Matéo 15

Jesús cho quique cuchade uje pésu ayorérique iñoñaringuérique

(Márcos 7:1-23)

1Enga fariséode uñane, jé aja Moisés urusarane atatasórone uñane rĩ ore tṍraji idáidatéi Jerusalén enga ore ibaguiédi tu Jesús. Enga ore chojningame:

2–¿Gotique gu a uje bacadigode que ore doi yocayode jnani bajácho ore jmapiedie to? Uje yimóngo bacadigode gu uje que ore churu dajmainie gatuaque go ome dabosode.–

3Jesús chajnai fariséode enga chojninga:

–Jé cho uaque erĩ́e uje que beyoi Dupade iroquéode quigode to. Uacagaidode jé u jnani bajade jmapiedie ome cuchade. 4Uje Dupade uruode chojninga: "Ajusópise uacayode, uacatedie ore guio, enga angáchoi ore." Chojningápo rĩ: "Ujetiga uñeque uruode gajnarenguipise aja danique, datéraque ore enga a chuque uté gosi jne." 5-6Jé basa uacayode jnani bajácho ore churúsãre dajmapiedie nanique to iji darujna aode, mu que cunguésõri Dupade uruode udore gotique. Enga qui tu icaite ujetiga jnacánique chichaga daplátadie aja Dupade ujetiga e toi, cachodi tu ome jnacari uné ujetiga ca chajirápo dayode ore yúode rĩ ome dagúchade. Mu gajnareque uacajéode unojo. Jecute obiréjnapise uje que ajichópo Dupade áyipiedie yui rĩ ome uacagaidedie jnani bajade áyipiei. 7Jnani táquechoquíode u uaque. Uacamóño uje Dupade uruode atatasṍri Isaías ojningai jé u uaque uje chojninga:

8Ayoréode unojo ore chijnóra yu ome dabijnani, Jeque ore áyipiedie idájapise iji yu.

9Jecute cucha bisidécho ore icotaquéode ome yu.

Uacamóño gu uje ore acajnaquéode ome dojode ayoréo garanone jé u ore.

Jeque garani que u yu go.

10Jé u uje Jesús tibidi ayorébui enga chojningame ore:

–Angachopísi yuruode enga a arajáyo quigode jne. 11Uje babosode cucha a ca pésu bañoñaringuérique jne. Amóngacho baru gajnaréngone a u jne ujetiga pésu bañoñaringuei.–

12Jé u uje Jesús acadigode ore sose yui enga ore chojningame:

–¿Ja araja to a uje fariséode ore chejnáreque baruode ucode que?–

13-14Mu Jesús chojningame ore:

–Jé ore dóji. Uacamóño uje fariséode, Moisés urusarane atatasórone ore gajnúone u edoparigode. Uje cho jetiga edoparic ore enga ore chijñaque ñane aja dagaitique cucha yúrique. Diga ore basája ejopiéraque enga ore nóna ñane aja ajei. Yanguresórone ore gajnunie a u Yapade acárigui pori. Mu pore uñanie uje que acai to enga a pijnimé udire jne iji erodie.–

15Enga Pédro chojningame Jesús:

–Angoma yoque baruode quitique.–

16Jesús narare enga chojninga:

–¿Ja uac u to a ujetiga ca arajáyo quigode to? 17Isocai u uje yajo cuchade enga chicáji yocajéode. Quigade enga chacája yocuchade enga yórangoja guesode bisideque. 18Jé basa yoquibijnanone garãsórone yocurúo u uje tṍraji yocáyipiedie. Enga ujetiga gajnarécho yocurúrigo enga udore ore ipesute yoquiñoñaringuéone ome Dupade. 19Yirajágo uje jnanione ore ate gajnaréngone jnese garanone u ore áyipie gajnarénguenie: uje ore pota chugode ome dojode ayoréo, uje ore potapo chequé unejánguenie rĩ, uje ore potapo pagupíode ome raque rĩ, uje ore potapo oriéode rĩ ome cucha quedéjnane, jé upo purupatáringane ore rĩ, dacate pijnimingone ore. Cucha gajnaréngone udore garani u páyipie jnese. 20Cuchade ucode jé ipesute yoquiñoñaringuéone ome Dupade. Mu ujetiga ca yicoi jnani bajade ore adode marínga, ujetiga ca yurugo yoquijmainie aja jnumi, jé yocate tiji. Uje que pésu yoquisójnaringuérique ome Dupade.–

Purása quedéjna cananéagoto changureta Jesús to

(Márcos 7:24-30)

21Jesús jnoji uté enga chicáji pachamini uté uje ore idáyode Tíro, Sidón ore déji. 22Mu uje ore jno enga Canaán jogotóraque tibidája ore quigade. Enga chojninga:

–¡Yangaráni é, David ape disi ejo é! ¡Be enga osõrape yu é! Uje Satanás utocaitique déji yabia ajei é. Ujñapié ajámi iji jmainie é.

23Mu Jesús que chajnai chequé uaté pijnane go. Jé u uje acadigode chise. Enga ore chijócha ajei údi. Enga ore chojningame:

–Aroque chequé uaté aja doi. Bamo uje que cha dabijnacaraidie aja yoquiquigade.–

24Enga jé u uje Jesús chojninga:

–Yai Dupade iroque yu ujetiga yedu israélgosode ome yadode uje ore cho Yai gachidé áyasa bijnánguenie.–

25Mu chequé e sose yui enga chichaga dagataidie aja jnumi iji iquei. Enga chojninga:

–Yangaráni á, átabaja yu to.–

26Jesús chajnai chequé uruode enga chojningame:

–Gajnareque ujetiga yijna yibotígo iji yatígo ore gari marínga, yisi ome tamocórigo.–

27Mu chequé jé chajo raja darai enga jé chojningame: Yangaráni á, jé ũré ua. Mu bamo uje tamocode pose cucha pépitade to uje basája jnumi iji dachisṍri agapi gai.

28Jé u uje Jesús chojningame uaté:

–Chequé á, que iyieque banguretigai. Yipésu bapotigádode ome ua jne.–

Enga jé iji deréjnai uté uaté abia ejnarei jnoji.

Jesús chiqueta ejnarétaque dipeséode

29Jesús jnoji uté enga chicáji yote quedéjnai pijnanai uje i tu Galiléa. Uné quigade enga cheru cototéraque enga cháji ójo. 30Enga jé u uje ayoré dipeséode ore chise Jesús iji cototé ójo enga ore di ejnarétaque ponáyone ore údi iji. Enga edoparitígo díji to, jé aja noñatígo, cõrocorṍrigo, jé aja uru eyútigo to. Uje ore chijna ore aja Jesús iquei, enga jé u uje uté chiqueta ore jnese.

31Jé u uje ayoré dipeséode ore tṍra rángome Jesús adode uje uru eyúgode ore narare. Jé chopome cõrocorone ore rĩ uje omápo ore rĩ. Noñángone ore digápo rĩ. Edoparigode chimópo dajirigode rĩ. Jecute ayorébui ore chicotápise israélgosode ore angureni Dupade.

Jesús chisi ome jnanione posode ome ore, enga 4.000 u ore

(Márcos 8:1-10)

32Enga Jesús tibidi dacadigode enga chojningame ore:

–Yosõripise ayoréode udore ore uje ore guejnane dire gadióguiji yari enga e que ore potique cuse. Que yipota ujetiga yiroque ore aja ore iguíjnane. Cachi ore íjnoque gu iji dajei ome dayaguhérigo.–

33Mu acadigode ore chojningame dacadisṍri:

–Que cuchárique déji yoquiyaridi uné gotique ome ayoré dipeséode ujetiga ore tagu. Que uñeque déji pejórique ujetiga pigaite cucháriguiji.–

34Jé u uje Jesús chajnai ore enga chojninga:

–¿Arurétigo jé cho riguiji uacari a?–

Enga acadigode ore chojningame:

–Arurégode gariti. Jé basa oyídabode garósosi.–

35Enga Jesús chojningame ayoré dipeséode:

–Ayáyoji jnumi iji te.–

36Enga jé u uje Jesús chisa arureque garitíode, oyite garósiode ore. Quigade enga catecã́ri dai Dupade enga chacãre gai. Diga chajuque udore iji jnumi enga jé u uje chajuguína dacadigode ujetiga ore chisi ome ayoré dipeséode. 37Jecute ayorébui ore tagu jnese. Enga subudé ore iji jnese. Mu uje ore cha chagu enga jé u uje ore chamáta daquebéode iji dabosode udore. Enga ore ĩretadie canásta gare iji ti iji ore iquebéode. 38Enga gunorone jnanío batigai u 4.000. Mu que pisecarané chequérigui, disírigo ore rĩ. 39Udore quigade enga Jesús chiroque ayoré dipeséode aja doi. Enga jĩraque chacája cucoi. Enga chicáji pachamini uté uje i tu Magadán.

Currently Selected:

Matéo 15: Ayore

Highlight

Compare

Copy