Éxodo 1
1
Egíptogosode ore dosóñime Israel ujnacare disi ejode ore betigai nanique
1A qué yatata jnani bajade uñéngo ore íode jne uje ore nóna dai jnani bajaque Jacob nanique ga ore garani tu daniri Canaán nanique enga ore qui tu punire uñai uje i tu Egípto. Ga udore ore jogasúode íjnongaja daqui tuté punire to nanique. 2Enga udore ore íode u udojo nanique: Rubén u uñai, jé basa ga Simeón u uñai, ga Leví u to. Judá jé upo to rĩ. 3Ísacar jé u to, jé aja Zabulón, Benjamín ore. 4Jé aja Dan, jé upo to Neftalí rĩ, jé aja Gad, Aser ore to rĩ. 5Jnani bajai Jacob, ujnacarode, ájnamone 70 u ore jnese nanique. Mu Jacob ujnacarode uñeque jé jogate ore uniri Egípto iji dai, ore iquei nanique, enga uté i tu José nanique.
6E mu José, uyade ore toji ore uniri uté nanique jnese, jé aja ore dai, jé aja Egípto guiyasõre bajade ore jnese. 7Mu jé isoca uje israélgotodie ore abode cuse, cuse. Ga, ga jiei ore iji puniri tuté nanique uje ore abode quérã, quérã nanique gu. Ga, ga ore chipédugu puniri Egípto tuté ome dapié uje jiépisi ore abode.
8Egíptogosode ore eduguéjna bajai chirajapise José nanique ga chijnóra José urasade ore to uje que suseque ore urásai José gu. Mu uje siquerérigui e orocóji José úringai toque quigade nanique ga egíptogosode ore eduguéjna ichárique cuse to uje a jé ca áyipieraque dépoji José casica gotique rĩ, ga jé u uje áyipie déji petétigai ome urasade ore. 9Enga ore eduguéjnai tuté catecã́ri darasapísode ore nanique ga chósi tome ore: "Cajicho to gojni purása quedéjnane udore iji yocujade to uje ore dáqui Israel jno udore ore údi aja yocuniri tudé nanique. Udore ore betigai suépise yoquibai iji yocuniri tudé. ¡Jé soca ore socárome yoque jne á!" 10Ga jé u uje ore eduguéjnai chojninga:
"¿Jé yoco ringome jne a jeta yaquírango chequedíe udire ore ome dabode? Mu jeta ca ore cha dabode jne enga a jé ore chajnera dádi jne, enga a chise dínique jeta yocumajósoningo ore socárome yoque jne ga Israel ape disi ejode udore ore cháta raja yocumajósoningo ore ome yoque, ga ore jnoji yocujade jne enga ore chicáji toniñeque ga a ca yoquirótique cusapo jne rĩ."
11Jé u uje eduguéjnai, jorane eduguéjna ore, ore pésu dáyipiedie ome ñane ujetiga ore chõre daroquéode eruéode ome Israel ujnacare disi ejode ore. Ga eduguéjna cuchábi uje ore chĩ́care Faraón aja uté nanique, uté catecã́ri dojode eduguéjna nanique ga chojningame ore: "Ueradi tu ome yu jeta Israel ujnacare disi ejode ore pésu guidai gáreode jne. Ga ore chiro jonáquepié cucháberigui iji udore jne ome yocacade cucha yúode. Ga a yĩ́caco Pitón aja guidáyode udore uñai, jé basa ga a yĩ́caco Ramsés aja uñai jne." Ga jé u uje ore chirógapo darasapísode aja Israel ujnacare disi ejode ore ujade nanique rĩ jeta ore timíninga ore aja quedéjnane iji ore isagode cucha pisacho udore. Ga jé u uje ore chimate Faraón, ore áyipiedie udire quigode ga ore pésu guidai gáreode udore, jé aja jonáquepié cuchábedie rĩ. 12Mu jé ate uje Israel ujnacare disi ejode ore abode cuse, cuse iji egíptogosode ore josipiedie jmainie nanique. Ga jé u uje egíptogosode dosóñime Israel ujnacare disi ejode ore betigai.
13Uje ore dosóñime ore nanique ga ore chiroque ore aja cucha pisagode nanique mu ore chaquesu ore údode aja uje que ore chimo pajegátigárigo ome ore nanique. Ga ducañerájma Israel ujnacare disi ejode ore iji egíptogosode ore jmainie nanique. 14E que Israel ujnacare disi ejo que ore chimópo putajnoquérique ome raque nanique iji egíptogosode ore iroquéode jmainie. Chamáñaje ore pésu adóbedie nanique gu iji deréjnane, jé aja dachabei uje ore chiro adóbedie aja ñane ga ore oidi tu dachabei ome nanique. Que gusu udojo mu ore iroqué uñane cuse to uje ore gachidedie aquirájna u jé aja áyasadie, jeoga ore chajire ore acade cucha yúode to nanique. Jecute Israel ujnacare disi ejode ore cho caru iji udore ore iroquéode jmainie nanique uje que ore chajire re ome cutejmane daroquéo ome ore nanique. 15Enga chise diri uje egíptogosode ore asuté tibidi chequé gáredie nanique uje udire ore irodé chequé icamasuguedie nanique. Uje gusu ore irodedie u Israel ujnacare disi ejode acotedie iji ore ica basuguedie nanique. Enga chequé gáredie udire ore íode u Sífra, Fúa ore nanique.
16Ga catecã́ri ore ga chósi tome ore:
–Ajichopise disi basutígo jne ga asayo diyequedíe iji ore jne, jé basa ajéyo diyoquírigo jeta ore basíji datedie.–
17Chequedíe udire cachi ore agutedie cho túcutúc ome eduguéjnai uruode udore, uje ore chiraja gu uje ore dosóñime Dupade yui ujeta ore chujé diyoqui basugode udore ore. Jecute que ore doi eduguéjnai uru quigode. Ore juéga jeta disiode jé dóji ga ore chapite to. 18Mu eduguéjnai chudúdapo pujnomei to rĩ uje disi diyoqui basugode ore eca ga tibidápoi chequé gare casidé ore rĩ ga catecã́ri ore ga chósi tome ore:
–¿Jé gotique gu a uje uacajuécho pucuecaringuei ome disi diyoqui basugode ore uje que yujuégame uaque diríca mu?–
19Chequedíe udire uña chajnai eduguéjnai uruode ga chojninga:
–Cachi que egíptogotodie cho chequedíe udire uje uajádei ore ome daca basuguedie ga que pirodé ore iji ore ica basuguéraque ome yoque ga que yimóngo ore ape basugode jeta diyoquío jeoga diyequei. Jecute que yicoi báyipiedie quigode ome ore.–
20-21Iji udojo quigade ga jé Israel ujnacare disi ejode jé ore chajnera dádi ome dapetígajnai, ome dáringane pirosobácho rĩ. Chequé gáredie udire ga Dupade chimesẽripise ore isocade to nanique ga juéga abechui ome chequedíe udire ore to ga uásejna ore abode to nanique. 22Ga udojo quigade nanique ga eduguéjna cuchábi Faraón chojningame darasade ore jnese nanique iji ore uniri údode: "Beyoi ga ecãcho Israel ujnacare disi ejode ore ape basutígo aja tié uaté jeta diyoquío basutígo. Mu jeta diyequei ore ica basuguedie ga jé dóji ore datedie gari jne."
Currently Selected:
Éxodo 1: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
