2 Reyes 8
8
E chise dı́nique nanique uje sunémgoto casica uaté tṍraji dapari punire iji chaguhédaté casodica quigade, ga chutai deduguéjnai ome dajnepı́di casica jnupe ujetiga patirécapo gai te rı̃
1Uje cáma chaguhédaté uquécasodicá tocade nanique, mu Eliséo e tibágui sunémgoto casica bajágome cucha dacadode udore yui. Ga chequé uaté u uje abi toi ga Eliséo chiqueta uté iji úringai toque ica. Ga Eliséo chósi tome uaté ica:
–Pangarádejnai a chiroque chaguhédatéode aja yocuniri Israel udé uje a jı̃raque diji yoque jne ga a chuságaja 7 áños, chaguhédatéi uté. Jecute jı̃raque boyo, bajogasúode uhuaque, ga ajnicho uáguiji chaguhéode iquei. Enga acueyoi uacaparitique punire uñeque ujetiga cucha pibosode déji ore uniri uté, enga ácayoji uté.–#8:1 Eliséo isocai uté uje chiqueta chequé até uaté abi iji úringai toque déji 2 Reyes capítulo 4, versículos 8-37.
2Ga chequé uaté dopı́si Dupade iroi uruode udore quigode ica. Enga chequé uaté jnoji daniri Israel nanique, mu nóna dajogasúode ore aja doi. Enga ore chicáji filistéogosode ore uniri ga ore chácariji aja siqueredie udire uje gare iji ti iji yijmanuñai.
3Enga chise siqueré garitidie udire eruei nanique ga ore jnopóji dapari filistéogosode ore uniri uté rı̃, ga ore chajniapója danirı́pisi rı̃.
Mu uje chequé uaté chise daguı́jna casica, mu uñeque a e cho dajnéngu iguı́jnai jé aja gajnei jnupe iji uaté quigade. Jecute uaté jı̃raque chicáji eduguéjna cuchábi yui ujetiga chijócha ajei údi ome re, ujetiga eduguéjnai uté chatirépo iguı́jnai, gajnei jnupe gai te rı̃.
4Uje sunémgoto uaté chise eduguéjna cuchábi uté iji charidi, mu uté qué déji dáringai dara gai ome proféta Eliséo uté iroi uje i tu Giézi nanique. Enga eduguéjna cuchábi quene chojningame Giézi que:
–Bebi, ga atataba Eliséo ipesudode cucha pitijabácho jnese ome uyu.–
5Mu uje Giézi uté qué déji datatagode Eliséo acho gai ome eduguéjnai, uje e chatire disi toi ucuecaringuei gai, mu ¡chimo jóroque re! uje ojningai disi uté daté e chise eduguéjnai, ore charidi uté ujetiga chutai eduguéjnai ome daguı́jna casica, jé aja dajnei jnupe uté. Ga Eliséo iroi Giézi uté chojninga:
–Yeduguéjná, yojninga chequé u dia uaté iji ua arı̃a. Ga uaté abi nóna to, uje toi nanique mu Eliséo chatire ucuecaringuei gai nanique rı̃.–
6Uje eduguéjna cuchábi chiraja uje uaté u uje Eliséo chatire ape toi ucuecaringuei gai, ga chojningame uaté:
–Bebi ga atataba Eliséo isocade jnese ome uyu uje chatire bape toi ucuecaringuei gai.–
Ga jé u uje uaté chatata cucha dacadode udore jnese ome eduguéjnai. Ga chequé e cha dojñane ga eduguéjnai chutṍri daroguipísode uñai ga chojningame uté:
–Be ga atire chequé gajné casodica cucha jnese gai to. Que gusu iguı́jnai, gajnei jnupe ore, mu átaja acade cucha oredie iji uaté gajnei jnupe, jé iji diri uté uje uaté jnoji yocuniri Israel udé ica, ga jé chuságaja diri tudé. Ası́ome gajnenie plátai ome jnese ome siqueredie 7 udire iji yoquiquigade.–
Dupade iroi Eliséo chatata uje sı́riagosi Hazael uté a chácariji deduguéjnai Ben-adad charidi iji quigade jne
7Enga e chise dı́nique iji udojo quigade nanique ga Eliséo chicáji sı́riagosode ore idáidatéi uje i tu Damásco. Enga Eliséo tṍraji sı́riagosode ore eduguéjnai ejnaréngone nanique uje ore eduguéjnai uté i tu Ben-adad, ga ore chingome deduguéjnai uté nanique uje Dupade iroi Eliséo e di iji ore idai. 8Jecute Ben-adad uté chósi tome daroguipísode uñai Hazael uté nanique:
–Ajna bẽrapáitigo cucha ome Dupade iroi jne. Jeta amo uté ga atai ujetiga chajnerame Pangarádejnai uru quitı́gome uyu jne, jeta jé qué yapite ome yejnarei udé.–
9Ga jé u uje Hazael uté chijna cucha oreránguejna ponáyone nanique uje tṍraji ore idai Damásco údode jnese, ga jé u uje doi dẽrapáidode ga chigarúja dachidode burica quedéjna guidobode nanique uje gachidode udore i tu caméllo, enga ore batigai chise 40 nanique. Ga Hazael jnome Eliséo yui, ga chise ga jé u uje basája iquei. Ga chósi tome Eliséo uté:
–Sı́riagosode yoqueduguéjnai Ben-adad uté cho daji ua. Ga uté chiroque uyu aja bei gu ujetiga yipésu pregúnta ome ua, uje pota chiraja ome ua ujetiga qué chapite jne ome dejnarei uté.–
10Ga Eliséo chajnai uruode ga chojningame:
–Bo ga ango beduguéjnai uje a jé qué chapite jne ome dejnarei. Mu Pangarádejnai e chingome yu uje jé ũrepise uje a toi jne.–#8:10 Jé ũré uje síriagosode ore eduguéjnai Ben-adad uté chapídirase ome dejnarei uté. Mu pijoque uje a cucha uñeque chise jne ujetiga chujé.
11Ga jı̃raque Dupade iroi Eliséo topı́siji Hazael gai ga que chajire jnutı́gome, jé aja ujetiga Hazael uté chajéngome Eliséo edominone. Enga jé u uje Eliséo popise.
12Mu Hazael chojningame Eliséo uté:
–Yangaráni á, ¿Ama, jé babogúrique cucha ya?–
Enga Eliséo chajnai Hazael uruode enga chojningame uté:
–Yibo gu uje a ua u jne jeta ajṍcarome yurasade israélgose ore jne. Ga a ua u jne jeta ãru ore idáidatéode gáyode ome piotique jne, uje ore ujuyaquéode chaparu ore idáyode udore gáyode. Ga a ejnápo jnacare gatoidie ore jne rı̃ ome baquesérique iji bajocaningane. Ga a anguı́rapó disi parátagabode aja jnumone jne rı̃, enga a ore gajnúraque u co pusı́garaque ome ua jne. Enga a ajuque chequé icarenie iji gatócorodie jne, ga a jé chuságaja ore abode iji ore ajéode jne, ome bajosipiedie udire.–
13Mu Hazael uté tṍra rome Eliséo uruode udore, ga chajnai uté ga chojningame:
–¡Urénga! Ayoré poritaque baroi tuyu arı̃a, ga yajnui tu tamocórique. ¿Ama yorási ringome bojningane cuchadatéo udore, ujetiga yipésu?–
Enga jé u uje Eliséo chajnapoi Hazael uté uruode ga chojningame:
–Mu Pangarádejnai e chingo yu uje sı́riagosode a ore eduguéjnai u ua jne.–
14Ga jé u uje Hazael uté jnoji Eliséo gari, ga chicáji deduguéjnai Ben-adad uté. Enga jé u uje eduguéjnai catecã́ri daroguipı́si uté ga chojningame:
–¿Cho rique Eliséo uru quitı́gome uyu que a?–
Ga Hazael chajnai deduguéjnai uruode ga chojninga:
–Chingome yu uje a jé qué aqueca que ome bejnaréngone arı̃a.–
15Mu dire uñai ga Hazael doi borapeque nañorai nanique ga chacáji yodi ga chaco deduguéjnai edodie, ujunane, pijnani ore gai jnese ome borapei uté jé aja ujetiga sı́riagosode ore eduguéjnai Ben-adad uté topı́si nanique. Enga jé u uje Hazael uté basája deduguéjna casé uté charidi nanique ome dáringai eduguéjna.
Josafat ujnacari Joram isocade gajnarécho iji dáringai judágosode ore eduguéjna nanique
16Uje Acab ujnacari Joram guejnanie siquerei chejna yijmanai nanique ome dáringai israélgosode ore eduguéjna, enga Joram uñai basája dáringai judágosode ore eduguéjna nanique, ga judágosode ore eduguéjnai Joram uté dai i tu Josafat.#8:16 Israélgosode ore eduguéjnai Acab chĩ́care Joram aja dabi nanique; jé basa ga judágosode ore eduguéjna cuchábi Josafat uté ujnacari uté jé i upo Joram nanique rĩ.
17Enga Josafat ujnacari uté uje i tu Joram guejnanie siquerei chise 32 áños, uje quene basája dáringai eduguéjna nanique.#8:17 Mu uje Josafat uté cáma toi ga ujnacari Joram, dayé ore cháta dáringane judágosode ore eduguéjna aja ñane iji dirode udore nanique. Ga uté guejnanie siqueré 8 años uje chácariji dáringai judágosode ore eduguéjna iji dedai Jerusalén uté nanique.
18Uje judágosode ore eduguéjnai Joram uté nanique, mu chacãra raja israélgosode ore eduguéjnane ga chajna ore jmapié gajnarénguenie iji jnumone. Enga Joram uté iradigode u Acab ape disi ejode ore aja ore adode. Chamáñaje uté chisa israélgosode ore eduguéjna cuchábi Acab urodie uñáraque nanique ga cho dacotéji uaté nanique.
Joram uté pésu cucha gajnaréngone iji Pangarádejnai edominone gatuaque nanique. 19Ga a jé tiógararása ujetiga Pangarádejnai chejnárase ore uniri Judá uté ¡pógopógo! nanique ome judágosode ore eduguéjnai Joram uté adode. Mu Pangarádejnai chetaque jeta chejna ore nanique. U gu uje e chichaga daru iyiejnane aja Joram dáqui gaté casicaite David uté yui nanique. Enga chı̃́care ujetiga jecucha David uté ape disi ejórigo udore uñeque chácarásiji uté charidi ome dáringárique judágosode ore eduguéjna iji idai Jerusalén gatuaque.#8:19 Pangarádejnai chacãra eduguéjnai David uté aja pibioque papótique nanique. Chamáñaje David uté gajnui tu pibioque papótique iji darasade ore ujade, ga que Pangarádejnai pota ujetiga uñeque chujnungu pibioi uté sere.
20Iji deréjnane udore uje Joram uté qué déji dáringai eduguéjna nanique iji ore uniri Judá uté, mu edómgosode ore tagu uruode aja ga ore chijnime re iji jmainie. Enga ore pésu deduguéjnapı́si iji daniri Edom uté nanique. 21Mu Joram chetaque ore isocade udore ga chijna dachidode guebéquedatéo jnese uje pocaningane gajnecho udore, ga nóna dasoldádode nanique ga ore chijnare raja edómgosode ore idáidatéi yui nanique uje i tu Sair. Gaidi tu gu ujetiga edómgosode udore tangárapoi uté rı̃. Enga Joram ore chise ta, mu edómgosode isoldádode ore chaparu judágosode ore gai iji ore irengúi uté.
Mu iji dejai uté ga Joram, jé aja isoldádode ore eduguéjna gatéode ore choru guebéquedatéode ga ore cugujnáji edómgosode ore. Mu que judágosode chijnime ore ãrı́rique, ga ore chijnime ráguiji edómgosode ore ajei. Enga judágosode ore isoldádode ore chayome dajocaningai nanique, ga ore chajni daguı́jnane gáyode jnese.
22Uje edómgosode e ore chijnime re iji judágosode ore jmainie ga que judágosode suépo ore gai rı̃, jé aja deréjnane udojo to.
Enga cucha dacadode udore a jé irába libnágosode ore isocai uté rı̃, uje ore chijnime re iji judágosode ore jmainie, ga que ore tangárapoi judágosode ore eduguéjnai to nanique rı̃.
23Enga cucha dacate amirone iji Joram úringai judágosode ore eduguéjna, jé aja ipesudode cucha udore, ga purusãracho jnese iji darujna aode uñane nanique uje ore churúsãre judágosode ore eduguéjnane adode jnese iji udore. 24Uje chise diri nanique uje judágosode ore eduguéjnai Joram toi, ga ore chicha ode taja dai bajade jogadi iji dáqui casicaite David idai Jerusalén uté.
Ga Joram uté ujnacari uje i tu Ocozı́as basája dayé charidi nanique ome dáringai judágosode ore eduguéjna.
Gajnareque judágosode ore eduguéjnai Ocozı́as isocade iji Pangarádejnai edominone nanique
25Uje Acab casicaite ujnacari Joram guejnanie siquerei e chise 12 años ome dáringai israélgosode ore eduguéjna, mu quene Joram uñai ujnacari, Ocozı́as, basája dáringai judágosode ore eduguéjna. 26Enga Ocozı́as uté guejnanie siquerei chise 22 años nanique uje basája dáringai judágosode ore eduguéjna nanique iji idai Jerusalén uté. Mu gusu guejna siqueré chojmara nanique ome dáringai judágosode ore eduguéjna.
Ga Ocozı́as daté i tu Atalı́a, enga israélgosode ore eduguéjna casicaite ájnape uaté uje ore eduguéjnai uté i tu Omri.
27Ga judágosode ore eduguéjnai Ocozı́as uté chacãra raja israélgosode ore eduguéjnane ga chajna ore jmapié gajnarénguenie iji jnumone, uje pésu pisijnaringuéone iji Pangarádejnai uté edominone gatuaque. Enga Ocozı́as uté jé cho Acab ape disi ejode ome ore adode. Chamáñaje jé ore iguiose ñane gu.#8:27 Ocozías dayé u Joram, Josafat ujnacari uté. Enga Joram uté cho dacotéji Acab uro Atalía nanique, jecute Ocozías iguiosode u Acab ape disi ejode ore.
28Ga Ocozı́as, jé aja Acab ujnacari Joram uté, ore cháta raja ñane ome dagaidi pocaninga ome sı́riagosode ore eduguéjnai Hazael uté. Ga ore jocaningai jogadi tu ore idai Ramot-Galaad uté nanique. Mu sı́riagosode ore ajnangoque israélgosode eduguéjnai Joram nanique iji dajocaningai jogadi uté. 29Jecute Joram uté chajnı́ja Jezreel uté jé aja ujetiga ninguira sı́riagosode ore yupı́di tiji uté nanique uje ore pésu dajocaningai ome sı́riagosode ore eduguéjnai Hazael uté.
Ga jé u uje judágosode ore eduguéjnai Ocozı́as uté taquirı́ji dojoi eduguéjna Joram uté iji idai Jezreel uté nanique uje sı́riagosode ore ajnangoque uté gu.
Currently Selected:
2 Reyes 8: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
