Éxodo 21

Dupade cho quique israélgosode ome pisoca ueratígo jeta gosi gaite dojórique israélgose atique oréraque

1Dupade qué jno daruode údi ome Moisés ga chósi tome:

"A yarecujate iyiejnanie u udiji jne jeta ango udiji quigode ome barasade ore. Ga ojningame ore: 'Dupade chósi tome uaque: 2Ujeta uaque gosi gaite uacojórique hebréogose ujnacánique oréraque, enga doi baroquéode bisideque jé aja siqueré garitidie, ga chise garitia ga jé u uje uacajuéchopome doi te rĩ jeta jno ga chicáji dajesúrique iji sañeque. Enga jé ca uté cho doré ome uaque gotique, mu a ajuécho doi ome bisideque jne. 3Ujeta gusu uté ica, ga jno ga jé gusuapo rĩ. Mu jeta acotẽrachuque ica enga acotéraque jé nóna aja ajesúrique to. 4Mu jeta uté gosi irósõri guerané acoté ome ica ga acoté, abode ore chácariji irósõri uté, mu uté jno ga gusu aja ajesúrique. 5-6Mu jeta gosi chojningame darósõri: 'Yijnorapise yabode, ore daté gu ga que toc jeta yi ga gusu yu. Ga a yi baroquéode aja yeruénique jne.' Ga uté irósõri chajnai uruode ga chojninga: 'Dupade e tangári baru quigode to.' Ga jogadi tu uje uté irósõri chijna aja guiguíjna piagoi ga chisa ojnaquéro ga chajója angoroné quiyíguinai ¡tac! Ga imoi tu gu uje uté irósõri e isaguipise daroi tuté ga que qué chapo darósõri iroquérique rĩ.

7Mu ujeta uaque gosi doi oré tome dataque ga uaté jé jogate dagaisṍri uté gari jé aja deruénique, ga jé ca cho uacasocai ome jnacarode to jne, uje jecucha uacajuécho dode ome ore iji siqueré garitidie gatuaque. 8Mu ujetiga suaté gajnesṍri chetágosi ga chojninga: 'A ca yóji gari uje que désiji yajénique gu, enga que yipotasia úringamía yacoté.' Ga jé u ujetiga uté juéga jeta uaté dayé jeoga iguiosi uñeque chimate uté ome pláta casidica ga chatirési ore gai jne, ga chácarapóji dayé ore gari to rĩ. Mu que pujuegate gotique jeta purása quedéjnarique doi oré tome uaté. 9Mu ujetiga gapua gajnesṍri chisi ome dagaidé suaté ome dajnacari, ga nóña ga cho dacaríji uaté, ga e que qué chopo darogue iji gotique rĩ. 10Mu ujetiga gapua gaisónique jé chopise dacoté iji uaté ga chisapo dacoté uñáraque gaté rĩ, ga jé ca pota cha dacoté bajé uaté ugúchade ome, jé aja potígo. Ga jé ca acoté bajé uaté unerotiguérique cuse ome dabai tuté ga abai chijnóra gatuaque. 11Mu jeta gosi jé ca doi cucha gadiógode udojo quigode ome dacoté jne, ga goto jnome daquitique erãpe ¡bu! Jeta ca gosi chisi ome iguidéraque ome, jeoga potígo, jeoga jé ca gosi chisápo unétique jeta moji uaté gari enga quene jogadi upúsu jeta ore juéga doi ome uaté ga que cho doré gotique.

Dupade cho quique ujetiga ore tẽrame ayoré yusórone ome pitoringai to uje ore chujépise dojórigo ayoré diríca gu

12Ujetiga ájningarãque gosi ga chujé dojórique ayoré ga que charoriguíji dei tuté ayoré ga quigade gosi quene toi enga ujode ayoré chujé yusṍri casica to ga ore tẽrame pitoringai to. 13Mu ujeta ayorérique que chimo dojórique ayoré jeta chujé gosi, ga a yui ujo ayoré iguiosode chajna uté jeta jé basa ore chujé uté to. Mu a yipésu pidánique úringai pãreque jne ujeta uté chicáji ga que chúguiji ajei. Ga ojnichome gosi jne: 'Bo ga acáji ore idai uté uje que pujuegate gu jeta chuque ayorériguiji uté. Chamáñaje bei casé jé topísi gu, mu que ua u gotique uje bapota chui ome uté mu Dupade u diríca uje juegate pitoringai ome uté gu.'

14Mu ujeta ayorérique jé yuguipise dojórique ayoré ga jé ajnáño gosi ga ajéyo gosi to uje ájningaránguipíse ayoré uté gu ome dei uté dojo ayoré. Jeoga chayója ore aseradéjnarique uje ore guẽrapáidode cuchiso jogadi u ome yu jeta chajo raja uté, mu jé ejñúño uté isagode iji, ga boyo údi enga ajéyo uté. Bai jé u dájninga casé to uje chujé dojoi ayoré diríca.

15Ujetiga gosi chujé dayé, daté uñáraque jeta jé ca chimánaja jnumi marínga, jé arec ujeta ajéyo ga amachopise gosi aja jnumi.

16Ujetiga gosi toria dojórique ayoré ga uté gosi gajnenguipise pitoringai ome re jne. Jeoga tẽrame dojórique ayoré gaté, jeoga jé jogate gari mu jé uté gajneque pitoringai ome re to jne uje toria dojórique ayoré gu.

17Ujetiga gosi chacacãre dayé, daté uñáraque ga gosi jé gajneque pitoringai ome re to. Gosi uruode gajnarécho ome dayé ore gu.

18-19Mu ujeta gosi chujé dojórique ayoré ome dajmanegataidie, jeoga gosi chimitingare dojórique ayoré ome cucarané ga uté gosi jé cho daba dadode udore to. Chamáñaje yui uté gosi déji damochápi ga e que toque isagode cucha pisacho ome uté gu. Enga jé tiógara ujetiga yusṍri uté doi oré tome bisidode ome dei uté gosi, jé aja ujetiga chimate ome iplátadie iji dirode jnese jé aja ujetiga yui uté e chisapo cuchade rĩ. Enga a quene yusṍri uté cha chisi ome daplátadie ome dei uté gosi ujetiga uté e chisa dagutadé ga chugutána iji ore idai tuté údode. Enga quene yusṍri úringai máraque bijna ome uje yui uté gosi e digápo rĩ.

20Ujetiga gosi chinguíra pitígaja darótique, jeoga darógueraque enga a uté gosi cho daba dadode udore jne ome dáringárique pujuya uje chujépise daroi uté gu. 21Mu ujeta gosi iroi uté qué chapite aja dire uñeque ga que pujuya gosi irósõri uté. Chamáñaje uté gaite oré daroi uté ica gu.

22Ujeta jnaníringo ore chujé ñane mu chequé ujningaquéraque déji ore ejórique ga udore uñeque chujé uaté abi iquei ga abi carujnáji daté, mu chequé uaté que toi gotique, ga jnani uqué tibágui chequé uaté abai ujetiga cho acoté uaté abi oré uje carujnáji ga gose uté que. Ga abai nóna uté gosi aja eduguéjnane ga chutai ujoi jnani iplátadie iji ore iquénique ga chojninga: 'A amate yacoté ome udaji jne. Ga asi ome yojninganie udiji ome jne.' Ujetiga eduguéjnane jé chimesẽre uté utaidedie ga jé u uje uté ujoi tuté jnani chisi ome utaidedie ome jnese. 23Mu jeta chequé uaté abi chequésãre ga jé tiógara jeta pequesarãque jnani uté to uje chequé toi ga gose uté diríca. 24Mu jeta gosi chusaque dojórique ayoré edóraque ga asácho gosi edóraque to. Jé adi upome gosi jeta chimochẽre dojórique ayoré patarane ga amochẽ́cho gosi patarane udore to. Jeoga gosi chimochẽre dojórique ayoré jmainie ga amochẽ́cho gosi jmainie to. Jeoga gosi guídai ga jé beyoi gosi isocai ome gosi imocherãtique dojo ayoré ate. 25Jeoga gosi chãru dojórique ayoré ga beyoi gosi ga ãcho gosi ome pioi to. Jeta gosi chinguíra uágaja cuchárique ga adi jé u jeta anguíraño gosi aja gosi erásonique cucha to. Jeta gosi chujé dojórique ayoré ¡paque!, ga jé beyoi gosi isocai uté to ga ajéyo uté gosi ¡paque! to.

26Ujetiga barótique cuse ga bagaite oré uté ica jeta doi baroquéode, ujeta asaque uté edo, ga ajuéga doi ome ga jno ga a jé ca uté cho doré ome ua jne uje basaque edo gu. Jeoga barogué goto jeta asaque edo ga jé dóji ga jno ga jé ca chopo doré ome ua rĩ uje basaque edo gu. 27Jeoga amochẽre pãtarai marínga, ajuéga doi ome baroi tuté uje que ajuse guio gotique gu.

Dupade cho quique Moisés ome aquirájna sijnángone nanique

28Ujetiga aquirájna sijnátique chachẽre jnanírique, jeoga chequéraque, ga chinguíra daredie aja gosi ga chequésãre gosi, ga beyoi uté ga amitingácho ome cucaranenie ga amácho aja jnumi jne ga ajnangaráso aja uaquejode ga topísi. Ga jé ca acho aquirájnai uté arione udore. Mu jé ca ajocáso aquirájnai uté gachisṍri. Jé ca cho daba dachidi ome uaque. 29Mu ujetiga aquirájnai gachisṍri uté chiraja uje gachidi jecucha isoca mu que chósi ti iji, enga jogadi quene u uje a cho daba uté adode jne ome uaque ga a patĩ́ora dachidi uté aquirájna jne jeta ajéyo to gachisṍri. 30Mu jetiga aquirájnai gachisṍri pota chapite, ga cho dachidi aquirájna equesarãi tuqué oré enga aquirájnai equesarãi iguiosode ore chutai dajegaidedie iji aquirájnai gachisṍri uté iplátadie ga chisi ome ore ga que chuque.

31Parecujaidie udiji jé quicho jnese jeta diyoqui gosi jeoga diyequé goto, jeoga jnani gosi mu páyipiedie udire jé chojmára iji jnumi ome gosi. Jeta gosi gachidéraque chujé ore ujórique ayoré ga omi tu jeta chuque gosi to, jeoga iguiosode chutai gosi iplátarigui ga doi ga chisi ome ore utaidedie udire ome ore. 32Ujetiga aquirájna sijnai uté chinguíra daredie aja ayoréode uñeque irógueraque, jeoga iroque ga chequésãre ore, ga beyoi ga ajéyo aquirájnai uté to ga amitingácho údode ome cucaranenie enga ajnangarásoja uaquejode. Ga irósõri chutai aquirájnai gachisṍri ipláta guebéode uje chise 30 iji batigai. Yojningai pláta guebeque udire u uje pipesudei iji plátapise ga chojmarai oredie jiei.

33-34Ujetiga gosi que chicha joríderaque aja derutique, jeoga chijócha erutique mu que pésu joride ome enga ujórique ayoré gachidi aquirájna basája gosi erui tuté, jeoga burica quedéjna, ga jé tiógara jeta uté gosi cho dojórique ayoré gachidi oré ome gachisṍri. Jé basa uté gachidi a jé jogate uté gari uje chijócha derutique diríca.

35Ujeta aquirájna choquírigo chujé ñane ga jõrai chimate ayoréode uñai gachidi aja jnumi, ga gachisórone udore ore tẽra uecai ga ore chajuque oredie iji jnumi ome ñane. Ga adi jé upome toi uqué uje ore chajúguiji gatócoro ome ñane rĩ. 36Ujeta aquirájna sijnai gachisṍri chiraja dachidi uje sijnaque mu que cãra jogatique ga chequésãre ayoréode uñai gachidi ga doi dachite uecárique ga chisi ome ayorei uté uje gachidode uñai chequésãre gachidi gu. Ga jé cho oré iji uté. Mu aquirájna sijnai gachisṍri cho dajnéngu dachidi yui tuté dojo aquirájna.

Currently Selected:

Éxodo 21: Ayore

Highlight

Copy

Compare