Sálmos 115
115
1Pangarádejná, que picotaquéode gajnesórone u uyoque gotique; que yocajneque picotaquéode udore ore gotique, mu picotaque opejã bei uté ome bajnoraquédatéi, jé aja báringai ũré ome cuchade jnese.
2Punirone a ore chojninga jne ome dáringane ijoyatácho:
–¿Ore angureni Dupa jé déji rique?–
3Yocudupade déji gaté, ga pésu cuchade jnese jeta pota.
4Mu ome udore ore ga jé ore ipesute dangurenone dupa ome pláta, óro ore, ga ore imanique cucha pisacho udore ome dajmainie.
5Uje ore pijnani déji, mu que ore narare; jé aja ore edodie, uje déji, mu érãtique ore chimo cuchárique.
6Ore angoninguinone déji mu que ore chudute cuchárique ome; ore ujunane déji, mu que ore chojare cuchárique.
7Ore jmanáyone de jórogui, mu que ore chisa cucháringome. Ore guídade déji mu ore eteque urugúi. Que pududique udore ore potogóro jocarãtique iji ore pusugúi.
8Udore ore uje ore oraque dangurenone udore ayoré gajnu orei, ga jé ore chopise dorade udore, ga udore ore jnese uje ore changureta ayoré gajnúone udore, jé ore chopise udore ore to.
9Israélgosode uaque á, anguretáyo Pangarádejnai Dupade uté, uje uacátajasṍri u uté, ga uté u uje gãreque uaque, ga ichajaque re aja uaquéode ome cuchade jnese.
10Aarón ájnape disi ejode uaque á, anguretáyo Pangarádejnai Dupade uté, uje átapi uaque ga ichajaque raja uaquei ome cuchade jnese.
11Uaque jnese uje uacarosóñiñome Pangarádejnai uté, anguretáyo Pangarádejnai uté. Uje uté átapi uaque ga ichajaque raja uaquei ome cuchade jnese.
12Pangarádejnai que áyipie jnoji yoque, ga a chacacãre yoque jne ome daru ueradode; chacacãrápo israélgosode ore jne rĩ; a chacacãrápo Aarón ájnape disi ejode ore jne rĩ.
13A chacacãre udore to ome daru ueradode uje ore tãrara iji uté iquei, jeoga ayoré gajnareque, jeoga ayorédaté, mu chapuse ore aja.
14Yipésupú ga Pangarádejnai jé chajnera uacájnape disi ejórigo údi jé aja uacabode ore ájnatigo jne.
15Yipésupú ga oyo uacajnéngu Pangarádejnai amangaqué ueradode udore ome uaque; uje Pangarádejnai uté u uje ipesute gaté, jnumi ore jnese.
16Gatajnoquei gajnengóri u Pangarádejnai uté, mu jé basa ga chisíome erámi tudé ome achamisórone ayoré ore uyoque.
17Ayoré togode a jé ca chicotapo Pangarádejnai uté jne rĩ; oderane udore uñeque que dopoi ga chicotapo Pangarádejnai to rĩ, uje oderane udore ore eteque darai iji dode uaté ajei.
18Mu ome uyoque ga yacãco Pangarádejnai uté gai iji dirode udojo jé aja deréjna pitade gatuaque.
¡Acotáyo Pangarádejnai Dupade uté!
Currently Selected:
Sálmos 115: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
