Éxodo 15

Moisés pésu daradé nanique uje chicota Dupade ga iradé achachagúgode u udojo nanique

1Uje Moisés, ore cho paráguiji jnumi iji Dupade iquei ga ore chijñecárome Dupade ga ore iradé achachagúgode u udojo uje chojninga:

"Qué yijñecare ga yedoi u Pangarádejnai Dupade úringai Dupa cuchape gajneri. Uje uté chingo dáringai pujnuéngaisõripíse aja egíptogosi casodé ore, ga yitijagopísa uté átedatéode ome egíptogosode udore ore. Ga yedotigade u ome ore uje Dupade chojne yodi egíptogosi casodé ore gai uje ore choru buricade diríca mu ¡yodi yore ore gai diríca ga chejnápise ore jnese!

2Yijñecade udojo gajnesṍri u Pangarádejnai Dupade uje guẽrate petotiguei ome yu, ga yiquetasṍri jé upo uté rĩ ome yujnuéngaisórone cucha.

Uje yangureni Dupa upúsu uté ga gajnéone u yicotaquéode ome re gatuaque. Uje yai angureni u uté to nanique ga jé tiógara jeta yicota uté to ome úringai cuchadaté.

3Pangarádejnai uté jnuéngai ayoré jõcaratáguebéode ome dáringai ayoré jõcaratac.

Enga pujnuéngaisṍri tuté i jé u Dupa Eyúgojmai.

4Pangarádejnai uté jé u uje chejna Faraón irógode soldate dipeséo ore diríca, ga chejnapo ore gachidode guebéquedatéo jnese rĩ iji yote quedéjna cuchábi ajei.

Uerate Faraón irógode udore diríca ome dojodie dacasutei ore jnese, mu que ore bisitique pijoque gotique iji Pangarádejnai tuté jmainie diríca, ga ore toji Yote Quedéjna Carataque cuchábi uté to.

5Ga ore gajnúone u cucarãte cuchátigo diríca ga jĩraque ore basája yodi údi, enga jé ore cachodi upúsu yodi urui iji te, uje yodi chacópise ore gai ¡pac!

6Pangarádejná, jé bajuyaquei íringome yocumajósõri casodé ore diríca uje cutejmai betotiguejna tṍraji bãrachua diríca ga que chajire re ome yocumajósõri casodé, ga pésu ore cutejmane pépita uje bejna ore diríca.

7Uje que ajiripise ua ome udore ore diríca uje ore jos eti ore cho betotiguei to, ga banguíra ore aja yodi údi diríca

ga que qué ore doi gatériguiji yodi urui to uje bajopise udore ore aja yote quedéjnai ujna diríca gu. Ga bajo ore aja ¡tac!

Uje bo bájningame udore ore ga cho jetiga baruode cho pioque ocarate cucháberigui

ga tagu udore ore gáyode ga ore cho jnacaraque papótigo iji bajmainie.

8Uje babúchu yote quedéjna cuchábi ome bajñarique chojmarai ¡pu!, ga uté jĩraque chajuque re iji baquei ga cho jese cuchábode aja gaté.

Ga yodi uje tṍraji jnumi ga bapésu uté ga bajuru garanone ¡pa! ¡pa! iji yote quedéjna cuchábi jochai.

9Ga yocumajosórone ore eduguéjna cuchábi chojninga jóroga diríca: 'A yajna udore jne aja tié cuchabé uéchai jne enga yajnose ore ome ore ugúchade jne.

Jeta e yajnose ore, ga a yisi yurasade ore iji jne ga jogadi jé u jne jeta yoquirasique yoque.

Mu jeta e yajnose ore jne ome ore ugúchade ga quene yijnime yiquesé cuchábi jne jeta yanguñeri udore ore údode jnese ome yãrachua, uje yetotiguei gãrapié u gu.'

10Mu uje babúchapo yote quedéjna cuchábi diríca rĩ, ga yote quedéjna cuchábi uté chinire yocumajosórone ore gai ¡tiroque! nanique,

ga que qué pimópo udore ore gotique rĩ. Ga cho jetiga cucha iménujna ore iji yodi jmainie nanique

ga jĩraque yodi chijna ore aja jnumi, ga que uñeque chapídome ua gotique diríca.

11Pangarádejnai Dupá, que dupa uñeque cuse jeta jé cunguésõri cutejmane bátedatéo udore to ome yoque.

Que uñeque úringai puyaque cho báringai Dupa puyaque pãrésõre gotique to iji erámone udojo. Uje cuchade jnese ore dacódejnai tu ua jnese.

Uje cucha pitijabácho bapesudode, ga que pisaque pejóringome udore gotique.

Ga jé batiógara báringai pedoque ome yoque iji yocachachagúgode udojo ome ua.

12Uje bango báringai ujopíerãque cuchape aja egíptogosode diríca ga jnumi dajúguiji ore údode ga cho jeta jnumi uté iniraque ore gáyode diríca.

13Mu bẽra bajnoraquei ome barasade uyoque diríca ga yapíco gu ua diríca.

Ga cutejmai betotigué u diríca to uje borei barasade uyóguiji baguíjna pirosobádi yui iji bojningai tuté punire uerate.

14Ujeta punirone iji erámone ore chudute yocujnoméone jne ga ore agutedie cho túcu, túguiji cutejmane yocujnomé jmainie jne,

ga ore tãrara iji udore uje ore chiraja gu uje bagúsiji yocari gatuaque.

Ga a cuchiyíode upúsu filistéogosode ore jne, uje a ore chipatigase raja quedéjnane jne ome dasadodéringane.

15Jé chopome punire uñai unirisórone ore asutedie rĩ uje ore uniri uté i u Edom. A yocujnoméone na ore aja jnumone jne, ga chácari ore údode ga que qué ore chise datijínaquérique jne rĩ ome dapotigátique pocaninga yúrique.

Jé adi ome Moab unirisórone ore asutedie rĩ uje a ore cho ta-ta-ta iji dasadodéringane jmainie jne, ga a jé ca ore tiógarapo erã́tique rĩ.

Ga jé chopome Canaán unirisórone uñane jnese jne, uje a ore chudute yocujnomérique jne enga a ore cha dajéode ome pocaningane yúode.

16Urénga, Pangarádejná, jé be ga apésu udore ore ga ore dosóñime yoque dirome, ga jé dóji ga ore cho ta-ta-ta ome darosobádode udore pujnoméo yúode.

Ujeta ajé bajmainie aja cananéogosode ore gai dirome, ga cho cucha iménurique iji udore ore gai dirome, ga que uñeque chicai ti,

enga a barasade uyoque yaroco yógaja udore ore idai dirome, mu jeta jé ca ore chunina yógaja déchai.

Ga uyoque u gu uje bapesute yocúringane ayoré jeta o bajnéngu yoque aja yocajesúrigo erámio.

17Urénga, Pangarádejná, be ga orei yóguiji bojninga tuaté ajã́ro ueradé gotóraque uje bagúsiji uaté ga pirosobade ajã́ro tuaté uje que picasidé.

Uje jé bataidé uaté ome ua nanique jeta o bedáji uaté to.

Ga ajã́ro tuaté chopise baguíjna pipesute pirosobádi nanique uje bapesudé uaté ome bajmainie diríca gu.

18Pangarádejná, ¡jé be ga jé ca báringa pasuté eruénique erãpe ponai cuse jne, jeta picotaque ua iji erãpe ponai údode jnese jne!"

Moisés, Aarón ore nero María chicota Dupade to, ga iradé achachagúgode u udojo nanique

19Uje Faraón, ore choru guebéquedatéode aja yote quedéjna cuchábi ajei nanique ga Dupade pésu jeta yodi chaco ore gai, ga ore orutode guebéquedatéo, buricade ore, ore toji jnese. Mu jé basa Israel ájnape disi ejode ore chaquesu tié cuchabé uaté ga chopise jnupe cajnónique ome ore enga ore chise uéchai jnese.

20-21Uje Aarón ore nero cuse ga i u María nanique. Dupade irogue uaté nanique. Ga María uaté chisasi degátique uje iábi su panderéta ga doi dojodie chequei iquei ga jé chijñecare ga achachagúgode chósi te:

"Beyoi to ga a yijñecacome Pangarádejnai Dupade uté uje que atique ajámome yoque diríca, ga jé picotaguipise uté ome yoque jne. ¿Ama, jé ca amóño to a? uje cucha pitijabácho ome yoque uje Dupade tṍra buricade aja yodi ga jé chátaja ore charipiésorone aja tié cuchabé uaté ga ore cho chac, cháguiji urui."

Ga María uaté ujodie chequei jé ore doi isocai to enga ore cho jobeyei gaitodie aja dajesúode uje ore chujé degábidie panderéta aja dajesúode ¡yígui, yígui!

Ore chise yodi iji pajmitique uje i u Mára, mu que toc jeta ore chóji uje yodi uté pepúja

22Uje Moisés chiroque darasade aja doi iji Yote Quedéjna Caratai uté ejode, ga chiroque ore aja garáijna cuchábi nanique uje i u Shur. Uje Moisés e urasade ore chejna dire gadiógode iji garáijnai tuté ajei mu cáma chise yote potique gotique. 23Mu uje e ore chise pajmitique uje i u Mára nanique ga yodi déji, mu que toc jeta ore chóji uje yodi uté pepúja. Ga Mára uté jé ore cho dajminíji gu, uje yodi uté i u Yote Pepui.

24Ga jé u uje Israel ájnape disi ejode ore dosója Moisés ga ore chojninga: "E yicajnocóji. ¿Ga jé yójigo pírique jne a?" 25Ga jé u uje Moisés chutṍri Dupade jeta chátaja ore. Enga Dupade chingo jupi quedéjnai aja Moisés ga Moisés chisa ga tṍraja yodi uté ajei ga jé u uje nóña ga yote unere.

Uje Israel ájnape disi ejode qué ore déji pajmini uté nanique ga Dupade chingo dáyipiedie aja ore jeta ore pésu ojningane cucha aja quigode jnese. 26Enga chetingarape ore iji uté nanique jeta ore tangári, jeoga ca ore tangári. Enga catecã́ri ore iji uté ga chojningame ore: "Ujeta angachopísi yu jne enga beyopísi yuru quigode jnese jne ome cuchade, ga a jé ca amóño yujuyaquéringome uaque jne. Uacarajáyo egíptogosode uje pejóporinguéi ipesungóño ore ica, ga ore gajnéone u yujuyaquéode ica. Mu uaque, ga a ca amóño yujuyaqué casodica gajnúrique to jne ome uaque jeta beyoi yáyipiedie quigode jnese iji uacajesúrigo. Jé uyu u yu gu, jecute que yujuéga uágome dequejnarétique ga ijõre uaque gu uyu."

27Ga ore jnopo gaté rĩ ga ore chise pajmite uñai uje i tu Elim, ga yodi déji uté uje garanone gare iji yirídai uje tṍraja jnumi ga jiépisi yodi iji uté. Ga ijnaque uague déji uté ejode to ga 70 u ijnane udore. Ga ore chácariji yodi uté ejoi ga ore chicha darengúi iji yodi edógai.

Currently Selected:

Éxodo 15: Ayore

Highlight

Copy

Compare