Josué 15
15
Patatagode udojo u jnani bajai Judá ape disi ejode gajnepídode erãpe iji cananéogosode ore uniri uté nanique
1Uje ore chisi ome judágosode ome ore gajnéone jnupe nanique ga ore doi cucaranenie ome ñane to nanique ujetiga ore chiraja ore gajnepítigo to, ga jé u nanique uje ore chingo ore ga gajnesórone ore cho dajnéngu dajnepítigo udore jnese nanique. Enga judágosode ore gajnei jnúpedatéi uté erué uñai chisípise edómgosode ore gajnei jnupe eruei to. Ga ore gajnei jnupe eruei tuté chicáji umusoi garani yui ga chisípise erãpetarei nanique uje erãpetarei uté i tu Zin. 2Ore gajnepídi erãpe eruei tuté chichaga raja yote quedéjnai ajécatadé eruépisi iji umusoi garani yui, ga ajécatadé uaté i tu Yote Quedéjna Echujna nanique. 3Ga ore gajnepídi eruei uté cáputaji dajesui aja umusoi garani yui to ga chaquesu cucarani iji uté uje i tu Acrabim, ga chaquesuapo erãpetarei Zin aja dajesui uté nanique to rĩ ga chise ore apáringaméi Cádes-barnéa to iji umusoi garani yui. Ga chisípise ore idai Hezrón to, jé aja ore idáyode uñane rĩ uje ore íode u udojo: Adar, Cárca ore. 4Ga jnopo rĩ ga chise ore idai Asmón to. Ga chise tié pujnúraque nanique to rĩ uje chichaga raja yote quedéjnapísi to uje i tu Mediterráneo. Ga tié pujnua tuaté i tu Tié Pujnua Egípto nanique. 5Enga judágosode ore gajnepídi erãpe erué uñai iji guedé garani yui chise yote quedéjnai ajécatadé edúdi iji umusoi garani yui ga jno ga chise edúdi uñai iji casaque garani yui to, uje ajécatadé uaté i tu Yote Quedéjna Echujna nanique. Ga chisápo yote quedéjnai Jordán to nanique rĩ. 6Ga ore eruei uté cho jñuque aja dajesúode ga chise ore idáyode uñane iji casaque garani yui uté nanique uje ore íode u udojo nanique: Bet-hógla, Bet-arabá, Péña de Bohán-Ben-Rubén ore. 7Ga ore gajnepídi jnupe eruei chaquesu pararinguei nanique uje uté i tu Acor ga chise ore idai Debir iji uté. Ga jno ga chise ore idai uñai uje i tu Gilgal uje Gilgal uté déji cucarani Adumín tiógarepísi. Uje cucarani uté déji pararinguei uté uécha uñai iji umusoi garani yui to nanique. Ga erué uñai uté jno nanique ga chise sibíjnane to uje sibíjnane udore ore íode u En-semes, En-rogel ore nanique. 8Ga chisápo pararingué uñai to rĩ uje chicapísiji jnumi iji uté to ga pararinguei tuté i tu Ben-hinom nanique. Ga pararinguei Ben-hinom uté dépoji cucarãte uñai tiógarepísi to rĩ uje cucarani uté i tu Jebús ga i uñai u Jerusalén nanique. Ga jnopo rĩ ga chise cucarani uñai ójo nanique uje pararinguéone déji cucarani uté uéchade iji guedé cacadi yui, jé iji casaque garani yui to. Ga pararinguei uté uje déji guedé cacadi yui uté i tu Hinom nanique, jé basa uñai uje déji casaque garani yui, uté i tu Refaim to nanique rĩ. 9Ga ore gajnepídi jnupe eruei uté cho jñuque iji cucarani uté ójo ga dopóji jnumi iji sibíjnai nanique uje ore ajmini tu ga ore ĩcarai tu Neftóa aja nanique. Ga eruei jnopo to nanique rĩ ga chise guidáyode uñane uje ore déji cucarani Efrón jmainie, ga jé jno ga chise ore idai Báala to uje i uñai cuse to nanique ga i u Quiriat-jearim. 10Mu ore gajnepídi jnupe eruei cho jñuque iji ore idai Báala uté enga chinguíraja guedé cacadi yui ga chise cucarãte uñai to rĩ uje i tu Seir ga chisápo ore idai Quesalón iji cucarani uñai uécha uñai iji casaque garani yui rĩ uje cucarani uté i tu Jearim nanique. Ga jnopo rĩ ga chicai jnumi ga chise ore idáyode uñane iji pararinguei uje ore íode u: Bet-semes, Tímna ore. 11Mu jnopo nanique rĩ ga chise cucaranone uñane uje udore ore déji ore idai Ecrón tiógarei iji casaque garani yui. Ga jno ga cho jñuque iji uté ga chise ore idai uñai nanique uje i tu Sicrón. Ga jnopo rĩ ga chisápo cucarãte uñai to nanique rĩ uje cucarani uté i tu Báala nanique, ga chisápo ore idai Jabneel to nanique. Ga jé jnopo nanique rĩ ga chise yote quedéjna cuchábi Mediterráneo edógai iji guedé cacadi yui. 12Ga erué uñai iji guedé cacadi yui cáputaji dajesui iji yote quedéjnai Mediterráneo edógai. Ga judágosode ore gajneque cuchade jnese iji dajnei jnupe uté údode jnese. Ga ore chajuque daguiosode iji jnumone ga ore gajnéone jnupe cuse jnese to ga que chonatique déji jnanione udore jnese.
Caleb doi pocaningai ome hebróngosode, debírgosode ore nanique ga suépise ore gáyode nanique, ga jé u uje cho dajnéngu udore ore idáyode to
13Josué chisi ome judágosode ore gajnei jnúpedatéi peque uñai ome Jefone ujnacari Caleb to nanique. Ga Caleb gajnepídi uté jé upúsu uje Yocangarádejnai Dupade chichagája nanique. Jecute Caleb cho dajnéngu ore idáidatéi Quiriát-árba nanique, uje uté i ejoi u Hebrón nanique. Ga ore idai uté suépise dojode guidáyo uñane gáyode jnese nanique iji taningai uje jnani bajai Anac ape disi ejode ore gajnepite uté nanique. Uje jnani umarejna udore nanique. 14Ga jnani bajai Anac ape disi ejode déji uté nanique uje Caleb doi pocaningai ome ore nanique. Enga gadioque ore eduguéjna cuchábode nanique uje ore íode u udojo: Sesai, Ahimán, Talmai ore. Mu Caleb suépise udojo ore gai nanique ga chijna ore idai tuté iji ore jmainie nanique. 15Mu Caleb dopoi pocaningai ome ore idai uñai to nanique rĩ uje i tu Debir, uje i uñai u Quiriat-sefer iji taningai to nanique. 16Mu uje Caleb jorane qué ore déji ore idai Debir uté yui nanique ga Caleb catecã́ri jnacarode ore iji dejode nanique enga chojningame ore nanique: "Beyoi ga acugujnáñoji ore idai tuté. Ujeta gosi chejna ore aja jnumi ga a yijna yuro taja gosi jne uje uaté i tu Ácsa, ga a uté gosi cho dacoté iji yuro uaté jne."
17Ga Caleb ujnacare uñai u nanique uje chejnápise ore aja jnumi ga yugode sué dajorane yugode gai. Ga uté i tu Otoniel nanique ga Cenaz ujnacare uté to nanique. Ga jé u nanique uje Caleb dopísi daruode enga doi daro Ácsa nanique ga chijnája uté to ujetiga cho dacoté iji uaté to nanique. 18Ga jé u nanique uje Otoniel jĩraque jnorase Ácsa údi nanique mu qué catecãrápoi rĩ enga chojningame: "Abágui bayé ga acatecãrami to jeta bayé ajéode u ga chisi ome yocajnepítique jnumome yoque to jeta yacágo cuchárigo iji to jne." Ga uaté e chorúrasu burica quedéjna nanique, mu dopoi jnumi to rĩ iji doruti gai ga jé u uje tibágui dayé. Ga dayé chimo nanique enga dayé catecã́ri bajaque enga chojninga:
–¿Bagaitíguiji yu a?–
19Ga uaté narare enga chojninga:
–Yipota jeta yicatecãrámi ua to ome yajegaitique cucha. Yiraja uje e basi ome yocajnei jnumome yoque to mu uté déji erãpetarei Neguev ajei. Mu asi ome jnupe ueratígome yoque to jetiga sibíjna to. Chamáñaje yipótago gu jetiga yacágo cucha ajñunie iji to.–
Ga jé u nanique uje Caleb chajnai daro uruode enga chojningame:
–Cachi u arĩa. A bajneque sibíjnane jne iji casaque garani, jé iji umusoi garani te rĩ.–
Patatagode udojo u judágosode ore gajnéone ore idáyo íode uje ore cho dajnéngu udore nanique
20Uje judágosode e ore chiraja dajnéone jnumío eruéode enga jé u nanique uje ore chisecãru daguiosode ore jnese, ga jiei ore nanique enga jé u uje jiei ore gajnéone pidáyo to. Uje garósi ore nanique enga garósi ore gajnéone pidáyo to. Ga jé u uje ore chisite rágaja daniri údode jnese nanique ga jé u uje ore cho dajnéngu dajnéone jnumío iji daniri údode jnese. 21Ga uñane jno nanique ga ore chicáji umusoi garani yui to ga ore cho dajnéngu ore idáyode jnese iji ore uniri Edom tiógarei to, ga ore íode u udojo nanique:
Cabseel, Edar, Jagur ore. 22Jé aja ore idáyode Cína, Dimóna, Adáda ore to. 23Jé aja ore idáyode Cédes, Hazor, Itnán to. 24Jé aja guidáyode uñane to uje ore íode u Zif, Telem, Bealot ore to. 25Jé aja Hazor-hadáta, Queriot, Hezrón to uje ore idai Hezrón uté i uñai u Hazor nanique. 26Jé aja Amam, Séma, Moláda ore to. 27Jé aja Hazar-gáda, Hesmón, Bet-pelet ore. 28Jé aja Hazar-sual, Beerséba, Bizótia ore to. 29Jé aja Báala, Iim, Esem ore. 30Jé aja Eltolad, Quesil, Hórma to. 31Jé aja Síclag, Madmána, Sansána ore to. 32Jé aja Lebaót, Silhim, En-rimón ore. Uje yisecãco ore gajnéone ore idáyo udore enga ore chejna ayoré chojmarai ga gagájni iji ti iji ayoré uñai jmanáyone. Ga jé ore chopo dajnéngu guidai ajámamone to rĩ iji ore gajnéone jnumío eruéode to.
33Judágosode ore chopo dajnéngu guidáyode uñane to nanique rĩ uje udore déji pararinguéone údode uje ore íode u udojo nanique:
Estaol, Zóra, Aséna ore. 34Jé aja Zanóa, En-ganim, Tapúa, Enam ore. 35Jé aja Jarmut, Adulam, Sóco, Azéca ore to. 36Jé aja Saaraím, Aditaím, Gedéra, Gederotaím ore to rĩ. Uje yisecãco ore gajnéone ore idáyo uje ore déji pararinguéone nanique enga gagájni ore iji yirídai nanique. Ga jé ore chopo dajnéngu guidai ajámamone to rĩ iji ore gajnéone udore eruéode to.
37Judágosode uñane ore cho dajnéngu ore idáyode uñane to uje déji pararinguéone udore to uje ore íode u udojo to nanique: Zenán, Hadása, Migdal-gad ore. 38Jé aja Dileán, Mízpa, Jocteel ore to. 39Jé aja Láquis, Boscat, Eglón ore to. 40Jé aja Cabón, Lahmam, Quítlis ore to. 41Jé aja Gederot, Bet-dagón, Naama, Macéda ore to rĩ. Uje yisecãco ore gajnéone ore idáyo udore nanique enga chojmára iji ti yirídai uñai. Ga jé ore chopo dajnéngu guidai ajámamone to rĩ iji ore gajnéone jnumío eruéode to.
42Judágosode uñane ore cho dajnéngu ore idáyode uñane to uje déji ore uniri uté to uje ore íode u udojo to nanique: Líbna, Eter, Asán ore. 43Jé aja Jífta, Aséna, Nezib ore to. 44Jé aja Kéila, Aczib, Marésa ore to. Uje yisecãco ore gajnéone ore idáyo udore nanique enga gagájni iji ti yijmanai uñai. Ga jé ore chopo dajnéngu guidai ajámamone to rĩ iji ore gajnéone jnumío eruéode to.
45Ga judágosode uñane ore cho dajnéngu ore idai Ecrón nanique jé aja guidai ajámamone to iji Ecrón ejode. 46Ga ore chopo dajnéngu jnumi jnese iji ore idai Ecrón, yote quedéjnai Mediterráneo ore ujai rĩ. Ga ore chopo dajnéngu guidai ajámamone to rĩ iji uté jé aja ore idai Asdod ejábi. 47Jé aja ore idai Asdod to, jé aja uté ejominórone guidáyo. Enga ore chopo dajnéngu ore idai Gáza to rĩ, jé aja guidai ajámamone to iji ore gajnéone jnumío eruéode to. Ga ore chopo dajnéngu jnumi to rĩ iji ore idai Gáza, tié pujnua ore ujai. Uje tié pujnua tuaté i u Tié Pujnua Egípto ome ore nanique, ga tié pujnua uaté u uje chichagápise raja yote quedéjnai Mediterráneo to nanique.
48Ga uñane jno nanique ga ore chicáji cucarãte umarejnájnamui nanique ga ore cho dajnéngu ore idáyode iji udore to nanique. Ga ore gajnéone ore idáyo íode u udojo nanique:
Samir, Jatir, Sóco ore. 49Jé aja Dána, Quiriat-sána ore to, uje Quiriat-sána uté i uñai u Debir nanique. 50Jé aja Anab, Estemóa, Anim ore to. 51Jé aja Gosén, Holón, Gílo ore to. Uje yisecãco ore gajnéone ore idáyo nanique enga chojmára iji yirídai nanique. Ga jé ore chopo dajnéngu guidai ajámamone to rĩ iji ore gajnéone jnumío eruéode to.
52Judágosode uñane ore cho dajnéngu ore idáyode uñane to uje déji ore uniri uté to uje ore íode u udojo to nanique: Arab, Dúma, Esán ore. 53Jé aja Janum, Bet-tapúa, Aféca ore to. 54Jé aja Húmta, Quiriat-árba ore, uje Quiriat-árba uté i uñai cuse to nanique ga i tu Hebrón nanique. Jé aja Sior to. Uje yisecãco ore gajnéone ore idáyo nanique enga gagájni iji ti yijmanai uñai. Ga jé ore chopo dajnéngu guidai ajámamone to rĩ iji ore gajnéone jnumío eruéode to.
55Judágosode uñane ore cho dajnéngu ore idáyode uñane to uje déji ore uniri uté to uje ore íode u udojo to nanique: Maón, Carmel, Zif, Júta ore. 56Jé aja Jezreel, Jocdeam, Zanóa ore. 57Jé aja Caín, Guibeá, Tímna ore to. Uje yisecãco ore gajnéone ore idáyo nanique enga ore chejna yijmanáyone. Ga jé ore chopo dajnéngu guidai ajámamone to iji ore gajnéone jnumío eruéode to rĩ.
58Judágosode uñane ore cho dajnéngu ore idáyode uñane to uje déji ore uniri uté to uje ore íode u udojo to nanique: Halhul, Bet-sur, Gedor ore. 59Jé aja Maarat, Bet-anot, Eltecón ore. Uje yisecãco ore gajnéone ore idáyo nanique enga chojmára iji ti yijmanai uñai. Ga jé ore chopo dajnéngu guidai ajámamone to iji ore gajnéone jnumío eruéode to rĩ.
60Judágosode uñane ore cho dajnéngu ore idai Quiriat-baal uje i uñai u Quiriat-jearim, jé aja ore idai uñai rĩ uje i tu Rabá, jé aja guidai ajámamone to iji guidáyode udore ejode.
61Ga uñane jno nanique ga ore chicáji erãpetarei nanique ga ore cho dajnéngu ore idáyode iji uté to nanique uje ore íode u udojo to nanique:
Bet-arabá, Midín, Secáca ore. 62Jé aja Nibsán, Guidáidatéi Echujna, Engádi ore. Uje yisecãco ore gajnéone ore idáyo nanique enga chojmára iji ti yijmanai uñai. Ga jé ore chopo dajnéngu guidai ajámamone to iji ore gajnéone jnumío eruéode to rĩ.
63Mu jebuséogosode déji judágosode ore gajnei jnupe nanique ga ore idai u Jerusalén nanique. Enga Judá ape disi ejode ore doi pocaningane ome ore nanique mu que ore chejna ore nanique uje jé ore etotiguei cho ñane gu. Ga quigade enga ore cha pocaningai ome ñane nanique, ga jé u uje ore chopise darása iji ñane. Jecute jebuséogosode, judágosode qué ore déji ñane gari to iji dirode udojo to iji uraque dedai tuté to.
Currently Selected:
Josué 15: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
