Éxodo 35
35
Dupade cho quique dire puyai adode ome Moisés
1Moisés chimáta israélgosode ore aja ñane jnese jeta catecã́ri ore. Ga chojninga: "Pangarádejna Dupa Eyúgojmai chisi ome darecujaidie quigode ome yu ujeta yatatame uaque. Ga u udojo ojningane cucha: 2A jé asayo uaquejode aja dire chojmarai iji tia jne mu iji dire garitia ga a ayáyo cucha pisagode iji jne ga a oyo dire puyáguiji uté jne ome yu. Enga iji dire puyai uté ga oyo yajnenguíji uté jne jeta ajnusináño yu iji uté uje uacoyo cucha pisagode uja iji diri uté. Ujeta gosi chisa cucha pisatíguiji uté jne ga ajéyopise gosi jne ga a amácho gosi aja jnumi jne. 3Jé ca uacáyipieraque déji pioque pipotatique iji uacaguíjnarique to iji dire puyai uté."
Moisés chatata Dupade uru quigode ome darasade ujeta ore tẽrája Dupade ome iguíjna ichárique úringárique pipesute
4Moisés chatata Dupade uru uñane quigode ome darasade ore ga chojninga: "Pangarádejnai ajequigode u udojo ujeta yẽcója ome iguíjna ichárique. 5Mu jeta gosi pota tẽrája Dupade ga chedupise dáyipie ome dẽrapáitique jeta chisi ome Dupade jne. Mu jeta gosi chiraja jeta chagutu rome Dupade, jé ca gosi chisi ome dẽratique cucha ome uté. Mu uaque uje que acájnacho uacajnetique aja Dupade jeta ẽchója Dupade ga amátayo uaquẽrapáidode aja ñane ga asíñome Dupade jne. Ga uaquẽrapáidode a u udojo jne:
Óro, pláta, bronce ore.
6Jé aja borapéode to uje ore uruchachade cãra rome ñane ga utata uneroque uñane, jé carataque uneroque uñane, jé basa carataguipise uñane. Ga borapéode udore pipesucho iji ore acai uje i tu líno.
Jé aja borapéode to uje pipesucho iji áyasa quedéjnane ojode, uje uacacáyo udore iji cucha caratai.
7Jé aja áyasa choquíode aode to. Jé aja cuchiso uñane aode to uje ueracho to. Enga a ajnáñopo ore ajugutígo petígo to jne rĩ iji poria uje i tu acácia.
8Enga aceite a u to jne uje ore ibiogode erã́sori u. Enga ajnáño cucha ai unérone to jne jeta pijaroi udire ome aseque puyai uje ore chimera aceite aja ga nóña ga puyaque aceite uté. Ga beyopoi cucha ai unérone uñane to jne rĩ ome inciénso uje a ore chãru udire iji daseradéjnai gai jne iji Dupade iguíjna puyai ajei.
9Enga ajnáño cucarané orerenie to jne uje ore íode u cornalína, jé aja cucarané orerenie uñáringui jeta ore chuga udire aja sacerdóteode ore eduguéjna cuchábi iguidedie uje iguidedie udire ore íode u pectoral, efod ore.
Moisés tibidi irajatade ujetiga ore pésu Dupade iguíjnai, gajnéone cucha
10Uaque uje uacarajáyopise cuchade úringane pipesucho ga abáchoi yu jeta apéso Dupade iguíjnai gajnéone udojo cucha jnese to jne. Yigaidi u gu jeta gusu irajatade uágome uacorade udore cucha jeta jé chopise Dupade ajegaidode cucha enochade jnese. A qué yatata Dupade iguíjnai isocade ome uaque jne, jé aja jogosórone cucha ujetiga uacuñeque chiraja cuchade udore uñeque quitique jne enga gosi doi ga chátaja ipesusórone udore ore to. 11Ga adode jé u udojo:
Dupade iguíjnapísi, jé aja gaminórone borapecho. Jé aja yuré guesímitódie uje porachóji cuchiso aode. Jé aja ojnaque ditajíode to.
Jé aja ore ajugugode pore pecho, jé aja ore ipesutígo pore pecho uñane to uje a ore chiramísara pore peque bajade udore pajei ujetiga ore catája ñane ome udore. Jé aja ore ajugugode pore petígo jeta yoco Dupade iguíjnai uté cutádedie iji jne, jé aja ore ajugugode udojo tábla pecho gajnéringui uje pipesudei iji bronce, pláta ore ga ore chijócha udore gatajidode jne jeta ore chanire tábla péode aja dajóchapídode udore.
12Jé aja Dupade uru pirosobádode pi cajo uté. Jé aja joride. Jé aja Dupade uruode pi cajo erásorone ore ajugugode pecho uje ore chiramísara pajei jeta ore chijnoque aja sañeque. Jé aja borapei uje suru Dupade iguíjna ajé pirosobádi yui.
13Jé aja mésaraque to, jé aja bajodíe jeta paníraja mésa uaté gai. Jé aja arureque puyade jeta paníraja mésa uaté gai ome Dupade. Jé aja tábla petígo to jeta paníraja mésa uaté jogotodie angoronei jne ga pujnúngaja quedéjnane jne.
14Jé aja ore ibiogode jogosóningo jeta papóso iji Dupade iguíjnai, jé aja ore ibioi erásorone cucha jnese to. Jé aja aseguipísi uje ore ibiogode erã́sori u.
15Jé aja ore aseradéjnarique jeta ore chãru cucha ai unérone iji gai uje i u inciénso. Ga a uté erásoningo cuse to jne uje pipesucho iji tábla péode jeta ore chijnoque daseradéjnai uté to. Jé aja inciénso jeta papose iji uté gai. Jé aja aseque puyai jne. Jé aja borapetique jeta chaco yoquibípidi gai jne.
16Jé aja uacaseradéjnarique uje a uacabocho uaquẽrapáidode cucha iji uté gai jne ome Dupade. Jé aja uacaseradéjnai tuté uniminónique cucha uje a pipesudíji bronce jne jeta ajéyo uaquetígo cucha aja udore gai iji ajé gatei. Jé aja uté erã́sore uñane cucha jnese uje a ore inguírajane u udore jne. Jé aja tábla petígo to jeta paníraja uté jogotodie angoronei jne ga pujnúngaja quedéjnane jne. Jé aja ore esãrapié, jé aja ore uchiejnane iji ejode. 17Jé upo borapéode to rĩ iji Dupade iguíjnai ejode jnese iji gai, jé aja ore ajugugode tábla pecho jeta ore cho cutadé iji ga ore pésu udore cutadé gatedie jeta ore na táblade aja dapesudé gatedie udire cutadé uje ore pésu iji bronce, jeoga pláta u. Jé aja borapéode iji ujuyaquei uté piagoi.
18Jé aja ojnaquéro cuchábedie, enuéjnane ore ome Dupade iguíjnapísi, ujuyaquéode ore iji gai.
19Jé aja Aarón iguidé puyérigui, jé aja ujnacarode iguidé puyérigui to, uje a jecucha ga udore ore chacája daguidé puyedie udire jne jeta ore pésu cuchade iji Dupade iguíjnai ajé puyai uté to."
Israélgosode ore tṍraji dajñarenie uje ore di deranone cucha údi ome Dupade iguíjnai
20Uje Moisés chejna udojo guesi uje cho quigome ore ga urasade israélgose ore chajníja daguíjnane jnese. 21Mu udore ore uje ore irasiguipise uru quigode ga ore quítequiguíji dagúchade jeta ore tẽrája Dupade ome. Enga jĩraque ore jno dẽrapáidode udore údi ome Moisés uje ore irasique yui jeta ore pésu Dupade iguíjna puyai adode ome, jé aja jogosórone cucha ore jnese, jé aja Dupade irógode iguidé puyedie to.
22Enga jnanione, chequedíe ore tṍraji dajñarenie jnese uje ore di deranone cucha údi. Que udore uñeque jnari ome re mu ore pota gu jeta ore doi Dupade uru quigode udore ga caniraque ore ome Dupade. Ga ore chijna dajnápeode uje pipesucho iji óro: ore jmanepiedie, ore angoronépiédie, jé aja cuchade udore uñane jnese. Enga ore cãra deranone dajnápecho udore ome Dupade uje pipesucho udore iji óro ujetiga Dupade cho dajnéngu ome daguíjnai úringai pipesute. 23Jé basa ga udore ore uje borapéode déji ore ga ore tẽrája Dupade to jnese ome borapéode udore. Ga ore chejna dajnéone borapeque aja Dupade uje ore uruchachade u utata uneroi, carataque uneroi, carataguipise, jé aja borapéode uñane to uje pipesucho iji ore acai uje i tu líno, jé aja borapéode to uje pipesucho iji áyasa quedéjnane ojode. Uje cucha ao diríjiode déji ore ga ore tẽrame Dupade to: áyasa choquíode aode uje ore chacáji cucha caratai, jé aja cuchisode aode uñane to uje ueracho to. 24Ore tẽra guebéode ome Dupade to ga ore gueranone u guebéode uje pláta, bronce u to. Ga uñane ore di ore ajugugode tábla peque údi uje pore péode udore gãrapié u poria uje i tu acácia ujetiga pipesute Dupade iguíjnai gajnéone cucha ome táblade udore. 25Chequedíe uje ore chiraja cuchade úringane poracho jĩraque ore di dorade údi to ga ore uruchachade cãra rome ñane ga utata uneroque uñane, jé basa carataque uneroque uñane, jé basa carataguipísi u uñane, jé aja borapéode uñane to uje pipesute iji ore acai uje i tu líno. 26Chequé oitedie udire uñanie ore chiraja to jeta ore chucare áyasa quedéjnanie ojode aja ñane, ga ore pésu borapéode iji udire to ome Dupade iguíjnai jeta gajnecho. 27Enga ore angaránone, ore asutedie ore di cucarané orerenie údi to uje cucaranenie udire i u cornalína, jé aja cucarané nanganatáguedie uñanie to. Enga ore chuse udire guio ujetiga ore chugája Dupade iroguipítique iguidedie jne uje udire ore íode u pectoral, efod ore. 28Enga ore angaránone udore di aceite údi to ome ore ibiogode, jé aja cucha ai unérone to ujetiga ore pésu inciénso ome udore jeta ore chipotame udore iji Dupade iguíjna ajé puyai, jé aja cucha ai unérone uñane to ujetiga ore chimere aceite iji cucha ai unérone udore údode jetiga ore pésu aseque puyai iji udore to.
29Ga uásejna israélgotodie chequei nanique uje ore chejna raja deranone cucha ome Dupade iguíjnai úringárique pipesute nanique. Ga uásejnapo jnanione ore to rĩ uje ore pota ore chisi ome cuchade to ome Dupade. Enga que uñeque iroque ore aja, mu jé ore guẽrapaite cuchade ome Dangarádejnai Dupa Eyúgojma nanique.
Dupade ajegaidi u Bezaleel nanique ujetiga pésu iguíjnai jogonórone cucha
30Moisés chojningame darasade ore: "Cajichope yocurásai Bezaleel to uje Dupade ajegaite uté iji ujode judágoso ore ujade jeta pésu cuchade iji iguíjnai ajei. Yojningai u Úri ujnacari uté. Uje jnani bajai Hur ájnape uté to.
31Dupade chĩreta uté údode ome dajopié. Jecute uté irajatigai jiépisi ome cuchade. Uje cáma pésupúsu cuchárique, mu chetingare cuchade bajaque, mu uerate ipesudode cucha. 32Ga Dupade guẽrate pirajatigai ome uté to ujetiga pésu cuchade iji plátadie, órodie, jé aja bronce to. 33Jé aja jeta chijnire cucarané nanganatáguedie udire to, jé aja jeta pésu cucarané nanganatáguedie charitígo iji óro, pláta ore. Jé aja jeta pésu cuchade iji táblade ga uerate adugode, ga ueradei iráradie iji adugode gáyode.
34Dupade chisiapome pirajatigai ome uté rĩ ujeta chacate dojode ayoré ore ome darajatigade udore to. Mu yocurasade uñai déji to uje dángosi u uté ga irajataque to ga a cháta cuchade aja Bezaleel uté jne uje i tu Aholiab. Ga uté dai u jnani bajai Ahisamac. 35Dupade chisi ome pirajatigade ome jnani gárode udore jnese ga ore chirajapise guebéode úringáringo pijnirácho, jé aja borapéode jeta ore pésu irárarigui iji gáyode uje borapéode udore ore uruchachade cãra rome ñane ga utata uneroque uñane, jé carataque uneroque uñane, jé basa carataguipise uñane, jé borapéode uñane pipesucho iji ore acai uje i tu líno. Ga ore chirajápo to rĩ jeta ore chijnire táblade ga ore pésu edodie ga ueradipíso ore ipesudode cucha iji táblade.
Currently Selected:
Éxodo 35: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
