2 Samuel 23
23
David uru erueminórone u udojo
1David uru erueminórone u udojo ga chósi te:
"David uyu. Ga Isaí ape yu.
Ga Dupade ipesute yu aja gaté ujetiga ujnomerãque yu to.
Dupa Pujnuéngaisṍre u uje ipesute yúringai eduguéjna ome israélgosode ore, ga jnani bajai Jacob angureni Dupade uté ajegaite yu iji yujode israélgose ore ujade.
Ga israélgosode ore chojningame yu: 'ayoré deyaque ijñeca unéri u uje cho cucha pajmaránone.'
Ga angachobi yuruode udojo quigode jne:
2"Pangarádejnai Dupade Ujopié u uje ipesute yuruode iji yibijnani.
Uté Ujopié chácariji yarei gatócoro.
3Israélgosode ore angureni Dupade catecã́ri yu.
Israélgosode ore gãrésõri chósi tome yu:
'Eduguéjna cuchábejnai a chajiripise darasade ore yúode gatuaque, enga a jé ca cho dajuñame jnanírique bisideque jne.
Enga uté a jecucha pésu Dupade ajegaidode jne.
4Enga uté a jé idírecaringuéi chopise guédo diríngoro.
Uté a jé chopise guedé úringai tocachuque uje que gue icagórique déji edo, ga ueradé guedé edo uaté uje chicho dejode.
Chopo guedé ojo pajnotáguedie uje chicho jnumi ga ugarabia sué ga quérã iji guei quigade.'
5Jecute Dupade chisi ome daru iyiejájnane ome yu ica ome yape disi ejórigo.
Ga e purusãraque uté uruode udore quigode jnese, ga e que pĩrochópo rĩ iji deréjna pitade jnese, ga que potigayaquérique déji uruode udore úringáringo tocachucho.
Ga uté chisi ome yúringai pujnuéngaisṍre ome yu ga yujnuépise yumajosórone ore gáyode jnese.
Enga uté jecucha chiraja yáyipie quigode ga dopísi udire quigode.
6-7Jé basa ayoré ate gajnaréngone ga Dupade a tṍra ore aja pioi uje udore jé ore gajnúone u ojnapúode gu.
Ga ojnapúode u uje que toc jetiga jnanírique charome dajmainie ga tṍraja pioi, mu ore chisa dajorángarangóne ga ore chĩrase ojnane údi, enga ore tṍra ore aja dapósejnai ¡júruru!"
Jiei David iroque dicaséode uje ore nóna David aja quedéjnane nanique
8David iroque dicaséode jiei ore nanique uje ore chirajapise pocaningane isocade, ga ore íode u udojo:
Gadioque dicasepísode nanique ga udore ore eduguéjnai u Joseb-basebet ga tacmóngose uté nanique. Ga uté yugode jnani chise 800 ome dasõre iji ore jocaninga chojmarai.
9Dicasepísode udore uje gadioque ore nanique udore jõrai i tu Eleazar ga ahohítagosi Dódo ujnacare uté. Ga uté nóna David aja pocaningai nanique. Ga ore doi filistéogosode iji ore idai Pasdamim ga ore chujé ore iji uté. Uje filistéogosode ore chose urasade israélgose ga ore chayo, mu que Eleazar chayome ore to. 10Ga chose raja jnumi iji ore iquei. Uje uté chichagu filistéogosode iji dejode ome daquesei nanique ga jmanecai íjnoque uje chejna ore aja jnumi, ga quesei uajádiji jmanai uje chidotápusu gu. Iji diri tuté ga Pangarádejnai Dupade chatapísaja Eleazar uté ga yugode jiépisiji filistéogosode. Ga quene jõráiso ore diapo rĩ jeta ore chimáta Eleazar yugode ugúcha uási.
11-12Enga Joseb-basebet, Eleazar udore ore jõrai u Sáma uje ararítagosi Age ujnacare uté. Ga jé uté isoca to uje jorane israélgosode uñane chayome filistéogosode mu Sáma doi ore acade cugué jogadi uje i tu Léhi uje filistéogosode ore déji uté nanique, ga chame filistéogosode iji uté. Enga gusu uté mu jé chejna filistéogosode ore iji dejode. Ga Pangarádejnai Dupade tẽra uté úringai pujnuéngaisṍre ome to.
13Uje eduguéjna David qué chayome Saúl nanique ga chacose re iji cucarã́tedó iji ore idai Adulam tiógarei. Enga e israélgosode ore na dacade cucha iji dirode udore nanique. Enga 30 u David jorane uje dicasepise ore ome pocaningane. Ga dirode udore u nanique uje gadióguiji udore ore, ore tibágui David. Ga filistéogosode ore déji dapáringaméi iji turéjnai ajei uje turéjnai i tu Refaim, ga dimane ore ome dajocaningárique yui. 14-15Enga filistéogosode ore chicha dáringáringo pirosobácho aja ore idai Belén ga que toc jeta israélgotique qué chicapóji uté rĩ uje ore todo filistéogosode gu. David qué déji dacoyapídode udore ga chojninga: "¡Yipésupú ga uñeque chisi yu iji yodi uté, jõ! uje déji yidai casica Belén gabi ejoi. Uje yote uneripise uté."
16-17David iroque gadioque dicaséode udore ore chudute David uruode ga jé u uje ore jno enga ore doi yodi iji filistéogosode ore ejoi ga ore toria ga ore jno dadui údi ome David jeta chóji. Mu que David chóji ore udui gotique, uje chojninga: "Yodi uté a yojne jne ga Pangarádejnai Dupade cho dajnéngu jne. Ujetiga pijote ga chopísiráse jeta pijote jnacare dicase gadiógode udore ore iyode jnese to. Uje cuchadaté ore ipesudode udore ome yu. Uje ore chosõre yu ga que ore dosóñime jõcaratade udore ore iji ejoi. Uje ore áyipie dépisi yu, ga ore chiraja uje jõcaratade a ore chujérase ore jeta ore chimo ore, mu que ore dosóñime ore uje ore doi yodi ome yu." Jecute David tẽra yote orerãi uté ome Pangarádejnai Dupade gaté.
18David irógode uje dicasepise ore ga 30 u ore nanique ga ore asutépise u David nero Sárvia ujnacari Abisai. Ga Joab desaque uté. Dicasepise Abisai uté to ga yugode 300 iji filistéogosode ome dasõre to iji ore jocaninga chojmarai. Ga David irógode uñane chicotapise dasuté Abisai uté nanique ome icasitigai. 19Ujnomerãque Abisai uté ome icasitigai, mu que cho David iroque gadioque bajade ore gotique uje ujnomeránguipíse ore nanique.
20Benaía ujnomerãque to. Ga jnani bajai Joiada ujnacare uté ga ore idai u Cabseel nanique. Ga Benaía uté yuque moábgosi Ariel ujnacare gárode nanique. Ebe quedéjnanie base nanique ga chaco erámi gai ga Benaía chajire erui ajei, mu chimo caraté iji erui ajei ga basája gai iji erui ajei ga chujé iji uté, ga caraté jé cachója erui uté ajei. Ga que cucha tejnuringai ome Benaía uté gotique uje tejnupise mu jé chujé caraté iji tejnuringai jmainie. 21Benaía chujé egíptogosi to nanique enga ayoré cuchape uté. Ga egíptogosi chijna dasõre, jé basa Benaía chijna aquesua pore ome egíptogosi uté. Mu chujé egíptogosi asõre ga tṍra ga jé u uje chisa egíptogosi asõre ga chichagu asṍresṍri ome ga chujé. 22Ga David irógode uje 30 u ore enga ore chicotapise dajõrai Benaía uté ome icasitigai. 23Picotaque uté mu que gajnéone picotaquéo cho bajade ore gajnéone ore icotaqué gotique, uje gadioque udore ore. David chicha Joiada ujnacari Benaía aja daroguipísode ore jeta ore cho dasuté iji uté, ga ore u uje ore irodiguipise deduguéjnai ejode.
24Enga a qué yatata dicaséode ore íode jne uje David iroque udore ga 30 u ore:
Asael u uñai uje Joab desaque uté. Elhanán u uñai uje beléngosi Dódo ujnacare uté. 25Sáma u uñai uje uté idai i tu Harod. Elíca u uñai enga idai jé u Sáma idai uté to uje i tu Harod. 26Paltítagosi Héles u uñai. Íra u uñai uje tecóagosi Íques ujnacare uté. 27Abiezer u uñai uje idai u Anatot. Mebunai u uñai uje idai u Húsa.
28Ahohítagosi Salmón u uñai. Maharai u uñai uje idai u Netófa. 29Heleb u uñai uje netófagosi Baana ujnacare uté. Itai u uñai uje dai i tu Ribai. Ga ore idai Guibeá déji benjamíngosode ore uniri ajei. 30Benaía u uñai uje idai u Piratón. Hidai u uñai uje idai i tu Gaas ga idógosiji tié jochaque querui. 31Arbatítagosi u uñai uje i tu Abi-albón. Ga Azmavet upo uñai rĩ ga idai i tu Bahurim. 32Saalbonítagosi Eliába u uñai. Jonatán u uñai; jé aja jnani bajai Jasén ujnacarode to rĩ. 33Ararítagosi Sáma u uñai. Ahíam u uñai uje ararítagosi Sarar ujnacare uté. 34Elifelet u uñai uje uté dai i tu Ahasbai, jé basa maacatéogose uté dáqui nanique. Eliam u uñai uje gílogosi Ahitofel ujnacare uté. 35Hezrai u uñai uje idai u Carmel. Arbítagosi Paarai u uñai. 36Igal u uñai uje Natán ujnacare uté, ga ore idai u Sóba. Gádgosi Báni u uñai. 37Selec u uñai uje idai u Amón. Naharai u uñai uje idai u Beerot. Ga Sárvia ujnacari Joab iróquegaté uté. 38Íra u uñai uje idai u Ítri. Gareb u uñai uje uté idai upo ore idai Ítri nanique rĩ. 39Urías u uñai uje hitítagose uté. Udojo ore jnese chise 37 nanique uje ore nóna David aja quedéjnane.
Currently Selected:
2 Samuel 23: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
