Sálmos 132
132
Piradé aja dajei iji Jerusalén yui.
1Pangarádejná, ajnusina David jé aja cucha dacate uajádode jnese uje chise uté.
2Uje chisíome daru iyiejájnane ome Pangarádejnai uté, ga jé chajo raja udore ome Pujnuéngaisṍri Jacob angaráni uté, uje chósi te:
3–A jé ca yacája yiguíjnai jne, ga que yimópoji yimochápi gai gotique rĩ;
4enga a jé ca yujuéga jeta yujuru yedodie gai ome moi, enga a jé ca yujuéga jeta yédabídie chise ñane,
5ga yisocade u udore jé aja jeta yise pijogatique ome Pangarádejnai uté, jeta Pujnuéngaisṍri, Jacob angaráni charidi tu uté.–
6Adójnacho uje yudúco Dupade uruode pi cajo uté ujnomei iji Efráta uté, uje íode uñai tu Belén; ga yico uté iji garáyode uje udore i tu Jaar.
7–Boyo, yacágoja uté charite pirosobádejnai jogadi; ga yichajo yoquigataidie aja jnumi iji uté guídade jogapi iquei.–
8Pangarádejná, ayague, ga acáji bayarite pirosobádejnai jogadi; acáji baruode pi uté cajo uje bapijogúsõri u uté ome báringai pirosobádejna cuchape.
9¡Apésu ga baruode júsorone sacerdote ore cho daguidéji cucha ũrepísode ore! ¡Apésu ga bajnorasórone udore ore chejnapúsu daruode ome dachietaquéode!
10Uje bajnóra baroi David uté, ga jé ca o bedobóya bajegaidi peduguéjna uté jne.
11Ũré uje Pangarádejnai chisíome daru iyiejnane ome David ga que doi ga chijnapóji gari rĩ, uje chojningame uté:
–Bape disi ejode uñeque a jé chabíji bayaridi uté jne.
12Ujetiga bape disi ejórigo ore dopísi yuru iyiejnane quigode, jé aja yuru yipijogúsorone quigode jeta yo ore quigome, ga ore ape disi ejórigo a jé ore gajnecho udore quigode to, ga jecucha ga ore cháji bayaridi uté jne.–
13U gu uje Pangarádejnai ajegaidé u Sión uaté; ajegaidi u ujetiga pésu dayaritique iji cucarãte oroné uaté.
14Uje chósi te:
–A jecucha ga yiyaridi u uté gatuaque jne. U gu uje jé yáyipie quicho jeta yicha yijogate ueratique aja uté.
15A jecucha ga yipésu uaté arétigarique jne ome cucha pibotique iji uaté ga jmatágode udore a ore nunaji arureque pibosode udore.
16A yĩra piguidé gajnúraque aja yuruode júsorone sacerdote ore iji uaté jne uje imoi u ore úringane yiquetacho, ga uaté jogosórone yijnorasóño a ore chejnapúsu daruode ome dachietaquéode.
17Ga jé u jne jeta yipésu ga David uté úringai eduguéjna qué chajnera dádi gaté; e yipota yapósi ome yajegaidi eduguéjna yui.
18Ga uté umajosórone ore ga yadíjai u piguidé gajnua pajegátiga aja udore ore, mu jé basa ga a uté pi u ducayo nanganatátique jne.–
Currently Selected:
Sálmos 132: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
