2 Samuel 4
4
Ore chise Is-boset iji imoi ga ore chaquesu uté etabi uje ore toria úringai chuque nanique
1Uje Saúl ujnacari Is-boset chudute to uje chuque soldádode eduguéjnai Abner iji David ore idai Hebrón ga jé u uje todópisa David yui. Ga israélgosode ore todo jnese iji uté. 2-3Saúl ujnacari Is-boset iroguipísode cuse nanique ga ajegaite ore nanique iji ore jorane ujade, uje oriechoqui udore ore jnese nanique. Benjamíngose udore ore to ga beerótgosi Rimón ujnacare udore ore to. Ga Is-boset iroguipísode udore ore íode u udojo nanique: Baana, Recab ore. Ga beerótgosode uñane chayome desórone nanique ga ore cho dedáji ore idai Gitaim nanique, mu uje ore catecã́ri udore ore ome idánique írique ga ore chojninga: "Yoquidaipísi i tu Beerot, ga benjamíngose yoque to."
4Ga iji udojo nanique ga Saúl ujnacari Jonatán casica abi qué eca to uje i tu Mefi-boset. Uje jezreélgosode di pujnomei údi iji Jonatán iguíjnai uje e filistéogosode chujé Jonatán, dayé Saúl ore, ga Jonatán jogasúode chayome pujnomei uté. Ga Mefi-boset guejnanie siquerei e chejna yijmanai uje ore chujé dayé nanique. Ga ore chayo ga Mefi-boset daté irogué chijna uté aja dagajñua, mu uté basíji doito jmainie ga nóña ga sebeque.
5Enga chise diri nanique uje Rimón ujnacarode udore uje ore íode u Recab, Baana ore, ga ore pota chui ome deduguéjna Is-boset. Ga ore chise uté iguíjnai iji guedé gatócoro, mu qué déji damoi uje jũrua erámi gu. 6-7Enga Recab, Baana ore chacája Is-boset iguijnai ajei, uje chiese ore gaidi tu jeta ore doi trígo garósiode. Uje Is-boset uté doi siésta enga que chunina uje ore chacája iguíjnai ajei. Ga ore chise uté mochápi jogadi enga ore chichagu uté ica ¡paru! ome daqueséode, ga ore chaquesu uté etabi uje ore toria úringai chuque. Uje ore chaquesu gatoi ga jé u uje ore jno údi ga ore chajuque garáijnai uje i tu Arabá, ga jé ore diguiji dejai údode jeta ore chise Hebrón to iji dejai. 8Uje ore diji David ore idai Hebrón uté, ga ore chojningame David:
–Yoqueduguéjná, ¡bamajósõri casica Is-boset gatoi de daque jã! Uje bamajósõri casica Saúl ujnacare uté. Uje uté dai pota chibéro bacuecaringuei ica iji erámi tudé. Mu Pangarádejnai Dupade edugádode u yógome jeta cho jnutáguiji yoque ome bamajósõri uté, dai casica ore jnese.–
9,10,11Ga David chojningame udore ore:
–Uacojode jnacare uñai di Saúl, ujnacari Jonatán ore ujnomei údi iji yu ica, uje filistéogosode ore chujé ore ica, ga uté júdi pujnomé chajni uté gai ica ga yujé uté ica iji ore idai Siclag. Uje jos eti yirasique ojñane quigode to ica. Enga jétapũré uaque ga a yujé uaque jne uje uacajéyo jnani uje que bárique cucha cuse, mu uje uté qué morásiji daguíjnapisi ajei. Jecute a yo uacajocaningai uté oré jne ome uacáringáringo chucho to jne. Enga a jé ca agúsopoji erámi tudé to jne rĩ. Uje Dupade jecucha chátaja yu iji cuchade jmainie ga que uaque u gotique jeta yedugáta uágome yajnéone petétiga. Ga yátajasṍri uté Dupade tangári yuru quigode ome uaque que, ga que toc jeta jé ca yujé uaque.–
12Ga David chutṍri dasoldádode ga ore chujé udore ore. Ga ore chaquesu ore jmanegataidie, ore guídogorodíe, ga ore chigaru ore aja gatéode iji ore erui ejoi uje yodi déji, ga uté déji ore idai Hebrón ejoi. Ga ore jno Is-boset gatoi údi aja Abner ode ga ore chijóchame Is-boset gatoi iji uté to iji ore idai Hebrón uté ejoi.
Currently Selected:
2 Samuel 4: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
