Sálmos 20
20
Piradé udaque gajnesṍri u piradedie irajasṍripísi. David ipesudé Sálmo u.
1Yipésupú ga Pangarádejnai tangári ua jõ jeta cuchárique chácari bádode iji dirode uñeque; ga Jacob uté angureni Dupápisi i tu ujetiga chãraque ua.
2Ueradi turásu ujetiga uté chiroque bátajasónique aja ua uje tṍraji daguíjna cuchábi uté, ga juégarása detotiguei ome ua uje garani tu dajogonóri cucarãte Sión uté.
3¡Yipésupú ga Pangarádejnai uté jecucha áyipie déji ua ome bẽrapáidode udore cucha, jeta chimesẽre beranone udore cucha ome re uje bapotame udore ome uté iji gaseradéjnai gai!
4Yipotigádi tu ujetiga uté juéga báyipie gaidode cucha jnese ome ua, ga báyipie omenie quigode tocade jnese jne, jé aja dáringáringui tocachugué eruénique.
5A yachietágoji báringai pujnuéngaisṍre jne, ga yarangoi yoquibandérade iji gaté uje yujnusinángo Yocudupade uté i ueradéjnai. ¡Yipésupú ga Pangarádejnai uté tangaripísi ua ome batoqué gajnéone cucha jnese, ga doi udore quigode jõ!
6E yiraja uje Pangarádejnai chisíome dedójnari peduguéjna uté úringai pujnuéngaisṍre ome; Pangarádejnai uté uje déji dedai pirosobádejnai iji gaté a chajnai uté ga edugadé tu dãrachu ujopíerẽ́ piquetato.
7Uñane changureta dachidode guebéquedatéo ome re. Jé basa ga uñane ore changureta dachidode burica ibisócho. Mu ome uyoque ga yichago yocanguretigai aja Pangarádejnai, Yocangureni Dupade uté i.
8Udore a ore chichaga dagataidie aja jnumi jne ome dáringane cõrachucho. Jé basa ga uyoque ga e yiyáguenango gaté ga uajate yóguiji yoquiyáguesiringai.
9¡Urénga, Pangarádejná, be ga aqueta peduguéjna cuchábi uté ome damajosórone! ¡Yipésupú ga Pangarádejnai uté chajnai uyoque jeta yibicoi uté jõ!
Currently Selected:
Sálmos 20: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
