Sálmos 2
2
1¿Cuchárique u gu a uje ájningaránguipíse purása quedéjnane udore ore ga ore tagu dejode ome dáringane ájningarã́cho? ¿Chimo jóroque re uje ore pésu dáyipie bisidéguedie ome ñane?
2Peduguéjna cuchábode, jé aja ore ujode eduguéjna uñane ore iji erámi ore tagu Dupade uruode aja. Ga jé ore chuságaja uje ore pésu dáyipiedie ome re ga ore áyipie noñánguenie udire gajnesṍri u Pangarádejnai, jé aja edójnari peduguéjna uté to.
3Ga ore tibite ga ore chojninga:
–¡Beyoi ga yibérogo ojnaquérodie udire uje pigarique yoqueruéode ome udire. Ga yiquetágo yógome Dupade uté uje chigaru yoque ica!–
4Uté uje déji gaté ome dáringai Peduguéjna cana udore ore pijnane gai; Pangarádejnai Dupade chujñieta udore ore.
5Ga jé u uje chejna dáringai dago aja guesi ga ájningai tocade ome udore ore, ga jé u uje chajuque ore aguté uje ore chududipise Dupade uté uru quigode ome úringai ájningarãque.
6Uté uru quigode u uje chojninga:
–E yingaraque yẽrate peduguéjna cuchábi uté iji yajnei cucarãte pirosobate uje i tu Sión.–
7Yujúdi a u Pangarádejnai arecujaidie quigode jne. Uje Pangarádejnai uté chósi tome yu: –Yabi tu ua, ga bayé tu yu iji deréjnai tudé.
8Ga atṍri yu jeta yisíome punirone udore jnese ome ua, jeta o bajnéngu udore. A jé ca erámi eruénique déji jeta jé ca o bajnéngu udore to jne.
9A ajna baranguéraque ome báringai Peduguéjna Cuchape jeta ejna ore, uje parangué uaté pipesudéji guebei. Ga a ore pépita iji banguirai quigode jne ga a ore cho co chuguérigui jne ome ua.–
10Peduguéjna cuchábode uaque, jé aja uacojode peduguéjna, adójnachopísa cuchade udojo. Ga arajáyo quitique.
11Beyoi Pangarádejnai iroquéode ome uacatãrarachúringai ome uté. Ga anínaño uágome uté.
12Ga achacho uacagataidie aja jnumi iji uté iquei. Ja seca ca apéso udore ga ajei dotárome uaque ga uaque gosi toi ¡paque! iji dajesúrique erãpe, uje jĩraque cho júruru.
¡Mu pininaquei gajnesṍri u gosi uje chucué dãrésonique cucha iji Pangarádejnai uté!
Currently Selected:
Sálmos 2: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
