Sálmos 88
88
Piradé u. Sálmo udaque pipesudé ome Coré abode. Piradé udaque gajnesṍri u piradedie irajasṍripísi. Hemán ezraítagosi o quigode u udojo.
1Urénga, Pangarádejná, Yiquetasṍri Dupá, iji dirode, dejade ore ga yibidi ua iji benominone.
2Amesẽre jeta yicatecãraitigade chise baquei. Orei bangoninguini iji gadoi jeta angári yagoyedie iji bejode.
3Chamáñaje cucha dacate gajnareque uásejnane udore u uje yore yibai. Enga yucuecaringuei uté e chirõre ducode uaté pijnanai.
4E pisecarãte yu to iji udore ore batigai uje ore basája togode ore gajnei eruque, ga yajnui tu jnani etótique uje nóña ga que etotiguérique cusapo rĩ.
5Jnani noñimei tu yu iji togode udore ujade, ga yisocai jé cho ayoré chutígo udore ore uje e ore moji jnaropié uaté ga que ajnusinápo udore ore rĩ, ga pejñuque ore iji bajmanai úringárique pãrésõre.
6Bachajapite yu aja ejo yoríco udimitópisi chaquipie, uje utataringué cuchábi jogadi tu.
7Báringai júruru uté chajo yu aja jnumi; bapésu ga yejnáreque yu ome yote bayátique igojnane udore uje doi baroquéode ga ore chacópise yibai jnese.
8Bajna yijorámeone ore jnese iji yari jeta idája ore iji yu, ga bapésu yúringai peteque ome ore. Pujurúgai yu, ga que toque guese pigaitígome yu.
9Yajirigode íjnoque ga gose cutejmane yáyuguhebátiga. Urénga, Pangarádejna Eyúgojmá, iji dirode jnese ga yibidi ua ga yorei yijmainie iji gaté iji bei.
10¿Ama jé apésurásu bapesute pitijabátique ome ayoré togode ore a? ¿Ama ayoré togode oré gatedie chiringarirase re ga chicota ua to a?
11¿Jé ũré uje pute bajnoraquédatéi iji ducode uaté jã? ¿Jeoga ore chatata báringai ũrepise iji cucha pejnangore jogadi uté?
12¿Ama bátedatéode pijoguirase iji ijnangununie jogadi uté to a? ¿Jeoga bate arégode u, jeta ore chiraja udore iji cucha picadiguiédode jnese uniri uté?
13Mu uyu ga, e yibidi ua jeta átaja yu, Pangarádejná. Ga yicatecãraitigade a chajningare baquei iji durasé jne gatuaque.
14Urénga, ¿Cuchárique u gu a uje bo betéquedatéi iji yu, Pangarádejná? ¿Cuchárique u gu a uje bapógu benochai ome yu?
15Uje qué jnacaripíta yu nanique jé aja de, mu jé yipese yu aja quedéjnane ga yajni pitoringai ejode gatuaque. Yipeyaque yu ome beranone pagutéjoragoso udore cucha, uje que yimécãre.
16Báringai júruru uté e pamurañaque yibai, ga beranone cucha iquiñiringuetáguipíso udore e chajnongose yu.
17Iji deréjnai údode ore chaparu yibai, ga cho yote bayátique iji yejode; e ore chajópise yu aja ñane.
18Bajnime yijorámeone ore iji yari jeta idája ore iji yu, jé aja udore jnese uje yijnórango ñane, ga yijõra idógosia tu ijnangunua uaté.
Currently Selected:
Sálmos 88: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
