Éxodo 10
10
Dupade chiroque chuguyúgudie aja egíptogosode uniri nanique
1Pangarádejnai Dupade chojningame Moisés:
–Bo ga abáchoi Faraón ore gajneri, ga acatecãchoi ore jne. Ga jé ca oyo uacáyugu ore úringane ducusuréchoquío jne uje uacarajáyo uje yẽrate ore úringane ducusuréo ome ore. Yigaidi jé u ome ore jeta yo yujuñame ore ga ore chimo yúringai ujopíerãque cuchape ome yátedatéode. 2Yigaidi jé upo rĩ jeta Israel ujnacare disi ejode uhuaque atatayo yadode udojo ome uacatígo, uacájnatigo ga a angoño udojo aja ore jne uje a ojnicho jne: 'Dupade cho damitiguei ome egíptogosode nanique ga que imitiguérique chojmára ome ore nanique, uje ore jmongarája urasade Israel ujnacare disi ejo uyoque nanique. Uje chiese ore sué Dupade gai nanique ome yoque uje ore chãraque doi ome yóguiji daniri nanique.' Yigaidi upo rĩ ujetiga arajayopise uje Pangarádejna Dupa Eyúgojmai jé upúsu yu uje yipésu cuchade udore jnese.–
3Ga Dupade chirógapo Moisés, Aarón ore aja eduguéjna cuchábi Faraón yui te rĩ ga chojninga:
–Oyósi tome Faraón jne: 'Pangarádejnai, hebréogosode yocangureni Dupade, uruode u udojo ome ua: ¿E cho rique jeta arosóñime yiquei to enga ajuéga doi ome yurasade Israel ujnacare disi ejo ga ore jno ga ore catecã́ri yu iji sañeque?
4Ujetiga jé ca ajuéga doi ome ore jne enga a yiroque chuguyúgudie aja uacaniri tudé dirome jeta tagu uacacade cucha iji uacaniri údode jnese. 5Ga a udire chĩreta erámi enga que pimópo jnutíguiji udire jmainie jne rĩ. A chuguyúgudie tagu uacacaque amirone udore ga chejnápise jne ga chatéta jogadi. Ga tagupo poridie to jne rĩ iji garáyode údode jnese. 6Enga udire chĩreta baguíjna cuchábi ajéode jnese, jé aja baróquegatéode ore iguíjnane to, jé aja uacojode egíptogose ore iguíjnane ajéode jnese. Ga que uacáquirigo nanique ore chimo cucha dacátedatéode udore nanique, jé aja dirode udojo to, uje chuguyúgu cuchábedie udire chĩreta uacaniri tudé údode ¡pac!'–
Uje Moisés cha catecã́ri Faraón ga chaparu dabai ga jé u uje doi guesi ga jno. 7Uje Moisés uté jnoji ore gari ga Faraón iróquegatéode chojninga:
–¿Ga cho pírique yúrigo jeta jnani uté chabu dapesudedie yocujurei iji de? Eduguéjna cuchábi á, be ga ajuéga doi ome ore ga ore catecã́ri dangureni Dupa gotique iji sañeque. Ise mu cáma adójnanga cuchade to jõ iji yocuniri tudé uje que qué cucha ujñapetátique dépoji yocuniri Egípto udé údode rĩ.–
8Ga Faraón tibidápoi Moisés, uyai Aarón rĩ enga chojninga:
–Boyo jne enga acatecãchoi uacangureni Dupade gotique jne iji sañeque. Mu atataba uacajorane gosode ome yu.–
9Moisés chojningame eduguéjnai:
–Cachi a jé u yoque jnese jne arĩa: yocabode, yocacotedie ore, jé aja yocachidode cuchiso ore jnese. Uje a yipéco yocajñamite cuchátique ome Pangarádejnai Dupade iji te jne jeta yẽcója ome yocachidedie aquirájna uñáringui.–
10Ga Faraón chojninga:
–¿Ama ajos eti jé ca yirajárase uacajequigode uje uacaraño uáguiji jeta acatecãchoi uacangureni Dupa gotique iji sañeque? Uacagaidi tu jeta ajíoñome yoque iji te. Jecute uacapótayo jeta ejnáño uágaja doi tiji yoquidai tudé. ¿Jé cho ringome bajéode jeta yiroque uágaja dórique jne enga uacabode ore nóna uágaja uacajesúode? ¿Jé chorási ringome uacangureni Dupa gotique to a, jeta chijnime uáguiji yari ga jno ga nónarása uágaja dajei? Uje que toque uáguiji yari ome uté to jeta chijna uáguiji yari. 11Jeta apótayo doi ga boyo ga jnani ueque uaque jeta qué acatecãchoi Dupade iji sañeque uje yajegaidi u ome uaque gu jeta jnani ueque uaque.–
Faraón e catecã́ri darodisórone soldácho enga chojningame ore:
–Bo Moisés, ore údi aja guesi, ga arocho ore aja doi.–
12Ga Dupade chojningame Moisés:
–Ãrai bajmanáyone iji gaté ga chuguyúgudie yore udore ore gai. Ga a chejna udore acade amirone jne uje qué déji ica uje que ebe cuchabé casidica chujé to ica.–
13Moisés chanire dajmainie aja gaté iji egíptogosode uniri ga Pangarádejnai Dupade jĩraque chiroque eme cuchábi aja egíptogosode uniri tuté údode jnese. Eme cuchábi tṍraji guedé garani ome ore, ga chubúchu ore uniri uté iji jnumi iji diri tuté údode, jé aja dejai údode to. Uje e dire ga ore chajire dejode mu chuguyúgudie udire e diji ore uje eme cuchábi tuté chijnóngaja ore uniri. 14Udire chĩreta ore uniri údode. Que pimo chuguyúgu uase tuaté ome ore dáquirigo jnani bajaque ore nanique. Ga a ca pimópo udire jne rĩ iji erã́tique jeta cho udire ome dáringanie dipesei. 15Uje udire chĩreta erámi ga que pimópo jnutíguiji udire jmainie rĩ. Udire socárome ore acade amiri casodica uje que ebe casodica chujé to ica, jé aja poria a amirenie ore, ga chejnápise ¡jaripe! Iji ore uniri Egípto údode ga poti gatéode ome chuguyúgudie udire uje chejna acarane, ga que qué erãp ojóningai dépoji ore uniri tuté rĩ. 16Ga Faraón jĩraque tibidi Moisés, Aarón ore jeta catecãrámi ore. Enga chojningame ore:
–Yate gajnaréngone u gu ome uacangarádejnai Dupade gotique, jé aja uaque to. 17Mu qué yutṍri uaque jeta acadíchobi yate gajnaréngone ome uaque jne, ga a jé ca yipésapo uacajuréraque jne rĩ iji udojo quigade. Ga acatecãchoi uacangarádejnai Dupade gajneri ga chijócãre chuguyúgu cuchábedie udire iji yocuniri tudé uje udire a chṹra chaguhé cuchátigo aja yoque jne ga yitogoi jne ome yoquiyaguhéningo uje chejna yocacade cucha jnese iji yocuniri ga poridie poti gatéode ome udire rĩ.–
18Uje Moisés ore doi guesi iji Faraón iguíjna cuchábi ajei ga catecã́ri Dupade ome ore. 19Ga Dupade chécãrapo emi garani to rĩ ga tṍraji guedé cacadi ome ore ga chijócãre chuguyúgu casidé iji ore uniri uje Egípto u ga tṍra chuguyúgu dipesé casidé aja yote quedéjnai uje i tu Yote Quedéjna Caratai. Que chuguyúgu chojmarátaque désiji Egípto to nanique uje emi chubúchu udire aja dajesui gu. 20Mu Dupade pésapo Faraón rĩ ga jĩraque cusu rome ore gaté rĩ ga que juéga doi ome Israel ujnacare disi ejode ore gotique rĩ.
Dupade chiroque ijnangunu cuchabé aja egíptogosode ore uniri nanique
21Dupade chojningápome Moisés rĩ:
–Orei bajmainie iji gaté ga a yiroque ijnangunu cucháberágaja egíptogosode jne ga basája ore gai iji ore uniri ga a judúguejnapise ore idáyode iji jnumi to rĩ, ga jé ca ore chimópo dírecaringuérique jne rĩ.–
22Ga Moisés chasingare dajmainie aja gaté ga jé u uje ijnangunua basája ore gai ga judúguejnapise ore ejode ga ore chisa erámi ¡sácasác! uje que ore chimópo dírecaringuéringome raque. 23Uje dirode gadioque ome ijnangunu basuguei aja ore uniri tuté ga que qué ore chimópo ñane edóraque jne rĩ, enga que qué ore chisṍrapo rĩ, uje ore charengu ijnangunua uje que ore chimo darípieraque iji dojórique ayoré yúrique nanique. Mu iji Israel ujnacare disi ejode ore idai Gosén ga dírecaringuéi jé jogate udore idai údode, uje que Dupade juéga ijnangunua ome ore gotique. 24Ga Faraón chojningame Moisés:
–A jé uerate jne jeta boyo ga acatecãchoi uacangarádejnai Dupade gotique iji sañeque, enga uacabode nóna uaque to. Mu que yujuéga doi ome uacachidedie áyasai, aquirájna udire gotique. Ga ajíoñome udire jne iji yoquidai tudé.–
25Moisés chojninga:
–A gajnareque jne jeta ca ajuéga doi ome yocachidedie uje a yujégorase uñáringui jne gu ome Dupade ga yipéco yocaseradéjnarique ome jeta yicatecãcoi Dupade iji uté. A jé ajuégame yoque to jne iji dínique. 26A jé ca yijíongosi ome yocachidedie uñátaque jne uje yoquigaidi u gu jeta yẽcója Dupade ome udire uñáringui iji yocuágueraque jogatique iji sañeque. Ujeta yico to ga quene yucuegoi yoquẽrapáidedie iji udire ujade ome Dupade.–
27Mu Dupade pésu ga Faraón jĩraque cusu rome Moisés ore, ga chãrácapo doi ome ore rĩ. 28Faraón chojningame Moisés:
–Bo ga acáji uaiti iji yijogadi tudé. Ga ajuse beo ome yu jne rĩ jeta apota abagapoi yu rĩ. Ujeta agúsapoi yiquei iji de jne rĩ enga a quene atoi jne.–
29Ga Moisés chajnai uruode ga chojninga:
–¡Ueratigai a u jõ! A jé ca yijopo ua iji de jne rĩ jeta yicatecãrápoi ua jne rĩ.–
Currently Selected:
Éxodo 10: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
