2 Coríntios 7

1Jecute yijorane uaque á, yocajneque Dupade uru ueradéjnane udore jnese to. Jecute yicoi ga ca yipéco yocáyipie iñoñaringuérique ome Dupade. Enga yañucopúsu yocao ayorei guio ome cucha gajnaréngone. Yicoi enga yẽcopísa yocáyipiedie, aja yocúringai ayoré aja Dupade. Chamáñaje Yocangarádejnai u gu.

Páblo pota ujetiga coríntogosode ore chécãre dáyipiedie quigode ome

2Jecute ayáyo uacáyipie gajnarénguenie ome yoque enga ajnóraño yoque to. Uacamóño uje que yipéco cucha gajnarétique ome uaque. Que yinejecopo uacádode ome cucha gajnarétigo rĩ. Enga que yarangopo uágome cuchárique to rĩ. 3Que yichaga cucha gajnarétique aja uaque go, ome yuruode udore. Chamáñaje yijnoraquei uásejnapise ome uaque gu. A ca yáyipieraque jnoji uaque jne. Enga yajéode u ujetiga yibaya uáguiji uacacuecaringuérique, jé aja uacatoringárique to rĩ. 4Yanguretapise uaque, jecute uacapéso yininaquei tome uaque. Uje yugúcoji yocajnéone petingaquédatéo jmainie mu yujnusi yu ome Dupade iroquéode enga pininaquédatéi irágu yu.

5Uje yiríngoji Macedónia diríca ga yocajnéone cucha gajnaréngone que doi jnutique ome yoque. Enga cho ujetiga yugúcoji pijmongaquéode ajei. Enga pisadodéringai dépisiji yocajéode. 6Mu uje yoco caru ga Dupade jecucha jnari yógome dadode. Jecute chorei Títo iji yoque diríca. Gaidi u gu ujetiga tijode cho jnángome yoque ome Títo diringai. 7Mu que gusu Títo diringai u uje tijode cho jnángome yoque, mu ojñane u to iji uaque uje tijode cho jnaque gaté ome yoque. Ojñane u uje unere yoqui ome uaque ujetiga yico uaque. Chingopome yoque rĩ uje uacajnusiétigai jiépisi ome yoc. Enga áyuguhebátaque uaque rĩ ome yoque. Uje yudute uacosõraquei ome yu ga yirasique yu gaté.

8Yiraja uje yipésu uacáyuguhebátigai diríca ome yurusãraque baja casodé. Ga adi jé uyu diríca, yo yáyugu yurusarane quigode to diríca ome uaque. Mu e íjnoque yáyuguhebátigade ome yurusãraque baja casodé. Yiraja gu uje tijode jĩraque cho jnángome uaque uje uacamácho cucha gajnaréngone udore aja quigode. 9Enga e yirasique yu. Mu que yirasitigade garani u uacajnusiétigade go, mu garani u uje uaquecãcho uacáyipiedie ga e omei quigode. Enga uacajnusiétigai ome yurusãra casodé u uje chécãre uacáyipiedie udire quigode. Yuruode dosója uaque diríca mu uacangáchoi yu. Jecute Dupade irasique re ome uaque. Jecute yirasiguipise yu uje que ejnárecho yurusãra casodé quigode ome uaque. 10Ujetiga paquĩraquérigo dosója yoque marínga, yicoi ga yangácoi. Enga jogadi u ujetiga Dupade irasique yoque. Enga uje Dupade chimo uje yecãco yocáyipie gajnarénguenie quigode enga yocúringai piquetaque jogadi u ome Dupade. Cucha omi tu uté ga que toc ujetiga chinguíra páyuguhebátigai aja yoque. Mu pujnusiétigade uje garani tu erámi tudé ga uté u uje chijna yógaja jnumi. 11Mu uacajnusiétigade ome yaquĩraquéode que chijna uágaja jnumi go. Chamáñaje uacangáchoi yu gu enga Dupade irasique re ome uaque. ¡Cajicho to gojni uje cucha omone tṍraji uacajnusiétigade udore! Chamáñaje yo cuchade udore quique diríca ome uaque iji yurusãraque baja casodé enga jé u uje e que oyópo cucha bisidéguiji jnani uté ipesudode cucha gajnarécho rĩ. Enga e que aráso uté adode ome uacajade. Chamáñaje uacatodóyo ate gajnaréngone gu. Enga jé u uje unere yi ome uaque ujetiga yáta yu aja uaque. Enga dimane uágome uté ujetiga oyo quique. Enga e obiréjna ome yu uje uacayoguéode e bijna ome uaque uje e uacaquíraño uté gu ome ate gajnaréngone. 12Uje yurúsãre yurusarane ome uaque diríca ga yáyipie déji jnacari uté uje pésu cucha gajnaréngone. Yáyipie dépoji uté dayé to rĩ uje gajnareque ujnacari adode ome. U mu yáyipie gaidipísode u uaque diríca uje yurúsarome uaque. Yigaidi u gu ujetiga Dupade chingo uaque to uje uacagutíñamáite yu to ome cuchade udore. 13Uje yirajágo uacadode udore enga yujnucoi yógome udore.

Mu yujnucopoi yoque gaté rĩ ome Títo irasitigade ome uaque. Chamáñaje uacátayopísaja uté gu ome cuchade enga tijode cho jnángome gatuaque iji uacajade. 14Uje cáma Títo chise uaque ga yingo yirasitigade aja Títo ome uaque. Uje e chimo uacadode to ga chiraja uje jé ũrepise yu ome yojñane iji uaque. Chamáñaje yocojñane ũrepíso to ome uaque gatuaque. Jecute jé ũré yocojñane udore to ome Títo iji uaque, uje yicotágo uac ome uacadode. 15Jecute Títo chijnóra uaque gaté uje jnusina uje angoninguite guesaque uágome ica. Enga que ajusécho to rĩ uje déji uacajade ica. 16Jecute yirasiguipise yu to enga que potigayaquérique déji yu go ome uaque jnese.

Currently Selected:

2 Coríntios 7: Ayore

Highlight

Copy

Compare