Juéces 10
10
Israélgosode ore adode ajirisórone cuse iji Abimelec úringai chuque quigade, ga uñai tu Tóla
1Israélgosode ore adode ajirisṍri cuse nanique iji Abimelec úringai chuque quigade nanique, ga i tu Tóla. Ísacargose Tóla uté ga dai i tu Púa, jé basa ga dáquide i u Dódo. Ga Tóla uté idai tu Samir nanique uje ore idai uté déji cucaranone ore ujai, uje ore cho jnani bajai Efraín gajnepídi iji cucaranone udore nanique. 2Ga uté chajire israélgosode ore adode aja quigode nanique ga guejnanie siqueré chise 23 años nanique ga toi iji udojo quigade ga ore chijóchame iji ore idai Samir ejoi.
Israélgosode ore adode ajirisórone uñai basapója Tóla jogadi rĩ uje i tu Jaír
3Iji Tóla uté úringai toque quigade ga uñai basapója jogadi uje i tu Jaír ga galaádgose uté. Ga israélgosode ore cho dasuté iji uté aja siqueredie uje chise 22 años nanique. 4Enga Jaír abode cuse ga ujnacarode ore chise 30 nanique ga ore choru burica quedéjnane jnese uje ore chicáji dajesúode erámio. Ga Jaír ujnacarode ore cho dajnéngu pidáyode udore, udore nanique jeta déji Jaír ujnacarode udore ore jnese. Ga pidáyode udore idaisórone ore cho dasuté iji Jaír ujnacarode udore ore jnese iji dedáyode. Ore ipesudode udojo pidai déji puniri ajei uje i tu Galaad. Ga ore chojningame pidáyode udore jnese: 'Jaír ipesudode pidáyo.' Jé aja dirode udojo to uje jecucha ore cho jnani bajai Jaír gajnecho iji pidáyode udore uje 30 u nanique. 5Uje Jaír toi ga ore chijóchame iji ore idai ejoi uje i tu Camón.
Dupade ajei dotárome israélgosode ga chisi ome petotiguei ome amóngosode ore enga ore sué israélgosode ore gáyode nanique
6Uje Jaír toi ga israélgosode pésapo date gajnaréngone iji Dupade edominone gatuaque rĩ. Ga ore chapúsapo dangurenone dupa aja to rĩ. Uñane changureta dupa quedéjnai Baal to ga ore catecã́ri uté oré gaté dipesedie to. Jé basa uñane catecã́ri dupa quedéjna to uje i tu Astarté. Uñane ore changureta síriagosode angurenone dupa quedéjna to. Uñane ore changureta sidóniogosode ore angurenone dupa to. Jé basa uñane changureta moábgosode angurenone dupa to. Jé basa uñane changureta amóngosode angurenone dupa to. Jé basa uñane changureta filistéogosode angurenone dupa to. Ga e ore chapúsu israélgosode ore angureni Dupápisi ga que jé ore catecãrápoi uté to rĩ. 7Ga Dupade ajei dotárome israélgosode ga chisi ome petotiguei ome filistéogosode, jé aja amóngosode ore enga ore sué israélgosode ore gáyode. 8Enga siqueredie chise 18 años nanique uje israélgosode ore chejnáringui jóroque filistéogosode, amóngosode ore josipiedie ome raque. Ga cuchiyíode upúsu israélgosode ore uje ore déji guedé garani yui iji yote quedéjnai Jordán uéchamitó, uje ore déji amorréogosode ore uniri Galaad ajei. 9Amóngosode chaquesu yote quedéjnai Jordán gatuaque to. Ga ore gaidode u judágosode, benjamíngosode, efraíngosode ore iji uéchamitó. Ga ore doi pocaningai ome ore idáyode udore gatuaque. Ga israélgosode ore chojninga: "Urénga, cuchade chajo yógaja ñane ga ¿jé yoco píringome yoque jne a?" 10Enga jé u uje ore jnusina dayode angureni Dupápisi. Ga ore chojningame daruode: "Dupade á, yocadode gajnarécho ome ua. Ga yicatecãcoi bãré cásodicáite dupa quedéjna uje tácho mu."
11-12Enga Yocangarádejnai chajnai ore uruode ga chojningame ore: "Uje uacajnárecho uágome egíptogosode ore josipiedie nanique ga yijna uáguiji ore gari. Jé aja amorréogosode, amóngosode, filistéogosode, sidóniogosode, amaléquegosode, madiángosode ore uje uaquejnárecho uágome ore josipiedie to, mu yátaja uaque ga yijnime uáguiji ore jmainie to. Uje jecucha uacacayoi quedéjnane ome yu ga yijna petotiguei iji uacari ga yisi ome uacamajosórone ore. Quigade uje uacáyipiedie dépoji yu ga jĩraque yátaja uaque ga yatirépo uaquetotiguéode uacabai to rĩ. 13Ga jiei uje yáta cuchade aja uaque mu érãtique ajóyo uágaja yu. Ga uacacatecãchoi ayoré gajnúone uje que ore cháta cuchárigaja uaque mu. Ga a jé ca yátaja uaque iji uacajnenie udiji ore josipié ejo jne. 14Boyo ga abáchoi uacajegaidi casodé dupa ejo gotígo ga atochoi ore jetiga ore chátaja uaque jne. ¡Ajóchayo ore ajéode údi jeta ore chiqueta uaque uje cuchade chajo uágaja ñane ga a ore chajuque udore iji uacabai jne!"
15Israélgosode ore chajnai Dupade uruode ga ore chojningame: "Pangarádejná, Dupade á, yocadode gajnarenguipíso ome ua, ga que déji bajénique. Mu acadígui yocadode udojo ga yijíñongome yóguiji bajmainie. Ujetiga bajéo ga o bajuñame yoque to, jeoga osṍrape yoque. Mu gusu erámi tudé jeta aquetape yóguiji yocumajosórone udore ore jmainie jne iji diri tudé. Osõripísape yoque." 16Ga jé u uje israélgosode ore chijnime dangureni casodé dupa ga ore cha changureta ore ga ore tṍraja sona, ga ore dopoi Pangarádejnai Dupade adode rĩ. Uje Dupade chimo udojo ga que doi ga juégapo ore ome ore umajosórone ore to rĩ, uje chosõripise israélgosode gu.
17Udojo quigade ga amóngosode ore chimáta rágome israélgosode yui jeta ore cho dajocaningame ore ga ore chicha dacárpade aja israélgosode uniri Galaad ajei. Ga israélgosode ore chimáta ñane ome pocaningai yui to ga ore chicha dacárpade aja ore idai Mízpa uje déji ore uniri Galaad uté ajei to. 18Ga israélgosode uje ore uniri u Galaad, ore angaránone ore catecã́ri ñane ga ore chojninga: "Ujetiga gosi cho dajnéngu yocumajosórone amóngoso udore jne, ga a jé u uté jne jeta yoco yocasutépise iji uté gosi iji yocuniri Galaad údode jnese jne. Chamáñaje íjnoque yocasuté gu jeta yijnajo gosi aja yocajesui."
Currently Selected:
Juéces 10: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
