Provérbios 20
20
1Ujetiga ayorérique chóji vínorique ga jé u uje surungúmeque uté gosi. Jé chopome yote pioi josórone ore rĩ uje uté chisi ome dedojísedie ome dajosṍri uté gosi. Que toque páyipie oméraque quitígome gosi uje chóji dajódode udore ga jogadípise jmainie gatuaque.
2Eduguéjna ájningarã́quechoquíode ore gajnua tu caraté chagúraque uje tagu dejode. Ujetiga ayorérique chichagu ¡tec, tec! ga jé u uje gosi chise darosobádi cucha ome re.
3Picotaquéode gajnesṍri tu gosi jetiga chiraja jeta ujórigo ayoré ore dosója ñane marínga, chécãre daruode qui ga que ore pojna ñane gotique. Jé basa ayoré táyipiegode ore chiraja jnese jetiga ore chaguhéta pipojnaquéode ñane gáyode.
4Uje e putáningai u, ga ayoré utacade chutãre jnese, jé basa ga ducutáguebéi que áyipieraque déji dáringárique utáca gotique to. Mu ujetiga ore na dacatígo cucha ga ayoré utácajmái chucué jórogui náraque cucha to mu que chiraja jogatique.
5Cho jetiga jé ca piraja páyipie pipoguiéderaque iji ayorérique, mu gusu ayoré irajatátique jeta chirajapise páyipie pipoguiédedie quigode iji ayoré chojmarai áyipie ajei.
6Jecucha ga ayoréode uñane chojningame yoque: "Ango báyipie quigode aja yoque uje yoquijõrápise ñane gu." Mu que toc jetiga yatatago yocáyipie quitígome gosi ga gosi jé ca chatatame dojórigo ayoré gaté.
7Pininaquei gajnesórone u jnanírique atígo jetiga uruode ũrepíso, ga adode omipíso rĩ.
8Uje eduguéjna cuchátique chamáta dojode eduguéjna ore aja re ome dajiritígo ore ate, enga uté u uje chajiripise ore adode aja quigode bajaque, enga jé u uje chiraja ujetiga máraque gosi, jeoga ca máraque.
9Que togome ayorérique jetiga chojninga: "Ueradípise yáyipiedie gatuaque, jé chopo yadode rĩ, uje que yiyoguérique cusipise."
10Que Dupade chisípise cucha gárode udojo unétique: uñai u ujetiga gosi tẽra gajnetique cucha mu chicháji yui. Jõrai tu jetiga gosi chuguhese cuchárique ga chicháji batigai yui.
11Ujetiga disi urẽjai tu marínga, pijoguipise ome ipesudode cucha jetiga paraque uté. Pijoque jetiga ũré enga arécho adode.
12Pangarádejnai pésu yocangoninguinone gu ujetiga angoninguite guesaque yógome cuchade jnese; enga pésu yoquedodie gu ujetiga yajico cuchade aja quigode ome yoquedodie udire.
13Ca aminingara ua ome pucutaquérique, jé soca jé ca amo cucháringome ua jne. Mu báyipie jogadípise cucha pisatique ome ua ga a ese babosode enga suépise babai iji udore.
14Ujetiga ayorérique doi oredie ome cucháriguiji oredie jogadébetíque dojo ayoré iguíjnarique ga chojningárasa: "Be yugúcha udore oredie to." Mu ujórique ayoré chojninga: "Oredie uásejna ga que pigaidé uje que uerate bagúchade to gotique." Ga chosi oredie iji jnumi ga jé u uje ujórique ayoré doi oré tome. Gaisṍri uté jno ga chojningame dagaidé tiji te: "¡Urénga, yirasique yu uje yigaidi tudé oredie jé garósipise que!"
15Órodie jiépisei jórogui oredie, jé aja cucarané nanganatáguedie, mu ujetiga gosi tujua payuquetotiguei ga gosi sué óro udire gáyode jnese.
16Ujetiga atai cucháringome bojórique ayoré di icha, ga jé tiógara ujeta guẽrasóri chaquĩ́ra bagúcha iji dari jeta di icha uté chimate doidi oredie jne, enga jé u uje chisiapome bañomi casica bagúcha ome ua rĩ. Ua u gu uje bataite uté ugúchade ome ayoré di ichai uté gu.
17Ayorérique jeta irasique paringaquéode, ga chimo cuchade gu daringaquéode ome re uje edójnari paringaquéo, mu aringaquéode quigade ga cho jetiga chichagu ungaréjnai arĩ́ringaja dabijnani.
18Ujetiga jé ca báyipie quitique piragome ua marínga, arodape bajõrárique yui jeta ango quigode aja uté to. Ga jé u ujeta apésu jeta ueradípise quigode ome uté ajequigode to. Udojo jé isoca to pocaningane uje ore asutedie chingo dáyipiedie quigode ome ñane jeta ore chise dáringáringo pujnuéngaisóño.
19Ayoré jutaréquechoquíode ore etéquetí ca ore chatata darárique ome dojórique ayoré. Jecute be, ga jé ca acunguésõri ayoré jutaréquechoquíode udore to, uje que ore pógu darárique, enga a ore chedo ua to aja dajesúode.
20Jetiga gosi uruode noñácho ome dai, daté ore ga a gosi chopise diri uje jĩraque íjnoque, ga gosi toi ga jõra tu ijnangunua utataringuejnai ome dáringa pirosobade.
21Ujetiga gosi chejna daguesi bajaque ome dagúcharigo enga a ca chuseque dagúchade udore jne, jecute a ore jogate uté gosi gari gatuaque. Mu pláta docoidé bisidéguerigui jĩraque jnopo rĩ iji gosi gari, uje que gosi chejna daguesi ome gu.
22Ujetiga bojórique ayoré isocárigo gajnarécho ome ua marínga, ca arate gosi isoca gajnaréngone ome ua. Enga anguretapise Pangarádejnai ga Dupade uté a cho baquigome cuchade udore jnese, enga a chijnime ua jne iji uté isoca gajnaréngone jmainie.
23Pangarádejnai chetaguipise ayorérique jeta chuguhese dẽrapáitique cucha mu déji dabatigai yui, enga chãra gaisṍri.
24Pangarádejnai u uje chiraja dasocáringome yoque iji dirode jnese, jé aja yoquiquitígo erámio. Que togome ayorérique jeta chiraja datique dirome iji dire uñai, jeoga daquitique.
25Acuepísi báyipie quicho bajaque jeta apota apésu Dupade gajnetique cucha, ga jé ca taque ua ome. Uje gajnareque jeta angongara ua aja Dupade diríca, mu que apésu bojningárique cucha ga jé bapesute barosobádode cucha udore.
26Eduguéjna áyipierane ore upúsu uje que ore cási pisijnaringuéringo iji daniri, ga jecucha ore cho dajuñame ayoré ate gajnaréngone ore iji danirone jeta ore jõre ga ca ore pésu pisijnaringuéringo iji deduguéjnarique unínique.
27Pangarádejnai jé ichajapite pirajatigai aja ayoré ponáyone ore jnese, gaidi u ujetiga ore chiraja jetiga paraque ore, jeoga sijnaque ore. Ga pirajatigai gajnui tupúsu dírecaringuérique iji yocajei uje chijñate yocáyipie gai aja yocajei eruéode ujetiga pijoque yocadode ome ñane.
28Ujetiga ore asutéraque ũrepísome dajnoraquéringome darasade ore, ga que piyaque uté unerotiguérique ome darasade ore, enga jecucha ore chijnóra uté ome úringai ore eduguéjna.
29Picotaque jnacarode ore gu ore etotiguéode ome re jne. Jé basa ga picotaque choquíjnane gu ore uchudie uje cóbi, uje imoi tu uje ore irajatigade jiei ome damone cucha iji erámi tudé.
30Ujetiga paquesuque ayoré sijnátique údode mu uté gosi chiqueta rome dáringai pajnangoque iji date gajnaréngone. Uje gosi e chimate raja dajnéone pujuyaquei uéchai ga jé u uje que gosi agutéraque chopo jora ome dapesudode udore cucha gajnarécho rĩ iji udore quigade.
Currently Selected:
Provérbios 20: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
