Provérbios 5
5
Jnanione udore ore bijna ga gotópise chequé dibéchoquídie ore iji erámi tudé gu uje ore chajiripise udire ore yúode
1Yababi á, payuquetotiguei, pirajatigai ore déji yu ga yo baquique jetiga angári yu.
2Yigaidi tu gu jetiga acájnaru ua ome cuchade ujetiga áyipierãque ua, enga jé ca cucha bisideque baru quigode ome cuchade jnese rĩ.
3Uje chequé quedéjnanie ore catecã́ri jnani quedéjnane ome dapotiguéode ga ore uruode ueradípiso quigode ga sué cucha pibose pajmarátique gai iji taningai.
4Mu quigade uje jnani chejna chequé tuaté ipotiguéode guesi ga jé cho cucha pibose iringotígo ome. Enga cho jetiga chequé tuaté chujépise ome quesérique uje asode gare.
5Ujetiga ajína gapu dibéchoquídie udire ore aja quedéjnane ga cho jetiga bajína ore aja bode yui ga a bagachodi jogadi tu uté jne.
6Que cucha pucuecaringuei ome gapudíe udire ore gotique. Enga que ore chiraja uje gajnareque ore ajnai tuté dajeque, ga a cuchárigo sué ore gáyode iji. Mu que cucha ome ore, jé ore chejna rángaja úringai pajnac.
7Mu yababi á, adójnangapísa yuruode udojo, ga jé ca acadígui yacajnaquéode quigode ome ua.
8Jé ca acunguésõri chequé quedéjnaraque, jé aja iguíjnai jetiga ca abágui.
9Bamo gu uje pate gajnaréngone chiborátaja pisocade uñane, uñane to. Ga quigade u uje bamanirase ua aja báringárique ate areque diríca, mu ore chimo ua iji badode udore gáyode ga que piyagápo banétique rĩ. Enga gajnareque jetiga achia badode udore ome gapu quedéjnanie ore.
10Que gusu udore, mu jé socaseti eduguéjnane ore chutai baplátadie ujetiga o basijnaringuéone udore oré enga e que agutíñame basagode cucha oréraque gotique mu baminingame ayoré quedéjnane ore.
11Mu a chise deréjnarique jne ujetiga abóji bejode ujetiga e arajaque badode ujetiga pugórodie tṍraji babai ga barañi jórogome uje dorite babai.
12Ga jogadi a u jne ujetiga quene ajnusina jóroga jetiga angári ore uje ore cho baquique diríca ome bate gajnaréngone.
13Enga a ojninga jne: "U gu uje que yangári yacadisórone gotique to. Enga yo cucha bisidéguiji ore acajnaquéode quigode ica gu.
14Uje e yise yúringai dipónguerã́que iji yujode ayoré ore ujade ga ore timíninga yu aja yajesúode ome yúringai dipoque."
15Yababi á, edu bacotéraque ome ua, uje uaté gajnua tu yotique ujetiga tṍraji berutique uje baraja uje yote unere ga jecucha bóji uje que ese yote uñeque unétique ome yodi tuté.
16Berui tuté uje yote unéri tṍraji, ga jé ca ajuseque ga ca achia ujetiga ca chayo bisideque aja dajeque uñéngo.
17Bamo uje bajnépise bacoté tuaté uje gajnua tu berutique. Jecute jé tiógara ujetiga gusu uaté ujetiga batígo basíji uaté. Jé basa ga gajnarenguirase ujetiga batique basíji chequé unejángueraque.
18Pininaquei gajnesṍri tu uté gosi ujetiga jecucha chóji yodi tiji deruguipísi tuté gatuaque. Mu, yababi á, be ga anína ua ome bacoté tuaté uje basa nanique iji báringai jnacare ga ca ese unerotiguérique.
19Uje gapu nanique ga uomepise ome ua nanique, ga uaté gajnua tu erámororaque nanique uje cho chemé, cho chemé aja dajesúode. Ga chijnorapise ua to nanique iji dáringa gapu. Enga gusu bacoté ujetiga chujé ua aja jnumone, enga a jé ca chise banerotiguérique jne, enga a ijnoraquei ome ua chise beruéode jne.
20Yababi á, ¿gotique gu a uje bagarurásu gapu quedéjnanie udire ore uje que bacoté ore mu?
21¿Ja ca araja uje Pangarádejnai que chirajaque badode udore uñeque, uje timíninga ua aja quedéjnane jnese?
22Jnani ate gajnaréngone uje ore adode chaco ore gáyode ga cho jetiga pujuyáraque isaque udore ore uje que ore chijnimápo re iji jmanéraque rĩ. Ga chopo rĩ jetiga pigarique ore aja ñane ome enuéjnarique uje que ore cho cuyúguiji.
23Mu udore ore uje jé ore gaidode u dajequigode ome cuchade iji erámone udojo ga ore isocade udore u uje chorei ore iji pitoringai. Que ore chiraja gu ujetiga ore cájnaru rágome cuchade. Táyipieque ore gu.
Currently Selected:
Provérbios 5: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
