Éxodo 27
27
Dupade cho quique ore aseradéjnarique ujetiga ore pésu uté iji poria péode ga ore chimesa gai jnese ome bronce
1Apéso uacaseradéjnarique iji pore péode uje i tu acácia ga eruéode tiroque jne ga a jé chopise ñane jne. Ga a uté dosadode jnese a jé abubíeraque chojmára iji jnumi jne jeta chise 2 métros, ga 25 centímetros jnese iji gai. Jé basa ga umaningai iji jnumi a chise 1 métro, ga 25 centímetros jne iji abubíe. 2Enga iji uté ajidedie jnese ga uacapesudérigui ue jé ca chimoque ajidedie jnese jne, ga a jé uacapesudei udire iji pore péode jne uje poria uaté i u acácia. Enga ameso uacaseradéjnai uté gai jnese ome bronce jne jeta bronce ueque uté gai jnese. 3Enga apéso uacaseradéjnai uté erásorone cucha to jne jeta bronce jé u jnese to. Enga a apéso puchucurui gajnetique to jne jeta óraño urui ome uté. Enga apéso corángarangátigo to jne jeta óraño pioi gueguerade, urui ore ome udore. Jé aja bajátigui jeta anícho uaquegode cucha arione aja udire ajéode, jé aja iyoi, íode ore. Jé aja uacapesutígo ojnaque ditajío jeta aguhéso uaqueguedie cucha péode iji, jé aja pioi gueguerade erásorone to jeta boyo údi aja uacapesute uñéngo cucha. 4Amecho ojnatígo iji ñane údode jne enga apéso angoronéringui iji uacamerajane ojnaque ajidedie jnese, ga gagájni jne iji ajidedie. Enga a uacamerajane udore ojnaque garani u bronce jne, jé aja angoroinie. 5Enga a aníraja uacamerajane udore ojnaque aja uacaseradéjnai tuté ajei ujetiga chujépise raja gatócoro. 6Apéso tábla petígo to ome uacaseradéjnai uté jeta aráñoja angoroinie jne, ga uacapesudode tábla peque gãrapié u poria uje uacojnichome acácia. Enga ameso gai ome bronce jne. 7Ga a uacapesudode udore quítequiguíji angoroinie uéchade jnese jne jeta jecucha ajnóchoja quedéjnane. 8Uacapesudi uacaseradéjnai iji acácia péode ga guesája gatócoro jne uje e yo quigome ua ica iji cucarani casica.
Dupade cho quique ujetiga ore pésu pujuyaquériguiji iguíjna puyai ejode
9Apésopo yiguíjna puyai uté ejode jne enga guesája jne. Apéso uacajuyaquériguiji yiguíjna puyai uté ejode jne jeta chaparu gai ga cho to-to-to gai. Ga apéso uacajuyaquériguiji borapéode jne uje pipesucho iji ore acai uje i tu líno. Iji umusoi garani yui enga borapéode udore a ore chise 45 métros jne.
10Ga apésopo tábla petígo rĩ jeta chejna yu, ga apéso udore cutáderigui iji bronce jne ga a aráño táblade dugudie aja cutádedie udire garane jne. Ga tábla péode udore ca uñeque chimoque ojnaque ditajíode, angoroinie ore jne uje pipesucho udore iji pláta. Ga adíyo borapéode udore aja táblade udore ome ojnaque ditajíode ore iji umusoi yui. 11Jé adi u iji casaque garani yui to jeta anícho tábla petígo aja to jeta chejna yu enga aráño udore aja uacapesudedie cutádei garane uje uacapéso iji bronce, ga a catáji gatéode bisideque jne. Ga borapéode umaningai a chisápo 45 métros to jne rĩ iji casaque garani yui uté. A adíyo borapei aja táblade udore jne ome ojnaque ditajíode, angoroinie ore uje pipesucho ore iji pláta. 12Iji guedé cacadi yui iji ujuyaquei uté pajei enga a aníchopo borapetígo aja to jne rĩ ga a chise 22 métros y médio jne iji guedé cacadi yui. Ga a adíyo borapei tuté aja tábla péode jne, enga uacapesutígo tábla peque udore a chejna yijmanáyone jne ga cutádedie chejnapo yijmanáyone to jne rĩ. 13Ga adi jé u iji guedé garani yui to ga a 22 métros y médio borapéode iji guedé garani yui to jne. 14A piagoi déji uacajuyaquei uté iji guedé garani yui ga piagoi dosadi jogonóri borapeque a chise 7 métros jne. A tábla péode gadioque iji dosadi uté, enga udore cutáderigui a gadiógapo to jne rĩ. 15Adi jé upo rĩ iji piagoi dosate uñai, ga borapeque uñai iji uté a chise 7 métros to, jé aja tábla péode, cutádedie ore, a gadiógapo ore rĩ iji dosate uñai uté to. 16Iji piagópisi ga aróyo borapetígo jne iji ore acai uje i tu líno jeta umaningai chise 9 métros jne, ga uacorai uté uruchachade cãra rome ñane jne ga utata uneroque uñai, jé carataque uneroque uñai, ga carataguipise jõrai. Enga aróyo irárarigui jne ome uacacarigode udore iji borapei údode ga cho daparagádu jne. Ga adíyoja tábla peque gagájnione udore jne, uje ore cutádedie cuse jnese jne iji údode. 17Iji yiguíjna puyai uté gai jogosórone tábla pecho a ojnaque ditajírigo ca chimoque eruéode jnese jne uje uacapesuchóji pláta. Ga jé cho uacapesudedie angoronei to, a pipesudei ore iji pláta to ga a jé ca chimoque udore eruéode to. Jé basa cutádedie ga a uacapesudei udire iji bronce jnese jne. 18Iji yiguíjna puyai uté ejode ga a ujuyaquei tuté umaningai chise 45 métros jne iji umaningane jnese. Jé basa ga iji gatajidode jnese a chise 22 métros y médio iji gatajidode jnese. Jé basa ga iji umaningai iji abubíe a chise 2 métros, 25 centímetros jne aja abubíe. Eduyo borapei uje garani u ore acai líno jnese jne iji yiguíjnai uté gai. Jé basa ga cutádedie a bronce u jnese jne iji gai jnese jne. 19Apésopo ojnaque umáningo to jne rĩ iji bronce jeta ajóyo udore aja jnumone iji tábla péode dosadode jnese iji gai. Jé aja ojnaque umáningo uñane rĩ ome yiguíjnapisi a pipesucho udore iji bronce to. Jé aja bajodíe, jeta apéso iji bronce to, jé aja yiguíjna ajéode cucha uña jeta boyo cuchade uñane údi ome udore ga a jé bronce u jnese to jne.
Dupade chiroque ore aja aceite yui uje garani u poria adie uje poria uaté i tu olívo
20Aroque israélgosode aja aceite yui uje garani u poria adie uje poria uaté i tu olívo. Ga aníchoja uacabioi jne jeta jé jogate gatuaque. Ga a jecucha tagúji dirode jnese jne. 21Aarón, ujnacarode ore gajnei tu jne jeta ore pésu uacapósi aja quigode gatuaque iji yiguíjna puyai uté ajéode uñai uje i tu 'Dupade, Yutuãjóa Ñane Iji Te.' Ga a ore noñome dapósi uté iji Uacangarádejnai Dupa Eyúgojma yiquei jne uje tagúji dejai údode jnese gatuaque. Yojningai ajé uñai uté uje uacapósi déji uté ga jé unejángome yiguíjna ajé pirosobádi uje yuru iyiejnane jogadi u ga déji borapéode uécha uñai. Yuru iyiejnai u yiroquei udé ome israélgosode uaque, jé aja uacape disi ejórigo to iji uacaquigáningo jeta Aarón, ape disi ejode ore pésu uacapósi aja quigode ujetiga uacapósi uté jé jogate yiquei iji dejade jnese."
Currently Selected:
Éxodo 27: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
