Sálmos 90
90
Dupade uruode atatasõre jnani Moisés uté icatecãraitigade u udojo.
1Pangarádejná, e yoco yoquiyaridébei iji báringai Pãrésõre jé iji yocáqui cásodicáite ore jnese iji yoquiquigáningo, ga jé chuságaja pape disi ejórigo ore eruénique jnese.
2Uje cáma cucaranone udore ore tocachúringai dire u nanique, jé aja uje cáma apésu jnumi, erámi ore, mu jé bajogate aro nanique ome báringai eyúgojma uje que taningárique cuse, ga jé báringai Dupa érãtique chise deruénique to iji deréjna pitade gatuaque.
3Bapésu ga jnanione ore chajnésaru dáringane jnupuñúringa, uje bojninga:
–Beyoi ga ajníñopója uacáringane jnupuñúringa, ayoréode abode uaque á.–
4Chamáñaje mil años iji benominone cho dire chojmarápitique uje e diríca, jeoga cho guedé batiga garósirigo iji dejátique.
5Batéta jnanione udore ore ga ore gajnúone u purique chojmarárique; ga ore chopo ugarape icháraque iji durasé rĩ uje jĩraque íjnoque.
6Uje erãp ojóningai uté quérãpo iji durasé rĩ ga pojnánguenie cuse, mu guedé jno ga udire cacója ñane ga beta.
7Uyoque ga pejnaque yógome báringai ájningarãque uté, ga yocagutedie cho túcutúc ome báringai júruru uté.
8E bacha yocate gajnaréngone udore ore iji benominone iquei, ga yoquipoguiédode yoquisijnaringuéo nóña ga déji guesáringai ome benochai idírecaringuéi uté.
9Yocajnéone dire jnese jnome dajesui iji bájningamíe uaté údi. Yoquejnanie siquerei chĩro re ga ore gajnui tu pujñarique chojmarai.
10Gusu uje yocajnéone dire iji yocucuecaringuei chise 70 años, jeoga gosi etotiguei jiérasi ga ja seca chise 80 años. A siqueredie udire icota jóroque re ome dáringanie jiei marínga, ore di cucha dacate iménuone údi, jé aja pujnusiétigade; uje yocajnéone dire jĩraque jno, enga jé yoco chugúpenique ome yocúringárique choque to.
11¿Gosi déji a jeta chiraja bájningai uté etotiguejnai? ¿Gosi te a uje jé ũré enga chiraja báringai pitote quitique, uje báringai tagu dejo jé chirate bajnéone ore isadodéringadatéo uje a ore chisírasome ua?
12Acadape yoque jeta yisecãco yocajnéone dire udore amíningo jeta yujuco udore guio, ga yicoi ga páyuquetotiguéode chõre re iji yocáyipiedie to.
13Urénga, Pangarádejná, be ga ãriápo rĩ. ¿Ga cho rique díningo iji yui? ¡Be ga osõre barógode uyoque!
14Jĩraque be ga ãreta yógome bajnoraqué eyúgojmai uté iji durasé, jeta yijñiecaco ome yocajéchietaringuéi, ga pininaquei irágu yocajéode jé aja yocajnéone dire jnese eruénique.
15Be ga apésu jeta umáño yocajnéone dire amíningo ga irágu udore ome yoquininaquéode, ga udore batigai jé chorase dire baja cásodicáite batigai iji yoquiquigade uje bapésu yocúringane áyuguhebátacho iji udore, jé aja siqueredie jnese uje yimóngo yocujuré gajnéone cucha udore ome yoque.
16Be ga ajuéga jeta bapesútedatérigo cucha choqui guesi ome barógode udore ore, jé aja jeta ore ape disi ejórigo chimo bangoningájnai uté ome re to.
17Yipésupú ga Yocangarádejnai Dupa ueratígajnai chácariji yoquibai jne jõ. Be ga apésu jeta yoquisagode cucha pisaque uje yipéco ome yoquijmainie jé uerate quigode gatuaque. Jé u, Pangarádejná, be ga yoquimaningone cucha udore ome yoquijmainie jé jogate jne ome ua.
Currently Selected:
Sálmos 90: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
