Sálmos 116
116
1Yijnorapise Pangarádejnai gu uje chudute yibijnane jé aja yutaqué gajnéone cucha.
2Uje chicha dangoninguini aja yi, jecute a jecucha yutṍri uté gatuaque jé aja yúringai tudé ueca eruénique.
3Pitoringai chigaru yu ome denuéjnai. Yṍra yu ome ducode uje chague yibai; ga yibasája yúringai sadodé jé aja páyuguhebátigai ipatigayaque.
4Jecute yutṍri Pangarádejnai uté i ome yu. Ga yósi te: –Pangarádejná, yijócha bajei údi jeta aqueta yu ga yiqueca.–
5Pangarádejnai uté paraguipise, ga ũrepise. Yocangureni Dupade uté osõrataguipise rĩ.
6Pangarádejnai chirodípise udore ore uje que urénga ore chiraja dasocáringome re; uje cuchai na yu aja jnumi, marínga, jé uté chiqueta yu.
7Yicatecã́ri yáyipie ga yojninga: –Yáyipie é, bopo pujnúrique rĩ, ga gose Pangarádejnai uje e chatapísaja ua.–
8Ua u uje barame yu ome pitoringai uté. Ga ua upo rĩ uje baquĩ́ra yeducadode ome úringane tocachucho; jé aja jeta jé ca yirída ajã́ronie cho caru, ga gose ua.
9Jecute a jecucha yiriguiji Pangarádejnai iquéode gatuaque jne iji erámi tudé uje uecade ore charidi tu udé.
10Yanguretigai jé jogate yu, uje yojninga marínga: –Páyuguhebátigai yore yibai.–
11Uje yugúsiji yúringai áyuguhebátaque, ga yojninga: –Taque erámi unirisórone udore ore jnese iji erámi.–
12¿Ga yo píringome Pangarádejnai jeta yo oré uté átajaquéode udore ome yu?
13A yãrai cópa iji gaté jne uje imoi tu uje bajnime yu iji cuchade jmainie, enga a yibidi Pangarádejnai uté jne ome úringárique Yátajasṍre.
14A yiji yuru quigode jnese ome Pangarádejnai jne, jé iji de iji pidai udé idaisórone ore edominone jnese.
15Uje Pangarádejnai chajire jnumi ga chimo danguresóningo uje toi, ga cho cucha oreránguiji udore itoringai uté.
16Pangarádejná, jé ũrepise uje baroque yu; baroi tu yu, uje barogué ape yu. Baquesu yerã́sori enuéjna iji yu.
17A yẽra yẽrapáitique cucha ome ua jne, ga u uje yacãre babai ome cuchade udore. Ga a yibidi Pangarádejnai uté i jne.
18A yipésu yojningane cucha jnese ome Pangarádejnai Dupade uté iji pidai idaisórone edominone jnese jne.
19Ga a yipésu udore jne iji ore ujuyaquéode udore ajei iji Pangarádejnai iguíjna cuchábi dosadi; uje déji bagatócoro, Jerusalén á.
¡Pisígai Opejã Pangarádejnai uté!
Currently Selected:
Sálmos 116: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
