Sálmos 84
84
Piradé udaque gajnesṍri u piradedie irajasṍripísi. Ome Coré abode. Sálmo u.
1¡Urénga, pedójnariejna baguíjna pirosobádejna jogadode uje bagúsi udore, Pangarádejna Ujopíerãque Cuchábi á!
2Yáyipie jnátupúsu yui jeta yugúsi Pangarádejnai uté iguíjna cuchábi ujuyaquéode udore ajei, ga yáyipie cho sere iji jmainie. Yáyipie jé aja yigosi jnese tibidája Dupa uecai uté.
3Chugúpẽre ajámamia suaté e chise daguíjna jogatíguiji uté, ga chugúpẽre uñámia pésapo daguíjnai iji baseradéjnai idógosiringai uté ga chicha dabidie aja uté, Pangarádejna Ujopíerãque Cuchábi á! Enga Yeduguéjna Cuchábi upo ua rĩ, jé aja Yudupa.
4¡Pininaquei gajnesórone ore u udore uje ore cho daguíjnai iji baguíjnai uté to, uje que ore cho daja ome báringai picotaque!
5¡Pininaquei gajnesṍri tu gosi uje chise detotiguei iji ua, ga e chicha dáyipie aja dajnai dajeque uté uje chise ua!
6Ga ore chise tuijnai iji dajesui uje i tu Tuijna Peducadode, mu uje ore chó gai ga nóña ga sibíjna uté. Ga guéode udore chaco tuijnai uté gai ome dãretadie gajño udire to.
7Ore jno ga ore etotiguei chajnerame re, chajnerame re aja ore ajesui uté, jé aja ujetiga ayoré chojmara, chojmarane jnese ore chingongara raja Dupade iji daqui Sión uté.
8Urénga, Pangarádejna Dupa Pujnuéngaisṍri á, be ga angarami yajei jochaqué gajnéone cucha ome ua. Acha bangoninguini aja gadoi, Jacob casicaite angureni Dupá.
9Cajire to, Dupa Yocãrésõri á. Acha benominone aja bajegaidi peduguéjna uté enochai, uje bojne aseque puyai aja uté ójo icaite.
10A yugúsirási baguíjna cuchábi ujuyaquéode ajei, ga gusu dire chojmarárique, mu dire chojmarai uté suérase pejnáringo dire mil gai iji guesi. Ueradome yu ujetiga yiyáguena gatéode iji yangureni Dupade uté iguíjna cuchábi piagoi, ga jé ca yupúsirási sijnángone udore ore iguíjnane cucha ao gotique to.
11Chamáñaje Pangarádejnai Dupade u cucha guedé jé aja cucha guebeguéjna pãrésõri uje chicha raja piquéode ome cuchade yúode. A Pangarádejnai uté gueranone u posongaquei jé aja pingoningájnai udore ore jne. A jé ca chãraque cucha ueradode udore uñeque ome gosi jne ujetiga areque gosi adode aja dajesúode.
12¡Urénga, Pangarádejna Ujopíerãque Cuchábi á, pininaquei gajnesṍri tu jnani uté uje chicha danguretigai aja ua gatuaque!
Currently Selected:
Sálmos 84: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
