Juéces 3
3
Israélgosode doi pocaningane ome cananéogosode ga cananéogosode uñane jé chapídiji daniri uté údode uje jé Dupade ajéo nanique gu
1-2Uje israélgosode doi pocaningane ome cananéogosode nanique ga uñane jé chapídiji daniri uté údode nanique. Uje que Dupade juéga jeta chuque ore jnese. Pota gu ujetiga pocaningane déji ome disi ejode to enga ore chiraja re ome dajocaningane to. Ga chojningame re: "Israélgosode abode a déji jne uje ore basíji dayode ore jocaningane quigade. Jecute a yujuéga jeta purása quedéjnane uñane qué ore chapite. Yigaidi tu gu ujetiga disi ejode doi ore enga chijócãre ore iji daniri ga jogadi u jne jeta disi ejode ore etotiguéode cuse to ome dajocaningane yúode." 3Ga Dupade iñomone u udojo nanique: filistéogosode uñane qué chapite to ga ore asutépisedie chejna yijmanai to nanique uje qué ore eca iji dajocaningane quigade. Cananéogosode ore chapite jnese to, jé aja sidóniogosode, jé aja hevéogosode ore rĩ uje ore uniri déji cucaranone jmainie nanique. Ore cho daniri iji cucarani Baal-hermón, tuijnai Lébo-hamat ore ujai jnese nanique ga ore uniri i tu Líbano nanique. 4Ga Pangarádejnai Dupade noñome udore ore iji uté gu jeta chetingare israélgosode ore ape disi ejode. Chidójnangarása gu jeta pijoque gosode iji israélgosode ore ujade uje dorási uté uru pirosobádode quigode uje Moisés chajnerame ome ore dáquiode nanique.
5Ga Josué ore jocaningane quigade u nanique uje israélgosode e ore cho darása iji cananéogosode ore nanique, jé aja hitítagosode, jé aja amorréogosode, jé aja ferezéogosode, jé aja hevéogosode, jebuséogosode ore to nanique. 6Ga ore abidie, ore ujnacarode ore chisa purása quedéjnane ore ga ore chóji ñane gari iji ñane ujade. Ga jé u uje ore catecã́ri ore angurenone dupa quedéjna to.
Dupade Ujopié Espíritu Sánto basája Otoniel gai nanique ga chijnime urasade ore iji purása quedéjnane ore eduguéjna cuchábi Cusán-risataim jmainie
7E israélgosode ore pésupúsu cucha gajnaréngone iji Dupade edominone. Enga ore chicha Dupapísi aja ti yui, ga ore doi dupa quedéjnane isocade to ga ore chijnoque udore ore oré gatedie aja quedéjnane to uje ore íode u Baal, Astarté ore. 8Jecute Dupade ájningarángome israélgosode ore ga tẽra ore ome mesopotámiagosode asuté uje i tu Cusán-risataim. Israélgosode ore doi Cusán-risataim urasade ore iroquéode bisideque nanique iji siqueredie uje gadióguiji yijmanai uñai. 9Ga ore chopise dáyugu re iji uté ga jé u uje ore áyipiedie doi dayode angureni casicaite Dupa. Ga ore chijóchapíse Dupade ajei údi jeta chijna udore ore iji eduguéjnai uté jmainie. Ga jé u uje Dupade pésu ore asuté iji ore urasade uñai, enga uté chijnime ore iji damajósõri uté josipiedie jmainie. Enga ore irotangóri uté u Caleb desai Cenaz ujnacari uje i tu Otoniel. 10Uje Pangarádejnai Dupade Ujopié Espíritu Sánto basája Otoniel gai nanique, ga nóña ga israélgosode ore eduguéjna jeta chajire darasade ore adode aja quigode. Ga Otoniel uté nóna israélgosode nanique ga ore jno ga ore doi docaningai ome damajosórone. Ga jé u uje Pangarádejnai pésu ore úringane pirosobácho ome eduguéjnai Cusán-risataim, ga jé u uje ore suépise uté gai. 11Iji udojo quigade ga israélgosode ore dopísi dangaráni Otoniel uru quigode ome raque nanique. Ga que cuchárique chopósi ti iji ore rĩ aja siqueredie uje chejna ayoré gáredie nanique.
Dupade ajegaite Aod nanique ujetiga chijnime israélgosode iji moábgosode ore jmainie
Enga e chise diri nanique uje ore angaráni Cenaz ujnacari Otoniel uté toi. 12Mu udojo quigade ga israélgosode ore chajniapója cucha gajnaréngone úringane pipesucho iji Dupade edominone rĩ, ga que Pangarádejnai chisápo ore unétique rĩ. Jecute Dupade pésu ga moábgosode ore eduguéjna cuchábi Eglón sué israélgosode ore gai ome dáringa dacasuté pirosobade. 13Ga jé u uje ore asuté cuchábi Eglón chutṍri amóngosode ore nanique, jé aja amaléquegosode ore jeta ore cháta rágaja ñane ome dajocaningai ome israélgosode ore. Ga ore jnome israélgosode ore ga ore pésu dajochai ga ore chose israélgosode ore iji ore idai uje i tu 'Pidai Ijnápui.' Ga ore sué israélgosode ore gai iji uté ga e que togome israélgosode ujetiga ca ore doi Eglón uté áyipiedie gatuaque. Ga Eglón, urasade ore, ore cho dedai iji ore idai uté to nanique. 14Ga israélgosode udore ore guejnanie siqueré chise 18 años nanique uje moábgosode ore eduguéjna uté pésupúsu israélgosode ore ujuredie gatuaque.
15Mu udojo quigade nanique ga israélgosode quene ore áyipiedie doi dayode ore angureni Dupa jeta chátaja ore. Ga jé u uje ore chijóchapíse Pangarádejnai Dupade ajei údi jeta chiroque ore átajasónique aja ore uje que ore chirajápo dasocáringome raque gotique rĩ. Ga Yocangarádejnai Dupade chiroque benjamíngosode uñai aja ore jetiga cho ore quique. Ga jnani uté pésu cuchade ga chinguíra dapesudode aja darasei. Ga uté i tu Aod. Jé basa ga dayé i tu Géra.
Ga chise diri nanique enga israélgosode ore átajasṍri Aod uté jno darasade israélgose ore iplátadie údi ome eduguéjna cuchábi Eglón ujeta ore doi dasocabei uje ore cho doré ome uté nanique iji ujade uje chutai ore gu. 16Mu uje cáma Aod jnome eduguéjnai yui ga doi daquesé yorícoi, uje umaningai cho médio métro ga uode asíco jnese, ga chigarúja detarúdi iji dãrachua uje arasé gu, ga chaníraja dagúchade údi. 17Ga jé u uje chise ore eduguéjna cuchábi Eglón iquei. Ga jnanidatépise uté nanique. 18Ga Aod uté nóna dojode jnani uñane aja ore eduguéjnai uté iquei to jeta ore chisi ome daplátadie ome uje ore cho darasade oré ome uté. Ga nonapo ore aja guesi to rĩ uje ore jno. 19Enga uje ore chise ore idai Gilgal ga ore chimo ore angurenone ayoré gajnúo iji ore idai údode. Ga Aod chajniápo aja ore asuté iguíjnai te rĩ. Ga chise ga catecã́ri ore eduguéjnai iguíjna piagoi irodisórone ore ga chojninga:
–Qué yingo ore urúiso ome uaqueduguéjnai, mu que ore juéga jeta uacuñeque tangári to. Gusu ome uacasuté jeta chiraja quigode.–
Enga jé u uje ore eduguéjnai chiroque darógode aja guesi iji dejode ga juéga jeta tangári Aod ojñane ga gusu ore iji ore charidi uté.
20Uje erámi jũruachúringane u nanique ga ore eduguéjna chijna Aod aja daguíjna ajé uñai uje aréredatepíse uté ajei. Ga eduguéjna cuchábi chácariji dayaripi gai iji uté. Ga jé u uje Aod catecã́ri uté ga chojningame:
–Eduguéjná, yujúdode gojña garani tu Dupápisi.–
Ga chajuque eduguéjnai aguté ga jĩraque chague jmame iji dayaripi gai. 21Ga Aod jĩraque chijnime daquesei iji dãrachua ome darasé uje jé ãrachua u darasé gu ga chijnime ga chichagu ore eduguéjnai Eglón ica ome ¡paru! 22Ga Aod iquesei chacája ore eduguéjna cuchábi ajei jnese ga isapídi chacapója to rĩ ga que pimo quesei eruénique gotique uje chicáji ajei jnese gu. Ga eduguéjnai Eglón cutejmanie arágajñui chaco iquesé yorícoi uqué gai ga Aod noñome daquesei iji ajei. 23Ga Aod suru ore charipi uqué guiguíjna ajé uña piagoi gai uje gaidi u gu jeta ore jos eti qué ore catecã́ri ñane iji uté. Ga doi guesi ga tṍraji ore iguíjna bocadi.
24Uje Aod e jno ga eduguéjnai irógode ore chajire ore charipi uqué guiguíjnai joride mu qué paré ga ore chojningame ñane: "A ca yicatecãcoi uje a qué chuchíja ore uchaquepié iji daguíjnai ajei." 25Mu e igasique eduguéjnai iji uté ajei ga ore cho dáyugu re ga ore chojninga: "Chimo jóroque re uje iyajmánguiji dayaridi uje que doi guesi gotique to." Ga ore doi ore iguíjna piagoi erã́sori llave ga ore chuchẽre gai mu ore chajire ajei mu ore chimo dasuté uaqué iji jnumi iji te.
26Uje que ore chucué deduguéjnai yungóri Aod míraque ga uté jno ga quítequiguíji ore idai Seirat. Ga chajuque ore idai Gilgal uje ore angurenone dupa quedéjna déji uté. 27Enga uje Aod e chise daniri Israel ga choru cucarani uje i tu Efraín ga chisa dapúpuria ga chubúchu ome darasade ore ga ore chudute ga ore tibágui. Ga jé u uje ore doi jnumi tiji cucarani ga ore chijñaque Aod aja jnumi. 28Ga Aod chojninga: "Ajnáño yiquigade uje a yicoi yoquijocaningai ome moábgosode ore jne. Chamáñaje Yocangarádejnai Dupade a pésu jne ga a yujnuéngo udore ore gai jne ga yijnico yóguiji ore jmainie. Ga israélgosode ore quítequigája tié Jordán jogosórone soldácho uje ore chirote yote quedéjnai garérodie uje yodi eré iji. Ga israélgosode sué udore ore gai ga jé u uje ore chopo dajnéngu ore irodi yote quedéjnai uté garérodie rĩ jeta jé basa ore charangape daniri yui iji uté to. Uje eduguéjna cuchábi chicha dasoldádode aja daniri gabi uté gu jeta jé ca israélgosode ore chacája ore uniri iji uéchamitó to. 29Enga iji israélgosode jocaningai ome moábgosode ore ga ore yugode chise 10.000 nanique iji soldádode uje israélgosode sué udore ore gai iji dajocaningai. Jé ũré uje ayoré uajádejna moábgosode ore ome pocaningane mu que uñeque chayo ga que uecárique déji ore uje israélgosode chejnápise udore ore ¡jaripe! 30Enga iji diri uté uje israélgosode ore sué moábgosode ore gai ga jé u uje pininaquei déji israélgosode ore to uje ore cho dadode ajirisṍri iji Aod uté nanique. Ga siqueredie chise 80 años nanique uje que israélgosode ujórique ayoré chopo dajocaningame ore nanique rĩ.
Israélgosode ore iquetangóri Aod toi ga ore iquetangore ejoi u Sámgar nanique
31Uje Aod toi nanique ga israélgosode ore ujnacarode uñai chácariji jogadi uje i tu Sámgar. Ga uté dayé u jnani bajai Anat nanique. Enga filistéogosode ore doi pocaningai ome ore ga Sámgar chisa dajnosocoi ga chujé filistéogosode ore ome nanique, uje chãraque darasade israélgose ore. Ga chicha raja udore ore yui nanique ga yugode chise 600 nanique ome dajnosocoi uté. Ga ijnosocoi uté u nanique uje uté chichagu dachidode aquirájna ome ¡taque! jeta chĩrase dejnane.
Currently Selected:
Juéces 3: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
