Matéo 22

Jesús pésu ejémplo, cucha gajnúo ome eduguéjna cuchátique uje ujnacánique, gajma ore chisa ñane

1Jesús chacadápo ore ome cucha gajnúone rĩ. Enga chojninga:

2–Dupade chamáta darasade ore aja dari jne enga isocai a jé u eduguéjna cuchátique isocai to jne uje pésu dajnacánique ininaquei uje gajma ore nóna ñane. 3Enga eduguéjnai uté chiroque darótigo aja dapotigátigo ayoré ujetiga ore díji uraque daninaquei to. Mu udore que ore pota to ujetiga ore chise ininaquei to. 4Mu chirógapo darótigo uñéngo aja dabidigode yui rĩ. Enga chojningame ore: "Angoño ore jne uje dimane cucha pibosode ome ore yui. Enga uje e yirógapo yirógode ore aja yachidé urojnanie yui rĩ, jé aja yachite aquirájna urojna uñane ujetiga ore chujé. Enga yajo iji yoquininaquei. Angoño ore enga ore chaguineru gadoi jne." 5Mu ibidigode jnanío jé ate uje que ore pota yui. Uñai chĩ́care jetiga chicáji dajnepítique jnupe. Jé uñai qué tẽra deranone cucha. 6Mu ibididique uñane ore chisa eduguéjna cuchátique irótigo. Enga ore chujé ore údode, jé aja ore úringáringo toque. 7Enga eduguéjna cuchábi ájningaránguipíse. Jé u uje chiroque dasoldádode aja ore, ujetiga ore chujé irógode yusórone. Enga ore chãrúpo ore idai gai te rĩ. 8Enga eduguéjna cuchábi jĩraque chojningame darógode: "Dimane cuchade jnese que iji yoquininaquei. Mu que tiógara go ujetiga yibididique bajade qué ore di to. 9Boyo enga ajnáñoji quedéjnane. Enga angoño yoquininaquei aja uaqueyatígo ayoréo aja quedéjnane." 10Jecute irógode ore do gojni enga ore chisite rágaja quedéjnane. Enga ore chamáta deyade jnese: jnani sijnácho, jé aja parágode ore. Jé u uje ore chĩreta guiguíjnai ajei.

11Enga ore chigui eduguéjna cuchábi gueranenie borai aja daninaquei yui. Jé u uje eduguéjna cuchábi chacája ayoré dipeséode ore gari. Enga chajire ore jnese. Mu chimo jnani unejai iji ore ujai uje que chigui gueranéisi bora uñáraque to. 12Enga chojningame uté: "Yijõra, ¿gotique gu a uje bacája yoquininaquei uné to, uje que agui yeranéisi bora uñáraque to mu?" Mu icatecãraini jnani que narare. 13Enga eduguéjna cuchábi tibidi darógode uje ore chijna cucha pibosode aja ore ininaquei gaisórone. Enga chojningame ore: "Beyoi uté enga agacho guídogorodíe, jmanecade ore aja ñane jne. Enga órañoja ijnangununie iji guesi jne. Jogadi tu jne ujetiga po jóroguiji. Jogadi upo jne rĩ ujetiga uté chigase damatarane uje chejnárengui jóroque re ome dajnéone pujuyaquéo." 14Yojningai u uje Dupade ibididigode uásejna, mu ajegaidode garósi.–

Judíode eduguéjnane ore inejequéode ome Jesús

(Márcos 12:13-17; Lúcas 20:20-26)

15Jé u uje Jesús chimate dacajnaquéode unojo guesi. Enga fariséode ore jnoji ejoi. Mu ore chamátapo uñane rĩ iji quigade ujetiga ore pésu dáyipiedie ome Jesús yui, jé aja ujetiga ore chise bárique cucha. 16Jecute ore chiroque dojode fariséo, jé aja Heródes angarásorone uñane ore aja Jesús yui enga ore chojningame:

–Yocacadisṍri á, yirajagopise ua uje jé ũrepise ua ome baruode quigode uje bo quique Dupade adode ome yoque. Yirajagópo rĩ uje que agutúapo ua ome ayorérique rĩ. Que cuchapome ua rĩ ujetiga ore irasique ua, jeoga ore chetaque ua ome baru uréone. 17Jecute angomome yoque ujetiga uerate ome judíode uyoque ujetiga yoco oré rómagosode ore eduguéjna cuchábi ome impuéstos, jeoga jé ca yoco oré.–

18Jesús jĩraque chiraja ore áyipie gajnarénguenie quigode enga chojningame ore:

–Urupatáquechoquío uaque. ¿Gotique gu a uje uacáyipiedie gajnarénguei ome yu, uje uacacuei tu yibárique cucha? 19Angoño pláta guebetique ome yu ujetiga po oré pasutéraque ome.–

Jé u uje ore doi pláta guebetique uje i tu denário enga ore chingome. 20Uje Jesús chimo ore oidé pláta guebei enga chojningame ore:

–¿Uñeque edoi unaji a? ¿Jé uñeque i upo udé rĩ a?–

21Ore chajnai enga ore chojningame:

–Rómagosode ore asuté oré erĩ́e. Jecute i jé déji údi.–

Mu Jesús chojningame ore:

–Jé arec ujetiga asíñome rómagosi uté gajnepídi ome. Jé basa ga asíñome Dupade gajnepídi ome to rĩ.–

22Uje ore chudute uruode udore enga ore tija. Jé u uje ore noñome iji te enga ore jno.

Saducéode ore catecã́ri Jesús

(Márcos 12:18-27; Lúcas 20:27-40)

23Diri uté jé u uje jnanione uñane ore tibágui Jesús uje ore uague i tu saducéo. Ore gaidi tu Jesús úringai pibotaque. Uje chiese ca totique ecápo gotique rĩ ome ore. 24Enga jé u uje ore chojningame Jesús:

–Yocacadisṍri á, jnani bajai Moisés urusarane quigode u unojo nanique: ujetiga jnanírique toi enga cáma atique tṍraji dacoté enga jõrárique nonapo gaté to rĩ. Ujetiga ore atígo base enga gajnui jé u ujetiga abai bajai jé abío. 25Jnacánique déji yocujade to nanique uje desátigo chojmára ore iji ti. Uté chisa dacoté, mu toi uje cáma atique déji dacoté gari. Jecute uté quigaminóri nonapo dajõra toi acoté to rĩ. Mu topoi gaté rĩ. 26Jé basa gadioi nonapo gaté rĩ. Mu topoi to rĩ. Enga isocai jé upome garitíode jnese rĩ uje ore nóna chequé uaté jnese, mu que uñeque atique cuse iji gari. 27Enga chequé topoi to rĩ iji ore quigade. 28¿Jé chequé uaté abaipísiriquerase iji garitíode ore ujetiga ore ecaporase rĩ iji dáringáringo toque quigade?–

29Mu Jesús chajnai ore enga chojningame ore:

–Que arajáyo Dupade uruode quigode to go. Que arajayópo uje Dupade ujopié cuse ome cuchade jnese. 30Uacamóño uje a togode ore ecápo jne rĩ, enga a ca ore nonapo chequéraque jne rĩ iji gaté. Ore gajnúone u Dupade irógode, gaté unirisórone ore jne. Chamáñaje que gapu pisaguéraque déji ore ajénique gu. 31¿Jé ca arajáyo to a Dupade uru quigode uje chingopísome yoque uje togode a ore ecápo jne rĩ? Uje Dupade chojninga: 32"Cachi jnani bajade Abraham, Isaac, Jacob ore idupade u uyu iji deréjnane." ¿Ga Dupade chojningárasa "ore idupade u uyu" ujetiga e íjnoque jnani bajade udore ore jogadode? Úngare. Uje que Dupade cho dajnéone iji ayoré togode mu cho dajnéone iji ayoré uecade.–

33Uje ayorébui ore chudute acajnaquéode unojo enga ore tija uté uruode jnese.

Dupade iroquéode unojo u uje sué iroqué uñane gai

(Márcos 12:28-34)

34Fariséode iji ore ujade ore chimo uje saducéode que chijnime Jesús ãríringome acajnaquéode. Enga que ore chiraja daru quitígome rĩ. Quigade enga ore chamáta rágaja ñane to ujetiga ore chucué dajéo ome dasocárique ujetiga ore chise Jesús bárique. 35Uje ore chimate dáyipiedie enga Moisés urusarane atatasórone uñai chague iji ore ajei. Enga catecã́ri Jesús. Mu qué equetingarãque to. Enga chojningame:

36–Yocacadisṍri á, ¿ja jé Dupade iroqué ujñapetátiguiji Moisés urusarane a ujetiga sué uñane gai?–

37Jesús chojningame uté:

–Ujñapetai u uné uje chojninga: "Ajnorapise bangaráni Dupade ome báringai ayoré jnese. Enga ejnápise báyipie, betotiguei ore aja." 38Iroquei bajai u uné uje sué iroqué uñane gáyode jnese. 39Iroqué ejoi jé cho bajai uje chojninga: "Ajusípise bojórique ayoré guio. Gajnui tu uje bajuse beo to." 40Moisés urusarane Dupade iroquéo garanone u iroqué gáreode unojo jnese. Dupade uruode atatasórone, jnani bajade, ore acajnaquéode garanone jé upo unojo to rĩ.–

Jesús catecã́ri fariséode ome Crísto danique

(Márcos 12:35-37; Lúcas 20:41-44)

41Uje fariséode qué ore déji dague uaté jogadi, enga Jesús pésu dapregúnta ome ore. 42Enga Jesús chósi tome ore:

–¿Uacáyipierigui cho rique ome Dupade utocaidi Crísto a? ¿Ape te a ome uaque a?–

Mu ore chojningame Jesús:

–Jnani bajai David a ape disi ejo jne erĩ́e.–

43Jé u uje Jesús chojningápome ore rĩ: –Dupade Ujopié Espíritu Sánto angúromei u David casica nanique uje cho dadupade iji Crísto iji darusarane. Uje urusarane u unojo:

44Dupade chojningame yangaráni: "Ayáji yejoi iji yãrachua aja diri ujetiga yujnué bamajosórone ore gai jne."

45¿Jé quitique dérasi rique a uje David cho dadupade iji Crísto, ja ape disi ejo urásu to a?–

46Mu que pichajnainápo uru quigode rĩ. Que ore chiraja gu. Enga que ore chucuepoi daringaquéringo ome rĩ, jé iji diri uté, jé aja dire piqueminórone.

Currently Selected:

Matéo 22: Ayore

Highlight

Compare

Copy