Isaías 53

Proféta Isaías chatata Dupade Utocadípisi adode

1A yatata yududigode udojo jne ome uaque, mu que yiraja gosi iji uaque jeta changureta yujúdode udojo quigode.

¿Ga a gosode u jne iji uaque jeta cho dajnéngu Pangarádejna Dupade igoi detotiguei aja uaque jne?

2Dupade ajéode u jetiga júdebei uté piquetangore chosi cucha ajñu ujniérãtaque uje suési iji jnupe uajádi.

Mu jé quérã iji jnupe uajádi uté jmainie ga chimate raja dáringai pore arégape uje erode chacája jnupe uajádi uté ujade ga que jé cho sebeque.

Ga Dupade júdebei piquetangóri uté gotique que déji dojórique jnacare enocha goningai gotique to.

Ga ujode ayoré yajico uté mu que picotágome omitigárique.

3Ga ujode jnani ore tagu dejode ome uté, ga que ore pota úringárique pijõra.

Ga áyuguhebátaque uté iji dojode ayoré yoquijmainie, ga jecucha isocabei u uje chejnáreque rome cucha dacadode jnese iji yocujade.

Ga uté jé chopise yoquimojmárique yocujo ayoré uje que gosi cho cheme iji yocujade, ga que piyaque uté gosi urúrique unétique.

4Ga yocadode gajnaréchome uté mu uté cho dajnéngu yocáyuguhebátigade ga na uté aja jnumi.

Ga chopo dajnéngu yoquejnaréngone isagode rĩ, ga chejnáreque rome udore to.

Uje yimóngo uté iji gajnei pujuyaqué jmainie ga yojnijome uté: "Dupade ajnangoque uté ga ujuyagaite, ga gaidi u gu jeta jé ca chisi dabai."

5Mu uté chicha raja yoqui ga Dupade chujé uté údode.

Mu a yocajnechóraso Dupade yupídode udore, ga gose yoquetétigade ome Dupade uru quigode.

Ga uté ujñapié ajámiji dabade yocate gajnarécho jmainie.

Mu gajnei pocaninga u uje di pajesereringai údi iji yoc.

Enga uté gajnéone chupícho di pijóningai údi iji yoque.

6Uje bijnaque yoque jnese ga yocajnunie jé u áyasa dodie.

Ga jé yicagóji yoquiquigode erámio jnese.

Ga que uñeque doi ga jĩraque quítequiguíji Dupade adode úringáringo pigaicho.

Jecute Dupade chicha yocajnéone pujuyaqué aja dajúdebei piquetangore uté gai, ga toi ome yoquisijnaringuéone.

7Uje ore cho damitiguéome uté mu que chajire ore yúrique caru gotique.

Ga que chuchẽrápo dabijnani gai gotique rĩ jeta narare damánique.

Ga ore jno údi, ga gajnua jé upúsu áyasa chuguéraque ome áyasadie yungóremétique.

Ga uté jé cho udiji uje etéquetí cho cheme ome desórone.

Uje jé chopise áyasadie uje chácariji dayaridi ga cho paraque iji uje ore chuju ojoi iji gai, mu cho paráguiji ore jmainie.

8Que uté bárique cucha cuse mu ore chisa ga ore jno údi aja padode ajirisórone jeta ore cho dajuñame uté pórecajna.

Que toc jeta gosi doi ga chatata uté ape disi ejórigo íode gotique, uje que noñome datique iji guesi gu.

Ga uté gajnua jé u pore pacáraque iji dojode ayoré ujade uje pijnimé uaté ¡janipe! iji poridie gatócoro.

Que cho daba dasijnaringuéone gotique, uje uégome pisijnaringuéone gu, mu toi ome yurasade ore isijnaringuéone.

Mu que cucha ome ayorérique uje toi ome ore gotique.

9Ga ore chijóchame iji jnani sijnáquechoquíode ore ujai.

Ga ore chicha uté ode aja ugucharane ore ódedie ujai uje ore áyipiedie chicai udore yúode ome Dupade adode.

Ga que uté chujé dojórique ayoré gotique to ga que ate uñeque cuse jeta ujórique ayoré chejnáreque atique ome re.

Ga que chopo darupatáringa to rĩ ome dojórique ayoré.

10Que cucha dacadode udore chise uté bisideque, mu Pangarádejnai Dupade jé áyipiedie quigode u jetiga jé yuque dajúdebei uté údode ga pésu uté gai charácha.

Ga áyipiedie quigode jé u jeta chujé uté údode ga yupídode na uté aja jnumi ga jé que chisápo dajóningárique rĩ.

Jecute uté tẽra rome ore isijnaringuéone, ga cho áyasa pẽrapáideraque ome Pangarádejnai Dupade ujeta chĩro erámi unirisórone isijnaringuéone ome úringai chuque.

Ga jé u uje uté ucuecaringuei u uje umare iji uté itoringai quigade, ga uté ape disi ejórigo a jiei ore iji erámi to jne ga a pañapísiji ore jnese jne.

Ga a uté u jne jetiga Pangarádejnai Dupade áyipiedie chise dáringanie ibijóguei jnese, ga gose uté.

11Uje uté déji dáringai surujnaque gai, ga cho jeta ijnangunua chaco uté gai, ga edodie cho jnaque.

Mu dépoji dírecaringuéi te rĩ ga chajire dejode mu uerate imaningone cucha aja quigode, ga irasiguipise re.

Pangarádejnai Dupade júdebei uté uégome pisijnaringuéone, jecute a u jne ujetiga chejñu darajasórone ore isijnaringuéone iji ore údode ga chibéro udore iji ore gáyode. Enga jiei uté ujode ayoré uje ore chagutíyame uté isocade udore jne.

12Jecute Pangarádejnai Dupade tẽrája dajúdebei uté, ga a cho ayorédaté iji dojningai tuté jne.

Ga uté gajnui jé upúsu ayoré dacasutéraque uje sué dajocaningai gai, ga ujodie dacasutei ore chicota uaté ome úringa ayoré dacasuté dicase.

Uje cuchadatépise uté adode uje chisi ome re ome pitoringai jeta cho pisijnaringuéone oré iji dagachodi uté.

Ga ore cho jóroque ayoré ate gajnarénguiji uté mu que pésu cucha gajnaréngone to.

Cucha gajnaréngone uje chimate uté aja jnumi que uté ate gajnarécho gotígo, mu ujode ayoré dipeséo ore ate gajnaréngone u uje chimate uté aja jnumi.

Mu uté chijócha Dupade ajei údi ome dojode ayoré ate gajnareque udore jeta Dupade chicadígui ore ate gajnaréngone, chamáñaje cho daba ore isijnaringuéone gu, ga jé u uje uté chijna Dupade, ate gajnaréngone udore ore aja ñane.

Currently Selected:

Isaías 53: Ayore

Highlight

Copy

Compare