Éxodo 20

Dupade acajnaqué obiréjnapísode u udojo enga acajnaquéode udojo ore chejna yijmanáyone

1Udojo quigade ga Dupade chatata daruode udore jnese aja Moisés ga chósi tome dajúdode darúo:

2"Bangureni Dupa Eyúgojma u yu uje yijnime ua iji Egípto nanique uje ore cho daróguiji ua nanique mu que ore chimate ua ome basagode ore iroquéo nanique.

3Jé ca angara banguretique dupa ome yu jeta ajuque yoquipajei.

4-5Jé ca apésu gaté jogonónique cucha oréraque, jeoga cucha jnutiminónique oréraque rĩ, jé aja tié cuchábedie jogonónique cucha oréraque. Ga jé ca acatecã́ri borade udore cucha oré, ga jé ca o yu iji. Enga jé ca achaga bagataidie aja jnumi iji borade udore ayoré gajnu iquei. Baraja uje gusu Dupa pangureni tu yu iji diri tudé ujeta o bangarádejna iji yu to, ga que borade udore ore u gotique. Dupa júrurubéi u yu ga yajnui tu jnani ocácachoquírique uje uté chajire dacoté yúode ga jĩraque tocãra dacoté uje chetaque adode, ga yocãra uaque to ome yadode uje uacoyo uacangurenone cucha iji cuchade uñane, enga que beyoi yuruode gotique. Ujeta jnanírique jé ca chise yunétique ga a uté gosi gajneque yujuyaquérique jne ome re, ga yujuyaquei chisa abode, ájnamone, ájnape disi ejórigo ore gaté rĩ. 6Mu uje gosode chijnóra yu ga ore doi yuru iyiejájnane udojo quigode jnese ga a yẽra yijnoraquei ome udore jne, ga jé chuságaja ore ape ejórigo ape ejo gatérigo uje yijnoraquei isaque ore gu. Ga yijnoraquei jé ca cho udore ore eruei jne, jé aja ore ape disi ejo gatérigo ore, jé aja ore eruépitique iji toniñeque.

7Be ga jé ca ajñieta bangarádejnai Dupapísi uyu yojningai udé yi, enga jé ca o berángu bisideque. Ga jé ca gosi chapídome yu jne gu ujeta gosi cho derángu yi udé bisideque.

8Jé ca báyipieraque jnoji dire puyai ujeta o bajñare iji uté. Baraja diri tuté gu uje yajneque, jeta edu asa yajegaidode, yuru quicho, iji uté.

9Asa cucha pisagode udore jnese iji dirode uñane jnese jé aja dire chojmaráitía. 10Iji dire garitia ga bangarádejnai Dupa uyu yajnei tu diri uté ome ua jne jeta ajnusina yu iji dire puyai uté. Jé ca apésu bajegaitique cucha pisaguíji dire puyai uté. Enga jé ca barótique, barógueraque chisapo dejórigo iji dire puyai uté to rĩ. Jé aja babode, babidie jeta jé ca ore chisa cucháriguiji dire puyai uté to. Ga jé ca asa cucha pisatique jeta anguíra bachidode aquirájna udore uñeque, jeoga bachitique cuchiso uñeque u. Jeta purása quedéjnarique déji bari iji dire puyai udé, ga jé ca chisa dejórigo iji dire puyai udé to. 11Uje bangarádejnai Dupa uyu yimate yipesudode cucha jnese nanique gu iji dire chojmaráitía; jé u gaté, jogonórone cucha jnese, jé aja bayaripi jnupe udé, jogonórone cucha iji erámi údode, jé aja tiedie, jogonórone cucha ponáyo. Ga yo yujñare to nanique iji dire garitia. Jecute Dupade uyu yo yajnenguíji dire garitia uté ga yo dire puyáguiji nanique.

12Angári bayé, baté ore uru quitígo ome ua gatuaque ga acota ore gatuaque to. Bagaidi u gu jeta bacuecaringuei umare iji uacangarádejnai Dupa Eyúgojma uyu yerani punire uje a yisi ome uaque jne.

13Jé ca apota ajépise bojórique ayoré.

14Ujeta e acotẽrachuque ua ga jé ca bajegáitedatépo pipotiguérique ome gapu quedéjnaraque rĩ. Jeoga e amanachugué ua ga jé ca apotapo jnacare quedéjnarique jne rĩ uje babai e cuse gu.

15Jé ca oria cucha quedéjnarique.

16Enga jé ca o barupatáringa. Enga jé ca aguhéta cuchárique bojórique ayoré gai uje que uté bai u gotique. Enga jé ca ajnimápo bacayai urúrique bisideque to rĩ.

17Enga jé ca bajegáitedaté bejominóri iguíjnai jeta jé ca aratáyime iguíjnasṍri. Jé chopome uté acoté rĩ jeta jé ca apota amóji uaté gari. Jé aja uté iróguedie, irógode ore jeta jé ca aratáyime iroquei ome udore ore, ga jé ca apota. Jé aja uté gachidode to, jé ca bajegáitedaté udojo ome ua, jeoga aquirájna u, jeoga burica quedéjna u. Uje que bajneque cuchade udojo gotique gu, enga jé ca apota cucha quedéjnane uje cucha quedéjna udojo ga que bajneque uñeque gotique."

Uje Dupade catecã́ri Moisés iji cucarani ójo uje i tu Sinaí enga israélgosode todópisa udore iji cucarani ójo nanique

18Israélgosode udore ore chududipise guéode uruode iji cucarani uté nanique uje tṍraji ójo. Ga ore chudúdapo trompétadie agoyé ibisóguedie to rĩ uje udire tṍraji cucarani tuté ójo to. Ga ore pañaji udore jnese, jé aja ajnorane, jé upo pioque úyujna cuchábedie rĩ uje tṍraji cucarani uté ójo. Ga ore todópisa udore iji cucarani ójo ga ore tõrorája dayaridode ome dasadodéringajnái. 19Ga israélgosode chojningame Moisés nanique:

–Angome Dupade ga yijíongome iji te uje e yipáñangoji bojninga casodé udore ga que qué potigayaquérique déji yocajénique. Ga aquĩ́ra Dupade ome darai ga cha dara ome uyoque uje que picasite uté uru quitique uje pagutéjoragose uruode quigode ome uyoque gu. Ja seca yocuñéngo toi ¡paque! iji uté dosadode udojo jne. Ueradi upúsu ome yoque jnese jetiga gusu Dupade catecãraite ua ga bajnerame uté uru quigode ome yoque, ga yicoi ga angoninguite guesaque yógome bajúdode Dupade uru quicho udore iji babijnani.–

20Ga Moisés chajnai ore uruode ga chojninga:

–Jé ca arosóñiñome Dupade uté iji uaquedominone mu angachopísi uruode. Uje Dupade di gu ujetiga chetingare uaque ujetiga angoninguite guesaque uágome uruode. Chiraja gu ujetiga ayorérique chimo úringai pirosobate enga jogadi u uje uté gosi tangári enga que pésu ate gajnarétigo ome.–

21Uje qué ore cháguena Moisés icapídi uéchai jnese ga Moisés chorupo cucarani uqué rĩ, ga quítequiguíji gue abuja utatájna iji cucarani ójopise uje Dupade déji gue abuja utatájna uaté ajei nanique gu iji te.

Dupade cho quique israélgosode ome daseradéjnaringo jeta pipesuchome ore gueranone cuchiso yúode uje a ore tẽrája udore ome uté jne

22Dupade chojningame Moisés gaté:

"Angopome israélgosode ore jne rĩ yuru iyiejájnane udojo to jne rĩ ga ósi tome ore: 'Israélgosode uaque á, e uacamóñopise yu uje yicatecã́ri uaque iji de ga yarani u gatajnoquei uje yingo yu aja uaque iji de. 23Ga jé ca apéso ayorérique oréraque jne iji óro, pláta ore, ga jé ca oyo yu iji uacoratique ayoré oré jne. Enga jé ca acatecãchoi uté jne ome uacajegaitígo cucha. 24Mu yojningame uaque jeta apéso uacaseradéjnarique ome yu iji jnumi jne ga abocho uacachidode uñéngo iji uacaseradéjnai uté ome yu jne: áyasadie uñáringui, jeoga aquirájnanie uñáringui u. Uacagaidi a u gu ujetiga yĩro uacasijnaringuéone ga yitojmárangopo iji jnumi to rĩ ome ñane. Ga abocho uacachidode uñane iji uacaseradéjnai uté ujetiga pajesereringai dépoji uágome ñane. A yingo uacapesutígo uacaseradéjna jogatígo aja uaque jne aja uacajesúode erámio, enga a yáta yu aja uaque jne uje uaquẽcho uaquẽrapáidode ome yu, ga a caniranguipise yu ome uaque jne gu uje uacoyo cuchadatei iji yi gu uje uaquẽcho uacachidode udore ome yu iji udore, udore. 25Mu ujeta apota apésu baseradéjnarique ome yu iji cucaranenie jne, mu jé ca ajé udire eruéode ujetiga apésupúsu ore soringane. Ujeta apésupúsurásu baseradéjnai uté soringane, enga a ca yise baseradéjnai uté unétique uje que yojningai u gu jeta ajé soringane aja jnumi. 26Mu puyágome yu to jeta apésu yajnetique baseradéjna to jeta idája iji jnumi ga ore uchiejnane cuse aja yaseradéjnai uté yui. Ja seca orúrasu ore uchiejnane aja gaté, ga bachaqui choqui guesi ome udore iji údi.'"

Currently Selected:

Éxodo 20: Ayore

Highlight

Copy

Compare