Sálmos 7
7
Deyaque David uté ga chatata dáyuguhebátiga gajnéone cucha ome Pangarádejnai uté, uje David jnusina benjamíngosi Cus uru gajnaréngone ome.
1Pangarádejná, Yudupá, yucuei u báringai Pãrésõre ome yu. Ga aqueta yu ome udore ore uje ore chajna yu aja quedéjnane.
2Aqueta yu ome udore ore uje a ore chajnangarase yu aja dejode ga ore gajnúone u caraté quedéjnanie ome yu; a ore chusũrurase yu aja jnumi, ga a jé ca gosi dérasi ga charanguirase yu ome udore.
3Pangarádejná, Yudupá, jeta jé ũré uje yipesudode cucha uñeque u, jeoga yiba gajnetique cucha déji yu;
4Jeoga yibai tu yate gajnarétique ome yijõrárique yujo ayoré uje uté gosi isocai omome yu mu; jeoga yibai u uje yoria yujórique ayoré ugúcharigo uje cachi yetétigade quicho udore ome yujoi uté ayoré gu;
5Jetiga ũré ore aguhétajade cucha udore ome yu, ga ajuéga jetiga yumajosórone udore ore chajna yu aja quedéjnane, ga ore chisa yu. Ajuéga ujetiga ore chuchiéjna yu aja jnumone, ga ore chimate yúringai ayoré pangaránaja jnumi.
6Urénga, Pangarádejná, be ga ajnime bájningárua ome yumajosórone udore ga acha ua aja udore ore iquei uje udore ore chijnime dájningai ome yu. ¡Ãriji ga bajiritíga uréone tocade ome udore ore!
7Erámi unirisórone udore ore jnese a ore chamáta ñane aja barosadode jne. Be ga ácariji bayaripi ueradéjnai gai iji gaté ome báringai Peduguéjna Cuchape Pujnuéngaisṍre.
8Ga ua u, Pangarádejná, ujeta ajire erámi unirisórone ore adode aja quigode.
Ajire yadode aja quigode to, Pangarádejná, ga o yoré ga beranone jé chirate yúringai ũré, yijmapié aréguedie udire.
9Dupade ũrei tu ua, ga ua u uje bajmita páyipiedie quigode udore. Jecute be báyipie quitígo ome pisijnaringuéone ipesusórone udore ore jeta ore ate gajnaréngone chise deruénique. Mu atapísaja ayoré uréone udore ore jeta uajate ore iji dáringane ũréo.
10Yãrésõri u Dupa Pujnuéngaisṍri uje uté u uje Piquetangore uté, ga uté iquetade u ayoré áyipie uréone.
11Dupade u Padode Ajirisõre Ũrei. Ga Dupade uté u uje chajire padode aja quigode ga chimo ayoré ate gajnaréngone ga jĩraque ajei dotárome udore ore iji dirode jnese.
12Ujeta jé ca ayorérique chajniápo Dupade gai rĩ ga Dupade doi ga chata daquesei ome uté yui. Enga dimane ojo iji oji ome uté gosi yui.
13Ga chicha pioque ocarate gajnua aja dojo uaté eruei. Ga dimane Dupade uté õrachade iji jmainie jeta chujé ore ome udore.
14Uje jnani sijnátique uté isijnaringuéone iji ajei cho pujningaquérique ome uté gosi. Ga gosi cho jetiga atique déji ajei ga chejnáreque dabi uté achaminone uje tagúji, mu uje base ga nóña ga purupatáringa udore jnese aja guesi.
15Jnani sijnai pésu dejopié ome dojórique ayoré yui jeta ujórique ayoré basája ejopié uaté, mu uté jé u basui aja dejopié uaté ajei.
16Ga uté angoninguite paritigade jé aja úringai chigóca ome dojode ayoré a chajni uté gai jne enga base uté gai jne enga chujé uté taroi iji jnumi.
17A jecucha yisi Pangarádejnai uté gai jne, uje ũrei tupúsu uté. ¡Ga a yedo Pangarádejnai uté i ueradi jne iji yachachagúgode ome úringai Pujnuéngaisṍre Cuchape!
Currently Selected:
Sálmos 7: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
