Matéo 16

Fariséode, jé aja saducéode ore pota ore chimo Jesús ipesutique cucha pitijabate

(Márcos 8:11-13; Lúcas 12:54-56)

1Enga fariséode, jé aja saducéode ore tibágui Jesús ome daringaquérique. Enga ore chutai ujetiga uté pésu cucha pitijátique enga tõrarásiji gaté ome ore. 2Jesús chajnai ore uruode enga chojninga:

–Guedéjnoringáne enga uacojnicho: "A uerate dínique dirome. Icha gaté gu." 3Direjnímei enga uacojnichópo rĩ: "Guéode suru gaté. A beque gajneri." Aringácachoquí uaque, uacacotáyo uágome uacarajatigade unojo, mu que cucha uacarajatigade. Pisecarãte Dupade ipesudode cucha pãrapié ome uaque iji dirode jnese. Mu que amíningachó gotique. 4Gajnarenguipíso uacadode. Que anguretáyopo Dupade gotique rĩ. Chamáñaje uacatáyoi yu ome yipesutique cuchadaté. Mu a ca yujuéga ome uaque jne. Gusu ujetiga amóño yisocai to jne uje jé u jnani bajai Jonás isocai to nanique.–

Enga Jesús noñome ore iji te jmete enga jno.

Jesús chacãra fariséode ore jmapié aja arurégode bisitique

(Márcos 8:14-21)

5Uje Jesús acadigode ore chicáji yote quedéjnai uécha uñai enga ore chicadígui arurétigo ujetiga ore chijnoque. 6Enga jé u uje Jesús chojningame dacadigode ore:

–Angáchoi yuruode. Enga ajuso uaqueo ome arurégode bisidi uje fariséode, saducéode ore angúromei u.–

7Jesús acadigode ore chojningame ñane:

–Chimo jóroque re ujetiga chĩ́care arurégode bisidi gu uje que yijnójo arurétigo.–

8Jesús pañaji uje que ore chiraja uje acajnaquéode u. Jecute chojningame ore:

–¿Gotique a uacaruode uje chiese jé ca ajnócho arurétigo? Ísenga qué garósi uacanguretigai ome yu ome uacameserane cucha. 9A cáma arajáyopise yadode jõ. A jnopóji uacajéode rĩ uje yajuguína arurégode uje udore chejna yijmanai aja jnanione ica uje 5.000 ore. Enga uacarajáyo yocamatade ica iji yoquibose péode. 10A jnopóji uacajéode rĩ uje yajuguína arureque garitíode aja jnanione ore ica uje 4.000 ore. Enga uacarajáyo yocamatade ica iji yoquibose péode. 11A uacáyipiedie chejna raja uacabotique yúrique. Jecute que arajáyo uje yacajnaquéode u que uje yĩ́care fariséode, saducéode ore angúromei cucha arureque bisicho ujetiga ajuso uaqueo ome.–

12Jé u uje quene ore chiraja acajnaquéode quigode uje Jesús que ojningane upúsu arurégode bisidípisode. Mu ojningane u fariséode, saducéode ore acajnaquéode jútigo uje cho arurégode bisidi uje chacája harína údode enga quérã.

Pédro chiraja Jesús úringai Dupade

(Márcos 8:27-30; Lúcas 9:18-21)

13Uje Jesús, acadigode ore chirõre ore idai Cesaréa iji ore uniri Filípo enga Jesús chojningame dacadigode:

–¿Ayoréode jé ore cho ringome Dupade utocaidi uyu a?–

14Acadigode ore chojningame:

–Uñane jos eti Juan el Bautísta u ua, uté uje chaca ore edodie iji yodi nanique. Jeque uñane ore cho jnani bajai Elías iji ua. Jé basa ga uñane ore chojninga: "Jnani bajai Jeremías a u. Jeoga Dupade angúromei proféta uñeque u."–

15Jesús catecãrápoi ore rĩ enga chojningame ore:

–¿Jé uacajéningo cho ringome yu a? ¿Uyu gosi ome uaque a?–

16Mu Simón Pédro chajnai enga chojningame:

–Crísto u ua, Dupade utocaidípisi. Dupa Uecai uté ujnacari tupo ua rĩ.–

17Jesús chojningame Pédro:

–Simón, Jonás ujnacari á, anína ua uje que ayoré uñeque ingome ua ome yu gotique. Yai Dupade iji gatajnoquei jé u uje ingome uyu gosi ome ua. 18Simón á, bei uñai u Pédro. Uje bei qui tu cucarané. Mu barecujaidie, uje baraja yúringai Dupade ape, gajnua u cucarané cucháberaque rĩ uje guiguíjnane ipesungórone ore pésu guiguíjnane iji gáyode. Enga ore jnese ujetiga ore chirate barecujaidie udire to enga a ore u jne ujetiga yo yi-iglésia iji ore. Enga Satanás, uje gajmaque ayoréode ore ome pitoringai, a pota chinoningase yi-iglésia jne, mu a ca toque jne ujetiga chinoningase ore.–

19Jesús chojningápome Pédro rĩ:

–Baraja yu. Jecute a yisi ome lláveode ome ua ujetiga achẽre cuchade aja guesode ome bojode ayoré uñéngo ujetiga ore chise dáringáringo Dupade urása to. O ore quique enga a Dupade narare babai iji gaté ome bãrétigo cucha, jé aja bajuegátigo cucha to.–

20Iji udojo quigade ga Jesús cho dacadigode ore quique, ga chósi tome ore:

–Jé ca angoñoma yu aja erámi jne uje Dupade utocaidi Crísto jé u yu.–

Jesús cho dagachodi ujnomei ome dacadigode

(Márcos 8:31-38; Lúcas 9:22-27)

21Deréjnai uté enga Jesús cho dacadigode quique gatuaque ome dagachodi yui. Enga chatatame ore uje Dupade ajéo ujetiga chicáji Jerusalén jne. Enga chojninga:

–A yumajosórone u judíode ore eduguéjnane, ore asutépisedie ore, jé aja Moisés urusarane atatasórone. Udore a ore socaripísome yu jne. A ore chimate yu aja jnumi jne rĩ. Mu yejnatígo dire gadioque jne iji yigachotique. Enga a jé u jne ujetiga yiquecápo rĩ iji yitoringai.–

22Enga Pédro chorei Jesús iji quedéjnarique. Enga ore cãra dáyipiedie ome ñane. Mu Pédro chaquĩ́ra ome uruode. Enga chojningame:

–Yocangaráni á, a ca Dupade áyipiedie u udire. A ca baruode ucode tocade jne erĩ́e.–

23Mu Jesús chajnai Pédro enga chojningame:

–Boji ti yejode, Satanás angúromei á. Bajéode u ujetiga ca yicáputaji Yai áyipiedie ome yu. Mu que báyipiedie cunguésõri yai Dupade áyipiedie go. Báyipiedie udire garani tu báringai ayoré.–

24Jé u uje chojningame dacadigode jnese:

–Ujetiga uacuñeque pota dáringai yiroque enga uté gosi doi ga chicadígui dacuecaringuei ome re. Enga jé tiógara jne ujetiga uté gosi cho daba dagaidode yiroquéo. 25Jecute gosi ujetiga pota chapídome dáringárique pujuya jne ome yu, ujetiga ca cho daba yu enga a chachia re jne. Jeque gosi ujetiga timiningara dacuecaringuei ome yu, a chise dacuecaringué gatérique jne.–

26Enga Jesús chojningápome dacadigode jnese rĩ:

–Que cuchárique tõrapísiji ayorérique ujetiga chise dajegaidode cucha jnese iji erámi uné, ujetiga uté gosi chachia re ome dáringárique pujuya iji quigade. ¿Jeoga jé gueranéringui pláta chorase rique ujetiga gosi cho doré enga gosi chise pucuecaringuei to? Úngare. Que toc ujetiga chise doréraque. 27A Dupade utocaidi uyu yajniápo jne rĩ enga a yijna yai Dupade úringai cuchape jne aja erámone unojo. Enga jé u jne ujetiga Dupade irógode gaté unirísoño a ore nonapo yu jne rĩ aja erámone unojo. Enga ujetiga e yĩri enga a yo oré erámi unirisórone ore jnese jne. Mu a jé yiji ore ipesutígo cucha jne ujetiga yo ore oré. 28Jé ũré yu uje a uacuñéngo ca tobi jne, ujeta cáma amóño Dupade utocaidi uyu yúringai eduguéjna cuchape.–

Currently Selected:

Matéo 16: Ayore

Highlight

Compare

Copy