Sálmos 112
112
1¡Picotaque Opejã Pangarádejnai! Pininaquei gajnengóri u uté gosi uje dosóñime Pangarádejnai. Ga uté irasiguipise áyipiedie quigode jeta doi quigode ome re.
2Ga uté atígo a ore ajirique puniri uté yui jne. Ga udore uje ũrepise ore ome dáringane ujñapetácho, a Pangarádejnai chacacãre udore ore ape disi ejórigo ome daru ueradéjnane jne.
3A jé ca cuchade edóraque cusapome udore ore iji ore iguíjnai rĩ. Ga jnani uté a jé ca úringai ũré chise deruénique jne.
4Páyuguhebátigade chajuque re iji ayoré uréone ore dosadode gu ore jogonóri dírecaringuéi uté; udore ore u uje paraque ore, jé aja uje osongáca ore, jé aja uje ũrepise ore ome cuchade.
5Cuchade ueracho ome ayoré parai uté uje juéga dacaniratiguei ome dojode erámi unirísõre ore, ga pijoque jmapiedie úringanie ũrei iji cuchade udore jnese uje chijocase.
6U gu uje que cuchárique chósi tiji ayoré ũrei uté jne. Ga a jecucha páyipie gaite uté gatuaque.
7Ga a jé ca uté aguté cho jora ome daduditígo pujnomé noñácho jne; chamáñaje uté áyipie e nimane gu uje uté changureta Pangarádejnai ojningane cucha ga que chotigase.
8Que cuchárique chósi tiji uté áyipie, ga que chimo pisadodéringai ome re, uje iji udore eruei ga a uté chimo jne uje sué damajosórone ore gai.
9Ga ayoré parai uté chajuguína cuchade aja jmatágode ore ga uté úringai ũré a jé ca chise deruénique jne; uté jmapié aréguedie a u jne jeta ore chẽráchu ome iji uté iquei, ga ore chicota uté ome dachietaquéode.
10Ayoré sijnai uté chimo uté ga jĩraque ájningarãc ome damoi uté; ga uté chigase dajui ome dájningai uté, mu jĩraque erã́ta erámi ome uté ga que pimopóji pedomitique rĩ. Ayoré sijnai uté ipotigátigo cucha que tocade gotique.
Currently Selected:
Sálmos 112: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
