Matéo 13
13
Jesús chacãra dacajnaquéode aja jnani utácarique
(Márcos 4:1-9; Lúcas 8:4-8)
1Jé deréjnai uté u nanique uje Jesús doi guesi iji dayaripi guiguíjna enga jno enga cháji gajño edo gai. 2Jiépisi ayoréode ore uje ore tibágui Jesús ome acajnaquéode. Uje chimo ayoré dipeséode ore enga jé u uje chacája cucoi enga cháji ajei ome dacajnaquéode. Enga ayorébui ore cháji gajño pijnanai uje ore tangári. 3Jesús chacate ore enga chacãra dacajnaquéode aja cucha dipeséode enga chojninga: –Ayorérique jnome dáringárique utáca ujetiga chaca dajonatique. 4Enga cucha ajñunie uñanie basája dajei edúdi. Enga chugúperenie chimo enga tagu. 5Jeque uñanie basája cucaranémui mu garósi jnumi tiji enga cucha ajñunie udire jĩraque sué. 6Mu guedé jĩraque tocade enga chãru cucha pacadie gai. Garósi erode enga jĩraque toi. 7Mu cucha ajñunie uñanie suéji ojnatedie ajei. Enga que togome ujetiga ijõrei uje ojnatedie nóna aja gatéode enga que chise daquéraningárique go. 8Jé basa ga cucha ajñunie udire uje basája jnupe arei u uje chaquesu re enga uásejna adie. Mu ore adie cha ñane yui. Uje uñanie guejnanie 100 u. Jé basa uñanie adie guejnanie 60 u. Jé basa uñanie adie guejnanie 30 u.–
9Uje Jesús chejna dacajnaquéode unojo guesi enga chojninga:
–Uñéngo ujetiga angoninguite guesaque ore enga a udore gosode u jne ujetiga ore chiraja yuruode unojo quigode.–
Jesús cho dacajnaquéode quique
(Márcos 4:1-9; Lúcas 8:9-10)
10Jecute acadigode ore sose Jesús yui enga ore chojningame:
–¿Gotique gu a uje bacãra bacajnaquéode aja cuchade ome ayorébui ore?–
11Mu Jesús chajnai ore enga chojninga:
–Uacajnei tu ujetiga Dupade chingongara dajmapiedie ome uaque ujetiga chijna dáringai eduguéjna aja jnumi tuné iji gaté. Jé basa cucha pipoguiédode u udore ome ore enga que toc ujetiga ore chiraja. 12Mu udore uje ore chañuru darajatigade guio enga Dupade chõre ore irajatigade. Enga diga uásejna ore irajatigade jne. Mu ore uje que ore chañuru darajatigade guio enga Dupade chijna ore irajatíga garósirigo iji ore gari jne. 13Jecute yo cucha gajnúo iji yacajnaquéode ome ore. Chamáñaje yacate ore mu ore gajnui urásu ujetiga edoparic ore enga que ore chimo yu iji daquei. Uje ore chudute yacajnaquéode mu chorase jeta ca yacate ore. Chamáñaje que ore chiraja yuruode quigode gu. 14Dupade uruode atatasṍri Isaías urusarane ojningai u ore uje chojninga:
A adúcho yuruode jne marínga, a ca arajáyo quigode jne.
A amóñopo yu jne rĩ mu a ca arajáyo yúringai cuchape jne.
15Chamáñaje angoninguite pariguipise israélgosode udore ore gu.
Enga que ore tangári yu.
Cho jetiga ca ore edóraque cus.
Chamáñaje ore gaidi u ujetiga ca ore chimo.
Enga ore gaidi upo rĩ ujetiga ca ore chudute cuchárique.
Que ore pota gu ujetiga ore chiraja.
Que ore pota rĩ ujetiga ore chajni yibai enga yiqueta ore.
16Mu pininaquei gajnesórone u uaque uje uacamóño ome uaquedodie. Enga uacadúchopo rĩ ome uacangoninguinone. 17Jé ũrepise uje uásejna Dupade uruode atatasõre bajade, jé aja ore urása ate arégode. Enga ore potapísa jóroga nanique ujetiga ore chimo uacamone cucha yipesútedatéode to. Jé chopo uacadudigode yacajnaquéo rĩ ujetiga ore tangári jórogui to. Mu que toc.–
Jesús chacate ore ome utácai gajnúone cucha
(Márcos 4:13-20; Lúcas 8:11-15)
18Jesús chojningápome ore rĩ:
–A yope utácai adíso yacajnaquéo quigome uaque jne. Jecute angáchoi yu. 19Cucha ajñunie udire uje basája dajei edúdode enga gajnui tu ayorérique ujetiga chudute uje Dupade chijna dáringai eduguéjna aja jnumi tuné mu que chiraja quitígo. Enga chugúperenie gajnui u Satanás uje charatáyime Dupade uruode ome uté enga chijna iji gari. 20Jeque ajñunie udire uje basája cucaranépitabui gajnui tu ayorérique ujeta chudute Dupade uruode enga que chise unerotiguérique enga changureta bu. 21Mu ore cho cucha pacadie uje garósi erode. Jecute uje pequetingaquéode chise ore jeoga ore cho daba danguretigai iji Dupade uruode enga jogadi u uje jĩraque ore anguretigai chicai jnumi yui ome Dupade. Enga que ore jno dáringai Dupade anguresõre údi gotique. 22Jeque ajñunie udire uje suéji ojnatedie ajei gajnui tu ayorérique uje chudute Dupade uruode. Mu áyipieraque que jnoji cucha ponáyone iji erámi údode. Pota ujetiga chise dáringárique ataque. Jecute que cuchárique tṍraji uté gosi anguretigai go. 23Mu cucha ajñunie udire uje pacáji jnupe ueratigai, gajnúone u ayorérigo ujetiga ore tangári Dupade uruode enga ore chirajapise quigode. Enga ujnomerãque ore ome Dupade adode uje ore doi. Ore isocai jé u ajñunie udire uje chaquesu re enga que chajire re dedórodie. Mu ore adie cha ñane yui. Uje uñanie adie guejnanie 100 u. Jé basa uñanie adie guejnanie 60 u, jé basa uñanie guejnanie 30 u.–
Jesús chacãra dacajnaquéode aja ugarape gajnarénguei, jé aja arroz quedéjnai
24Jesús chacãrápo dacajnaquéode aja cucha uñai rĩ enga chojninga:
–Yoqueduguéjnai Dupade iji gaté urasapísode iji jnumi tuné ore gajnui tu arroz quedéjnai ajñunie uje utácarique chutã́riji dejnai. 25Mu jnani uté guetésõri doi uje qué ore mo jnese enga chaca ugarape gajnarénguei ajñunie iji arroz quedéjnai ujade to. Uje chimánaja jnumi enga e jno. 26Jé u uje arroz quedéjnai quérã. Ugarape gajnarénguei quérãpo rĩ. Enga ore cho uñane aja gaté. Quigade enga ájnanie cuse jnese. Jé u uje pijoque arroz quedéjnai, ugarape gajnarénguei ore iji ñane ujade. 27Jé u uje guejnasṍri irógode ore chingo. Enga ore chojningame: "Bacapiedie ueradépi ica ya, ¿chimo jóroque re gotique uje ugarape gajnarénguei sué iji arroz quedéjnai ujade?" 28Mu guejnasṍri chojninga: "A yetésonique ayoré acáji ujade." Quigade enga irógode ore chojningame: "¿Ja apota ya ujetiga yijnico ugarape gajnarénguei iji ujade a?" 29Mu guejnasṍri chajnai ore enga chojninga: "Jé dóji. Chamáñaje a ajnicho ugarape gajnarénguei iji arroz quedéjnai ujade jne enga nonarása ñane aja guesode. 30Jé dóji enga nóna ñane aja dáringai pojnaque, jé aja diri ujetiga pĩraque. Enga jogadi u jne ujetiga yiroque yirógode ore aja enga ore chamáta ugarape gajnarénguei bajaque jne iji arroz quedéjnai ujade. Enga jé u jne ujetiga papose gai. Enga pujusápo arroz quedéjnai guio to jne rĩ iji jogatique."–
Gojñane unojo acãrájai u cucha ajñu atíamia uje i tu mostáza
(Márcos 4:30-32; Lúcas 13:18-19)
31-32Jesús chacate ore enga chojninga:
–Yoqueduguéjnai Dupade iji gaté úringai pangurete iji jnumi tuné gajnui tu cucha ajñu atíamia uje quene pacape. Jé u uje suési enga poredaté iji quigade. Enga jé u uje pijoque. Uje poredaté iji ejoi enga chugúperone basája enga pésu daguíjnane iji jmanecade.–
Gojñane unojo acãrájai u arurégode bisidi
(Lúcas 13:20-21)
33Enga Jesús chojningápome ore rĩ:
–Dupade urasapísode a ore chõre raque jne enga ore gajnui u arurégode bisitique to uje chequéraque chójneja harína pipesutique gai, uje gadioque tázadie. Mu jé cachodi tu uje harína pipesudi uté quérã enga cho dabai.–
Jesús oidode u cucha gajnúone ome dacajnaquéode
(Márcos 4:33-34)
34Jesús que chacate ore bisideque mu jecucha cho cucha gajnu iji dacajnaquéode jnese. 35Chacãra dacajnaquéode aja cuchade gu uje Dupade uruode atatasórone uñai jé urusãracho nanique uje chojninga:
A yo cucha gajnu iji yacajnaquéode jne.
A yopo quique cuchade to jne rĩ uje cáma pududicho to iji erámone taningane.
Jesús cho dacajnaquéode quique ome ugarape gajnarénguei aja arroz quedéjnai ore
36Uje Jesús chiroque ayorébui aja doi nanique, enga jé u uje uté chacája guiguíjnarique enga acadigode ore tibágui. Enga ore chojningame:
–Ope bacajnaquéode quique ome yoque ome arroz quedéjnai, ugarape gajnarénguei ore quitique.–
37Enga Jesús chojningame ore:
–Jnani uje chaca cucha ajñu ueradedie gajnui jé u Dupade utocaidi uyu. 38Jeque corã́cabia gajnui tu erámone unojo. Cucha ajñu ueradedie gajnúone u Dupade urasapísode ore. Jé basa ugarape gajnarénguei gajnúone u Satanás ajnangórone ayoréo jnese. 39Jeque ugarape gajnarénguei acasṍri gajnui tu Satanás. Sequeré pirangué gajnui tu erámone unojo eruei. Jeque sequeré ĩrasórone ore gajnúone u Dupade irógode gaté unirísoño. 40Uacamóño uje a pigarique ugarape gajnarénguei aja ñane jne enga a paranája pioi to jne enga a papose gai jne. Enga Satanás ajnasórone ayoréo ore isocai jé upo to jne rĩ iji erámone eruei. 41Dupade utocaidi uyu a yiroque yirógode gaté unirísoño aja erámone ujetiga ore chamáta ayoréode ore jnese uje ore dejéna dojode ayoréo aja pisijnaringuéone. Jé aja ore uje ore chajmára pisijnaringuéone. 42Enga a parãte udore ore jnese jne aja pióquedatérique. Enga jogadi a u jne ujeta ore po jóroque. Jogadi upo jne rĩ ujetiga ore chigase damatarane, uje ore chejnárengui jóroque re ome dajnéone pujuyaquéo. 43Jé ore uje ore pésu Yai uruode a ore gajnunie tu guedé ojodie jne ujetiga ca poque ore iji ore dai Dupade dosadi. Ujetiga uacuñéngo angoninguitígo cuse enga adúcho yuruode unojo.–
Jesús chacãra dacajnaquéode aja cucha orerã́quedatérique
44Jesús chacate ore enga chojninga:
–Yocúringane Dupade urása gajnui u cucha orerã́tique ujetiga pijóchame iji jnumi údi. Ujetiga ayorérique chise mu jĩraque chacose gaté iji jogadi. Enga chayóji dagúchade yui enga tẽra dagúchade jnese. Uje pota doi oré tome jnumi uté gu. Enga doi oré tome enga chejna dagúchade oredie aja jnese. Jé u uje ininaquei jogadi tu. Chiraja gu uje e gajneque cucha orerãi uté.
Jesús chacãra dacajnaquéode aja cucarané orerẽ́ póroropise
45Yocúringane Dupade urása gajnui upo ayoré ugúcharã́i rĩ uje chucué cucarané pórorodie iji erámi uje nanganatápise. 46Mu ujetiga chisírase dacuegué cucarané orerẽ́ enga jĩraque tẽra dagúchade jnese. Chiraja úringa orerẽ́ gu. Chejna dagúchade oredie aja jnese uje doi.
Jesús chacãra dacajnaquéode aja chímenoraque
47Yocúringane Dupade urása gajnua u jocha pichaguéraque ome chímenoraque ujetiga chímeno chijnime oyite ponáyone jnese. 48A oyídode irágu chímenoraque ajénique enga jé u uje gaisórone ore churugúsaja yote quedéjnai pijnanai. Enga jé jogadi u uje ore doi dajegaidode iji oyídode ujade. Ore suse dameserane guio iji dorade picho. Jeque ore tṍrapo detégode aja yote quedéjnai rĩ. 49Yote quedéjnai ichajusórone ore gajnúone u Dupade irógode, gaté unirisórone, uje ore chamáta ayoré ate arégode, ayoré sijnángone ore jnese jne iji erámone eruei. Jé u uje a ore cãra ore jogatígo ome ñane jne. 50Enga jé u uje a ducarãte Dupade guetesórone ore aja pioque ditaguérique jne. Enga a ore cachodi u jne ujetiga ore chisa jóroque dabade. Jogadi upo jne rĩ ujetiga ore chigase damatarane uje ore chejnárengui jóroque re ome dajnéone pujuyaquéo.–
Jesús chacãra dacajnaquéode aja cucha orerãque ichárigo, diyajmátigo ore
51Unojo quigade enga Jesús chojningame dacadigode ore:
–¿Ja arajáyo yacajnaquéode unojo quitígo a?–
Jé u uje ore chajnai enga ore chojningame:
–Yocacadisṍri á, yirajágo erĩ́e.–
52Jé u uje Jesús chojningame ore:
–Ujetiga uacuñeque chiraja Moisés urusarane enga chirajápo yacajnaqué ichade ome yocúringane Dupade urása jne rĩ, enga gajnui tu guiguíjnai iguíjnasṍri jne uje suse dagúcha orerãque diyajmane, ichade ore guio iji dari. Jé u uje tagúome dagúchade jnese. Chamáñaje orerã́cho jnese gu.–
Jesús adode u unojo uje chajníja dedai
(Márcos 6:1-6; Lúcas 4:16-30)
53Jesús chimate dacajnaquéode ome cucha gajnúone aja guesi. Enga jnopóji ore idai uté rĩ. Jno gojni enga jnome danirípisi enga chise dedai Nazaret. 54Enga chacate judíode ore iji te iji ore aquiningaméone. Enga Jesús irajatigade chajuque ayoréode agutedie uje chacate ore. Enga ore chojningame ñane:
–¿Jé uté irajatígadatéi tṍra iji rique a? ¿Jé cho píringome ipesute cucha pitijádode udore rĩ a? 55Uacamóño dayé úringai poridie irábesṍre to. ¿Ja ujnacari irajatígadatéi tõrarásiji uté bisideque e? Uje yoquimópo daté María to rĩ. Yimóngopo uté desade: Jacóbo, José, Simón, Júdas ore to rĩ. Uje ayoré gajnareque ore. 56Jé chopo uté neronie ore rĩ uje yocurása ore to. ¿Chimo jóroque re gotique irajatigai?–
57Jesús chiraja uje que ore chise unétique. Jecute chojninga:
–Uacamóño uje cucha Dupade uruode atatasónique urásarique, jogasúrique chise unétique; ore urása jóroque. Mu a Dupade uruode atatasõre agúpuraníque dirásiji ore to enga ore imeserãi u uté.–
58Ore chotigase Jesús, jecute que urénga pésu cucha pitijabátiguiji dedai to.
Currently Selected:
Matéo 13: Ayore
Highlight
Share
Compare
Copy
Want to have your highlights saved across all your devices? Sign up or sign in
© 2021 Ethnos360
