Sálmos 71
71
1Yicha yanguretigai aja ua ome yúringai pãreque, Pangarádejná. Jé ca ajuégapísa ujetiga pinguíraja dipoi aja yu gotique.
2Ome báringai Ũré ga arame yu, ga ajnime yu iji cucha dacadode jmainie. Acha bangoninguini aja gadoi, ga aqueta yu.
3Be ga o cucarané pãretóraque ome yu, jeta jecucha yibágui uaté gatuaque. Ga be ga ẽ́care yúringárique piquetaque ome baroquéode quigode udore gu uje ua u cucarané uajade ome yu, ga ua upo ore oragadé yoríco yãreto te rĩ.
4Urénga, Yangureni Dupá, be ga ajnime yu iji sijnángone udore ore jmainie, ga ejñu jnani ate noñángone, jnani josipíerane udore ore isagode iji yu.
5U gu uje yangureta bei ome yu, Pangarádejnai Dupade á; uje jnacare gatode yu nanique mu jé yicha yanguretigai aja ua.
6Uje quene yibase nanique mu e basa yu iji gaté ome báringai Yátajasṍre. Ua u uje bajnime yu iji ité ajei nanique. Ga a jecucha yicota ua gatuaque jne.
7Jiei ore uje ore cho cucha pibojmai tiji yu; mu ua u Yãrésõri etoque uté.
8A irágupúsu yibijnani uté jne ome bajnéone yicotaquéo, ga yedoi tu bangoningájnai iji deréjnai údode.
9Jé ca ajócãre yu jeta e yise yúringai choquíjna casé jne. Ujeta yetotiguei garósipise jne marínga, ca ajíome yu iji te jmete.
10Chamáñaje yetesórone udore ore cho daboti cucha iji yu; udore ore uje ore chuquéjnai yu, ga ore chimáta ñane ome yu ga ore pésu dáyipierigui ome yúringárique chuque yui.
11Ga ore chojninga:
–Beyoi ga acajningachome uté uje angureni Dupa e iyaque uté ga beyoi ga asayo uté. Uje que iquetasónique ujo ayoré cuse gu.–
12Urénga, Dupade á, jé ca idája ua ome yu jne. Jĩraque abágui yu ome báringai Yátajasṍre, Yudupá.
13Udore ore uje ore jnátu yucuecaringuei úringárique pejnaque, ga jé tiógararása ujetiga pinguíraja pajegátigai aja ore, ga pejnaque ore. Ga udore ore jnese uje ore ucuei tu pejóporinguérique ome yu, ga a ore dorási ga ore cho pepeque piguitíguiji dipoi uté, ga pijosique udore ore iji jnumi.
14Mu ome yu, ga panguretigai a jé jogate yu gatuaque jne. Ga yicotaquéode ome ua a jé chajnera dádi, jé chajnera dádi jne gatuaque.
15A yibijnani júdode u báringai ũré, basoca piquetangórone udore ome yu jne, iji deréjnane údode, uje que yiraja udore ore eruénique mu.
16A yiji ga yatata Pangarádejnai Dupade uté ipesútedatéode jne. A yĩ́care ua ome báringai Ũrepise jne, ga yedoque dugai tu ua.
17Urénga, Dupade á, uje qué jnacarape yu nanique ga jé bacadique yu nanique. Ga yejna yu aja yujúdode bátedatéo udore jé aja deréjnane udojo to.
18Ujetiga yise yúringai choquíjnape, yúringai uchṹraque ore jne, mu jé ca ajíome yu iji te jmete, Dupade á, jé aja ujetiga yatata báringai Ujopíerãque Cuchape ome disi ejode ore, betotiguejnai ome ore ape disi ejórigo jnese uje cáma ore base.
19Urénga, Dupade á, báringai ũré ome cuchade jnese chuságaja gatajnoquei uté iji te uje atéta uaté iji gaté; ua u uje bapésu cuchadatéode. ¿Ama gosi dérasi jeta cho ua, Dupade á?
20Uje bajuéga jeta yimo pujuré gajnéone udore cucha ome yu uje jiei ore, ga uajate udore quigode ome yu marínga, a atirépo yucuecaringuei yibai te rĩ. Idájapise yu iji guesode iji jnumi údi marínga, a jé aringarápo yu aja gaté jne rĩ iji uté.
21A ajnerame yúringai ujnomeránguejna jne rĩ. Ga a yisápo yúringárique ayoré áyuguhebátaque eruénique jne rĩ ome báringai yaparúgaisṍre.
22Urénga, a yujé yi árpa jne ga yicota ua ome basoca uréone, Yangureni Dupá; a yujé yi uje i tu saltério jne, ga a yirate yicotaqué gajnéringui yiradei ome ua jne, israélgosode udore ore Angurete Puyaguipísi á.
23Yibijnani uté a chejnapúsu daruode ome dajéchietaquéode jne ujetiga yicota ua ome yijñiecade, jé aja yajépisi, uje baqueta yu gu.
24Yarei uté a jé ca chacho chatata basoca arégode udore jne iji deréjnai údode gatuaque; u gu uje udore ore uje ore ucuegode u pejóporinguérique ome yu ga pajegátigai e guiyaque ore, ga pijosique udore ore iji jnumi.
Currently Selected:
Sálmos 71: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
