Provérbios 30
30
Cachi jnani bajátique arecujáchi udire nanique uje i tu Agur
1Másagosi Jaqué ujnacari tu Agur nanique. Enga Agur uté cho dajorane quique nanique uje ore íode u Itiel, Ucal ore. Enga chósi tome darecujaidie ome ore:
2-3Que yirajapise cucha dacatíguiji Dupa togójmai uje ueguipis ome pisijnaringuéone. Jecute táyipieguipise yu ome yujode ayoré ore jnese. Enga que páyuquetotigué atíãtique désiji yajénique.
4¿Gosi te uje chicáji gaté mu dopoi jnumi tiji rĩ? ¿Gosi te ujetiga chisa emi te ga chaco gai iji dajmana ajã́ro? ¿Ga ayorérique déji ujetiga chojninga: 'A yigaru yote quedéjnai gai iji yiguidé jne enga yijnóngaja yiguíjnai jne'? ¿Gosi ajuguque jnumi ore iji ñane nanique rĩ? Ujetiga araja gosi ujetiga ajuguque jnumi iji ñane ga atata gosi írique ome yu. Jeoga atata uté gosi ujnacánique írique to jeta ujnacánique cuse, ga yiraja to.
5Jecucha Pangarádejnai chirota danguresórone ore uje ore chijnorapise uté. Enga Dupade chingongara cuchade aja yoque ga ca yotigáco uté. Chamáñaje jecucha ga uté uruode tocade jnese gu.
6Ujetiga atata Dupade uru quigode ga ãrápisaja quigode. Enga a ca Dupade dosója ua jne. Chamáñaje udore ore uje ore chatata Dupade uruode mu ore chõre quigode, ga a Dupade cho arapatáquechoquíji ore jne enga obiréjnapise ore úringáringo urupatáquechoquío ome dojode ayoré ore.
7-8Dupade á, yutai ua ome cucha gárode jeta asi ome yu uje cáma yitoi. Jõrai tu ujetiga ajócãre yurupatáringane iji yibijnani ujetiga yedupise yuru omone. Jõrai tupo rĩ jeta ca ugúcharánguipíse yu, jeta ca yijmátapise rĩ, jeta yibotígo jé déji to iji dirode jnese to.
9Bamo ujeta ugúcharã́que yu ga a ca yise banétique jne ga a yo cucha bisidéguiji badode jne. Jé basa jeta yijmátapis ome cuchade ga a yoria cuchárigo ga jé yipésu yibai tome ua to enga ore chietáyime ua gu yadode udore ome ua.
10Jé ca aguhéta cuchárique bojórique ayoré irótique gánique uje uté irósõri déji ejoi. Ga ja seca chirota daroi enga bejnáringui jóroque uru dosógode ome ua.
11Jnacarode uñane ore déji uje ore cho darúja dayode ga que ore chise datedie unétique.
12Ayoréode uñane ore josipis eti jé ca ore iñóñaringuetíque cusosi, mu que pejnaque cucha dacadode udore aja guetíguiji udore ore, ga jé ore ate noñángone qué jogate ore gatuaque.
13Ayoré uñane ore déji uje ore cho cuchadatéji raque, ga ore toji darasade gáyode ome denocha patígode.
14Ore u uje ore chajnose ayoré gajnaréngone ome cuchade ga ore doi dajosipiedie ome ore gatuaque. Ga cho jetiga ore chinguíra dajmanegataidie aja udore ore, jé aja dasṍreringui.
15-16Jṹjui abidie gare ore, mu jecucha ore uruode chojmara ome dataquéode enga que ore chirame dataitique ayoré enga ore chojninga: "Asi yu, asi yu, asi yu."
Cucha gagájnione déji to uje que toc jeta subudé ore to: Jõrai u ducódedie. Jõra tupo chequé aberedie ore rĩ. Jõra tupo gojna uajátique rĩ uje que cucha popitique déji. Jõrai jé upo pioi rĩ uje a pipotaque marínga, que chacho dáringai pipotac.
17Ujetiga gosi dojnóngaja dai, ga chujñietápo daté iji úringamía gata rĩ, ga jé tiógara jeta quiráquirátique chijnime uté edóraque. Jé tiógarapo rĩ jeta chuque uté ga pimaníngaja jnumi ga cobotodie tagu arione iji cachodi.
18-19Cucha pirajaque gagájnione déji uje que yiraja udore quíquedatérique: Jõrai u arori uje chó ga chise erãpe ponai ome dáringai choque. Jõrai jé upo ugai rĩ uje chicáji cucaranemúone ujade ome dáringai urugu. Jõrai jé upo cuco cuchátique rĩ uje yote quedéjnai chachia re iji jnumi mu jé uté diguiji gai. Jõrai jé upo jnacánique rĩ uje nejéru gapúraque útigo ga chimánaja re ome danejequéode.
20Chequé amanachuguéraque jeta moji jnani quedéjnarique gari a uaté chojningárasa: "Que cucha yipesudode gotique ome yu." Enga uaté cho jeta tagu dabotique ga chejna ga jĩraque churu dabijnanane ga a chojningárasa: "Jé go que yiboté tuaqué catája yibijnanane gotique."
21Pisoca gagájnione déji uje erámone jogosórone ore chujãpise: 22Jõrai tu uje ore cho deduguéjna iji ayoré pisai tuté. Jõrai tupo rĩ ujetiga ayoré táyipietique chise dáringárique ugúcharã́que, enga cucha pibosode sué uté gáyode. 23Jõrai tupo chequé petéguebéraque rĩ uje chisa dabai ga quene cho jnóro to enga cho chequé omé iji re to. Jõrai tupo jetiga chequéraque irógueraque chijna abai iji daroto tuaté gari ga abai cha dacoté ga nóna dacoté irogué tuaté.
24Cuchiso gagájnamone déji jnumi udé uje irajatáguipísape sudore ome jnani irajatade ore: 25Jõrai u gajnongójnanie. Uje que uajadipise udore ore mu jecucha ore chijna daborade aja daguíjnai ajei jeta ore tagu iji esoi. 26Jõrai tupo edórobe quedéjnanie rĩ uje que jiépisi ore gotique mu ore chiraja dasocáringome daguíjnane úringáringo pijóchacho. Uje ore chãraque rágome cuchiso chagúode ga ore pésu daguíjnane iji cucaranémui uje cucarané uejájna iji. 27Jõrai tupo jidabidie rĩ uje que ore eduguéjnarique cuse mu jé ore nóna ñane aja dajesúode ga que ore cho jmíti, jmíti ome ñane. Ga ore pésu dajochai aja dajesúode uje ore dique. 28Jõrai tupo ugóbedáyode, uje ajámape ga a jé gosi chichasirásiji dajmana ajã́ro ga jé chopise gosi jmana ajã́ro. Mu que ore cájnaru rome eduguéjna cuchátique igochocóiya uje ore choru ga ore chicha daguíjnane aja to.
29Cucha gagájnione déji uje chijose raja dajesúode ga jecucha yimíningacó ore aja ore úringane urugúo: 30Jõrai u caraté quedéjnanie uje cuchisode jnese ore dosóñime uté jnese, jé basa uté chijose raja dajesúode uje que dosóñime dojórique cuchiso. 31Jõrai tupo cochagájnarique rĩ uje chijose raja dáringai urugu ome dojode cochagájna. Jõrai tupo áyasa uerenie choqui rĩ uje chijose raja dáringai urugu to enga que dosóñime dojórigo choquío iji darosadode. Jõrai tupo eduguéjna cuchábi uje urasade ore chijñángaja dajocaningai ga que chimo pisadodéringárique ome re.
32Táyipie chá, aya báyipie gajnarénguenie ome bapesute gajnaréngone cucha yúode. Enga be ga angári bajnéone yaquĩraquéo udojo ome ua, yacãrájane cucha udojo: 33Ujetiga gosi chipatigase aquirájna irisode iji ñane ga nóña enga mantéca uté. Ujetiga gosi chipatigase dojórique ayoré ujunai ga iyoi tṍraji ujunane. Ga jé chopo rĩ ujetiga gosi pésu dojórique ayoré ejóporinguéone ga gosi chirate uté ga ore pésu pocaningai ome ñane.
Currently Selected:
Provérbios 30: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
