Sálmos 16

David ipesudé u ujetiga pacadique ore ome.

1Dupade á, ajuse yio uje yicha yanguretigai aja ua ome yúringai pãreque.

2Yósi te iji yáyipie ome Pangarádejnai:

–Ua u Yangarádejnai. Que cuchárique déji siñéngome yu jeta ueradome yu, mu gusu ua uje ujñapetai tu ua ome yu.–

3Ome Dupade anguresórone uje ore déji jnumi udé, jé aja ate arégode, udore ore u uje ore pésu yajéchietaquéode.

4Sijnángone udore ore ejnaréngone cucha a chajnera dádi gatuaque jne uje udore ore chayo ¡jmuc, jmuque! aja dangurenone dupa quedéjna udore quigade. A jé ca yẽra yẽrapáitique cucha piyo pijnimisóño ome ore angurenone dupa quedéjna udore, ga a jé ca yĩ́care udore ore íode to jne ome yibijnani uté.

5¡Urénga, Pangarádejná! Ua u uje yo yajneque cucha iji ua ga bátegoningáne basipísaja yu, ga bajnui tu cóparique uje yijopite uté, ga unéri tupúsu ua ome yu. Bajusípise yio gatuaque.

6Uerate yajnepídi jnupe uté ome yu uje picaque uté eruéode, ga omitigai basipísaja yu. Jé ũrepise uje yajnéone cucha ueracho jnese uje beranome yu.

7A yacacãre Pangarádejnai uté ome yuru ueradode jne, ome o quigode cucha udore ome yu; a dejaque dejátique marínga, yáyipie uaté jé chacate yu, ga cho yiquique.

8Jecucha yicha Pangarádejnai uté aja yedominone iji yiquei gatuaque. Uje uté jogadi u yãrachua enga a jé ca pungurañaque yu jne.

9Jecute pininaquei irágupúsu yáyipie, enga yibijnani uté chachietáji re. Jé aja to uje a yigosi jnese cho dajñare jne ome dáringai pãreque.

10U gu uje a jé ca ajíome yáyipie iji jnaropié jne, enga a ca ajuéga to ujetiga batocaite puyai uté arione tarata aja jnumi jne.

11A acate yu jne ome dajeque pucuecaringué ajnasṍri uté jeta yajna uté to. Enga a yininaquei irágu yajei jne ujeta yugúsi bari. Uje cucha pajmaránone jnese jé jogate bãrachua iji deréjna pitade jnese.

Currently Selected:

Sálmos 16: Ayore

Highlight

Copy

Compare