Márcos 10
10
Jesús cho quique uje a ca pujuegate iji taningapísi ujetiga gosi tṍra dacotéraque
(Matéo 19:1-12; Lúcas 16:18)
1Uje Jesús chijnime re iji ore idai tuté uje i tu Capernaúm, ga jé u uje qui tu ore uniri Judéa. Mu uje chise Judéa uté ga jé u uje chicáji tié Jordán uéchamitó iji guedé garani. Mu jĩrique ayorébui ore yore gai. Ga Jesús jĩrique doi dasocabei uje chacate udore ore. 2Jecute fariséode uñéngo ore sose Jesús yui ga ore catecã́ri ujetiga pujuegate ome ayorérique ujetiga cha dacotéraque. Mu ore ucuei upúsu ujetiga cho paraque enga jé u ujetiga ore chise bárique cucha. 3Mu Jesús chajnai ore ga chósi tome ore:
–¿Ga jé ca arajáyo Moisés acajnaquéode quigode ome udore a?–
4Mu jé basa ore chajnai gaté, enga ore chojningame:
–Moisés uté urusarane quigode u: ujetiga ayorérique pota piyátigome dacotéraque, ga uté gosi doi ga chutai dangaránone ore urusãratígo. Ga jé u uje uté gosi chisi ome ore urusarane udore ome dacoté ga jé u uje pijógome úringa piyagué.–
5Mu jé basa ga Jesús chajnai ore ga chósi tome ore: –Moisés uté juéga cucha dacadode udore ome uaque nanique uje chiraja gu uje que toc ujetiga pajnique uágome uacáyipiedie udire. 6Mu uje Dupade pésu cuchade jnese iji taningápisi ga áyipie quigode u nanique ujetiga jnanírique, chequéraque ca ore cho jmíti, jmíti ome ñane. Uje Dupade uruode chósi te: "Dupade pésu jnani nanique ga pésapo chequé rĩ." 7Dupade uruode uñane dépoji rĩ uje chósi te: "Jecute a ayorérique chirame danique, datéraque ore jne ga uté gosi jno enga jõra a upúsu dacoté aja tijórigo jne. 8Mu udore a gajnui tu ujetiga e que garapo jnani, chequé ore to gotique, mu e ore nóña ga chopise ujetiga e chojmára ore ome ñane." 9Jecute a gajnareque ujetiga jnanione ore chejñu cuchárique uje e Dupade oite ore aja ñane que.–
10Uje e ore dépoji dapusiédi guiguíjna enga Jesús acadigode ore catecãrápoi rĩ ome cuchade udore quitígo. 11Jecute Jesús chajnai ore enga chojningame ore:
–Udore quigode u arĩ́e: ujetiga ayorérique cha dacotéraque ga chisapo dacoté uñáraque rĩ, jé u uje uté gosi chimate dasijnaringuéone ome dacoté dayagué bajé tuaqué. 12Mu jé isocai upome chequéraque rĩ. Ujetiga uaté goto cha damanique enga dopoi ga chisapo ujórique jnani rĩ, jecute uaté chimate dasijnaringuéone to ome dayai tuté dabai bajai.–
Jesús qué changacãre disi dírigo ga que tagu dejórigo ome ore go
(Matéo 19:13-15; Lúcas 18:15-17)
13Mu udore quigade enga ayoréode ore chijna disírigo aja Jesús to ujetiga chisasíape ore to. Mu Jesús acadigode ore tagu dejode ome udore ore dayode ore. 14Mu uje Jesús chudute dacadigode ore uruode ga ájningaránguipísome udore ore. Ga chojningame ore:
–Ca ãrácho yejode ome disabode sudore ore. Ca amecho ore iji ome gadoi. Uje Dupade úringárique pibi gajnúone u disabode sudore uje ore gajnenguipise dáringane Dupade urásapíso to gu. 15Jé ũrepise yuruode udore ome uaque: ujetiga ca uacuñeque chosi disatique ome darasitigai ome Dupade yui ujetiga chopise deduguéjnai iji enga a ca toque jne ujetiga chise dáringai Dupade urása.–
16Uje Jesús chejna daruode udore guesi enga jé u uje chisasi disabode ore iji gaté enga changacãrósi sudore ore uje chujé dajmainie aja ore gáyode.
Jnacare ugúcharã́i catecã́ri Jesús
(Matéo 19:16-30; Lúcas 18:18-30)
17Mu uje Jesús e chóji gaté ome dáringárique do, mu jnanírique chimo uté ga chayo iji uté iquei. Uje chise ga jé u uje chichaga dagataidie iji Jesús iquei. Enga chojningame:
–Pacadisṍri á. Ate omío u ua. ¿Jé yorási ringome ujetiga yise yucuecaringué eyúgojmárique to a?–
18Mu Jesús chajnai uté ga chojninga:
–¿Gotique gu a uje babidi yu ga bẽ́care ate omi taja yu a? Uje que ate onique déji ayorérique, uje gusu Dupade uje ate omi tu. 19A e arajapise Moisés urusarane quigode uje isocai tu de: "Be ga ca angarája chequé quedéjnaraque. Ca bajénique déji chutique ome bojórique ayoré. Ca apota poriquérique ome bojórique ayoré ugúcharique. Ca o barapatáringa ome bojórique ayoré. Ca ãrápo bojórique ayoré rĩ. Be ga angaripísi bayé, baté ore."–
20Mu jnacari uté chajnai Jesús ga chósi tome:
–Yocacadisṍri á, yimate cuchade udore jnese iji yúringai disi jé aja deréjnai tudé.–
21Jesús chajire jnani uté mu jé u uje chosõripise ome uru quigode udore. Ga jé u uje chojningame:
–Cucha amiri chojmarápise ome ua ujetiga be ga apésu uté. Be ga be bagúchade udore enga ẽra jnese jne. Ga asi ome orérigui ome ayoré jmatágode ore jne. Ga a jé u ujetiga Dupade tẽrája ua ome bacaniratiguei tuté iji gaté, ujetiga ese báringárique ataque jne iji gaté. Mu ujetiga e amate bacaniratiguérigo ome jmatágode ore enga bo ga ca acusu ua ome yiquigade jne.–
22Mu jnani tuté chudute dajnéone udore Jesús urúo ga jé u uje jno mu chopise dáyugu re ga jnusiétaguipíse aja daqui. Chamáñaje chiraja dáringai ugúcharánguipíse gu.
23Jecute Jesús chajire dacadigode iji darosadode ga chojningame udore ore:
–Piraguipísome ayoré ugucharane ore ujetiga ore chise dáringane Dupade urása to.–
24Mu Jesús uruode udore chajuque acadigode agutedie jnese. Mu Jesús qué chajo raja daruode ga chósi tome ore:
–Yacadigode uaque á, cucha ibiraguipísi tu ome ayoré ugucharane ore ujetiga ore chise dáringáringo Dupade urása to jne. Chamáñaje udore ore anguretigai chejna raja cutejmane dagúcha udore gu. 25Uacarajáyo uje que toc ome cuchiso cuchátique ujetiga chacája ojnatique edóraque. Ga jé adi tu ome ayoré atátique to ujetiga chacája Dupade idai. Jé ore cho ñane ome dáringane cucha ibiracho gu.–
26Mu Jesús acadigode chudute uruode ga jé u uje ore chopise dáyugu raque ga ore catecã́ri ñane enga ore chojningame ñane:
–¿Chimo jóroque re daquitique ujetiga piquetaque uyoc uñeque?–
27Mu Jesús chajire dacadigode ga chósi tome ore:
–Que toc ujetiga jnanírique doi ga chiqueta re. Mu que cuchárique piragome Dupade gotique. Jecute uté u ujetiga chiqueta uacuñeque jne.–
28Jecute Pédro chojningame:
–Yocangaráni á, e yijíñongome yocugúchade jnese diríca ujetiga yijínango ua aja tijode.–
29-30Jecute Jesús chajnai ore ga chósi tome ore:
–Jé ũrepise yu uje a uacuñéngo noñome dajnetígo cucha ujetiga jno yujnomei údi mu a Dupade tẽrája uté gosi gaté jne ome iñomone udore dagúcha. Jeoga iguíjnarique u. Jeoga jõráringo ore u. Jeoga jõráringui ore u. Jeoga uté dayé u, jeoga daté, jeoga abío, jeoga gajnepite jnupe. Mu uaque gosi ca cha dangoroné ome dañomone udore cucha. Uje Dupade a chatire uaque gosi gai iji erámi tudé jne enga guẽrapáitigo suépise uaque gosi iñomone udore cucha gáyode. Mu uje qué uacagúsoi yiroquéode gai ga a uacajnecho uacáringáringo pumajo to jne. Mu diga eso erãpe ichai uté to dirome enga jé u jne ujetiga amácho uágaja pucuecaringué eyúgojmai.–
31Mu Jesús qué jno doquigode cucha údi ga chósi tome ore:
–A ayoré uásejnaringo déji ujetiga ore cho ibijóguiji raque iji jnumi udé. Jé basa ga a ca ore pijoque to jne iji Dupade idai. Mu jé basa ga uásejnapise ore to uje ayoré gajnareque ore iji jnumi udé mu a ore chise dáringáringo ibijócho jne iji Dupade idai.–
Qué Jesús chajopo raja gaté rĩ uje cho quique dagachodi isocade
(Matéo 20:17-19; Lúcas 18:31-34)
32Mu chise diri uñeque ga ore jno ga ore chicai ore idáidatéi uje i tu Jerusalén. Mu Jesús acadigode ore chijñaque dacadisṍri. Mu Jesús acadigode ore chopise dáyugu raque aja dajei, jecute ore agutupúsu raque ome cucha dacadode iji ore iquei. Mu Jesús tibidi dacadigode uje gare ore iji yirídai enga chingopo cucha dacadode ome ore rĩ uje a cuchade udore tocade ome ore dirome iji ore qui tuté. 33Enga Jesús chojningame ore:
–Uacarajáyo uje e yico ome Jerusalén yui. Mu ujetiga diga yiríngo jne enga a pẽrate Dupade utocaidi uyu ome sacerdóteode ore asutedie jne, jé aja Moisés urusarane atatasórone ore rĩ. Mu a udore ore guẽrate yu ome chutique dirome. Enga a ore teráma yu ome deduguéjna purása quedéjnaringo to jne rĩ. 34Mu purása quedéjnane udore a ca ore chimo dedo dipóngueránguiji yu dirome. Uje a ore chujñieta yu, enga a ore chujé yúdode, enga a ore chutĩ́raja yedodie. Mu udojo quigade dirome ga yigachodi tu jne ujetiga ore chimate yu aja jnumi. Mu a chise dire gadiótigo iji yigachodi quigade ga a jé u jne ujetiga yĩrijíapo jne rĩ iji yúringárique toque.–
Juan, Jacóbo ore ajegaidipísi tu ujetiga ore cháji Jesús dosadode jne iji gaté
(Matéo 20:20-28)
35Mu quigade ga Zebedéo ujnacarode Jacóbo, Juan ore sose Jesús yui ga ore chojningame:
–Yocacadisṍri á, qué yijóchago bajei údi ujetiga bebi yocutoquérique jne.–
36Mu Jesús chajnai ore ga chojninga:
–¿Jé gotique uacajegaitique ujetiga yipésu ome uaque a?–
37Mu ore chajnai Jesús ga ore chósi tome:
–Be ga ajuéga barosadode ome uyoque jne ujetiga ese báringai eduguéjna cuchape. Yocuñeque a gajné u bãrachua jne. Jé basa yocuñai gajné u barasé.–
38Mu Jesús chajnai ore ga chojninga:
–Mu a ca uacáyipieraque déji uacataquéode udore cucha gotique. ¿Ga jé acasorási yajnéone udore pocaninga dirome ome yúringárique ducañerájma? Uje yajnéone udore, yumajosórone ujuyaquéo gajnui tu cucha otate unerótique dirome ome yu.–
39Jecute ore chajnai Jesús ga ore chojningame:
–Jé ũrepise yoque uje yicacopísi udore yui.–
Jecute Jesús chojningame ore:
–A jé ũrepise uágome uacacasitigade udore. Uje a jé eso to jne uacáringáringo ducañerájma uje a gajnui tu cucha otate unerótique jne ome uaque. 40Mu que yajnei tu gotique ujetiga yujuéga yãrachua, jeoga yarasé ome uacuñeque. Chamáñaje Dupade e chimate dáyipiedie ome udore gajnesórone gu. Enga udore a ore gajneque yirosadode jne, ujetiga ore chácariji.–
41Mu Jesús acadique uñane uje ore chejna yijmanáyone ore chudute udore ga jé u uje ore ajéode chamañapise ome dajorane Jacóbo, Juan ore. 42Mu Jesús tibidi ore ga cho ore quique ga chósi tome ore:
–Uacarajáyo uje eduguéjnane ore cho ñane iji erámone údode ome dajosipiedie. Uje ore sué darasade uacabáyode iji uacanirone. 43Mu ca ajnáño udore ore jmapiedie udire ome ñane to go. Mu jé basa ga uacuñeque pota dáringárique ibijoque ga ca uaque gosi chajirape dei ome cuchárique mu uaque gosi doi ga chátaja cuchade aja dojórique ayoréo gatuac. 44Mu ujetiga uaque gosi pota dáringárique dajorane angarate mu ca uté gosi áyipie déji dáringárique ibijoque mu uté gosi doi enga chope dajorane iróguiji re gatuaque. 45Uacamóño uje jé chuságaja Dupade utocaidipísi uyu. Uje que yise erámi udé gu ujetiga yo yijosipié ome uaque mu yigaidi tu ujetiga yo uacaróguiji yu iji yoquiquitígo erámio. Mu yigaidi tupo rĩ ujetiga yẽra yu ome erámi unirisórone uaque ga a jiépisi yimanitígo uaque jne aja uacáringáringo piquetaque.–
Jesús chiqueta edoparitique uje i tu Bartiméo
(Matéo 20:29-34; Lúcas 18:35-43)
46Udojo quigade ga Jesús ore chise ore idai Jericó. Mu uje Jesús jnopóji ore idai uté enga acadigode, ayorébui ore nóna. Mu ore chise jnani edoparitique iji ore idai eruei uje i u Bartiméo. Uje Timéo ujnacari u. Mu charidébeque dajere edúdi uje utaidébeque dojode ayoréo iji uté gatuaque. 47Mu jnani edopari uté chudute nazarétgosi Jesús ujnomei uje chicáji yui ga jé u uje jnani edopari jĩrique tibite Jesús gai. Enga chojningame:
–Jesús á. Yoqueduguéjna jnani bajai David ujnié gaté ua yá. Jecute be ga ajnama bosongaquérique ome yu jne á.–
48Mu a ca ore chise jnani edopari unétique ome pijnane udore. Jecute ore ipojnaquéode tṍraji dajñarenie ome uté ujetiga cho paraque. Mu jnani tuté tibite gaté, uje a ca tangári ore gotique enga chojninga:
–David ujnié gaté ua yá. Osõrape yu jne.–
49Uje Jesús chudute uté uruode ga jé u uje base ga chojninga:
–Beyoi ga abichoi uté.–
Jecute ore tibidi jnani edopari uté ga ore chojningame:
–Ayague ga o bedojnaringué ome uté yui. Jé areque gu uje e tibidi ua.–
50Jecute jnani edopari jĩrique tṍra daguidé damamito aja jnumi enga jĩrique chague jmame ga sose Jesús yui.
51Jecute Jesús catecã́ri enga chojninga:
–¿Jé bajegaitique ujetiga yipésu ome ua?–
Mu jnani edopari chojninga:
–Ore acadisṍri á, cachi yajegaidi u ujetiga achẽre yedodie gáyode ga yimópo yajiritígo to rĩ.–
52Enga Jesús chojningame uté:
–Bo jne, chamáñaje bangureta yu gu, jecute yiqueta ua.–
Jesús urúo udojo ga jé u uje jnani edopari jĩrique chimo dajirigode to rĩ. Enga nóna Jesús aja dajei to.
Currently Selected:
Márcos 10: Ayore
Highlight
Share
Compare
Copy
Want to have your highlights saved across all your devices? Sign up or sign in
© 2021 Ethnos360
