Provérbios 17
17
1Ujetiga jnanírique jogasui ore chedu arureque uajádode úringane piboso mu pijnoraquei dépisiji udore ome ñane enga uté gosi irasitigai suépise ayoré ugucharane ore gáyode ome darasitigai, uje ore posode jiépisi mu que ore chise ñane unétique iji daguíjnai.
2Ujetiga jnanírique irótique cuse ga tangaripísi darósõri uru quigode ga iroi tuté suépise abipísode uñai gai uje abipísi que doi dai ojningárique cucha. Ga dayé cha cho dabi iji uté. Jé basa ga cho dabi iji daro casica ga uté gajneque abi casica gajnéone cucha jnese, enga uté gajnepídi jé chopise ape uñane ore gajnéone cucha to.
3Yirajágo uje pipotame órodie, plátadie ore ga iguirode tocade iji gáyode ga pijoque úringanie ichapísi. Adi jé u to uje Pangarádejnai chajire yocáyipiedie aja quigode, ga quene yocáyipiedie quigode pijoque, jeoga ueracho, jeoga gajnarécho.
4Ayoré aringácachoquíode jecucha ore tangári ñane áyipie gajnarénguenie quigode ga ore doi ñane áyipiedie, chamáñaje urupatáquechoquí udore ore jnese gu.
5Ujetiga adojnóngaja ayoré gajnarétique enga cho jetiga adojnóngaja Dupade to uje Dupade imanique ore to gu. Mu ujetiga cucha dacatique chósi ti iji ore, ga bangana ore gáyode ga bajneque Dupade ujuyaquérique jne ome ua.
6Uje choquíjnane ore ájnamone cuse ga ore irasique dájnamone ga ore cho daparagádu dájnamone ore. Jé basa jnacarode ore cho daparagádu dayode udore ore.
7Que pisoca gotique ujetiga áyipierã́tique cho darupatáringa. Ga jé chopome turuturérigo to rĩ uje que pisoca to ujetiga udore arecujátigui ueradei uje ore narare.
8Ayoréode uñane ore chicota rome dáringárique cuchadaté enga ore chojninga: "Uyu u uje yáyipiedie tocade ome cuchade jnese." Enga jé ũré ore uruode mu ore áyipie quigode tocade gu uje ore cho oré ipesusórone, mu que ore chatata dapesudode udore quitígo.
9Ujetiga gosi ujórique ayoré cho damajo marínga, gosi chedu dajnoraquei ome enga jogadi u uje uté gosi cha dajei dotáningane enga jé u uje chopise dajõrai iji damajo casica. Mu ujetiga jé ca gosi chicadígui dojórique ayoré uru dosótigo ome re enga cho jetiga gosi jé chucuase dajõrárique iji quedéjnane gatuaque ome re, enga cho jetiga ore cãrápisa daquigode ome ñane.
10Ujetiga ayorérique cho ayoré áyipierã́tique quique iji ipesute gajnarétique enga gosi cho quique ga chojmára mu jĩraque uté cha dapesute gajnarétique cucha. Jé basa ayoré táyipietique jeta ayorérique cho jóroque quique gatuaque mu que cha dapesutique date gajnarétique gotique. Ujetiga gajnéone pejopo chise 100 marínga, cáma cha ate gajnarei tuté.
11Ayoré jõcaratáguebei jecucha chucué dajocaningai iji udore, udore, mu diga chise dacuei ga jé cachodi tu ome dajocaningai.
12Ujetiga ayorérique ajéode u ujetiga chijnimírase cuchiso chagúrique iji pujuyáraque, mu cuchisoi tuté que chiraja jeta pejñunguírasiji mu iquiñiringuetac uje tagu dejode ga que toc jetiga ayorérique chejñu iji. Mu iquiñiringuetáguipísi tu jeta pátapi ayoré turuturérique ome áyipie quitígo uje que toguípise go jeta áyipiedie quigode tocade. Enga gosi jé ipesudépise dajuredie ome re jetiga cháta raja ayoré turuturérique ome áyipie quitígo.
13Ujetiga ayorérique áyipiedie ueradépisei ome ujórique ayoré, mu ujoi ayoré que doi dojoi ayoré isocade to gotique, ga pésu dajõrai ujuredie, ga jé uté gajnei dapesudedie pujuré gatuaque, ga pujuredie jé jogate uté jogasúode ore gatuaque to.
14Pipojnaquéode gajnui tu jeta ayorérique pésu dajuyaquérique aja yote bayátique iquénique ga yodi tuté chusaque ujuyaquei ga chayója quedéjnarique iji uéchai, enga chejna daqueminórone cucha jnese. Mu ujetiga ayorérique doi enga suru yodi garani iji ore ujuyaquei tuté enga e que yodi chayóji uéchai enga que chejna cuchade iji uéchai.
Ga adi jé u to ome pipojnaquéode. Ujetiga gosi jĩraque cha dájningai ome dojórique ayoré ga jé gusu iji te. Mu ujetiga ca gosi cha dájningai ga chimate raja pocaningárique ome dojórique ayoré ga ore socárome ñane enga ore ájningai e chajnerame re.
15Pangarádejnai chetaguipise pisoca gárode udore jnese: jõrai u uje ore cho dajuñame ayorérique bisideque uje que bárique cucha cuse mu. Uñai upo rĩ uje ore chirajapise ayorérique atique mu que ore cho dajuñame uté ga ore chirógaja doi bisideque.
16Ujetiga ayoré táyipietique chicárasiji escuélaraque to ga ore chojningame: "Táyipie chá, ¿jé bagaitique uje bajna baplátadie iji bajmanai?" Mu uté chajnai ore ga chojninga: "A yijírasi pirajatigai oréraque to ga irajataguirase yu to." Mu uté timiningara daplátadie bisideque, uje que toc jeta uté chise darajatigárique uje chajo raja dáringai táyipieque gu.
17Ujetiga yoquijorámetique cuse enga jecucha ga yoquirasique ñane, enga que yimójo ñane isocárique. Enga uje páyuguhebátigade chise yoque, ga yoquijorane udore cháta cuchade aja yoque iji yocáyuguhebátigade jmainie, enga ore osongaquéode suépise yoquẽrópisedie, yoquesaguipísode ore osongaquéode gáyode ome yoque.
18Ujetiga gosi chojningame dojórique ayoré: "Be, ga asi ome bapláta ome uté, ga a ca chatire babai jne mu uyu u jne jetiga yatire uté oidéraque babai," enga uté gosi úringai turuturé quene pijóguiji daruode udore.
19Ujetiga jecucha gosi uruode gajnarécho gatuaque enga imoi tu uje gosi irasique pocaningane. Ujetiga gosi jecucha chicota rome dojode ayoré, ga ujode ayoré ore chacho icotaquéode ga ore chanire ga jé uté ipesudei dajuredie ome re.
20Ujetiga gosi chiraja dáyipie gajnarénguenie, daru gajnaréngone ore ga jé ca gosi changureta cucha onique yúrique ome re. Uté gosi gajneque obiréjnai tu pajegátigai ome re jne.
21Táyipiegode ore dayode cho jóroque dáyugu rome dajnacari adode uje chudute uté ujnoméone. Enga que togome ayoré táyipietique danique jeta chise dajóningárique.
22Pitijínaquéi chopise cucha bisitígome gosi. Mu ujetiga gosi áyuguhebátigai nápisaja jnumi enga que chise dacaniratiguérique gotique.
23Ca angári ayorérique ujetiga chojningárasome ua: "Ca atata yibáringome ore ga a yimate ua ome yipláta jne." Chamáñaje ujetiga baberási uté uruode enga báringai sijnaque pijoguipise jne ome badode udore.
24Ujetiga áyipierãque gosi ga jecucha uté gosi chatingáraja dapesudode cucha yui jetiga chimate jne. Jé basa táyipiei que áyipieraque déji cuchárique úringai pimanitique yúrique.
25Táyipiegode ore dayode, ore datedie que ore chiraja dasocáringome dabi táyipietigade enga ájningarãque ore iji ujade ome dabi, jé basa ore cho dáyugu rac iji ujade ome dabi adode.
26Gajnareque jeta eduguéjnarique chajnose jnanírique bisideque ome iplátadie ujetiga que bárique cuse. Jé chopome ayoré parágode ore rĩ uje eduguéjnane chaquesu ore údode bisideque uje que ore bárique cucha cuse mu.
27Obiréjnapise ayoré áyipierane uje darájma ore ga ore cho paraque gatuac. Obiréjnapo irajatade ore rĩ uje ore cho paráguiji cuchade jmainie.
28Ujetiga turuturé ayorérique marínga, ore cho ayoré áyipieránguiji uje cho paráguiji dayaridode gatuaque, ga que pijoque úringai turuturé.
Currently Selected:
Provérbios 17: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
