Héchos 26

Páblo chatata dadode ome eduguéjnai Agrípa

1Enga eduguéjnai Agrípa chojningame Páblo:

–Atata bojñáringo ome yoque.–

Enga Páblo chãrai dajmanai iji ore enga doi enga narare dabai. Enga chojninga:

2–U arĩ́e, eduguéjnai Agrípa. Yacaranguipise ome ua uje bapota ujetiga angári yojñáringo ome yetesórone judío ore aguhétajade cucha yibai. 3Omi tu ome yu uje e baraja judíode uyoque yoquisocade. Enga barajápo rĩ uje judíode uyoque jecucha ga yibotáco ñane. Jecute yingome ua ujetiga angarami yu enga ca acho angári yu.

Páblo adode u udojo uje cáma changureta Jesús to

4Judíode ore chiraja jnese yadode iji yúringamí disape iji yuniri, enga ore chirajápo yadode iji Jerusalén rĩ. 5Ore chiraja to rĩ uje fariséo yu uje qué jnacare yu nanique enga a ore chingorása ua uje jé ũré yu ome udore ujetiga ore pota. Bamo uje fariséode ore upúsu uje ore chejna rángaja judíode adode enga ore dopísi quigode. 6Ore chijna yu aja udé gu ujetiga pajirique yadode aja quigode. Uje ore gueteguipísi u iji yu uje yangureta Dupade uruode uje chatata uje togode ecápo rĩ. Uje Dupade jé urúo udojo nanique ome yocayode jnani bajácho. 7Israélgosode uyoque uje yocuáguedie gare iji yirídai yiroco jnese ujetiga Dupade uruode udore tocade enga togode ecápo rĩ. Jecute que ore cha tangári Dupade enga ore doi iroquéode iji dirode, dejade ore jnese. Eduguéjna Agrípa, jé yadi upúsu ore adi to uje yangureta pucuecaringué ichárique yui to. Mu jé ore chetaque cuchade udojo ome yu. Enga ore chaguhéta cuchade udojo yibai. 8¿Ja jec ũré yu a, uje uacanguretáyo to uje Dupade a chiqueta togode jne?–

Páblo chingo uje cho damajo Jesús anguretasórone nanique

9Jodeti omone u to nanique ujetiga yipésu cucha gajnarétigo ome Jesús, nazarétgosi, anguretasórone to. 10Jecute yo yumajo ore nanique iji Jerusalén. Enga yijna sacerdóteode eduguéjnane urusarane ome ore enga yujuru Jesús anguretasórone gáyode. Que gusu udore mu uje ore chujé ore enga que yetaque go. 11Jecucha yo yujuñame ore to. Uje yajéode u gu ujetiga ore cha changureta Jesús. Yo yujuñame ore iji judíode aquiningaméone guiguíjna sinagóga jnese. Enga yajnápo ore aja purása quedéjnane idáyode to rĩ uje yagúpusu yejode.

Páblo chatatapo rĩ uje changureta Jesús

(Héchos 9:1-19; 22:6-16)

12Sacerdóteode eduguéjnane ore chutṍri yu aja Damásco to ica, enga yijnoque ore urusarane aja uté. Uje yigaidi u gu ujetiga yisa Jesús anguretasórone iji uté. 13Eduguéjnai Agrípa, uje e yugúsi dajei iji Damásco yui, enga guedé doi gatócoro, enga dírecaringué cuchábi chiqueta raja yoque, yijorane ore uyoque. Enga sué guedé gai. 14Enga yicórangoja jnumi jnese. Enga yudute darade enga doi judíode yocuruode hebréo. Enga chojninga: "Sáulo á, Sáulo á. ¿Jé gotique gu a uje bo bamajo yu? Mu bamajópisi u ua. Uje bajnui u aquirájnai uje chuchiéjna uburuco asõre uje gachisṍri ipesudé ome." 15Yichajnai darade udojo enga yojninga: "¿Jé ua gosi te a?" Enga yocangarádejnai Jesús chojningame yu: "Jesús u uyu, bamajoi. 16Mu ãriji enga ayague. Chamáñaje yiqueta yu aja ua gu ujetiga be yiroquéode jne. Mu que gusu deréjnai udé uje yiqueta yu aja ua, mu a yiquetápo yu aja ua rĩ iji dirode uñéngo. Enga bajnei tu ujetiga atatame erámi bamone cucha jnese uje yingome ua. 17Ujetiga diga be yiroquéode enga judíode, purása quedéjnane a ore pota chutígome ua jne. Mu a yãraque ua ome ore. Mu a yiroque ua aja purása quedéjnane jne. 18Yiroque ua aja ore gu ujetiga acate ore ome yadode to. Chamáñaje ore gajnúone u ayoré edoparigode. Enga cho ujetiga ore déji ijnangununie ajéode. Diga ore changureta bacajnaquéode ome yu enga cho ujetiga achẽre ore edodie gáyode enga quene díreca ore ejode. Que yipota gu ujetiga Satanás jno ore údi uje sué ore gai, mu yipota ujetiga ore changureta yu enga ore doi Dupade adode to. Yipota to ujetiga yĩro ore isijnaringuéone ujetiga Dupade cháta ore aja danoningañane to jne ome dẽratígo cucha omío."

Angoninguite guesaque Páblo ome Jesús

19Eduguéjnai Agrípa, bamo uje que angoronéparíque yu ome gaté unirísõri Jesús uje chiqueta raja yu. 20Mu jĩrique yacate damáscogosode bajaque ujetiga ore chécãre dáyipie quigode, dadode ore enga ore chajni Dupade gai, enga ore doi date omone ujetiga pijógome ore jnese uje e ore chécãre dadode. Udojo quigade enga yiji yacajnaquéode udore údi aja Jerusalén, jé aja Judéa údode jnese, jé aja purása quedéjnane ore rĩ. 21Yibade u udojo ome judíode ore uje ore chisa yu iji Dupade iguíjna cuchábi enga ore chujérase yu. 22Mu que yiya go uje yacate ayoréode ore ome Dupade adode. Chamáñaje yátajasṍri u Dupade gu. Jecute yacate ayoré atade enga yacadápo ayoré jmatágode ore rĩ. Enga yacajnaquéode que cãra re gotique ome Dupade uruode atatasórone, Moisés ore urusarane quigode uje ore chatata jnese uje cucha dacadode udore a tocade jne. 23Chamáñaje udore ore chatata jnese uje judíode yoquijnati Crísto gajnei tu ujetiga chejnáreque re enga toi ome yoquisijnaringuéone. Enga a uté u to jne ujetiga chijñate yurasade judío ore gáyode, jé aja purása quedéjnane ore gáyode rĩ. Gaidi u gu ujetiga ore chise dáringane piquetaque jnese.–

Páblo ajéode u ujetiga Agrípa changureta Jesús to

24Uje Páblo urúo udojo uje narare dabai enga Fésto chinguíra dabijnani aja enga chojninga:

–Ũruso ua, Páblo á. Jiei bajirigode iji darujna aode, enga udore u uje ore ipesute bãrusoringuei.–

25Mu Páblo chajnai ga chojninga:

–Que ũruso yu go, eduguéjna cuchábi Fésto á. Jec ũré yu ome yojningane udore jnese. 26Eduguéjnai Agrípa uté u uje chirajapise cuchade udojo quigode. Jecute que yagutu yu ome yojñane iji gari. Ise ga jec ũré yu uje eduguéjnai Agrípa chiraja udore uje que pipoguiécho Jesús adode gotique nanique. 27Eduguéjnai Agrípa, ¿ja e angureta Dupade uruode atatasórone ore ojningane cucha to a? A e angureta arĩ́e.–

28Eduguéjnai Agrípa chojninga:

–A bajéode u ujetiga jĩrique yangureta Jesús ome bacajnaquéode uje garósi bacajnaquéode múñi.–

29Páblo chojninga:

–Garósi yacajnaquéode mu a jiérasi marínga, yajéode u ome Dupade ujetiga arate yu aja yanguretarétigade ome Jesús. Cho ujetiga gusu ua, mu yojningane jé u udore ore jnese to uje ore tangári yu iji de. Mu aracho yu aja yadode marínga, ca pigarique uaque.–

30Uje Páblo chejna daruode udore guesi ga jé u uje eduguéjnai Agrípa chague, jé aja Berenice, eduguéjnai Fésto ore. Enga ore garíjogonórone ore chague jnese to. 31Enga ore chicai quedéjnane ome Páblo ujetiga ore catecã́ri ñane ome cucha dacadode udore. Enga ore chojningame ñane:

–Jnani tuté que bade cuchadatéo gotique ujetiga yisíngome pitoringai ome. Que tiógara to ujetiga pujurúgai rĩ.–

32Eduguéjnai Agrípa chojningame Fésto:

–A yirangorásome iji de gajneri, mu chamáñaje pota jeta rómagosode yoqueduguéjna cuchábi emperador chajire adode aja quigode.–

Currently Selected:

Héchos 26: Ayore

Highlight

Copy

Compare