Matéo 23

Jesús ipojnaquéode u unojo ome judíode angaránone

(Márcos 12:38-40; Lúcas 11:37-54; 20:45-47)

1Enga Jesús chojningame ayorébui, dacadigode ore:

2–Moisés urusarane atatasórone, fariséode ore ajéode ore chirajárase Moisés urusarane quigode jnese. 3Beyoi enga angáchoi ore enga jé ca ayóyopo ore uru quitique gánique rĩ. Mu ca aracho ore adode. Uacamóño erĩ́e uje ore chacate uágome cuchárique, mu ore pésu cucha uñai. 4Uje ore acajnaquéode péro ore acadigode gai uje que togome udore ore jeta ore chimate. Mu que ore chãra ránguiji dacajnaquéode to ujetiga ore doi. 5Ore ipotigádi tu ujetiga picotaque ore ome ore adode. Enga ore aparagate rĩ uje ore chajo Dupade urusarane pei aja denochade, jé aja dajmanecabode. Ore chiguíapo daguidedie rĩ uje pajnerápicho eruéode ome borapeque querúode. Ore gaidi tu gu ujetiga ore sué dojode ayoré uñane gai ome dadode. 6Ore chise judíode yocaquiningaméone enga ore ajegaidode upúsu piyaripi ibijógode ome raque. Jé ore jmapié u to iji ore ininaquéode, uje ore ucuegode u dayarite ibijógode ome raque ujetiga ore pañaji ore. 7Udore ore ajéode upo rĩ ujetiga uñane cho pacadisõre pirarã́idejna iji ore. Enga uje ore tuangóa ayorérique iji mercado jogadode enga ore jnátu gosi achietaquei ome re.

8Mu jé ca aracho ore ujetiga uacojórique ayoré chĩ́care pacadisõre pirarã́idejnárique aja uaque. Uacamóño uje uacoyo ñane gu. Enga uacacadisõre pirarã́idejnai chojmára, enga Crísto u. 9Jé ca oyópo uacai iji ayoré bágueguejnarique rĩ iji jnumi uné. Uje uacai chojmára enga déji guéode uje Dupade u. 10Jé ca ojnichome ayorérique rĩ: "O dacasuté iji yu." Uacamóño uje uacasuté ugurui u Crísto. 11Uaque gosi ujetiga cháta cuchade aja dojode ayoréo, a ibijoi u uté jne iji uaque. 12Ujetiga gosi cho cuchadaté iji re enga Dupade a sose uté gosi iji jnumi jne. Jé basa gosi ujetiga ca chucué dáringárique ayoredaté enga Dupade a pésu uté gosi úringárique ibijoque jne.–

13Jesús chojningame fariséode ore:

–Iyieja Dupade ujuyaquei yui ome Moisés urusarane atatasórone uaque, jé aja fariséode uaque uje ducusuréchoquí uaque jnese. Uje chorase ujetiga ajucho Dupade yui ome uacarasade ujetiga ca ore chise dáringárique purása to jne. Jé cho uaque uje que apótayo Dupade úringárique purása yúrique enga que acásopoi rĩ ujetiga uacojórique ayoré chise Dupade úringárique purása to. Uñane pota jóroga.

14Iyieja Dupade ujuyaquei yui ome Moisés urusarane atatasórone uaque, jé aja fariséode uaque to rĩ ome uacáringane ducusuréchoquío. Uje jecucha uacajnósopo chequé abai toguedie rĩ ome ore iguíjnane, uje que chequé ecadie udire ujñapeque mu ujetiga uñeque narare uñáraque gai. Uacacotáyo uaque ome Dupade uje uacacatecãchoi, enga uacajoso ati apócho uacate gajnaréngone iji uacáyipiedie. Mu que toc ujetiga pãraque Dupade ome uacajoyaquérigo. Uje a ca Dupade chajire re jne ujetiga cho dajuñame uaque ome uacadode udore.

15Iyieja Dupade ujuyaquei yui ome Moisés urusarane atatasórone uaque, jé aja fariséode uaque rĩ ome uacáringane ducusuréchoquío. Uje uacaboyo uacacajnaqué tágode údi aja quedéjnane. Uacagaidi u ujetiga ore timíninga uaque enga ore chirate uacadode. Mu ujetiga diga ore nóna uaque enga a ore atígo doi datéringane jne ome uacadode. Jecute a atiócho acayoi gajño pioi te jne mu a aguchopísi ore gai jne. 16,17,18,19Iyieja Dupade ujuyaquei yui ome uaque uje chiese uacarasade ijñac uágaja Dupade, mu a ca eso ore ome Dupade jne. Uacajnúone u edoparigode gu uje ore chinguíra rágaja quedéjnane. Jecucha uaqueránganone u Dupade iguíjnai jogosórone cucha. Uacagaidi u ujetiga uacojode ayoréo ore timíninga uaque. Ujetiga uaquẽcaratique cucha iyiejna enga a amácho aja guesi to jne uacaruode udore. Jé basa ga a ẽ́care cucha iyiétique jne enga a jé arec ujetiga be baruode, jeoga ca be. Mu que arajáyo cucha iyiejnane, cucha iyiégode ore. Uje chiese cucha iyiejna óro iji Dupade iguíjna cuchábi ajei, mu que u go. Dupade iguíjnai upúsu uje úringai iyiejna suépise óro gai iji ajei. Isocai jé u uje chiese uaquerani cuchiso upúsu iyiejnai ome uaque. Mu que arajáyo cuchárique go ome uacáringane edoparicho. Uje cucha iyiejnai upúsu gaserani enga gaserani u uje pésu uaquerani cuchiso úringai iyiejna. 20,21,22Jé ũré uje gusu Dupade uje iyiejnapise. Gaserani, gaiminóri cuchiso ore iyiejnaringuei garani u Dupade. Jé cho Dupade iguíjna cuchábi rĩ. Chamáñaje Dupade charite, jecute iyiejna to. Adi jé u guéode to uje iyiejna gu uje Dupade charicho. Jecute a ẽ́carirase cuchade unojo uñeque enga gajnui jé upúsu ujetiga ẽ́carirase Dupade. 23Iyieja Dupade ujuyaquei yui ome Moisés urusarane atatasórone, fariséode uaque, uje ducusuréchoquí uaque. Uje chiese ca acadíchoi Dupade gotique ome gajnepídi iji uacagúchade, jé aja uacanírenie cucha ajñu quiyiguitágabídie ujetiga asíñosi Dupade iji to. Unojo déji Dupade uruode enga ca amoque ujetiga apéso. Mu cucha uñane déji uje sué unojo gai. Mu que apéso to go. Uje Dupade uruode chojninga: "Ajusípise badode guio ome Dupade." Chojningápo rĩ: "Osõre bojode ayoréo." Chojningápo rĩ: "Angureta Dupade." Cuchade unojo u ujetiga ca uacáyipierigui jnorásiji ujetiga apéso ome Dupade. 24Ore ijñaque uaque mu uacajnúone u edoparigode. Ujetiga amóñorase cucha atíãtique iji uacajotai mu a jĩraque achayorása borapetígaja yui. Enga jé u ujetiga ójiyo. Mu que amóño pasique querúrique iji mu jé uacójiyo.

25Moisés urusarane atatasórone, fariséode uaque á, ducusuréchoquí uaque. Uacajnui tu ayorérique uje churu dagapi iji guesi, mu gajnarenguipise iji ajei. Uacagaidi tu ujetiga ayoréode ore chiraja uacate guesíminórone. Jé basa uacapócho uacasijnaringuéone, uacoriquéode ore iji uacajéode. 26Fariséode uaque, que arajáyo cuchárique. Uacajnúone u edoparigode. Beyoi enga aruyo uacagapíode ajéode bajaque. Enga quigade enga a ichapo guidobode to jne rĩ.

27Iyieja Dupade ujuyaquei yui ome Moisés urusarane atatasórone, fariséode uaque, uje ducusuréchoquí uaque. Uje uacajnua u ducode uje ore chirósi guiguíjnami iji gai enga uerate, enga póroropise. Mu que uerate údi to go. Uje ayoré toque taratai jogadi u. 28Enga jé uacasocai u uje uacoyo ayoré áyipieranguiji uaque iji uacarasade ujade. Mu táquechoquí uaque uje uacasijnaringuéone irágu uacajéode.

29Iyieja Dupade ujuyaquei yui ome uaque to ome uacajoyaquéode ome jnani bajade ucácasodicáite, Dupade uruode atatasórone ore. Uje táquechoquí uágome uacajoyaquéode udore. Uje chiese ajnusináñopísa ore úringane omío. 30Enga uacojnicho: "A qué yiquecágorase iji yocai cásodicáite, enga a ca yujégorase ore yugode Dupade uruode atatasóño to nanique." 31Obiréjna ome uacaruode udore uje uacayode jé ore yuque Dupade uruode atatasórone nanique. 32Ujetiga jé ũré eti ca ajéyorase Dupade uruode atatasórone to nanique enga jé ca uacáyipieraque dépoji rĩ iji dirode unojo ujetiga ajéyo uñeque.

33Aringácachoquí uaque. Jé oyópise uacayode jnani bajácho ore. Uacajnúone u ugade. Jé chopo uacayode jnani bajácho rĩ. Ca ajoso ati apícho jne ome gajño pioi. 34Jecute a yiroque yuruode atatasóningo uñéngo aja uaque jne, jé aja irajatátigo, pacadisóningo ore rĩ. Mu a ca ajéchome ore jne. A oyópise uacamajo yirógode ore jne iji uacaquiningaméone. A ajnáñopo ore aja quedéjnane jne rĩ ome uacajocaningáringo. Quigade enga a ajéyo uñéngo jne. A ajóyopo uñéngo aja curesérigo to jne rĩ. 35Mu Dupade a chaguhéta uacayode jnani bajaque ore jocaningane udore uacabai to jne. Uje jé uacasáchoja deréjnane unojo uje uacoyo uacamajo Dupade irógode ore iji uacajade. A Dupade qué chingoma Abel ome uaque jne uje uacai jnani bajai Caín chujé nanique. Uje que ayáyo Dupade uruode atatasórone unétique gotique uje uacajéyo ore iji uacajade. Uje a agusorásiji to nanique enga uaqueguírase jnani bajai Zacarías to nanique. Uje Berequías ujnacare Zacarías uté. Uté cachopísaja Dupade iguíjnai ajépisi nanique uje cho daba dapesutígo Dupade urúo aja quigode. 36Jé ũré yu uje yojningame disi ejode uaque, a oyo uacaba yocai jnani bajácho jocaningane jnese to jne, jé aja uacajocaninga ejode unojo to rĩ.–

Jesús áyuguhebátigade u unojo ome Jerusalén idaisórone

(Lúcas 13:34-35)

37Mu Jesús cho dáyugu re ome jerusaléngosode. Enga chojninga:

–¿Gotique chimo jóroque re uje jerusaléngosode uacoyo uacamajo Dupade uruode atatasórone iji uacajade? Enga jé chopome Dupade irógode iji uaque rĩ uje uacamitingácho ore údode ome cucaranenie. Uje jecucha yáyipie quigode u ujetiga yamáta uágaja ñane enga uacajnúone u yabode. Enga yajnua tu cochagájnaraque uje chamáta dabidie aja dajnóngone údode. Mu que apótayo yu gotique. 38A jé amóño to jne ujetiga ca Dupade dépoji uacari jne rĩ. Enga uacajnui tu guiguíjna noñimérique jne. Uje que ayorérique déji. 39A ca amóñopo yu to jne rĩ, jé aja diri ujetiga ojnichome yu jne: "Dupade imeseranguipísi tu datocaidi uté aja yoque."–

Currently Selected:

Matéo 23: Ayore

Highlight

Compare

Copy