1 Tesalonicénses 2
2
Páblo chingo dasagode cucha ome Tesalónica idaisórone ore uje déji ore gari ica
1Yocujode Jesús anguresõre uaque á, uacarajáyopise uje que cachi yoquibaguiete uáguiji uaquedai ica go. 2Uacarajáyo to uje yico ore idai Filípos ica, enga filíposgosode ore pojna yoque enga ore isocade gajnarenguipis ome yoque iji dedai ica. Mu jé yibájoi uaque iji uaquedai Tesalónica ica. Dupade átapi yoque gu. Mu que yicájnaco yoque ome ore guetétigade ome yoque, mu jé yajógo yógaja yocacajnaquéode Yocangarádejnai acho ica uje piquetangóri u uté gu. 3Uje yacaco uaque ica enga ũrepise yoque enga que paringaquérique déji yoque ujetiga yarángo uágome pacajnaqué tátique. Enga que yocáyipiedie dépoji yoquipotigué gajnarétigo gotique rĩ, mu yocáyipiedie jogadi upúsu Dupade. 4Jé basa Dupade chiraja yocadode uje omío. Jecute ajegaite yoc ujetiga yico ujnomei údi ujetiga yatatago Yocangarádejnai Jesucrísto úringai piquetangore ome ore. Jecute que yocajéode u go ujetiga ayoréode ore irasique yoque. Mu yoquigaidi u ujetiga Dupade irasique yoque, uje uté u gu uje a chajire yocadode aja quigode jne, enga chiraja yocajéode iji yocáyipiedie jne. 5Uacarajáyo uje que yisígo uacabánique gotique ome yocuru uerate bisidétique. Enga que yarango yóguiji quedéjnarique rĩ ujetiga yipótago uaquẽratique cucha. Dupade u uje chiraja yocúringane ũréo ome cuchade unojo. 6Ujetiga yocajéraso ica, enga a yingongorása yoquimenuringuéone ome uaque ujetiga picotaque yoque ome uaque. Chamáñaje Yocangarádejnai Jesucrísto irógode uñane u yoque gu. Mu que yocáyipiedie déji ujetiga picotaque yoque ome ayorérique, jeoga uaque u, jeoga uñéngo u. 7Mu que yijnángo yocájningárique aja uaque mu yocajnua tu chequé ome uaque uje chacucãre dabi enga chijnóra. Yocadi jé u uté ome uaque uje yijnórangopise uaque to gu. 8Tadipise yoquijnoraquéode ome uaque. Jecute jé yitiójopísarása ujetiga yoco yoquiba uaque ome yocatatagode Dupade urúo ome uaque. Chamáñaje yijnórangopise uaque gu. 9Yocujode Jesús anguresõre uaque á, ajnusináño uje yugúcoji uacajade ica enga yocujuya yoc ica uje yucuegoi yoquiquetangóño ica iji uaquedai. Yoco yocujuñame yoque ica gu ujetiga ca yipéco uacajuréraque ica ome cuchárique uje qué yatatago Dupade uruode ome uaque ica gu.
10Yocadi casodica pijogúsorone u Dupade, jé u uaque rĩ. Uje que yipéco Dupade anguresórone uaquejnarétique cucha ica, mu yedugopise Dupade ica iji yocajéode, enga ũrepise yoque ujetiga ca diquiyaque yoquiyoguérique ome ayorérique uaque. 11Uacarajáyo to uje yaquírango uágome uacajnusiétigade ica, enga yinejecopo uacádode rĩ. Enga yocajnui u jnani uje susípise dabode guio. 12Enga yingongome uaque ica ujetiga ca apúsoja uacajéningo, uje Dupade anguresóño uaque gu. Uje Dupade tibidi uaque gu ujetiga cháta uágaja darasade ujetiga uacasuté jé u Dupade to ujetiga amóñopise ingoningájnai ome uaque to.
13Jecute yacãco Dupade gai ome uaque gatuaque uje uacadúcho Dupade uruode ica iji yoquibijnanone, enga que oyo gojña ayoréo iji ica. Mu uacamesecho ica uje Dupade urúo yocatatagode udore. Enga jé ũrepise uje Dupade uruode jé upúsu yocacajnaquéode udore ome uaque. Chamáñaje chécãre uacadode gu uje uacanguretáyo ica. 14Yocujode Jesús anguresõre uaque á, uacarasade ore cho damajo uaque. Mu Dupade anguresórone jé ore adi tu to ica iji Judéa. Uje ore urasade judío ore cho damajo ore to ica uje ore changureta Jesucrísto to gu. 15Judíode udore jé ore yuque Yocangarádejnai Jesús to icaite. Jé ore yugápo Dupade uruode atatasórone jnani bajácho icaite to rĩ uje judíopise ore to múñi. Enga jé ore jocarangápo yoque to rĩ iji dajade. Que ore chucué dangoningárique ome Dupade go, enga cho ujetiga ore cho damajo erámi unirisórone ore jnese. 16Jecute uje yipótago ujetiga yacaco purása quedéjnane ome Jesús adode ujetiga chiqueta ore to, mu judíode ore chãraque darai ome yoque. Jecute ore isijnaringuéone chõre re gaté. Mu Dupade ujuyaquédatéi a chise ore jne, jé iji ne gajneri.
Páblo potapísa jeta chisápo Dupade anguresórone iji ore idai Tesalónica rĩ
17Yocujode Jesús anguresõre uaque á, uje yicoji uacari ica enga yirajágo uje a ca diyajmaque yoque jne, mu jĩraque yipótago yimóngopo uaque rĩ. Ũré uje yugúcoji quedéjnane ome uaque ica, mu yocáyipiedie que jnoji uaque go. 18Jecute yocajéode u ujetiga yibajopoi uaque rĩ. Cuchiyi tupúsu Páblo uyu, yijírase gatuaque, mu jecucha ga Satanás chicha raja yiquei enga chãraque uaquéode ome yu. 19Uaque u yocangurenone ome Dupade adode. Enga uacapesute yocajéchietaringuéi to. Enga tijode a chopise jnángome yoque jne gu uaque ujetiga diga Yocangarádejnai Jesucrísto di. 20Jé yocajéchietaringuéi, yoquininaquéode ore gajnengórone u uaque gatuaque.
© 2021 Ethnos360