Sálmos 50
50
Asaf uté gajné Sálmo udaque.
1Dupa Pujnuéngaisṍri, Pangarádejnai uté narare enga pijnangaite erámi achamisórone jé iji guedé tocachúringai jogadi uté enga jé chuságaja jogadi uté uje guedé chacája dabié noñangue.
2Dupade idírecaringuéi tṍraji Sión abubíe sogójma ueradé uaté ga chijñate erámi gai.
3Yocudupade di ga a ca cho paraque gotique jne. Pioque ocarai cuchabé dequejnatodie déji uté iquei, jé basa ga eme cuchábejnai cho júruru iji uté dosadode jnese.
4Ga uté pijnangaite gatajnoquei iji gaté, ga ibididique erámi to, ujetiga uté chajire darasade ore adode aja quigode.
5Ga Dupade chojninga:
–Amátayo yingarangone yurása udore ome yu, ga yojningane u udore ore uje ore chisíome daru iyiejnane ome yu, ga ore tẽra dẽrapáidode cucha ome yu.–
6Ga gaté uté tujua uté úringai ũrepise, uje Dupade upúsu Padode Ajirisṍri uté.
7Dupade chojninga:
–Yurasade uaque á, angáchoi ga a yĩrarare jne. Urénga, israélgosode uaque á, a yatata uacaba gajnéone cucha jne. Dupade u uyu, Uacadupa.
8Que yidosója uaque gu uaquẽrapáitigo cucha ome yu, jé aja beranone cucha udore uje uacapotayome udore ore ome yu, ga jecucha udore déji yiquei gatuaque.
9A jé ca yijna uacachidi aquirájna choqui iji baguíjnai jne, jé aja uacachidode áyasa quedéjna choquío iji piedie ajéode.
10Uje yajnecho cuchiso aségode udore ore jnese iji monte gu, jé aja cucarãte mil dipeséode achamitodie aquirájnai udire.
11Yiraja chugúpẽre chogode udore jnese ore iji cucaranone udore ójodie, jé aja cuchisode uje déji garáyode uje yajnecho udore ore to.
12A chaguhei chejnárase yu marínga, que yi ga yutai yibotique iji uaque uje yajneque erámi udé jnese gu, jé aja jogosórone cucha jnese iji erámi údode.
13¿Ama yagu aquirájna choquíode arione to ome uaque? ¿Jeoga yóji áyasa quedéjna choquíode udore iyojnanie?
14Ẽcho uaquẽrapáitigo cucha ome Dupade ujetiga acãcho gai ome udore, enga ca amócho beyoi uacojningáringo cucha quigode uje uacachachója Pujnuéngaisṍripísi uté jeta gajneque ome uaque.
15Enga abichoi yu iji uacajnenie pujurei dire, ga a yijnime uáguiji udire jmainie jne, enga a jé u ujetiga asíyo yibai jne.–
16Mu ome ate gajnarei uté Dupade chojninga: –¿Ama bajnei turásu jetiga atatarása yuru pirosobádode udore, jeoga babijnani júdode urásu yuru iyiejájnane udore a?
17Uje betéquetí angári yaquĩraquéode ome ua, ga barãte yuruode udore aja baquigade.
18Uje bamo oriechoquírique ga bajuéga bei ome ga bachietai uté diringai iji ua, enga bo bajõráji jnani dipotáquechoquíode udore ore to.
19Basíome babijnani ome cucha gajnaréngone úringárique pujute, ga barei jĩraque dimane ome datuátigade udore yúrique.
20Uje bayáji bayaridode, ga bo baboti cucha iji bajõrápisi uté gatuaque. Jétapũré uje jutareque ua ome baté abi uté.
21Bapesucho cuchade udojo jnese arĩa, mu yo paráguiji barosadi. Ga bajósetí jé yo ua. Mu uyu ga a yiqueta bedodie jne, enga a yingo baba gajnéone cucha aja ua iji benominone iquei.
22Uaque uje uacacadíchoi Dupade, adójnachopísa udojo, jeoga yipésu uacapépitade enga a jé ca gosi déji jeta chiqueta uaque jne.
23Gosi uje tẽra dẽrapáitigo cucha ome yu ujetiga chacãre yibai ome udore, ga uté u uje chosi yu iji gaté. Ga gosi uje chusípise dajmapiedie guio ga a uté u jne ujetiga yingongara Dupade úringai Piquetasõre aja uté.–
Currently Selected:
Sálmos 50: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
