Sálmos 21
21
Piradé udaque gajnesṍri u piradedie irajasṍripísi. David ipesudé Sálmo u.
1¡Urénga, Pangarádejná, peduguéjna cuchábi udé nína re ome betotiguejnai! ¡Urénga, querújna uté ininaquédatéi, uje bẽra uté úringai pujnuéngaisṍre cuchape ome!
2Ua u uje basíome uté áyipie ipotigádode cucha ome, enga que ãraque ajei jochaqué gajnéone cucha uje chutai iji ua ome dabijnani.
3Uje bajningare uté iquei ome bacacãrátigade cucha ome uté uje ueracho. Bachajapite uté jongoto ducayo aja gatoi uje i tu 'coróna', uje óro uegue.
4Uje uté chutai pucuecaringuei iji ua, ga basíome ucuecaringuei ome, ga umare ga érãtique eruénique cuse iji deréjna pitade jnese.
5Uté chise dáringai ingoningarãque ga gose báringai Pátajasṍre ome uté. Uje bẽrate peduguéjnai uté úringai picotaque ome jé aja úringai pitijabate.
6Jé ũré uje bacacãrátigade ome uté jé ca eruénique cuse jne. Bapésu ga pininaquei irágu uté ajei gu uje bagúsi uté gari.
7U gu uje peduguéjna cuchábi uté changureta Pangarádejnai ome re; ome Dupa Pujnuéngaisṍri uté ijnoraquédatéi uté, ga a ca pijocayaque uté gotique jne.
8Bajmana ujopíerãi a chise bamajosórone udore ore jnese jne. Bajmana bãrachua a chisína udore ore jnese jne uje ore chetaque ua.
9Iji diri tuté ujetiga bájningai tocade enga a o ejo pipotáraque iji betesórone udore ore; Pangarádejnai uté a chinire ore gai ome dájningamíe, enga uté iquetai pioque dequejnangore uté a chejna udore ore ¡jaripe! jne.
10Ga a anoningase betesórone udore ore abode jnese jne iji erámi, ga a jé ca pimópo udore ore ape disi ejórigo ore to iji jnani uecárigo ore abode ujade jne rĩ.
11Uje udore ore chucué jórogui dasoca ome ua jeta ore sué babai, jé aja uje ore áyipie noñánguenie udire quigode cuse ome ua, mu que toc ujetiga ore pésu ga udore uñeque chise dáringárique tocachuque ome ua.
12Jecute a apésu jeta ore chisíome dedoboi ome ua iji dáringai bayaque jne, uje bãra bojo aja chaqui ome udore ore yui uje bachagája udore ore edodie.
13Be ga ajosi ua iji gaté ome cutejmane betotiguejna, Pangarádejná. Ga a yoquedoi tu báringai ujopíerãque jne ome yoquiradedie uje yicotágo ua ome udire.
Currently Selected:
Sálmos 21: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
