Éxodo 37
37
Bezaleel pésu Dupade uruode pi cajo nanique ga jé chopise Dupade uru quigode
1Bezaleel pésapo Dupade uruode pi cajo rĩ. Ga pésu cajo uté iji pore péode uje poria uaté i tu acácia. Ga chatingarapísa métro aja údode jeta umaningai chise 1 métro 10 centímetros, jé basa ga pajei chise 65 centímetros, ga 65 centímetros abubíe iji jnumi. 2Enga chimese gai ome óro, jé aja ajei, ga óropise udore jnese. Ga chanire óro aja uté eruéode jnese. 3Enga chanire angoroné gagájninie aja dugudie gáyode jnese uje pipesudei udire iji óro uegue. Gare iji uécha uñai, ga garapóji ujoi uécha uñai. 4Enga pésu tábla peque umarone to iji pore péode uje poria uaté i tu acácia enga chimese gai ome óro jnese. 5Ga nája dapesudi uté Dupade uruode pi jogotodie angoronei jeta jé jogate gatuaque. Ga a ore chijnoque uté jne aja dajesúode.
6Enga pésapo Dupade uruode pi joride te rĩ iji órodie ga chedu órodie ome. Ga chatingara métro aja ga umaningai chise 1 métro 10 centímetros, ga pajei chise 65 centímetros. 7Ga pésapo gaté unirísõre gárode oredie gaté iji joride eruéode jnese rĩ. Ga chichagu eruéode aja jnumi ome parangué quedéjna, ga pésupúsu adode, gatoi, edodie, ujnóngone, aramanie jnese ome erã́sori uté.
8-9Ipesudode udore gaté unirísõre que cãra jogatique gotique, ga pésu joride ga jé chátaja gaté unirísõre orerane udore iji uté gai. Ga ore chaco dajnóngone uté gai, jé ore toji gai iji dádi.
Bezaleel pésu Dupade iguíjna puyai jogoto mésa nanique
10Bezaleel u to uje pésu Dupade iguíjna puyai jogoto mésa ga pésu iji pore péode uje i tu acácia. Enga chatingara métro aja jeta umaningai chise 90 centímetros, jé basa ga 45 centímetros iji pajei, jé basa ga 65 centímetros abubíerigui iji jnumi. 11Enga chimese gai jnese ome óro ga chanire óro aja uté eruéode jnese. 12Ga pésu dosadi jogosórone to jeta chise 7 centímetros. Ga chimese gai ome óro, ga chanírapo óro aja uté eruéode jnese rĩ. 13Enga ore chanire angoroinie aja ajidedie uje dugudie jogadode u ga déji dugudie gáyode jnese. 14Enga pésu tábla péode to rĩ jeta ore chaníraja uaté jogotodie angoroné ga ore chijnóngaja quedéjnane ome erásorone udore.
15Ipesudode udore tábla pecho ga pésu iji pore péode uje poria i tu acácia. Ga chimese gai jnese ome óro. 16Jé aja mésa jorane cucha: catíbeode, bajodíe, ore jopidode ga ore pésu udore iji óro to. Ga a ore oidode u udore jne ome cucha otadi uje ore chójneja daseradéjnai gai to jne ome Dupade.
Bezaleel pésapo ore ibiogode ero aja gaté to nanique rĩ
17-18Bezaleel pésapo ore ibiogode ero aja gaté to rĩ. Ga pésu udore ome óro pei chojmarai ga chichagúja jnumi ome erãto parangué quedéjna. Ga pésu chaqui bajaque, ga pésapo pajei te rĩ aja gaté. Ga pésu úcorigui to ga gadioque ore iji gatócoromitó uéchade jnese. Ga pésu bajátigui iji uté gatajidode jnese. Ga pésu pojnánguenie iji uté potogórodie jnese. 19Gadióguei bajo gajnaminie déji úcodie udire jnese uje chojmára úcodie udire iji yijmanai uñai, ga bajo gajnaminie udire ore chopise poria adie gatódaóde uje poria uaté i tu alméndra. Ga gatódaóde jé déji úcodie udire potogórodie jnese, jé aja pojnánguenie to.
20Ga ore pésu potogórorigui iji gosi uté jeta gagájni to, ga ore pésu pojnánguenie iji potogórodie erodie to ga gatódaoi jé jogate to. 21Úcodie udire uje catája Bezaleel orai uté gosi ga gadióguei iji gosi uéchade jnese. Iji jogadode udore uje úcodie catája gosi ga pojnánguenie déji ga gatódaóde déji to. 22Ore apósi uté jé catája ore ipesudi uté úcodie jnese ga ore chojmára iji jnumi. Óro ueque udore mu ore chichagúja jnumi ome parangué quedéjnanie. 23Ore pésu apósepiátigui to iji óro ga gare ore iji ti ujetiga ore chanírosi sudire aja bajo gajnaminie ore ajéode jnese uje bajo gajnaminie sudire déji úco gatajidábode jnese. Ore pésu ore apósabode sudore erásorone iji óro to: tijéra quedéjnane, bajodíe ore. 24Uje ore chuguhese ore ibiogode ero uté adode jnese, erásorone ore uje pipesucho udore iji óro jnese ga ore batigai chise 33 kílos nanique.
Bezaleel pésu gaseradéjnai to ome Dupade iguíjnai uté ajei jeta ore chãru inciénso iji gai
25Bezaleel pésu gaseradéjnai to ome Dupade iguíjnai uté ajei jeta ore chãru inciénso iji gai. Ga pésu iji pore péode uje i tu acácia. Ga chatingara métro aja umaningai jeta chise 45 centímetros ga jé chopóji pajei ga 45 centímetros upo rĩ. Enga 90 centímetros iji abubíe iji jnumi. Enga pésu ue gagájninie iji dapesudi uté ajidedie ga jé pésupúsu iji dapesudi tábla péode jeta catája. 26Ga jé u uje ore chimese gai ome óro jnese, jé aja uedie ore. Enga pésu pijnanai ome óro jeta cho uruchacháji. 27Enga ore chanire angoroinie aja uté ajidedie iji uruchachai údi. Gare iji uécha uñai ga garapóji ujoi uécha uñai. Ga ore na tábla peque gárode aja angoroinie jeta ore chijnóngaja quedéjnane. 28Ore ajugugode udore tábla peque pipesucho iji poria uje i tu acácia. Ga ore chimese gai ome óro jnese.
Bezaleel pésu aseque puyai to nanique rĩ, jé aja inciénso ore
29Bezaleel pésu aseque puyai to jeta ore chaníraja cuchade gai ga úringai puyaque jogadi tu. Ga pésapo cucha ai unéri to rĩ uje i tu inciénso ga jé chopise cucha ai unérone ipesusórone ore ipesutique. Enga ore aseradéjnai erã́sori u uté jeta chãru iji Dupade iguíjnai ajei jne.
Currently Selected:
Éxodo 37: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
