ́ɔ̀ gbo. Ḿ mɔ̀ nyɔ ɓɛ́ Gèɖèpɔ́ɔ̀ gã ma kà ɔ hwòɖǒ nyuɛ ma gbɔ poɛ kɛ, ɓɛ́ ḿ ké Kɛ́ɖɛ́ì Jízɛ̀ɛ̀ àpɔ́sò jǔ.

Ḿ kè à ɖíí-gàà Sɔ́sènì 2zà ɓě mɔ̀à Gèɖèpɔ́ɔ̀ cɔ́cì-nyɔ̀ ɓě nìà ɖé Kɔ́ɖèìn-hwɔ̀ɖɔ̀ɔ̀ múɛɛ nyíɔún. Gèɖèpɔ́ɔ̀ nyuɛ ké bɛ̃̌ ɖò se ɓě mɔ̀ nyɔ ɓě kè Kɛ́ɖɛ́ì Jízɛ̀ mɔ̀à nyɔ dyúáɖò kɛɛ bũ̌ nì. Gèɖèpɔ́ɔ̀ ɖǎ ɓě ɖá, ɓɛ́ ɓě ké ɔ nyɔ ɓě jǔ. Ɔ mɔ̀ ɓě kè nyɔ séín ɓě ɖǎà à Bounɓo Jízɛ̀ Kɛ́ɖɛ́ì nyɛ́nɛ́ ɖá dà séín nyɛ. Ɔ mɔ̀ à kè wa Wuɖuí-kɔ̃̀-nyɔ̀ɔ̀.

3Gèɖèpɔ́ɔ̀ mɔ̀à à Ɓǎ kɛ kè Bounɓo Jízɛ̀ Kɛ́ɖɛ́ì mɛ po ɓě mana kɔ̃, ɓɛ́ wa ké ɓě gìɖìǐ nyí.

Mana ɓě nì ɖé Kɛ́ɖɛ́ì múɛɛ jè

4Ḿ po Gèɖèpɔ́ɔ̀ zùo tee ɓó ɓě jè. Ɖɛ nɔ̀mɔ̀ dyíin ɓɛ́ ɔ nyí ma kà ɓě ɖé Kɛ́ɖɛ́ì Jízɛ̀ múɛɛ jè, ḿ po ɔ zùo. 5Sepóɛɖé ɖé ɔ múɛɛ, Gèɖèpɔ́ɔ̀ ɖǎ ɓě bã̀ìn ɖé ɖɛ séín mú. Ɔ nyuɛ ké ɓě dyuò wùɖùɛ̀ mìɔ, ké ɓě zi hwòɖǒ kɔ̃in cɛ̃̀ǐn. 6Sepóɛɖé zàse-bɔ̃̀ ɓá Kɛ́ɖɛ́ì dyíɛɛ ɓéɖé pá ɖé ɓě mú mìɔ. 7Ké ɔ nyuɛ ké kà ɓě nìà à Bounɓo Jízɛ̀ Kɛ́ɖɛ́ì xwáɖáún wóɖó jè hwìǐ gmɔ̀ǔn wɛ̃ɛ, ɓě se nyíí-ɖɛ̀ séín ɓɛ́ Zùùɔ̀ nyí nyɔɛɛ ɖò xwa bĩ. 8Ɔ mu ɓě dyi kùìn tee, ɓɛ́ nyɔ ɖò ké se ɓě ɖɛ ɖò nyu jè kpɔ̃, ti ɓɛ́ à Bounɓo Jízɛ̀ Kɛ́ɖɛ́ì wéɔ̀ mu dyiìn nyɛ. 9Gèɖèpɔ́ɔ̀ mɔ̀ hwòɖǒ-kɔ̃-dè-nyɔ̀, ké ɔ mɔ̀ nyɔ ɖá ɓě, ɓɛ́ ɓě kè ɔ Dyú-gàà mɔ̀à Jízɛ̀ Kɛ́ɖɛ́ì mɔ̀à à Wuɖuí-kɔ̃̀-nyɔ̀ɔ̀ kɛɛ ké gbo kpɔ̃ìn.

Mú-ge-ge nì ɖé cɔ́cìɔ̀ múɛ

10Ní ɖíí ɓě, ḿ ɓaà ɓě ɓó à Bounɓo Jízɛ̀ Kɛ́ɖɛ́ìɛ̀ nyɛ́nɛ́ɔ̀ jè. Ɓě séín mɛ cɛ̃ ɖɛ dyúáɖòɔ̀, ɓɛ́ mú-ge-ge ɖò ké se ɖé ɓě hwìɛ̀ nì. Ɓě mɛ kpɔ̃ìn gbo, ɓɛ́ ɓěɛ̀ hwìɖǐi-poìn-poìn kè ɓěɛ̀ fɔ̀nɔ̀-hwòɖǒ ké dyúáɖò nì. 11Ní ɖíí ɓě, Kóɖówèɛ̀ nyɔ ɓěɔ̀ ɖǎà ḿ gbo cɛ̃ kà zà-ɖɛín nì ɖé ɓě hwìɛ̀ kɛ. 12Ɖɛ ḿ nìà cɛ̃iń nyɛɛ, ɔ kɛ̀. Ɔ mɔ̀, ɓě ɖíɛ́ ɓě ɖá ɓě nì ḿ nììn wáká kɔ̃, ké ɖíɛ́ ɓě ɖá wa nì Àpɔ́ɖè nììn wáká kɔ̃, ké ɖíɛ́ ɓě ɖá wa nì Sífà nììn wáká kɔ̃, ké ɖíɛ́ ɓě mɔ̀ùn ɖá wa nì Kɛ́ɖɛ́ì nììn wáká kɔ̃. 13Kɛ́ɖɛ́ì ge múe? Mɔ̄ ɖé wa kɔ̀ìn ma kà kɔ́ɖɔ́sìɔ̀ kɔ̃in ɓó ɓě bììɛɛ̀? Ɖé ní nyɛ́nɛ́ mú, ɖé ɓě kpá ma kà níɔ kɛɛ̀? 14Ḿ se ma ɓě ɖò níɔ po, ɔ sèìn Kíɖípàsì kè Gédyà ɖòùn. Ḿ po Gèɖèpɔ́ɔ̀ zùo ɓóɛ jè, 15ɓɛ́ nyɔ ɖò ké seɛ cɛ̃ kà ɓɛ́ ɓě kpá ma níɔ ɖé ní nyɛ́nɛ́ múɛ. 16(Ḿ po ma Sɛ́ɖɛ́fínà ɓíɖí-gbǒ-xwíníín-nyɔ̀ ɓěɔ̀ níɔ ɖekè. Ɓó nyɔ ɓěa wáún wɛ̃ɛ, ḿ se dyuò kɛbì ḿ ɖǎ ɓó nyɔ kà kò ɖò ɓě níɔ po ɖe ní.) 17Kɛ́ɖɛ́ì se ma ḿ tò, ɓɛ́ ḿ ké nyɔǔn níɔ po, kɛɛ ɔ tò ma ḿ, ɓɛ́ ḿ ké bɔ̃̌ nɔ̀mɔ̀ dyíinɔ̀ cɛ̃. Ɔ se ɓɛ́ ḿ ké ɓóɖó-kpàà nììn hwòɖǒ-fɔ̀nɔ̀-fɔ̀nɔ̀ dyí ɖú, ɓɛ́ ḿ kéɛ bɔ̃̌ nɔ̀mɔ̀ dyíinɔ̀ cɛ̃̀ìn nyɛ, ɓɛ́ Kɛ́ɖɛ́ì kɔ́ɖɔ́sìɔ̀ ní kɔ̃̀ ɖà ɖɛ fóɖóún jǔ.

Gèɖèpɔ́ɔ̀ kpéɔ̀ kè ɔ hwòɖǒ-fɔ̀nɔ̀-fɔ̀nɔ̀ɔ̀ nì ɖé Kɛ́ɖɛ́ì mú

18Kɔ́ɖɔ́sìɔ̀ jè cɛ̃-cɛ̃ mɔ̀ ɖɛ cá-cá ɓó nyɔ ɓě ɓɛ́ wa nìà mú gbɔɔ̀ǔn wɛ̃ɛ gbo. Kɛɛ ɓó à mɔ̀ nyɔ ɓě nìà póɛń nyɛ gboɛɛ, Gèɖèpɔ́ɔ̀ kpé nì kɔ́ɖɔ́sìɔ̀ jè cɛ̃-cɛ̃ ɖeín. 19Gèɖèpɔ́ɔ̀-cèè-ɖɛ̀ɔ̀ ɖá,

“Ní mu hwòɖǒ-fɔ̀nɔ̀-nyɔ̀ ɓěɔ̀ hwòɖǒ-fɔ̀nɔ̀-fɔ̀nɔ̀ɔ̀ mú gbɔɔ̀ùn,

ké ní mu waà nyɔ ɓě ɓɛ́ wa kɔ̃̀ sɛ́ɖɛ́ɛ, waà sɛ́ɖɛ́-kɔ̃̀-kɔ̃̀ɔ̀ nyuùn, ɓɛ́ ɔ ké se ɖɛ kpa.”

20Dɛ̌ hwòɖǒ-fɔ̀nɔ̀-nyɔ̀ ɓěɔ̀ nìɛ́? Dɛ̌ Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ nìɛ́? Dɛ̌ ɓóɖó-kpàà dòǐn-zà-nyɔ̀ ɓěɔ̀ nìɛ́? Má, Gèɖèpɔ́ɔ̀ ɖǎa nyu ké ɓóɖó-kpàà nììn hwòɖǒ-fɔ̀nɔ̀-ɖɛ̀ɔ̀ mɔ̀ ɖɛ cá-cáe?

21Sepóɛɖé Gèɖèpɔ́ɔ̀ hwòɖǒ-fɔ̀nɔ̀-fɔ̀nɔ̀ɔ̀ nyuɛ ké ɓóɖó-kpàà nyɔ ɓě se ma ɔ dyí dyuòɛ̀ ɓɛ́ìn dyììn ɖé wa mìɔùn nììn hwòɖǒ-fɔ̀nɔ̀-fɔ̀nɔ̀ɔ̀ mú. Ɔ jèɛɛ, Gèɖèpɔ́ɔ̀ poìn ma hwìɖǐi kà ɓɛ́ ɔ nɔ̀mɔ̀ ma dyíin ɓɛ́ ɔ ké nyɔ ɓě ɓéɖéà hwìɖǐǐ-taɓa-taɓa kɛɛ póìn. Ɔ póìn wa dyììn ɖé ɖɛ cá-cá kɔ̃̀ jè à poà zio kɛɛ mú. 22Júù-nyɔ̀ ɓěɔ̀ mɔ́ ɖàɓàìn-ɖɛ̀ dyéɛ dyi, ké Gíɖíì-nyɔ̀ ɓěɔ̀ nì fɔ̀nɔ̀-hwòɖǒ dyi mɔ́uń. 23Kɛɛ à mɔ̀ùn po Kɛ́ɖɛ́ì kè ɔ kɔ́ɖɔ́sìɔ̀ kɔ̃in-kɔ̀ìn-kɔ̀ìnɔ̀ jè zio. Ɖɛa kɛɛ nyu ké Júù-nyɔ̀ ɓěɔ̀ gbǒ, ké ɔ mɔ̀ ɖɛ cá-cá ɓó ɓóɖó-dù kà kò ɖò ɓěɛ̀ nyɔ ɓěɔ̀ gbo. 24Kɛɛ ɓó nyɔ ɓě ɓɛ́ Gèɖèpɔ́ɔ̀ ɖǎà ɖáa gboɛɛ, kɛbì wa mɛ mɔ̀ Júù-nyɔ̀ ɓě mɔɔ ɓóɖó-dù kà ɖò ɓěɛ̀ nyɔ ɓě kɛɛ, Gèɖèpɔ́ɔ̀ kpéɔ̀ kè ɔ hwòɖǒ-fɔ̀nɔ̀-fɔ̀nɔ̀ɔ̀ nì Kɛ́ɖɛ́ì mú. 25Sepóɛɖé Gèɖèpɔ́ɔ̀ nììn ɖɛ cá-cáɔ̀ fɔ̀nɔ̀ hwòɖǒ ké ɔ zi nyɔǔn nììn fɔ̀nɔ̀-hwòɖǒ dyí. Ké Gèɖèpɔ́ɔ̀ nììn kpéí-hwɛ̀-hwɛ̀ɔ̀ ku dyi ké ɔ zi nyɔǔn nììn gana dyí.

26Ní ɖíí ɓě, ɓě mɛ poɛ̀n hwìɖǐi kà ɓɛ́ Gèɖèpɔ́ɔ̀ nyu ma ɓě ɖáa kɛ. Ɓě ɓáún-ɓáún se hwòɖǒ-fɔ̀nɔ̀-nyɔ̀ ɖé ɓóɖó-kpàà gbo. Ɓě ɓáún-ɓáún se nyɔ vɛ̀nɛ̀-vɛ̀nɛ̀ ɓěɛ̀ dyú. 27Kɛɛ Gèɖèpɔ́ɔ̀ gã ma ɖɛ ɓě ɓɛ́ ɓóɖó-kpàà ɖáìn ɖɛ cá-cáa, ɓɛ́ ɔ ké hwòɖǒ-fɔ̀nɔ̀-nyɔ̀ ɓěɔ̀ dɛ̃ nyùìn. Gèɖèpɔ́ɔ̀ gã ma ɖɛ ɓě ɓɛ́ ɓóɖó-kpàà ɖáìn kpéí-hwɛ̀-ɖɛ̀ kɛ, ɓɛ́ ɔ ké nyɔ ɓě ku dyiɛɛ dɛ̃ nyùìn. 28Gèɖèpɔ́ɔ̀ gã ma nyɔ ɓě ɓɛ́ ɓóɖó-kpàà seà ɖɛ ɖáa kè nyɔ ɓě ɓɛ́ wa zàìn zùǔn wɛ̃ ɔ kè nyɔ ɓě se ɖɛ kpaa, ɓɛ́ ɔ kéɛ nyu ɓɛ́ ɖɛ ɓě nìà kàǔn wɛ̃ɛ ké se ɖɛ kpa. 29Gèɖèpɔ́ɔ̀ nyuɛ ma náa, ɓɛ́ nyɔ ɖò ní kɔ̃̀ ɖà ɓɔ́ɖɔ́ ɓó ɔ dyúa. 30Gèɖèpɔ́ɔ̀ nyuɛ ké ɓě kè Kɛ́ɖɛ́ì Jízɛ̀ mɔ̀ nyɔ dyúáɖò. Gèɖèpɔ́ɔ̀ nyuɛ ma ké ɔ hwòɖǒ-fɔ̀nɔ̀-fɔ̀nɔ̀ɔ̀ nì Kɛ́ɖɛ́ì mú ɓó à bìì. Kɛ́ɖɛ́ì mɔ̀ nyɔ nyuɛ ké à sɛ́ɖɛ́ìn dyí. Dyììn ɖé ɔ múɛɛ, à cĩ́-cĩ́ɔ̀ se kɛɛ ɖò ɓéɖé. Kɛ́ɖɛ́ì ɖǎ à buɛ̀. 31Ɔ jèɛɛ, Gèɖèpɔ́ɔ̀-cèè-ɖɛ̀ɔ̀ ɖá, “Nyɔ ɓɛ́ ɔ ɓɔ́ɖɔ́ɛɛ mɛ ɓɔ́ɖɔ́ ɓó Bounɓoɔ̀ jè.”

Currently Selected:

1 Kɔ̀ɖéíntĩ̀ɔ̀ 1: ƁB02

Highlight

Copy